বিজেপিৰ নিৰ্বাচনী প্ৰচাৰ সন্দৰ্ভত এক গুৰুত্বপূৰ্ণ মন্তব্য কৰিছে মুখ্যমন্ত্ৰী ড০ হিমন্ত বিশ্ব শৰ্মাই

ৰাজ্যত এতিয়া নিৰ্বাচনৰ বতাহ । আগন্তুক বিধানসভা নিৰ্বাচনৰ বাবে প্ৰত্যেকটো দলে প্ৰস্তুতি তীব্ৰতৰ কৰি তুলিছে । ইয়াৰ মাজতে ৰাজ্যত বিজেপিৰ নিৰ্বাচনী প্ৰচাৰ সন্দৰ্ভত এক গুৰুত্বপূৰ্ণ মন্তব্য কৰিছে মুখ্যমন্ত্ৰী ড০ হিমন্ত বিশ্ব শৰ্মাই । বিজেপিয়ে অসমত ৪২ কিলোমিটাৰ জোৰা এক ৰোড শ্ব’ৰ জৰিয়তে নিৰ্বাচনী প্ৰচাৰ আৰম্ভ কৰিব বুলি মুখ্যমন্ত্ৰী হিমন্ত বিশ্ব শৰ্মাই সদৰী কৰিছে । মুখ্যমন্ত্ৰী হিমন্ত বিশ্ব শৰ্মাই জনোৱা মতে, মনোনয়ন দাখিলৰ সময়সীমা শেষ হোৱাৰ ঠিক এদিন পিছত, অৰ্থাৎ ২৪ মাৰ্চত ভৱানীপুৰ-সৰভোগ সমষ্টিত এই বিশাল ৰোড শ্ব’টো অনুষ্ঠিত হ’ব ।

সংবাদ মাধ্যমৰ সন্মখত মুখ্যমন্ত্ৰী ড০ শৰ্মাই কয় যে মিত্ৰজোঁটে ২৪ মাৰ্চৰ পৰা আনুষ্ঠানিকভাৱে প্ৰচাৰ আৰম্ভ কৰাৰ লক্ষ্য নিৰ্ধাৰণ কৰিছে আৰু ২৬ মাৰ্চৰ পৰা নিয়মীয়া নিৰ্বাচনী সভা অনুষ্ঠিত হ’ব । তেওঁ কয়, “ভৱানীপুৰ-সৰভোগ সমষ্টিত এটা ৰোড শ্ব’ অনুষ্ঠিত হ’ব যিয়ে প্ৰায় ৪০ কিলোমিটাৰ পথ সামৰি ল’ব । কিন্তু ২৬ মাৰ্চৰ পৰাহে নিয়মীয়া সভাসমূহ আৰম্ভ হ’ব ।”

ইফালে গুৱাহাটীত মুখ্যমন্ত্ৰী ড০ শৰ্মাই টিকট বঞ্চিত ৰমেন্দ্ৰ নাৰায়ণ কলিতাক সাক্ষাৎ কৰে । মুখ্যমন্ত্ৰীগৰাকীয়ে কয় যে আসন ভাগ-বাটোৱাৰাৰ বাধ্যবাধকতাৰ বাবেহে এই সিদ্ধান্ত লোৱা হৈছে ।

তেওঁ কয়, “আসনৰ বুজাবুজিৰ বাবেহে তেওঁ আসনখন পোৱা নাই । এনেকুৱা নহয় যে তেওঁক প্ৰত্যাখ্যান কৰা হৈছে । তেওঁৰ কৰ্মীসকল সুখী নোহোৱাটো, অলপ হতাশ হোৱাটো আৰু অলপ খং উঠাটো স্বাভাৱিক । কিন্তু লাহে লাহে আমি কথা পাতিব লাগিব আৰু তেওঁলোকৰ স্বাৰ্থ সুৰক্ষিত হ’ব বুলি তেওঁলোকক আশ্বস্ত কৰিব লাগিব ।”

লগতে পঢ়ক : জয়ন্ত দাসৰ পদত্যাগক লৈ হিমন্ত বিশ্ব শৰ্মাৰ প্ৰতিক্ৰিয়া; ক’লে ‘দলে সঠিক সিদ্ধান্তই লৈছে’

বিজেপিয়ে শনিবাৰে দুটা সমষ্টিৰ বাবে প্ৰাৰ্থীৰ নাম ঘোষণা কৰি নিজৰ দ্বিতীয়খন তালিকা প্ৰকাশ কৰিছে

