টি-২০ বিশ্বকাপৰ বাবে ভাৰতীয় দল ঘোষণা কৰাৰ লগে লগে বাছনি সন্দৰ্ভত বিতৰ্ক তীব্ৰতৰ হৈ পৰিছে । জানক নিৰ্বাচিত সকলৰ বিগত এবছৰৰ প্ৰদৰ্শন ।
বি চি চি আইয়ে টি-২০ বিশ্বকাপৰ বাবে ভাৰতীয় দল ঘোষণা কৰাৰ লগে লগে বাছনি সন্দৰ্ভত বিতৰ্ক তীব্ৰতৰ হৈ পৰিছে । যিসকল খেলুৱৈক সুযোগ দিয়া হৈছে আৰু যিসকলক সুযোগ দিয়া হোৱা নাই তেওঁলোকৰ পৰিসংখ্যাৰ পাৰ্থক্যৰ বিষয়ে অনুৰাগীসকলে আলোচনা কৰিছে । এই বিতৰ্ক স্বাভাৱিক যদিও যিকোনো দল নিৰ্বাচনৰ প্ৰকৃত মাপকাঠী আৱেগ নহয়, পৰিসংখ্যা আৰু শেহতীয়া প্ৰদৰ্শনৰ ওপৰত নিৰ্ভৰ কৰে । যদি ভাৰতে টি-২০ বিশ্বকাপৰ খিতাপ ৰক্ষা কৰিব বিচাৰে তেন্তে এই ১৫ জন খেলুৱৈয়ে নিজৰ সকলোখিনি দিব লাগিব ।
যদি আমি ২০২৪ চনৰ ২০ ডিচেম্বৰৰ পৰা আন্তঃৰাষ্ট্ৰীয় টি-২০ৰ সামগ্ৰিক প্ৰদৰ্শন চাওঁ, তেন্তে স্পষ্ট যে নিৰ্বাচকসকলে দ্ৰুত স্ক’ৰিং ক্ষমতা, ইমপেক্ট খেলুৱৈ, অল-ৰাউণ্ড অৱদানকাৰী আৰু উইকেট লোৱাৰ ক্ষমতা থকা খেলুৱৈক অগ্ৰাধিকাৰ দিছে । যোৱা এটা বছৰত বিশ্বকাপ দলৰ বাবে নিৰ্বাচিত খেলুৱৈসকলৰ আন্তঃৰাষ্ট্ৰীয় টি-২০ প্ৰদৰ্শন চাওঁ আহক । ইয়াৰ ভিতৰত আই পি এল, ঘৰুৱা প্ৰতিযোগিতা, আন্তঃৰাষ্ট্ৰীয় ক্ৰিকেটত তেওঁলোকৰ প্ৰদৰ্শন অন্তৰ্ভুক্ত আছে ।
শীৰ্ষ ক্ৰম : দ্ৰুত আৰম্ভণিৰ নিশ্চিতি
ভাৰতীয় দলৰ টপ অৰ্ডাৰত থকা আগ্ৰাসন স্পষ্টকৈ দেখা গৈছে ।
অভিষেক শৰ্মাঃ বিগত এটা বছৰত ভাৰতীয় দলৰ অন্যতম বিপজ্জনক টি-২০ বেটছমেন হিচাপে পৰিগণিত হৈছে অভিষেক শৰ্মা । ৪১খন মেচত ১৬০২ ৰান, গড় ৪১.০৭ আৰু ২০২ ৰ ওপৰৰ ষ্ট্ৰাইক ৰেটে তেওঁৰ পাৱাৰপ্লে’ক সম্পূৰ্ণৰূপে নিজৰ পক্ষত ঘূৰাই অনাৰ ক্ষমতাক সূচায় । তিনিটা শতক আৰু নটা অৰ্ধশতকত তেওঁৰ উদ্দেশ্য স্পষ্টকৈ প্ৰমাণিত হৈছে ।
