ফাইনেলত প্ৰথমে বেটিং কৰি গুজৰাট টাইটানছে ৰয়েল চেলেঞ্জাৰছ বেংগালুৰুৰ সন্মুখত ১৫৬ ৰানৰ লক্ষ্য বান্ধি দিয়ে।

আহমেদাবাদৰ নৰেন্দ্ৰ মোদী ষ্টেডিয়ামত খেলি থকা আই পি এল ২০২৬ ৰ ফাইনেল মেচখনত গুজৰাট টাইটানছে প্ৰথমে বেটিং কৰি ২০ অভাৰত ৮ টা উইকেট হেৰুৱাই ১৫৫ ৰাণ সংগ্ৰহ কৰে। দলটোৰ হৈ ৱাশ্বিংটন সুন্দৰে আটাইতকৈ ডাঙৰ ইনিংছ খেলি ৩৭ টা বলত ৫ টা চাৰিৰ সহায়ত ৫০ ৰাণ সংগ্ৰহ কৰে। দলৰ তাৰকা বেটছমেন শুভমন গিল, জছ বাটলাৰ আৰু ছাই সুদৰ্শন সম্পূৰ্ণৰূপে ফ্লপ প্ৰমাণিত হয়। এই খেলখনত বেংগালুৰুৰ হৈ ৰাশিখ ছালাম দাৰে সৰ্বাধিক ৩ টা উইকেট দখল কৰে।

মেচখনত বেংগালুৰুৰ অধিনায়ক ৰজত পাটিদাৰে টছত জিকি প্ৰথমে বলিং কৰাৰ সিদ্ধান্ত লয়। প্ৰথমে বেটিং কৰাৰ আমন্ত্ৰণ পোৱা গুজৰাটৰ আৰম্ভণি একেবাৰেই ভাল নহ’ল। দলটোৱে ২২ ৰাণৰ স্ক’ৰতে প্ৰথমটো উইকেট হেৰুৱায়, যেতিয়া অধিনায়ক শুভমন গিল মাত্ৰ ১০ ৰাণ কৰি পেভিলিয়নলৈ উভতি যায়।

ইয়াৰ পিছত দলটোৱে ২৬ ৰাণত দ্বিতীয়টো উইকেট, ৫৫ ৰাণত তৃতীয়টো উইকেট, ৭৩ ৰাণত চতুৰ্থটো উইকেট, ৯৯ ৰাণত পঞ্চমটো উইকেট, ১১৫ ৰাণত ষষ্ঠটো উইকেট,১৪২ ৰাণত সপ্তমটো উইকেট আৰু ১৫১ ৰাণত অষ্টমটো উইকেট হেৰুৱায়।

আটাইতকৈ ডাঙৰ ইনিংছ খেলা সুন্দৰৰ বাহিৰে দলটোৰ হৈ ছাই সুদৰ্শনে ১২ ৰাণ, অধিনায়ক শুভমন গিলে ১০ ৰাণ, নিশাম্ব সিন্ধুৱে ২০ ৰাণ, জছ বাটলাৰে ১৯ ৰাণ, আৰ্শদ খানে ১৫ ৰাণ, ৰাহুল টেৱাটিয়াই ০৭ ৰাণ, জেছন হ’ল্ডাৰে ০৭ ৰাণ, ৰাছিদ খানে ০৭ ৰাণ আৰু কাগিছ’ ৰাবাডাই ০৩ ৰাণ সংগ্ৰহ কৰে।

বেংগালুৰুৱে নিশ্চিতভাৱে দ্বিতীয়টো খিতাপ অৰ্জন কৰিব বিচাৰিব। দলটোৱে যোৱা ছিজনত অর্থাৎ ২০২৫ চনত নিজৰ প্ৰথমটো খিতাপ জয় কৰিছিল। এতিয়া অধিনায়ক ৰজত পাটিদাৰৰ নেতৃত্বত বেংগালুৰুৱে ধাৰাবাহিকভাৱে দ্বিতীয়বাৰৰ বাবে ট্ৰফীত নিজৰ নাম খোদিত কৰিব পাৰে।

বেংগালুৰুৱে দ্বিতীয়টো ট্ৰফী লাভ কৰিবলৈ ১৫৬ ৰাণ কৰিব লাগিব। এতিয়া দলটোৱে এই লক্ষ্য খেদি কেনে প্ৰদৰ্শন কৰে, সেয়া চোৱাটো আকৰ্ষণীয় হ’ব।

