আই পি এল ২০২৬ৰ উন্মাদনা প্ৰায় আৰম্ভ হৈছে । এই প্ৰতিযোগিতাৰ নিলামৰ বাবে ৩৫০ জন খেলুৱৈ চৰ্টলিষ্ট কৰা হৈছে ।
ইণ্ডিয়ান প্ৰিমিয়াৰ লীগৰ ১৯ সংখ্যক ছিজন তথা আই পি এল ২০২৬ৰ প্ৰস্তুতি আৰম্ভ হৈছে ।অহা ১৬ ডিচেম্বৰত আবুধাবিত অনুষ্ঠিত হ’ব আই পি এল ২০২৬ৰ নিলাম । এই নিলামত বিশ্বৰ ১,৩৯০ জন খেলুৱৈয়ে পঞ্জীয়ন কৰিছিল, ইয়াৰে ৩৫০ জন খেলুৱৈক মিনি নিলামৰ বাবে চৰ্টলিষ্ট কৰা হৈছে । ইয়াৰ ভিতৰত আছে যোৱা ছিজনৰ মেগা নিলামত বিক্ৰী নোহোৱা অষ্ট্ৰেলিয়াৰ তাৰকা বেটছমেন ষ্টিভ স্মিথো ।
আই পি এল ২০২৬ৰ নিলামত ২৪০ গৰাকী ভাৰতীয় আৰু ১১০ গৰাকী বিদেশী খেলুৱৈক চৰ্টলিষ্ট-
অহা ১৬ ডিচেম্বৰত আবুধাবিত ২৪০ জন ভাৰতীয় আৰু ১১০ গৰাকী বিদেশী খেলুৱৈকে ধৰি মুঠ ৩৫০ গৰাকী ক্ৰিকেটাৰক লৈ নিলাম অনুষ্ঠিত হ’ব । দক্ষিণ আফ্ৰিকাৰ উইকেটকীপাৰ-বেটছমেন কুইণ্টন ডি কককো চূড়ান্ত তালিকাত অন্তৰ্ভুক্ত কৰা হৈছে । শেহতীয়াকৈ অৱসৰ লোৱাৰ পিছত পুনৰ সীমিত অভাৰৰ ক্ৰিকেটলৈ ঘূৰি আহিছে ডি কক । তেওঁৰ ভিত্তি মূল্য ১ কোটি । অষ্ট্ৰেলিয়াৰ বেটছমেন ষ্টিভ স্মিথকো এই তালিকাত অন্তৰ্ভুক্ত কৰা হৈছে, যাৰ ভিত্তি মূল্য ২ কোটি । স্মিথে শেষবাৰৰ বাবে ২০২১ চনত আই পি এলত খেলিছিল ।
আই পি এলৰ প্ৰেছ বিজ্ঞপ্তি অনুসৰি খেলুৱৈ নিলামৰ বাবে মুঠ ১,৩৯০ জন খেলুৱৈয়ে পঞ্জীয়ন কৰিছিল, যিটো পিছত ১০০৫ লৈ হ্ৰাস পাইছিল । এই খেলুৱৈসকলৰ পৰা ৩৫০ গৰাকী খেলুৱৈৰ চূড়ান্ত তালিকা প্ৰস্তুত কৰা হৈছে । এই নিলামত এই ৩৫০ গৰাকী খেলুৱৈৰ পৰা সৰ্বাধিক ৭৭ গৰাকী খেলুৱৈ ক্ৰয় কৰিব পাৰিব আই পি এলৰ ১০ টা ফ্ৰেঞ্চাইজিয়ে ।
প্ৰথম ছেটত অন্তৰ্ভুক্ত ভাৰতৰ পৃথ্বী শ্ব’ আৰু ছৰফৰাজ খান-
আই পি এল ২০২৬ৰ নিলামৰ প্ৰথম ছেটত অন্তৰ্ভুক্ত হৈছে ভাৰতৰ পৃথ্বী শ্ব’ আৰু ছৰফৰাজ খান । দুয়োজনে নিজৰ ভিত্তি মূল্য ৭৫ লাখ নিৰ্ধাৰণ কৰা হৈছে । ২০১৮ চনৰ পৰা ২০২৪ চনলৈ আই পি এলত খেলিছিল শ্ব’ৱে, কিন্তু শেষৰ নিলামত বিক্ৰী নোহোৱাকৈয়ে আছিল তেওঁ । ২০২১ চনৰ পিছত ছৰফৰাজে এই প্ৰতিযোগিতাত অংশগ্ৰহণ কৰা নাই ।