সঞ্জু চেমছনঃ সঞ্জু চেমছনকো শীৰ্ষত ক্ৰমত স্থান দিয়া হৈছে । ৩০খন মেচত তেওঁৰ ৭৪০ ৰান আৰু গড় ৩২.১৭য়ে তেওঁৰ অভিজ্ঞতাক প্ৰতিফলিত কৰে । যদিও তেওঁৰ ষ্ট্ৰাইক ৰেট ১৩৫ৰ ওচৰত থাকে, তথাপিও তেওঁৰ ধাৰাবাহিকতা আৰু মেচ নিয়ন্ত্ৰণ কৰাৰ ক্ষমতাই তেওঁক উপযোগী কৰি তোলে ।
ঈশান কিষনঃ ভাৰতীয় দলত ঈশান কিষনৰ বাছনি তেওঁৰ পৰিসংখ্যাই অধিক শক্তিশালী কৰি তুলিছে । ২৪খন মেচত তেওঁৰ ৮৭১ ৰান, গড় ৪৫.৮৫ আৰু ১৭৬.৩১ ষ্ট্ৰাইক ৰেটৰ লগতে তিনিটা শতকে তেওঁৰ দ্ৰুত আৰম্ভণি আৰু ডাঙৰ স্ক’ৰ গঢ়ি তোলাৰ ক্ষমতা প্ৰমাণ কৰিছে । এই ৰান আই পি এল আৰু ঘৰুৱা প্ৰতিযোগিতাতৰ পৰা আহিছে ।
মধ্য ক্ৰম : স্থিৰতা আৰু চাপৰ মাজত ৰান
মিডল অৰ্ডাৰৰ দায়বদ্ধতা সেইসকল বেটছমেনৰ বাবে থাকে যিয়ে ইনিংছ চম্ভালিব পাৰে আৰু প্ৰয়োজনত ৰান সংগ্ৰহৰ গতি বৃদ্ধি কৰিব পাৰে ।
সূৰ্যকুমাৰ যাদৱঃ ভাৰতীয় দলৰ অধিনায়ক সূৰ্যকুমাৰ যাদৱে ৪৪খন খেলত ১০৯৯ ৰান সংগ্ৰহ কৰিছে । ১৫২ ওপৰৰ ষ্ট্ৰাইক ৰেট আৰু পাঁচটা অৰ্ধশতকে দেখুৱাইছে যে তেওঁ শতক অৰ্জন নকৰাকৈয়ো ধাৰাবাহিকভাৱে প্ৰভাৱ পেলাবলৈ সক্ষম ।
তিলক বাৰ্মাঃ তিলক বাৰ্মাই ৩৬খন খেলত ৯১০ ৰান সংগ্ৰহ কৰিছে । ৩৯.৫৬ গড়ে তেওঁৰ কঠিন পৰিস্থিতিত অটল থকাৰ ক্ষমতা দেখুৱাইছে, যিটো বিশ্বকাপৰ দৰে প্ৰতিযোগিতাত অতি গুৰুত্বপূৰ্ণ ।
ফিনিচাৰ আৰু অল-ৰাউণ্ডাৰ: শেষ অভাৰৰ অস্ত্ৰ
হাৰ্দিক পাণ্ডিয়াঃ ভাৰতীয় দলৰ এটা মূল শক্তি হাৰ্দিক পাণ্ডিয়া । ৩২খন মেচত ৬১৩ ৰান, ১৬০ৰ ওপৰত ষ্ট্ৰাইক ৰেট, ২৮ উইকেটৰ সৈতে তেওঁৰ অৱদান দুয়োটা বিভাগতে গুৰুত্বপূৰ্ণ ।
শিৱম ডুবেঃ শিৱম ডুবেই ৩৫ খন মেচত, ২৮.৭১ গড়ে ৬০৩ ৰান সংগ্ৰহ কৰাৰ ল গতে ১৭টা উইকেট দখল কৰি নিজৰ যোগ্যতা প্ৰমাণ কৰিছে । তেওঁৰ নামত ২টা অৰ্ধ শতক আছে ।