ছেন্নাই ছুপাৰ কিংছ আৰু মুম্বাই ইণ্ডিয়ানছৰ পিছত ধাৰাবাহিকভাৱে দুখন ট্ৰফী জয় কৰা তৃতীয়টো দল হোৱাৰ সুযোগ আছে বেংগালুৰুৰ সন্মুখত।

লগতে পঢ়ক: বিচিচিআইৰ ডাঙৰ সিদ্ধান্ত; ইণ্ডিয়া এ টীমৰ পৰা বাদ পৰিল ৰিয়ান পৰাগ

অৱশেষত আই পি এল ২০২৬ত ৰাজস্থান ৰয়েলছৰ যাত্ৰাৰ অন্ত পৰিল।কোৱালিফায়াৰ ২ত গুজৰাট টাইটানছে ৭ উইকেটত ৰাজস্থান ৰয়েলছক পৰাস্ত কৰে।

আইপিএল ২০২৬ৰ ফাইলিষ্ট দুটা দল নিশ্চিত হৈছে। কোৱালিফায়াৰ-১ত পৰাস্ত হোৱাৰ পিছত, গুজৰাট টাইটানছ পুনৰ এবাৰ আৰচিবিৰ সৈতে খিতাপ জয়ৰ বাবে যুঁজিবলৈ সাজু হৈছে।শুকুৰবাৰে কোৱালিফায়াৰ-২ত গুজৰাট টাইটানছে ৰাজস্থান ৰয়েলছক ৭ উইকেটত পৰাস্ত কৰে। এই পৰাজয়ৰ পিছত ৰিয়ান পৰাগে এক মন্তব্য আগবঢ়ায়। তেওঁ নিজৰ দলৰ প্ৰশংসা কৰাৰ লগতে পৰাজয়ৰ কাৰণো স্পষ্ট কৰি দিয়ে। প্লে অফত সৰ্বাধিক স্ক’ৰ (২১৪) গঢ়াৰ পিছতো ৰাজস্থান ৰয়েলছৰ দলটোৱে শোচনীয় পৰাজয়ৰ সন্মুখীন হ’বলগীয়া হয়।

মেচৰ অন্তত পৰাজয়ৰ কাৰণ ব্যাখ্যা কৰি ৰিয়ান পৰাগে কয়, “ই এটা গড় স্ক’ৰ আছিল। মই ভাবো ২১৫ ৰান কৰিব পৰা গ’লহেঁতেন, কিন্তু মোৰ অনুভৱ হৈছিল যে দ্বিতীয় ইনিংছত হেভী ৰ’লাৰ চলোৱাৰ পিছত উইকেটৰ কিছু উন্নতি ঘটে।প্ৰথম ইনিংছত স্পিনাৰসকলে অধিক গ্ৰিপ পাইছিল আৰু চুটি, লেহেমীয়া বলবোৰ আৰু লেহেমীয়া হৈ আহিছিল। সেয়ে মই ভাবো ই এটা ঠিক-ঠাক স্ক’ৰ আছিল, কিন্তু ই আৰু উন্নত হ’ব পাৰিলেহেঁতেন। এটা সময়ত এনে লাগিছিল যে ২৩৫ ৰান হ’ব, যিটো এনে ডাঙৰ মেচত পাৰ্থক্য গঢ়িব পাৰিলেহেঁতেন, সেই অতিৰিক্ত ১৫-২০ ৰান। মই ভাবো যদি ২৩০-২৪০ ৰান হ’লহেঁতেন, তেন্তে লক্ষ্যত উপনিত হোৱাটো সঁচাকৈয়ে অতি কঠিন হ’লহেঁতেন।”

তেওঁ লগতে কয়, “আমি জানিছিলো যে আমি অপেনাৰসকলক সোনকালে আউট কৰিব লাগিব, যিটো আমি কৰিব নোৱাৰিলোঁ আৰু তাৰ পিছত কামটো কঠিন হোৱাটো খাটাং আছিল। ই এটা ভাল ছিজন আছিল, বহুতো ইতিবাচক দিশ আছিল। কিন্তু যদি এটা শাৰীত ক’বলৈ যাওঁ, তেন্তে মোৰ অনুভৱ হৈছে যে আমি কোৱালিফাই কৰিবই নালাগিছিল। আমাৰ দলত বহুতো যুৱ মুখ আছিল, যিসকলৰ অভিজ্ঞতা কম আছিল। তেওঁলোকে আইপিএলত কম ক্ৰিকেট খেলিছে আৰু আমি বহু নতুন পৰিৱৰ্তন আৰু সংমিশ্ৰণ চেষ্টা কৰিলোঁ আৰু পৰীক্ষা কৰিলোঁ। কিন্তু ল’ৰাবোৰে যি ধৰণৰ প্ৰদৰ্শন দেখুৱালে আৰু আমি আৰু আজি আমি য’ত উপস্থিত হৈছো,মই ভাবো আগন্তুক দীঘলীয়া যাত্ৰাৰ বাবে এয়া এক উৎকৃষ্ট আৰম্ভণি।”