আগন্তুক অসম বিধানসভা নিৰ্বাচন ২০২৬-ৰ বাবে ভাৰতীয় জনতা পাৰ্টি তথা বিজেপিয়ে শনিবাৰে দুটা সমষ্টিৰ বাবে প্ৰাৰ্থীৰ নাম ঘোষণা কৰি নিজৰ দ্বিতীয়খন তালিকা প্ৰকাশ কৰিছে।

​দলৰ কেন্দ্ৰীয় নিৰ্বাচনী সমিতিয়ে প্ৰকাশ কৰা অনুসৰি, এই তালিকাত দলগাঁও আৰু চিচিবৰগাঁও বিধানসভা সমষ্টিৰ বাবে প্ৰাৰ্থীৰ নাম ঘোষণা কৰা হৈছে। ৫১নং দলগাঁও সমষ্টিৰ পৰা সুশ্ৰী কৃষ্ণা সাহাক প্ৰাৰ্থিত্ব প্ৰদান কৰা হৈছে আৰু ৭৯ নং চিচিবৰগাঁও আসনৰ বাবে জীৱন গগৈক প্ৰক্ষেপ কৰিছে দলে ।

​ইয়াৰ পূৰ্বে দলটোৱে ১৯ মাৰ্চত ৮৮ গৰাকী প্ৰাৰ্থীৰ নাম সম্বলিত প্ৰথমখন তালিকা প্ৰকাশ কৰিছিল। ১৯ মাৰ্চত হিমন্ত বিশ্ব শৰ্মাই কৈছিল যে বিজেপিৰ কেন্দ্ৰীয় সংসদীয় বৰ্ডে অহা অসম বিধানসভা নিৰ্বাচনৰ ৮৯টা সমষ্টিৰ ভিতৰত ৮৮টাৰ প্ৰাৰ্থিত্ব চূড়ান্ত কৰিছে আৰু বাকী থকা চিচিবৰগাঁও সমষ্টিৰ প্ৰাৰ্থীৰ নাম অতি সোনকালে ঘোষণা কৰা হ’ব।

​ তেওঁ লগতে কয় যে ৰাজ্যজুৰি দলীয় কৰ্মীসকলে এই তালিকাক লৈ সন্তুষ্টি প্ৰকাশ কৰিছে আৰু এইবাৰো বিজেপিয়ে শক্তিশালী নিৰ্বাচনী ফলাফল আগবঢ়াব বুলি তেওঁ আত্মবিশ্বাস ব্যক্ত কৰে।

লগতে পঢ়ক : তীব্ৰতৰ হৈ পৰিছে নিৰ্বাচনী যুঁজঃ কোন প্ৰাৰ্থীয়ে কোন সমষ্টিৰ বাবে দিলে মনোনয়ন ?

৩৫খন জিলাৰ বিভিন্ন সমষ্টিত মুঠ ১০৯ গৰাকী প্ৰাৰ্থীয়ে ২০৯খন মনোনয়ন পত্ৰ দাখিল কৰিছে

আগন্তুক অসম বিধানসভা নিৰ্বাচনৰ বাবে ২০ মাৰ্চ, শুকুৰবাৰে শাসক-বিৰোধীৰ কেইবাজনো প্ৰাৰ্থীয়ে নিজ নিজ সমষ্টিৰ বাবে মনোনয়ন দাখিল কৰে । বৃহৎ সংখ্যক সমৰ্থকেৰে বিশাল ৰেলী কৰি জিলা আয়ুক্ত কাৰ্যালয়ত মনোনয়ন দাখিল কৰে প্ৰাৰ্থীসকলে ।

অসমৰ মুখ্য নিৰ্বাচন বিষয়াৰ কাৰ্যালয়ৰ পৰা প্ৰকাশিত এক চৰকাৰী বিজ্ঞপ্তি অনুসৰি, ২০ মার্চত ৰাজ্যখনৰ ৩৫খন জিলাৰ বিভিন্ন সমষ্টিত মুঠ ১০৯ গৰাকী প্ৰাৰ্থীয়ে ২০৯খন মনোনয়ন পত্ৰ দাখিল কৰিছে । ইয়াৰ লগে লগে এতিয়ালৈকে মুঠ ১১৬ গৰাকী প্ৰাৰ্থীয়ে ২১৯খন মনোনয়ন পত্ৰ দাখিল কৰিছে । ২৩ মাৰ্চ মনোনয়ন পত্ৰ দাখিলৰ অন্তিম দিন হোৱাৰ পৰিপ্ৰেক্ষিতত নিৰ্বাচনী তৎপৰতা ক্ৰমান্বয়ে বৃদ্ধি পোৱা পৰিলক্ষিত হৈছে ।