আই পি এলে শ্বেয়াৰ কৰা তালিকাত নিউজীলেণ্ড আৰু চেন্নাই ছুপাৰ কিংছৰ প্ৰাক্তন অ’পেনাৰ ডেভন কনৱে আৰু দক্ষিণ আফ্ৰিকাৰ ডেভিদ মিলাৰৰ লগতে অষ্ট্ৰেলিয়াৰ দুজন খেলুৱৈ কেমেৰুন গ্ৰীণ আৰু জেক ফ্ৰেজাৰ-মেকগাৰ্ককো অন্তৰ্ভুক্ত কৰা হৈছে, প্ৰত্যেকৰে ভিত্তি মূল্য ২ কোটি টকা ।
কোনখন দেশৰ কিমানজন খেলুৱৈ নিলামত অন্তৰ্ভুক্ত-
দক্ষিণ আফ্ৰিকাৰ পৰা নিলামৰ তালিকাত ১৫জন খেলুৱৈ আছে । ইয়াৰ ভিতৰত আছে ডি কক আৰু মিলাৰৰ লগতে ফাষ্ট বলাৰ এনৰিচ নৰ্টজে, লুংগি এনগিডি, গেৰাল্ড ক’টজি, আৰু অল ৰাউণ্ডাৰ উইয়ান মুল্ডাৰ । নিলামৰ তালিকাত ৱেষ্ট ইণ্ডিজৰ ৯ জন খেলুৱৈৰ নাম অন্তৰ্ভুক্ত কৰা হৈছে, য’ত আছে ফাষ্ট বলাৰ আলজাৰী জোচেফ আৰু শ্বামাৰ জোচেফ, আকিম অগাষ্ট, শ্বাই হোপ, ৰষ্টন চেজ ।
আই পি এল ২০২৬ৰ নিলামৰ তালিকাত স্থান লাভ কৰা শ্ৰীলংকাৰ ১২ গৰাকী খেলুৱৈৰ ভিতৰত আছে ৱানিন্দ হাছাৰাংগা, দুনিথ ৱেলালাগে, মহীশ তীক্ষণা, ট্ৰেভিন মেথিউ, পাথুম নিছাংকা, কুছাল মেণ্ডিছ আৰু কুছাল পেৰেৰা । নিউজীলেণ্ডৰ ষোল্লগৰাকী খেলুৱৈ আৰু আফগানিস্তানৰ ১০গৰাকী খেলুৱৈয়ে নিলামৰ তালিকাত স্থান লাভ কৰিছে । নিউজীলেণ্ডৰ খেলুৱৈসকলৰ ভিতৰত আছে চেন্নাই ছুপাৰ কিংছে মুকলি কৰি দিয়া ৰাচিন ৰবিন্দ্ৰ । আফগানিস্তানৰ খেলুৱৈৰ ভিতৰত আছে ৰহমানুল্লাহ গুৰবাজ আৰু নবীন উল হক ।
চূড়ান্ত নিলামৰ তালিকাত আছে ইংলেণ্ডৰ ২১জন খেলুৱৈ । ইয়াৰ ভিতৰত আছে উইকেটকীপাৰ-বেটছমেন জেমী স্মিথ, বেগী বলাৰ গাছ এটকিনছন আৰু লিয়াম লিভিংষ্টন, টেষ্টৰ অ’পেনাৰ বেন ডাকেট । কেমেৰুন গ্ৰীনে ডাঙৰ বিড আকৰ্ষণ কৰাৰ সম্ভাৱনা আছে । মুঠ ১৯ গৰাকী অষ্ট্ৰেলিয়ান খেলুৱৈক এই তালিকাত অন্তৰ্ভুক্ত কৰা হৈছে । গ্ৰীণৰ উপৰিও জোছ ইংলিছ, মেথিউ শ্বৰ্ট, কুপাৰ কনলি, বিউ ৱেবষ্টাৰ আদি উল্লেখযোগ্য নাম ।
লগতে পঢ়ক : আজি কটকত ভাৰত-দক্ষিণ আফ্ৰিকাৰ প্ৰথম টি-২০ মেচ, মূল একাদশত কোন কোন ?