অক্ষৰ পেটেলঃ অক্ষৰ পেটেলে ৩১ খন মেচত ৪৪৬ ৰান আৰু ২২ টা উইকেটেৰে দলটোক ভাৰসাম্য প্ৰদান কৰাৰ বিপৰীতে তেওঁৰ ৭.৫৮ ইকনমি দলৰ বাবে এক ডাঙৰ শক্তি । তেওঁৰ গড় ২৩.৪৭ ।
ৰিংকু সিং : বিস্ফোৰক বেটছমেন ৰিংকু সিঙে ২৫খন মেচত ৪২১ ৰান সংগ্ৰহ কৰি ফিনিছাৰৰ ভূমিকাত আত্মবিশ্বাস প্ৰদৰ্শন কৰিছে । তেওঁৰ গড় ২৬.৩১ আৰু তেওঁৰ নামত এটা অৰ্ধ শতক আছে ।
ৱাশ্বিংটন সুন্দৰঃ যোৱা এবছৰত টি-২০ৰ ১২খন মেচত ১৫৬.৯৪ ষ্ট্ৰাইক ৰেটত ২২৬ ৰান সংগ্ৰহ কৰি অৰিহণা যোগোৱাৰ লগতে ৬টা উইকেটো দখল কৰিছে ৱাশ্বিংটন সুন্দৰে । যাৰ জৰিয়তে তেওঁ নিম্ন ক্ৰমৰ এগৰাকী উপযোগী বেটছমেন আৰু বিকল্প স্পীনাৰ হিচাপে দলৰ ভাৰসাম্য ৰক্ষা কৰিছে ।
বলিং- ভাৰতৰ আটাইতকৈ ডাঙৰ শক্তি
বলিং বিভাগে ভাৰতক খিতাপৰ বাবে শক্তিশালী প্ৰতিদ্বন্দ্বী কৰি তুলিছে ।
যশপ্ৰীত বুমৰাহঃ মাত্ৰ ৬.৮৮ ৰ ইকনমি ৰেটত ২৫খন মেচত ৩২টা উইকেট দখল কৰি নিজৰ যোগ্যতা প্ৰমাণ কৰিছে বুমৰাহে । টি-২০ত তেওঁৰ সৰ্বশ্ৰেষ্ঠ বলিং ২২/৪ ।
বৰুণ চক্ৰৱৰ্তীঃ বৰুণ চক্ৰৱৰ্তীয়ে ৩৭খন মেচত ৫৫টা উইকেটৰে সৰ্বাধিক সফল বলাৰ হিচাপে পৰিগণিত হৈছে । তেওঁৰ সৰ্বশ্ৰেষ্ঠ বলিং ২৪/৫ আৰু ইকনমি ৭.৬২ ।
কুলদীপ যাদৱঃ ভাৰতীয় দলৰ এগৰাকী অভিজ্ঞ বলাৰ কুলদীপ যাদৱে বহু সময়ত নিজৰ স্পীন যাদুৰে সক্ষমতা প্ৰদৰ্শন কৰিছে । তেওঁ ২৪ খন মেচত ৩৬ টা উইকেট দখল কৰিছে । তেওঁৰ সৰ্বশ্ৰেষ্ঠ বলিং ৭/৪ আৰু ইকনমি ৭.০৬ ।
অৰ্শদীপ সিং- ভাৰতীয় দলৰ আন এগৰাকী নিৰ্ভৰযোগ্য বলাৰ হৈছে অৰ্শদীপ সিং । ২৯ খন মেচত তেওঁ ৩৬ টা উইকেট দখল কৰিছে । তেওঁৰ সৰ্বশ্ৰেষ্ঠ বলিং ১৬/৩ ।
হৰ্ষিত ৰাণাঃ হৰ্ষিত ৰাণাই ১৯খন মেচত ২২টা উইকেট দখল কৰি ভৱিষ্যতৰ বিকল্প হিচাপে দৃষ্টি আকৰ্ষণ কৰিছে যদিও তেওঁৰ ইকনমি নিয়ন্ত্ৰণৰ প্ৰয়োজন ।
লগতে পঢ়ক : ৪ বেটছমেন, ৪ অল ৰাউণ্ডাৰ, ২ উইকেটকীপাৰ… টি-২০ বিশ্বকাপৰ বাবে টিম ইণ্ডিয়াৰ কম্বিনেচন