ৰিয়ান পৰাগে বৈভৱ সূৰ্যবংশীৰ ভূয়সী প্ৰশংসা কৰি তেওঁৰ উজ্জ্বল ভৱিষ্যতৰ কামনা কৰে। বৈভৱে একেৰাহে দুখন মেচত ‘নাৰ্ভাছ নাইনটিজ’ৰ (নব্বৈৰ ঘৰত আউট) বলি হৈছে। তেওঁ হায়দৰাবাদৰ বিৰুদ্ধে ৯৭ ৰানৰ এক অভিলেখ গঢ়া ইনিংছ খেলিছিল। আনহাতে, গুজৰাটৰ বিৰুদ্ধেও বৈভৱ ৰৈ নাথাকিল আৰু বিধ্বংসী ৯৬ ৰান সংগ্ৰহ কৰিলে। অৱশ্যে, আউট হোৱাৰ পিছত বৈভৱক যথেষ্ট আৱেগিক হৈ পৰা দেখা গৈছিল।

লগতে পঢ়ক: ফাইনেললৈ গুজৰাট টাইটানছ; অথলে গ’ল বৈভৱ সূৰ্যবংশীৰ দুৰ্দান্ত বেটিং

২০২৬ চনৰ আই পি এল ছিজনৰ পিছত লক্ষ্ণৌ ছুপাৰ জায়েন্টছৰ অধিনায়ক পদ এৰিলে ঋষভ পণ্টে। শুকুৰবাৰে ফ্ৰেঞ্চাইজিটোৱে ছ’চিয়েল মিডিয়াত এটা পোষ্টৰ জৰিয়তে এই খবৰ শ্বেয়াৰ কৰিছে।

লক্ষ্ণৌ ছুপাৰ জায়েণ্টছে আনুষ্ঠানিকভাৱে ঘোষণা কৰিছে যে ঋষভ পণ্টে ফ্ৰেঞ্চাইজিৰ অধিনায়ক পদৰ এৰিবলৈ অনুৰোধ জনাইছে। ফ্ৰেঞ্চাইজিয়ে তেওঁলোকৰ এই অনুৰোধ তাৎক্ষণিকভাৱে কাৰ্যকৰী কৰি গ্ৰহণ কৰিছে।অধিনায়কৰ পদৰ পৰা সকাহ দিবলৈ পণ্টে নিজেই ফ্ৰেঞ্চাইজিক অনুৰোধ কৰিছিল। এল এছ জিৰ পৰিচালনা সমিতিয়ে অধিনায়ক হিচাপে ঋষভ পণ্টৰ অৱদানৰ শলাগ লৈছে, তেওঁৰ নেতৃত্ব আৰু দলৰ প্ৰতি নিষ্ঠাৰ বাবে কৃতজ্ঞতা প্ৰকাশ কৰিছে।

লক্ষ্ণৌ ছুপাৰ জায়েন্টছৰ ক্ৰিকেটৰ সঞ্চালক টম মুডীয়ে কয়, এই বিষয়টো সন্দৰ্ভত ঋষভে ফ্ৰেঞ্চাইজিৰ সৈতে যোগাযোগ কৰিছিল, আৰু আমি তেওঁৰ অনুৰোধ সন্মানেৰে গ্ৰহণ কৰিছো। এনে সিদ্ধান্ত লোৱা কেতিয়াও সহজ নহয়। অধিনায়ক হিচাপে এই ড্ৰেছিং ৰুমত ঋষভে যি অৰিহণা যোগাইছিল, তাৰ বাবে আমি তেওঁৰ ওচৰত কৃতজ্ঞ। আমাৰ গুৰুত্ব এতিয়া দলটোৰ সামূহিক পুন নিৰ্মাণ আৰু উচ্চতম মানদণ্ডত উপনীত হ’বলৈ পুনৰ্গঠনৰ ওপৰত হ’ব।