২০ মাৰ্চ, শুকুৰবাৰে অগণন সমৰ্থকক লগত লৈ জালুকবাৰী সমষ্টিৰ বাবে মনোনয়ন দাখিল কৰে মুখ্যমন্ত্ৰী হিমন্ত বিশ্ব শৰ্মাই । খানাপাৰাৰ পৰা বৃহৎ ৰেলী কৰি জনস্রোতৰ মাজেৰে মনোনয়ন দাখিল কৰে মুখ্যমন্ত্ৰীগৰাকীয়ে। মুখ্যমন্ত্ৰীগৰাকীৰ মনোয়ন যাত্ৰাত অগণিত সমৰ্থকৰ লগতে তেওঁক সংগ দিয়ে পত্নী ৰিণিকি ভূঞা শৰ্মা, পুত্ৰ নন্দিল বিশ্ব শৰ্মা আৰু গুৱাহাটীৰ সাংসদ বিজুলী কলিতা মেধিয়ে।

ইফালে মনোনয়ন দাখিলৰ লগে লগে ​কেইবাটাও সমষ্টিত বহুকোণীয়া প্ৰতিদ্বন্দ্বিতাৰ ইংগিত পোৱা গৈছে। ভৱানীপুৰ-সৰভোগ সমষ্টিত বিজেপিৰ ৰঞ্জিত কুমাৰ দাস আৰু চিপিআই(এম)ৰ মনোৰঞ্জন তালুকদাৰকে ধৰি তিনিগৰাকী প্ৰাৰ্থীয়ে প্ৰতিদ্বন্দ্বিতাত নামিছে। আনহাতে চামগুৰিত চাৰিগৰাকী প্ৰাৰ্থীয়ে মনোনয়ন দাখিল কৰিছে, যিয়ে তীব্ৰ ৰাজনৈতিক যুদ্ধৰ ইংগিত দিছে।

উল্লেখ যে, মুখ্যমন্ত্ৰী হিমন্ত বিশ্ব শৰ্মাৰ লগতে ৰাজ্যৰ কেইবাগৰাকীও প্ৰভাৱশালী নেতাই শুকুৰবাৰে মনোনয়ন দাখিল কৰে। জাগীৰোড সমষ্টিৰ বাবে মন্ত্ৰী পীয়ুষ হাজৰীকা, নগাঁও সমষ্টিৰ বাবে ৰূপক শৰ্মাই, কংগ্ৰেছ নেতা দেৱব্ৰত শইকীয়াই নাজিৰা সমষ্টিৰ বাবে, অসম জাতীয় পৰিষদৰ সভাপতি লুৰীণজ্যোতি গগৈয়ে খোৱাং সমষ্টিৰ বাবে আৰু মন্ত্ৰী প্ৰশান্ত ফুকন ডিব্ৰুগড় সমষ্টিৰ বাবে মনোনয়ন দাখিল কৰে ।

​তামুলপুৰত ইউপিপিএলৰ মুৰব্বী প্ৰমোদ বড়ো আৰু বিজেপিৰ বিশ্বজিৎ দৈমাৰীৰ মাজত এক হাইপ্ৰফাইল যুঁজ হোৱাৰ সম্ভাৱনা আছে। একেদৰে বৰচলাত কংগ্ৰেছ নেতা ৰিপুণ বৰা বিজেপিৰ ঋতু বৰণ শৰ্মাৰ মুখামুখি হ’ব।

​তদুপৰি শুকুৰবাৰৰ দিনটোতে মনোনয়ন দাখিল কৰে- তুলিৰাম ৰংহাঙ, ৰংখাং সমষ্টি আৰু ড° হেবে টেৰণ আমৰি সমষ্টি। চিপিআই(এমএল)ৰ প্ৰাৰ্থী ৰবি কুমাৰ ফাংচোৱে হাওৰাঘাটৰ পৰা প্ৰতিদ্বন্দ্বিতা আগবঢ়াইছে।

​উল্লেখযোগ্য যে, ১২৬ জনীয়া অসম বিধানসভাৰ নিৰ্বাচন ৯ এপ্ৰিলত অনুষ্ঠিত হ’ব আৰু ৪ মে’ত ভোটগণনা হ’ব।

