দিল্লী বিস্ফোৰণক লৈ বিশ্বৰ প্ৰতিক্ৰিয়া-

সোমবাৰে সন্ধিয়া দিল্লীৰ লালকিল্লাৰ সমীপত সংঘটিত হোৱা বিস্ফোৰণে দেশ কঁপাই তুলিছে । ৰেড ফ’ৰ্ট মেট্ৰ’ ষ্টেচনৰ ১ নং গেটৰ সমীপত হাৰিয়ানাত পঞ্জীয়নভুক্ত এখন গাড়ীত এই বিস্ফোৰণ সংঘটিত হয় ।

সোমবাৰে নিশালৈকে বিস্ফোৰণত ৯ জন লোকৰ মৃত্যু হোৱাৰ লগতে ২০ জন লোক আহত হোৱা বুলি নিশ্চিত কৰা হৈছে । মঙলবাৰে আৰক্ষীয়ে জনোৱা মতে, আঘাতপ্ৰাপ্ত হৈ আৰু তিনিজন লোকৰ মৃত্যু হোৱাৰ লগে লগে মৃত্যুৰ সংখ্যা ১২জনলৈ বৃদ্ধি পাইছে ।

বিস্ফোৰণৰ পিছতে নিৰাপত্তা সংস্থাসমূহে সতৰ্কতা বৃদ্ধি কৰিছে । দিল্লী, উত্তৰ প্ৰদেশ, বিহাৰ আৰু মুম্বাইত হাই এলাৰ্ট জাৰি কৰাৰ লগতে ভিৰ হোৱা ৰাজহুৱা স্থান আৰু ধৰ্মীয় স্থানত নিৰাপত্তা বৃদ্ধি কৰা হৈছে ।

ইফালে দিল্লী বিস্ফোৰণক লৈ বিশ্বৰ নেতা আৰু বিদেশী কূটনীতিবিদসকলেও শোক প্ৰকাশ কৰাৰ লগতে ভাৰতৰ প্ৰতি সমৰ্থন প্ৰকাশ কৰিছে ।

কি ক’লে নেপালৰ প্ৰধানমন্ত্ৰীয়ে ?

নেপালৰ প্ৰধানমন্ত্ৰী সুশীলা কাৰ্কীয়ে দিল্লী বিস্ফোৰণক লৈ শোক প্ৰকাশ কৰি কয় যে এই শোকৰ সময়ত নেপাল ভাৰতৰ সৈতে থিয় দিছে । প্ৰধানমন্ত্ৰী নৰেন্দ্ৰ মোদীক টেগ কৰি এক্সযোগে তেওঁ লিখিছে, “দিল্লীত সংঘটিত হোৱা ভয়ানক বিস্ফোৰণত মই স্তম্ভিত আৰু দুখ প্ৰকাশ কৰিছোঁ । শোকসন্তপ্ত পৰিয়ালবৰ্গলৈ গভীৰ সমবেদনা জ্ঞাপন কৰিছো আৰু আহতসকলৰ আশু আৰোগ্যৰ বাবে প্ৰাৰ্থনা কৰিছো । এই শোকৰ সময়ত নেপাল ভাৰতৰ সৈতে থিয় দিছে ।”

I am shocked and saddened by the tragic Delhi explosion last evening. Deepest condolences to the bereaved families and prayers for the speedy recovery of the injured. Nepal stands in solidarity with India in this hour of grief. @narendramodi

— Prime Minister Sushila Karki (@pmsushilakarki) November 11, 2025

মালয়েছিয়াৰ প্ৰধানমন্ত্ৰীৰ শোক প্ৰকাশ-

মালয়েছিয়াৰ প্ৰধানমন্ত্ৰী আনোৱাৰ ইব্ৰাহিমেও দিল্লী বিস্ফোৰণক লৈ শোক প্ৰকাশ কৰে । তেওঁ এক্সত লিখিছে, ‘সোমবাৰে সন্ধিয়া দিল্লীৰ লালকিল্লাৰ সমীপত সংঘটিত হোৱা বিস্ফোৰণত কেইবাজনো লোকৰ প্ৰাণ কাঢ়ি লোৱাৰ লগতে বহু লোক আহত হোৱাৰ ঘটনাত মই দুখ প্ৰকাশ কৰিছোঁ ।

