উমৰয় সামৰিক ষ্টেচনত আয়োজিত ১৩খন দেশৰ প্ৰথমখন বহুপাক্ষিক সামৰিক অনুশীলন ‘প্ৰগতি-২০২৬’ আজি এক বৰ্ণাঢ্য অনুষ্ঠানৰ মাজেৰে সফলতাৰে সম্পন্ন হয়

ভাৰতৰ নেতৃত্বত মেঘালয়ৰ উমৰয় সামৰিক ষ্টেচনত আয়োজিত ১৩খন দেশৰ প্ৰথমখন বহুপাক্ষিক সামৰিক অনুশীলন ‘প্ৰগতি-২০২৬’ আজি এক বৰ্ণাঢ্য অনুষ্ঠানৰ মাজেৰে সফলতাৰে সম্পন্ন হয় । ভাৰত মহাসাগৰীয় অঞ্চলৰ দেশসমূহৰ মাজত সামৰিক সহযোগিতা, সামূহিক নিৰাপত্তা আৰু কৌশলগত অংশীদাৰিত্ব শক্তিশালী কৰাৰ লক্ষ্যৰে আয়োজিত এই অনুশীলনত ৪০০ তকৈ অধিক সেনাই অংশগ্ৰহণ কৰি নিজৰ সামৰিক দক্ষতাৰ প্ৰমাণ দাঙি ধৰে ।

অংশগ্ৰহণকাৰী দেশসমূহ :

‘পাৰ্টনাৰশ্বিপ অৱ ৰিজনেল আৰ্মিছ ফৰ গ্ৰোথ এণ্ড ট্ৰান্সফৰ্মেশ্যন ইন দ্য ইণ্ডিয়ান অ’চেন ৰিজিয়ন’ (PRAGATI)ৰ অধীনত আয়োজিত এই বৃহৎ অনুশীলনত ভাৰতৰ লগতে ভূটান, কম্বোডিয়া, ইণ্ডোনেছিয়া, লাওছ, মালয়েছিয়া, মালদ্বীপ, ম্যানমাৰ, নেপাল, ফিলিপাইনছ, ছেচেলছ, শ্ৰীলংকা আৰু ভিয়েটনামে অংশগ্ৰহণ কৰে ।

অনুশীলনৰ মূল লক্ষ্য :

অৰ্ধ-পাহাৰীয়া আৰু গভীৰ অৰণ্যত আয়োজিত এই অনুশীলনৰ মূল কেন্দ্ৰবিন্দু আছিল ‘সন্ত্ৰাসবাদ বিৰোধী অভিযান’। অংশগ্ৰহণকাৰী দেশসমূহৰ সৈন্যসকলে মিশ্ৰিত দল গঠন কৰি এম্বুশ্ব, ৰক ক্ৰাফ্ট, শ্লিদাৰিং, জাংগল লেন শ্বুটিং, কোঠা আৰু বাছত হস্তক্ষেপ অভিযান (Room and Bus Intervention), আইইডি (IED) চিনাক্তকৰণ আৰু আহতসকলক সুৰক্ষিতভাৱে উদ্ধাৰ কৰাৰ দৰে জটিল কৌশলসমূহৰ প্ৰশিক্ষণ লয় ।

দ্বিপাক্ষিক আলোচনা আৰু প্ৰতিৰক্ষা প্ৰদৰ্শনী :

অনুশীলনৰ সামৰণি অনুষ্ঠানত ছয়খন দেশৰ সেনা উপ-প্ৰধানসহ ৪০ গৰাকীৰো অধিক জ্যেষ্ঠ সামৰিক বিষয়া উপস্থিত থাকে । ভাৰতীয় সেনাৰ উপ-প্ৰধান লেফটেনেণ্ট জেনেৰেল ধীৰাজ শেঠিয়ে বিদেশী প্ৰতিনিধি দলসমূহৰ আতিথ্য গ্ৰহণ কৰাৰ লগতে বিভিন্ন দেশৰ বিষয়াৰ সৈতে দ্বিপাক্ষিক আলোচনাত মিলিত হয় । এই সময়তে ভাৰতীয় সেনাই এফআইচিচিআই (FICCI) আৰু আৰ্মী ডিজাইন ব্যুৰোৰ সহযোগত এখন বিশেষ প্ৰদৰ্শনীৰো আয়োজন কৰে । ইয়াত ‘আত্মনিৰ্ভৰ ভাৰত’ অভিযানৰ অধীনত নিৰ্মিত অত্যাধুনিক প্ৰতিৰক্ষা সঁজুলি আৰু প্ৰণালীসমূহ প্ৰদৰ্শন কৰা হয়, যাৰ উদ্দেশ্য আছিল বিশ্বৰ প্ৰেক্ষাপটত ভাৰতৰ বৰ্ধিত প্ৰতিৰক্ষা নিৰ্মাণ ক্ষমতা আৰু ৰপ্তানি সম্ভাৱনাক তুলি ধৰা ।

