দক্ষিণ আফ্ৰিকা টি-২০ ছিৰিজৰ বাবে ঘোষণা হল টিম ইণ্ডিয়া । ৪ বেটছমেন, ৩ অল-ৰাউণ্ডাৰ আৰু দুজন স্পীনাৰক অন্তৰ্ভূক্ত কৰা হৈছে দলত ।
দক্ষিণ আফ্ৰিকাৰ বিৰুদ্ধে ৫খন মেচৰ টি-২০ শৃংখলাৰ বাবে ঘোষণা কৰা হৈছে ভাৰতীয় দল । ৯ ডিচেম্বৰত কটকত আৰম্ভ হ’ব এই শৃংখলাৰ প্ৰথমখন মেচ ।
এছিয়া কাপৰ সময়ত আঘাতপ্ৰাপ্ত হাৰ্দিক পাণ্ডিয়া পুনৰ দললৈ ঘূৰি আহিছে । টিম ইণ্ডিয়াৰ সহ-অধিনায়ক শুভমন গিলো এই দললৈ প্ৰত্যাৱৰ্তন ঘটাইছে । কলকাতা টেষ্টৰ সময়ত ডিঙিত পোৱা আঘাতৰ বাবে শুভমন সমগ্ৰ শৃংখলাৰ পৰা বাহিৰ হয় ।
বুধবাৰে (৩ ডিচেম্বৰ) ভাৰতীয় ক্ৰিকেট নিয়ন্ত্ৰণ ব’ৰ্ডে ঘোষণা কৰে টিম ইণ্ডিয়া । অষ্ট্ৰেলিয়াৰ বিৰুদ্ধে পাঁচখন খেলৰ টি-২০ শৃংখলা খেলা টিম ইণ্ডিয়াৰ অংশস্বৰূপ নীতিশ কুমাৰ ৰেড্ডী আৰু ৰিংকু সিঙ দক্ষিণ আফ্ৰিকা শৃংখলাৰ বাবে নিৰ্বাচিত নহ’ল ।
অৱশ্যে মন কৰিবলগীয়া যে অষ্ট্ৰেলিয়া ভ্ৰমণৰ বাবে নিৰ্বাচিত দলটোত ১৬ জন সদস্য আছিল । দক্ষিণ আফ্ৰিকাৰ বিৰুদ্ধে পাঁচখন খেলৰ টি-২০ শৃংখলাৰ বাবে ১৪ জন সদস্যক নিৰ্বাচিত কৰা হৈছে । সামগ্ৰিকভাৱে দক্ষিণ আফ্ৰিকাৰ বিৰুদ্ধে টি-২০ শৃংখলাৰ বাবে অষ্ট্ৰেলিয়া ভ্ৰমণ দলৰ পৰা কেৱল ৰিংকু সিং আৰু নীতিশ ৰেড্ডীক বাহিৰ কৰা হৈছে ।
শুভমন গীল নিশ্চিতভাৱে দলটোত থাকিলেও তেওঁৰ অংশগ্ৰহণ বি চি চি আইৰ চেণ্টাৰ অৱ এক্সেলেন্সৰ পৰা ফিটনেছ ক্লিয়াৰেন্সৰ ওপৰত নিৰ্ভৰশীল । গতিকে ফিটনেছ ক্লিয়াৰ হ’লেহে তেওঁ দলত খেলিব ।
দক্ষিণ আফ্ৰিকাৰ শৃংখলাৰ বাবে ঘোষিত টীম ইণ্ডিয়াত আছে চাৰিজন বেটছমেন, তিনিজন অল-ৰাউণ্ডাৰ, তিনিজন পেচাৰ, দুজন উইকেটকীপাৰ আৰু দুজন স্পীনাৰ । যদি গীলে ফিটনেছ প্ৰমাণত ব্যৰ্থ হয় তেন্তে অভিষেক শৰ্মাৰ সৈতে পুনৰবাৰ সঞ্জু চেমছনক অ’পেনিং কৰাৰ সুযোগ দিয়া হ’ব পাৰে ।
ইফালে ঋষভ পন্টো এই শৃংখলাৰ বাবে বিবেচিত নহ’ল । গতিকে অনুমান কৰিব পাৰি যে তেওঁ ২০২৬ চনৰ টি-২০ বিশ্বকাপত নাথাকিব । টি-২০ বিশ্বকাপৰ পূৰ্বে টিম ইণ্ডিয়াই বহু শৃংখলা খেলিব নোৱাৰিব । টি-২০ত পণ্টৰ দুৰ্বল অভিলেখৰ বাবেই তেওঁক বাদ পৰাৰ কাৰণ বুলি চৰ্চা চলিছে । যথেষ্ট দিন ধৰি পণ্ট টি-২০ চেটআপৰ অংশ হোৱা নাই । ২০২৪ চনৰ জুলাই মাহত শ্ৰীলংকাৰ বিৰুদ্ধে শেষবাৰৰ বাবে টি-২০ খেলিছিল তেওঁ । পণ্টে ৭৬খন টি-২০ আন্তঃৰাষ্ট্ৰীয় খেলত গড়ে ২৩.২৫ত ১২০৯ ৰান সংগ্ৰহ কৰিছে । ইয়াৰ উপৰিও তেওঁৰ নামত ৪০টা কেচ আৰু ১১টা ষ্টাম্পিং আছে ।
দক্ষিণ আফ্ৰিকা শৃংখলাৰ বাবে ভাৰতীয় টি-২০ দলৰ সংমিশ্ৰণ-
৪ বেটছমেন : সূৰ্য্যকুমাৰ যাদৱ (অধিনায়ক), শুভমন গীল (উপ-অধিনায়ক), অভিষেক শৰ্মা, তিলক বাৰ্মা ।
৩ অল-ৰাউণ্ডাৰঃ হাৰ্দিক পাণ্ডিয়া, শিৱম ডুবে, অক্ষৰ পেটেল, ৱাশ্বিংটন সুন্দৰ ।
২ উইকেটকীপাৰঃ জিতেশ শৰ্মা (উইকেটকীপাৰ), সঞ্জু চেমছন (উইকেটকীপাৰ)।
২ স্পীনাৰ : বৰুণ চক্ৰৱৰ্তী, কুলদীপ যাদৱ ।
৩ পেচাৰ : হৰ্ষিত ৰানা, যশপ্ৰীত বুমৰাহ, অৰ্শদীপ সিং ।
দক্ষিণ আফ্ৰিকাৰ বিৰুদ্ধে টি-২০ শৃংখলাৰ বাবে টীম ইণ্ডিয়া : সূৰ্যকুমাৰ যাদৱ (অধিনায়ক), শুভমন গীল (উপ-অধিনায়ক), অভিষেক শৰ্মা, তিলক বাৰ্মা, হাৰ্দিক পাণ্ডিয়া, শিৱম ডুবে, অক্ষৰ পেটেল, জিতেশ শৰ্মা (উইকেটকীপাৰ), সঞ্জু চেমছন (উইকেটকীপাৰ), যশপ্ৰীত বুমৰাহ, বৰুণ চক্ৰৱৰ্তী, অৰ্শদীপ সিং, কুলদীপ যাদৱ, হৰ্ষিত ৰাণা, ৱাশ্বিংটন সুন্দৰ ।
লগতে পঢ়ক : সূৰ্য ব্ৰিগেডৰ পৰা বাহিৰ হ’ল ৰিংকু সিং, নীতিশ; দক্ষিণ আফ্ৰিকা টি-২০ ছিৰিজৰ বাবে দল ঘোষণা