মালয়েছিয়াৰ প্ৰধানমন্ত্ৰীগৰাকীয়ে আৰু লিখিছে, “নিহতসকলৰ পৰিয়াল আৰু ভাৰতৰ জনসাধাৰণৰ প্ৰতি মোৰ আন্তৰিক সমবেদনা । যদি এই কাণ্ড সন্ত্ৰাসবাদৰ কাৰ্য্য বুলি প্ৰমাণিত হয় তেন্তে ইয়াক কঠোৰৰ পৰা কঠোৰ ভাষাৰে গৰিহণা দিব লাগিব । নিৰীহ লোকক লক্ষ্য কৰি আৰু সাধাৰণ নাগৰিকৰ মাজত ভয় বিয়পোৱা হিংসাৰ কোনো ন্যায্যতা থাকিব নোৱাৰে ।”

কি ক’লে জাপানৰ প্ৰধানমন্ত্ৰীয়ে ?

জাপানৰ প্ৰধানমন্ত্ৰী ছানাই তাকাইচিয়েও লালকিল্লাৰ সমীপত সংঘটিত হোৱা বিস্ফোৰণৰ ঘটনাত শোক প্ৰকাশ কৰে । টুইট কৰি তেওঁ কয়, “ভাৰতৰ ৰাজধানী দিল্লীত সংঘটিত বিস্ফোৰণত ইমানবোৰ বহুমূলীয়া প্ৰাণ হেৰুৱাৰ খবৰ পাই মই গভীৰ দুখ প্ৰকাশ কৰিছোঁ । জাপান চৰকাৰ আৰু জনসাধাৰণৰ হৈ মই নিহতসকলৰ লগতে তেওঁলোকৰ পৰিয়ালৰ প্ৰতি গভীৰ সমবেদনা জ্ঞাপন কৰিছো । আহতসকলৰ আশু আৰোগ্যৰ বাবে প্ৰাৰ্থনা কৰিছো ।”

কি ক’লে মালদ্বীপৰ ৰাষ্ট্ৰপতিয়ে ?

মালদ্বীপৰ ৰাষ্ট্ৰপতি মহম্মদ মুইজুৱে ছ’চিয়েল মিডিয়া প্লেটফৰ্ম এক্সত ভাৰত আৰু ভাৰতীয় জনসাধাৰণৰ সৈতে একতাৰ ভাৱ প্ৰকাশ কৰি লিখিছে, “দিল্লীৰ লালকিল্লাৰ সমীপত সংঘটিত হোৱা বিস্ফোৰণত আমি গভীৰ শোক প্ৰকাশ কৰিছো । শোকসন্তপ্ত পৰিয়ালসমূহলৈ আমাৰ আন্তৰিক সমবেদনা জ্ঞাপন আৰু আহতসকলৰ আশু আৰোগ্য কামনা কৰিছো । এই কঠিন সময়ত মালদ্বীপ ভাৰতৰ জনসাধাৰণ আৰু চৰকাৰৰ সৈতে সংহতিৰে থিয় দিছে ।”

চীনৰ প্ৰতিক্ৰিয়া-

সোমবাৰে দিল্লীত সংঘটিত হোৱা বোমা বিস্ফোৰণৰ ঘটনাত চীনে মঙলবাৰে গভীৰ শোক প্ৰকাশ কৰে । বেইজিঙত এখন প্ৰেছ ব্রিফিঙৰ সময়ত চীনৰ বৈদেশিক মন্ত্র্যালয়ৰ মুখপাত্ৰ লিন জিয়ানে কয় যে আমি এই ঘটনাত স্তম্ভিত হৈ পৰিছো ৷

তেওঁ নিহতসকলৰ প্ৰতি সমবেদনা জ্ঞাপন কৰাৰ লগতে মৃত আৰু আহতসকলৰ পৰিয়ালৰ প্ৰতি আন্তৰিক সমবেদনা জ্ঞাপন কৰাৰ লগতে আহতসকলৰ আশু আৰোগ্য কামনা কৰে ।