লগতে পঢ়ক : জনসমুদ্ৰৰ মাজেৰে মনোনয়ন দাখিল মুখ্যমন্ত্ৰী ড০ হিমন্ত বিশ্ব শৰ্মাৰ

প্ৰাৰ্থী তালিকাত অতি কম সময়ৰ ব্যৱধানত কংগ্ৰেছ ত্যাগ কৰা দুজন জ্যেষ্ঠ নেতাক টিকট প্ৰদান কৰা হৈছে

২০২৬ৰ অসম বিধানসভা নিৰ্বাচনৰ বাবে ভাৰতীয় জনতা পাৰ্টীয়ে বৃহস্পতিবাৰে প্ৰকাশ কৰিলে প্ৰাৰ্থী তালিকা । বিজেপিয়ে ঘোষণা কৰা ৮৮ জনীয়া এই প্ৰাৰ্থী তালিকাত অতি কম সময়ৰ ব্যৱধানত কংগ্ৰেছ ত্যাগ কৰা দুজন জ্যেষ্ঠ নেতাক টিকট প্ৰদান কৰা হৈছে ।

২০২১ চনৰ পৰা ২০২৫ চনলৈ অসম প্ৰদেশ কংগ্ৰেছ কমিটিৰ সভাপতি হিচাপে কাৰ্যনিৰ্বাহ কৰা প্ৰাক্তন দুবাৰৰ বিধায়ক ভূপেন কুমাৰ বৰাক লখিমপুৰ জিলাৰ বিহপুৰীয়া সমষ্টিৰ পৰা বিজেপি দলে প্ৰক্ষেপ কৰিছে । তিনিটা দশকৰো অধিক সময় কংগ্ৰেছত অতিবাহিত কৰা ভূপেন বৰাই দলৰ ভিতৰ চ’ৰাৰ অৱহেলা আৰু আভ্যন্তৰীণ সংঘাতক দল ত্যাগৰ কাৰণ হিচাপে দৰ্শাই অসমত দলীয় কাৰ্যকলাপ সন্দৰ্ভত তেওঁৰ উদ্বেগসমূহ কেন্দ্ৰীয় নেতৃত্বই বাৰে বাৰে আওকাণ কৰা বুলি পদত্যাগ কৰি অভিযোগ কৰিছিল ।

পদত্যাগৰ কাৰণ হিচাবে ভূপেন বৰাই লগতে দাবী কৰিছিল যে ৰকিবুল হুছেইনে অসম কংগ্ৰেছত আধিপত্য বিস্তাৰ কৰিছে, যাৰ ফলত তেওঁৰ দৰে বহু জ্যেষ্ঠ নেতাৰ গুৰুত্ব হ্ৰাস পাইছে । ফেব্ৰুৱাৰী মাহত তেওঁ আনুষ্ঠানিকভাৱে বিজেপিত যোগদান কৰে আৰু মুখ্যমন্ত্ৰী হিমন্ত বিশ্ব শৰ্মাই তেওঁক দললৈ আদৰণি জনাই ।

ইফালে নগাঁৱৰ বৰ্তমানৰ লোকসভাৰ সাংসদ প্ৰদ্যুৎ বৰদলৈয়ে ১৭ মাৰ্চত কংগ্ৰেছৰ পৰা পদত্যাগ কৰি ১৮ মাৰ্চত বিজেপিত যোগদান কৰে । ইয়াৰ পিছতে তেওঁক এতিয়া অসমৰ অন্যতম গুৰুত্বপূৰ্ণ সমষ্টি দিছপুৰৰ পৰা প্ৰাৰ্থিত্ব প্ৰদান কৰা হৈছে । পাঁচ দশকৰো অধিক সময় কংগ্ৰেছৰ সদস্য হৈ থকা বৰদলৈয়ে কয় যে যোৱা দুবছৰ ধৰি তেওঁ দলৰ ভিতৰত অপমান কৰা হৈছিল আৰু তেওঁ অকলশৰীয়া হৈ পৰিছিল ।

উল্লেখ্য যে, এই হাই-প্ৰফাইল নেতাসকলৰ উপৰিও বিজেপিৰ তালিকাত নামনি, মধ্য আৰু উজনি অসমৰ ৰঙিয়া, পলাশবাৰী, গুৱাহাটী কেন্দ্ৰীয়, নগাঁও, মঙলদৈ, ধেমাজি আৰু তিনিচুকীয়া আদি সমষ্টিসমূহ অন্তৰ্ভুক্ত হৈছে ।

লগতে পঢ়ক : জালুকবাৰীত মুখ্যমন্ত্ৰী হিমন্ত বিশ্ব শৰ্মা, ৮৮টা সমষ্টিৰ বাবে বিজেপিৰ প্ৰাৰ্থী তালিকা ঘোষণা