ভৱিষ্যতৰ দিশ: প্ৰতিৰক্ষা মন্ত্ৰালয়ৰ মুখপাত্ৰ লেফটেনেণ্ট কৰ্ণেল মহেন্দ্ৰ ৰাৱতে জনোৱা মতে, ‘প্ৰগতি-২০২৬’য়ে অংশগ্ৰহণকাৰী দেশসমূহৰ মাজত পাৰস্পৰিক বিশ্বাস আৰু পেছাদাৰী সমন্বয় এক নতুন উচ্চতালৈ লৈ গৈছে । এই সফল প্ৰয়াসে ভৱিষ্যতে ইণ্ডো-পেচিফিক অঞ্চলত শান্তি, নিৰাপত্তা আৰু সমৃদ্ধিৰ বাবে এক শক্তিশালী ভেটি প্ৰস্তুত কৰিলে বুলি আশা প্ৰকাশ কৰা হৈছে ।

লগতে পঢ়ক : বিদ্ৰোহমুক্ত হ’ল মিজোৰামঃ মুখ্যমন্ত্ৰীৰ ঘোষণা- আত্মসমৰ্পণ কৰিলে সকলো বিদ্ৰোহীয়ে

মেঘালয়ৰ বিখ্যাত ‘জীৱন্ত শিপাৰ দলং’সমূহক ইউনেস্ক’ৰ বিশ্ব ঐতিহ্য তালিকাভুক্ত কৰাৰ বাবে ভাৰতে মনোনয়ন দিছে

২৩ মাৰ্চত কেন্দ্ৰীয় চৰকাৰে সংসদত জনোৱা অনুসৰি, ২০২৬-২৭ বৰ্ষৰ বাবে মেঘালয়ৰ বিখ্যাত ‘জীৱন্ত শিপাৰ দলং’সমূহক ইউনেস্ক’ৰ বিশ্ব ঐতিহ্য তালিকাভুক্ত কৰাৰ বাবে ভাৰতে মনোনয়ন দিছে ।

লোকসভাত এক লিখিত উত্তৰত কেন্দ্ৰীয় সাংস্কৃতিক মন্ত্ৰী গজেন্দ্ৰ সিং শ্বেখাৱটে কয় যে এই সন্দৰ্ভত এক প্ৰস্তাৱ ইউনেস্ক’ বিশ্ব ঐতিহ্য কেন্দ্ৰত দাখিল কৰা হৈছে । এই অনন্য গাঁথনিসমূহ খিলঞ্জীয়া জনগোষ্ঠীসমূহে নিৰ্মাণ কৰিছে আৰু ইয়াৰ পৰিৱেশগত তথা সাংস্কৃতিক গুৰুত্ব অত্যন্ত বেছি । স্থানীয়ভাৱে “জিংকিএং জ্ৰী” নামেৰে জনাজাত এই জীৱন্ত শিপাৰ দলংসমূহ মেঘালয়ৰ খাচী জনজাতীয় লোকসকলে ৰবৰ গছৰ শিপাৰ পৰা প্ৰস্তুত কৰে । দুৰ্গম বনাঞ্চলত এই দলঙে এক বহনক্ষম আৰু প্ৰাকৃতিক আন্তঃগাঁথনি হিচাপে কাম কৰে । চৰম জলবায়ুৰ অৱস্থাতো এইবোৰ অত্যন্ত মজবুত আৰু সহনশীল বুলি জনাজাত ।

পৃথিৱীৰ অন্যতম সৰ্বাধিক বৰষুণ হোৱা অঞ্চলটোৰ ৭৫ খনতকৈও অধিক দুৰ্গম গাঁৱক সংযোগ কৰা এই দলংসমূহে মানুহ আৰু প্ৰকৃতিৰ মাজত থকা গভীৰ সম্পৰ্কৰ নিদৰ্শন দাঙি ধৰে । পুৰুষাণুক্ৰমে বিকশিত কৰা এই পৰম্পৰাগত জ্ঞান আৰু কৌশল আজিও চৰ্চা কৰি থকা হৈছে, যিয়ে ইয়াক এক জীৱন্ত সাংস্কৃতিক ঐতিহ্যত পৰিণত কৰিছে ।

মেঘালয়ৰ এই জীৱন্ত শিপাৰ দলংসমূহে যদি স্বীকৃতি লাভ কৰে, তেন্তে ই খিলঞ্জীয়া কাৰিকৰী কৌশল আৰু পৰম্পৰাগত জ্ঞানৰ ওপৰত ভিত্তি কৰি গঢ়ি উঠা বহনক্ষম পদ্ধতিসমূহৰ বাবে এক গুৰুত্বপূৰ্ণ গোলকীয় স্বীকৃতি হ’ব ।

ইয়াৰ লগতে চৰকাৰে উত্তৰ প্ৰদেশৰ সাৰনাথৰ প্ৰাচীন বৌদ্ধ ক্ষেত্ৰকো ২০২৫-২৬ বৰ্ষৰ বাবে ইউনেস্ক’ৰ তালিকাৰ বাবে প্ৰস্তাৱ দিছে ।

লগতে পঢ়ক : বৃদ্ধি পাব পাৰে লোকসভাৰ আসনৰ সংখ্যা! কি এই ৫০+৩৩ ফৰ্মূলা ?