আমেৰিকা আৰু ৰাছিয়াৰ প্ৰতিক্ৰিয়া-

ইফালে ৰাছিয়া আৰু আমেৰিকায়ো এই ঘটনাক লৈ প্ৰতিক্ৰিয়া প্ৰকাশ কৰিছে । দিল্লী বিস্ফোৰণত প্ৰাণ হেৰুওৱাসকলৰ প্ৰতি ভাৰতত থকা আমেৰিকান দূতাবাসে শোক প্ৰকাশ কৰিছে ।

দূতাবাসে টুইটাৰত লিখিছে, “নতুন দিল্লীৰ ভয়ংকৰ বিস্ফোৰণত ক্ষতিগ্ৰস্ত হোৱা সকলোকে আমাৰ সমবেদনা জ্ঞাপন কৰিছো । আমি পৰিস্থিতি তীক্ষ্ণভাৱে নিৰীক্ষণ কৰি আছো । আপোনজনক হেৰুওৱা পৰিয়ালসমূহলৈ আমাৰ গভীৰ শোক প্ৰকাশ কৰিছো । আহতসকলৰ আশু আৰোগ্যৰ বাবে আমি প্ৰাৰ্থনা কৰিছো ।”

আনহাতে দিল্লী বিস্ফোৰণক লৈ ৰাছিয়াইও শোক প্ৰকাশ কৰে । ভাৰতত থকা ৰাছিয়াৰ ৰাষ্ট্ৰদূত ডেনিছ আলিপভে টুইটাৰযোগে লিখিছে, “লালকিল্লাৰ সমীপত সংঘটিত হোৱা বিস্ফোৰণত মই স্তম্ভিত হৈছো । মই নিশ্চিত যে চলি থকা বিশদ তদন্তই এই কাণ্ড উন্মোচন কৰিব । আমি নিহতসকলৰ পৰিয়াললৈ সমবেদনা জ্ঞাপন কৰিছো আৰু আহতসকলৰ আশু আৰোগ্য কামনা কৰিছো ।”

Shocked by the explosion at the #RedFort. Confident that the ongoing thorough investigation will determine the cause of the incident. We express condolences to the families of the victims and wish a speedy recovery to the injured.

— Denis Alipov 🇷🇺 (@AmbRus_India) November 11, 2025

এইসমূহ দেশৰ ওপৰিও ছিংগাপুৰ, ইজৰাইল, ইৰাণ, শ্ৰীলংকায়ো দিল্লী বিস্ফোৰণৰ ঘটনাক নিন্দা কৰাৰ লগতে শোক প্ৰকাশ কৰিছে আৰু নিহতসকলৰ পৰিয়াললৈ সমবেদনা জ্ঞাপন কৰিছে ।

Heartbreaking scenes in Delhi following the car blast resulting in so many dead and injured. Our deepest condolences to the families of the victims. Wishing speedy recovery to those who survived.
Praise for the rescuers & security forces.
🇮🇱❤️🇮🇳

— 🇮🇱 Reuven Azar (@ReuvenAzar) November 11, 2025

লগতে পঢ়ক : বিস্ফোৰণত জড়িত কাকো ৰেহাই দিয়া নহ’ব… ভূটানৰ পৰাই প্ৰধানমন্ত্ৰী মোদীৰ হুংকাৰ

ৰাছিয়াৰ পৰা শীঘ্ৰেই তেল ক্ৰয় বন্ধ কৰিব ভাৰতে

ৰাছিয়াৰ পৰা তেল ক্ৰয়ৰ বিষয়টোক লৈ বৰ্তমান ভাৰত আৰু আমেৰিকাৰ মাজৰ সম্পৰ্ক জটিল হৈ পৰিছে । ইফালে ইয়াৰ মাজতে আমেৰিকাৰ ৰাষ্ট্ৰপতি ট্ৰাম্পে এক ডাঙৰ দাবী কৰিছে । মাৰ্কিন ৰাষ্ট্ৰপতিগৰাকীয়ে দাবী কৰিছে যে, ভাৰতে শীঘ্ৰেই ৰাছিয়াৰ পৰা তেল ক্ৰয় কৰা বন্ধ কৰিব । লগতে তেওঁ দাবী কৰে যে প্ৰধানমন্ত্ৰী নৰেন্দ্ৰ মোদীয়ে তেওঁক ব্যক্তিগতভাৱে এই বিষয়ে আশ্বাস দিছে । তেওঁ ইয়াক ৰাছিয়াৰ ওপৰত হেঁচা বৃদ্ধিৰ প্ৰচেষ্টাৰ অংশ বুলি অভিহিত কৰে । ট্ৰাম্পে কয় যে ৰাছিয়াক অকলশৰীয়া কৰাৰ একমাত্ৰ উপায় এইটোৱেই ।