প্ৰাক্তন প্ৰদেশ কংগ্ৰেছ সভাপতি ভূপেন বৰাকে ধৰি শেহতীয়া উদাহৰণসমূহ দাঙি ধৰে আৰু ভৱিষ্যদ্বাণী কৰে যে বৰদলৈৰ দৰেই আৰু অধিক নেতা বিজেপিলৈ আহিব

মুখ্যমন্ত্রী ড০ হিমন্ত বিশ্ব শৰ্মাই বুধবাৰে কংগ্ৰেছক তীব্ৰ সমালোচনা কৰি দাবী কৰে যে আত্মসন্মান থকা কোনো ব্যক্তিয়েই বিৰোধী দলটোত থাকিব নোৱাৰে । ৰাজ্যখনৰ উজ্জ্বল ভৱিষ্যত নিশ্চিত কৰাৰ স্বাৰ্থত কংগ্ৰেছৰ সকলো “ভাল” নেতাক ভাৰতীয় জনতা পাৰ্টিত অন্তৰ্ভুক্ত কৰাৰ ইচ্ছা প্ৰকাশ কৰে মুখ্যমন্ত্ৰীগৰাকীয়ে ।

পাঁচ দশক ধৰি দলটোৰ সৈতে জড়িত জ্যেষ্ঠ নেতা তথা কংগ্ৰেছৰ লোকসভা সাংসদ প্ৰদ্যুৎ বৰদলৈয়ে পদত্যাগ কৰি দিল্লীত বিজেপিত যোগদান কৰাৰ পিছতেই মুখ্যমন্ত্ৰী শৰ্মাই এই মন্তব্য কৰিছে । সাংবাদিকৰ আগত মুখ্যমন্ত্ৰী ড০ শৰ্মাই কয়, “কংগ্ৰেছে কি কয় ক’বলৈ দিয়ক । কিন্তু কংগ্ৰেছৰ সকলো ভাল নেতাক বিজেপিৰ শিবিৰলৈ অনাটোৱেই আমাৰ লক্ষ্য । আমি বিজেপি আৰু অসম উভয়ৰে ভৱিষ্যত ভাল কৰিব লাগিব । সেইবাবেই কংগ্ৰেছৰ যিসকল নেতা বোজা নহয় বৰঞ্চ সম্পদ, তেওঁলোকক মই লাহে লাহে বিজেপিলৈ আনিব বিচাৰো ।” তেওঁ উল্লেখ কৰে যে ২০১৬ চনৰ পৰা আৰম্ভ হোৱা বিজেপিৰ এই প্ৰচেষ্টাই ইতিমধ্যে “৯৯ শতাংশ সফলতা” লাভ কৰিছে ।

মুখ্যমন্ত্ৰীগৰাকীয়ে দাবী কৰে যে অসমত কংগ্ৰেছৰ বৰ্তমানৰ অৱস্থা আৰু আদৰ্শগত স্থিতিৰ পৰিপ্ৰেক্ষিতত কোনো আত্মসন্মান থকা ব্যক্তিয়ে দলটোত থাকিব নোৱাৰে । তেওঁ প্ৰাক্তন প্ৰদেশ কংগ্ৰেছ সভাপতি ভূপেন বৰাকে ধৰি শেহতীয়া উদাহৰণসমূহ দাঙি ধৰে আৰু ভৱিষ্যদ্বাণী কৰে যে বৰদলৈৰ দৰেই আৰু অধিক নেতা বিজেপিলৈ আহিব । ড০ শৰ্মাই লগতে কয় যে বিজেপিয়ে অসমত সুফল দি থকাৰ বাবেহে নেতাসকলে দলটোত যোগদান কৰিছে । আগন্তুক লোকপিয়লৰ পিছত অসমীয়া মানুহৰ স্বাৰ্থ ৰক্ষা কৰাটো এক প্ৰধান লক্ষ্য হ’ব বুলিও তেওঁ উল্লেখ কৰে । ইয়াৰ উপৰিও বিজেপিৰ এই জনসংযোগ অভিযানত পথ প্ৰদৰ্শন কৰাৰ বাবে তেওঁ কেন্দ্ৰীয় গৃহমন্ত্ৰী অমিত শ্বাহক ধন্যবাদ জ্ঞাপন কৰে ।

লগতে পঢ়ক : ক্ষন্তেক পিছতে প্ৰকাশ পাব বিজেপিৰ প্ৰাৰ্থী তালিকা