পশ্চিম গাৰো পাহাৰ জিলাত ১১ মাৰ্চত কোনো ধৰণৰ নতুন হিংসাত্মক ঘটনাৰ খবৰ পোৱা হোৱা নাই

মেঘালয়ৰ পশ্চিম গাৰো পাহাৰ জিলাত ১১ মাৰ্চত কোনো ধৰণৰ নতুন হিংসাত্মক ঘটনাৰ খবৰ পোৱা হোৱা নাই । গাৰো পাহাৰ স্বায়ত্বশাসিত পৰিষদৰ (GHADC) নিৰ্বাচনৰ মনোনয়ন প্ৰক্ৰিয়াক কেন্দ্ৰ কৰি সৃষ্টি হোৱা সংঘৰ্ষত আৰক্ষীৰ গুলীত দুজন লোকৰ মৃত্যু হোৱাৰ এদিন পিছত পৰিস্থিতি কিছু শাম কটা যেন পৰিলক্ষিত হৈছে ।

কৰ্তৃপক্ষই জনোৱা মতে, প্ৰভাৱিত এলেকাসমূহৰ পৰিস্থিতি বৰ্তমান “শান্ত কিন্তু উত্তেজনাপূৰ্ণ” হৈ আছে, যাৰ ফলত জিলা প্ৰশাসনে সতৰ্কতামূলক ব্যৱস্থা হিচাপে সান্ধ্য আইন আৰু দুদিনৰ বাবে বৃদ্ধি কৰিছে । ১৩ মাৰ্চৰ মাজনিশালৈকে সান্ধ্য আইন বাহাল থাকিব আৰু জিলাখনত মোবাইল ইণ্টাৰনেট সেৱা বন্ধ কৰি ৰখাৰ সিদ্ধান্তও অব্যাহত থাকিব ।

মঙলবাৰে চিবিনাং অঞ্চলত জনজাতীয় আৰু অ-জনজাতীয় গোটৰ মাজত হোৱা সংঘৰ্ষৰ সময়ত আৰক্ষীয়ে গুলীচালনা কৰাত দুজন যুৱকৰ মৃত্যু হয় । জিএইচএডিচি নিৰ্বাচনৰ মনোনয়ন পত্ৰ দাখিল কৰাৰ সময়তে এই হিংসাত্মক ঘটনা সংঘটিত হয় । পশ্চিম গাৰো পাহাৰৰ আৰক্ষী অধীক্ষক আব্ৰাহাম টি চাংমাই জনোৱা মতে, স্থানীয় পৰিষদৰ নিৰ্বাচনৰ মনোনয়ন প্ৰক্ৰিয়াৰ সময়ত এই ঘটনা সংঘটিত হয় ।

জিলা আয়ুক্ত ভি আগৰৱালে কয় যে যিকোনো ধৰণৰ হিংসা প্ৰতিৰোধ কৰিবলৈ নিৰাপত্তা ব্যৱস্থা অধিক কটকটীয়া কৰা হৈছে । আগৰৱালে কয়, “আইন-শৃংখলা পৰিস্থিতি বৰ্তাই ৰাখিবলৈ অঞ্চলটোত নিৰাপত্তা বৃদ্ধি কৰা হৈছে । ১৩ মাৰ্চৰ নিশা ১২ বজালৈ সান্ধ্য আইন বৃদ্ধি কৰা হৈছে ।”

অসামৰিক প্ৰশাসনক সহায় কৰিবলৈ সেনাৰ পাঁচটা কোম্পানী মোতায়েন কৰা হৈছে । বিষয়াসকলে জনোৱা মতে, গাৰো পাহাৰ অঞ্চলৰ সংমণ্ডল সদৰ তুৰাত তিনিটা কোম্পানী আৰু চিবিনাঙত আন দুটা কোম্পানী নিয়োগ কৰা হৈছে ।

লগতে পঢ়ক : দুদিনীয়া ভ্ৰমণসূচীৰে ১৩ মাৰ্চত পুনৰ অসমলৈ প্ৰধানমন্ত্ৰী নৰেন্দ্ৰ মোদী