অ’ভেল অফিচত সাংবাদিকৰ প্ৰশ্নৰ উত্তৰত আমেৰিকাৰ ৰাষ্ট্ৰপতি ড’নাল্ড ট্ৰাম্পে কয় যে প্ৰধানমন্ত্ৰী নৰেন্দ্ৰ মোদী তেওঁৰ ভাল বন্ধু আৰু দুয়োৰে মাজত এক ভাল সম্পৰ্ক আছে । তেওঁ আৰু কয় যে ভাৰতে অতি শীঘ্ৰে ৰাছিয়াৰ পৰা তেল ক্ৰয় কৰা বন্ধ কৰিব । লগতে তেওঁ দাবী কৰে যে প্ৰধানমন্ত্ৰী নৰেন্দ্ৰ মোদীয়ে তেওঁক ব্যক্তিগতভাৱে এই বিষয়ে আশ্বাস দিছে । ট্ৰাম্পে কয় যে ভাৰতৰ এয়া এটা ডাঙৰ পদক্ষেপ । এতিয়া আমি চীনকো একে কাম কৰিবলৈ ক’ব লাগিব ।

ইয়াৰ মাজতে শেহতীয়াকৈ ভাৰতত থকা আমেৰিকাৰ ৰাষ্ট্ৰদূত চাৰ্জিঅ’ গ’ৰ আৰু প্ৰধানমন্ত্ৰী মোদীৰ মাজত হোৱা বৈঠকক লৈয়ো ট্ৰাম্পে প্ৰতিক্ৰিয়া প্ৰকাশ কৰে । তেওঁ কয়, “মই ভাবো প্ৰধানমন্ত্ৰী মোদী এজন আচৰিত আৰু মহান ব্যক্তি । চাৰ্জিঅ’ই মোক কৈছিল যে মোদীয়ে মোক পছন্দ কৰে । মই বছৰ বছৰ ধৰি ভাৰত চাই আহিছো । ইয়াৰ পূৰ্বে প্ৰতি বছৰে এজন নতুন নেতা আহিছিল, কেইমাহমান, কেইবছৰমান আছিল । কিন্তু এতিয়া মোৰ বন্ধুজন বহুদিনৰ পৰা ক্ষমতাত আছে আৰু তেওঁ মোক আশ্বাস দিছে যে তেওঁ ৰাছিয়াৰ পৰা তেল ক্ৰয় নকৰে ।” ইয়াৰ উপৰিও ট্ৰাম্পে লগতে কয় যে এই পৰিৱৰ্তন লগে লগে কাৰ্যকৰী নহয়, কিন্তু ইয়াৰ প্ৰভাৱ কিছু সময়ৰ পিছত দেখা যাব ।

অৱশ্যে ট্ৰাম্পৰ এই দাবীৰ আনুষ্ঠানিক নিশ্চয়তা ভাৰত চৰকাৰৰ পৰা পোৱা নাই । ৱাশ্বিংটনত থকা ভাৰতীয় দূতাবাসে প্ৰধানমন্ত্ৰী মোদীয়ে এনেধৰণৰ বক্তব্য দিছে নেকি সেই সন্দৰ্ভত সোধা প্ৰশ্নৰ কোনো উত্তৰ দিয়াৰ পৰা বিৰত থাকে ।

লগতে পঢ়ক : ট্ৰাম্পৰ প্ৰচেষ্টাৰ শলাগ ল’লে প্ৰধানমন্ত্ৰী মোদীয়ে; নেতানিয়াহুক লৈয়ো কৰিলে বিশেষ মন্তব্য