ৰাষ্ট্ৰপতি ট্ৰাম্পে ভাৰতৰ সামগ্ৰীৰ ওপৰত পাৰস্পৰিক শুল্ক হ্ৰাস কৰাৰ কথা ঘোষণা কৰি এক ডাঙৰ দাবী কৰিছে । ভাৰতে ৰাছিয়াৰ পৰা তেল ক্ৰয় কৰা বন্ধ কৰিব বুলি দাবী কৰিছে তেওঁ ।

ভাৰতে ৰাছিয়াৰ পৰা তেল ক্ৰয় কৰা বন্ধ কৰিব বুলি দাবী কৰিছে আমেৰিকাৰ ৰাষ্ট্ৰপতি ড’নাল্ড ট্ৰাম্পে । ৰাষ্ট্ৰপতি ট্ৰাম্পে ভাৰতৰ সামগ্ৰীৰ ওপৰত পাৰস্পৰিক শুল্ক হ্ৰাস কৰাৰ কথা ঘোষণা কৰি এই দাবী কৰিছে । ভাৰতত থকা আমেৰিকাৰ ৰাষ্ট্ৰদূত চাৰ্জিঅ’ গৰে ভাৰতৰ ওপৰত আৰোপ কৰা পাৰস্পৰিক শুল্ক ১৮ শতাংশলৈ হ্ৰাস কৰা হ’ব বুলি উল্লেখ কৰে ।

ভাৰতৰ শক্তি নীতি আৰু ভাৰত-ৰাছিয়াৰ শক্তিশালী সম্পৰ্কৰ পৰিপ্ৰেক্ষিতত ট্ৰাম্পৰ এই দাবী তাৎপৰ্যপূৰ্ণ বুলি বিবেচিত হৈছে । দুয়োখন দেশৰ মাজত কৌশলগত অংশীদাৰিত্বৰ অংশ হিচাপে ভাৰত আৰু ৰাছিয়াই কিছুদিনৰ পৰা তেল আৰু শক্তি খণ্ডত সহযোগিতা আগবঢ়াই আহিছে । অৱশ্যে ট্ৰাম্পে তেওঁৰ এই দাবীৰ কোনো সুনিৰ্দিষ্ট কাৰণ বা সময়সীমা প্ৰদান কৰা নাই ।

এই বক্তব্যই স্বাভাৱিকতে এই প্ৰশ্ন উত্থাপন কৰে যে ভাৰতে শক্তি কৌশলত কোনো বৃহৎ পৰিৱৰ্তন কৰাৰ পৰিকল্পনা কৰিছে নেকি ?  ৰাছিয়াৰ পৰা তেল ক্ৰয় নকৰা সন্দৰ্ভত ৰাষ্ট্ৰপতি ট্ৰাম্পৰ দাবী সন্দৰ্ভত ভাৰত চৰকাৰে এতিয়াও আনুষ্ঠানিকভাৱে কোনো মন্তব্য কৰা নাই, যাৰ ফলত পৰিস্থিতি অস্পষ্ট হৈ পৰিছে ।

সোমবাৰে সন্ধিয়া প্ৰধানমন্ত্ৰী নৰেন্দ্ৰ মোদী আৰু ৰাষ্ট্ৰপতি ড’নাল্ড ট্ৰাম্পৰ মাজত ফোনযোগে বাৰ্তালাপ হয় । ভাৰতত থকা আমেৰিকাৰ ৰাষ্ট্ৰদূত চাৰ্জিঅ’ গৰে ছ’চিয়েল মিডিয়া প্লেটফৰ্ম এক্সত পোষ্ট কৰি কয় যে ৰাষ্ট্ৰপতি আৰু প্ৰধানমন্ত্ৰীয়ে ফোনযোগে কথা পাতিছে আৰু অতি সোনকালে এক বৃহৎ ঘোষণা কৰা হ’ব । মাত্ৰ ডেৰ ঘণ্টাৰ পিছত আমেৰিকাই ভাৰতৰ ওপৰত আমদানি শুল্ক হ্ৰাস কৰাৰ কথা ঘোষণা কৰে ।

উল্লেখ্য যে, দুয়োখন দেশৰ মাজত বাণিজ্য আৰু অৰ্থনৈতিক সহযোগিতাৰ বাবে অহৰহ আলোচনা চলি থকাৰ মাজতে এই শুল্ক হ্ৰাস কৰা হৈছে । ভাৰতে দীৰ্ঘদিন ধৰি আমেৰিকাৰ শুল্কৰ পৰা সকাহ বিচাৰি আহিছে । এই হ্ৰাসৰ ফলত ভাৰতৰ ৰপ্তানি খণ্ডত উত্থান ঘটিব বুলি আশা কৰা হৈছে ।

লগতে পঢ়ক : এই অংশীদাৰিত্বক এক নতুন উচ্চতালৈ লৈ যামঃ ট্ৰাম্পৰ ঘোষণাৰ পাছতেই প্ৰধানমন্ত্ৰী মোদীৰ প্ৰতিক্ৰিয়া

আয়াতুল্লাহ আলী খামেইনীয়ে দেওবাৰে আমেৰিকাক কঠোৰ সতৰ্কবাণী জাৰি কৰিছে । তেওঁ কয় যে ইৰাণ দৃঢ়তাৰে থিয় দিছে আৰু থিয় দি থাকিব ।

ইৰাণৰ সৰ্বোচ্চ নেতা আয়াতুল্লাহ আলী খামেইনীয়ে দেওবাৰে আমেৰিকাক কঠোৰ সতৰ্কবাণী জাৰি কৰিছে, যিয়ে মধ্যপ্ৰাচ্যত আলোড়নৰ সৃষ্টি কৰিছে । আমেৰিকাৰ ৰাষ্ট্ৰপতি ড’নাল্ড ট্ৰাম্পৰ ভাবুকিৰ প্ৰত্যুত্তৰ জনাই খামেইনীয়ে কয় যে ইৰাণ দৃঢ়তাৰে থিয় দিছে আৰু থিয় দি থাকিব । তেওঁ লগতে কয়, “আল্লাহে ইচ্ছা কৰিলে আমেৰিকাৰ ভাবুকি অত্যাচাৰৰ অন্ত পেলাব ।”

উল্লেখ্য যে, ইৰাণ আৰু আমেৰিকাৰ মাজত উত্তেজনাময় পৰিস্থিতি অব্যাহত আছে । এফালে আমেৰিকাৰ ৰাষ্ট্ৰপতি ড’নাল্ড ট্ৰাম্পে কয় যে তেওঁ ইৰাণৰ সৈতে সকলো ধৰণে মোকাবিলা কৰিবলৈ সাজু, কিন্তু আলোচনাৰ জৰিয়তে সমস্যাটো সমাধান কৰাটো পছন্দ কৰে । আনহাতে ইৰাণেও বাৰে বাৰে কৈছে যে যদি আমেৰিকাই ইৰাণক আক্ৰমণ কৰে তেন্তে দেশখনে ইয়াৰ প্ৰত্যুত্তৰ তীব্ৰ প্ৰত্যুত্তৰ দিব ।

বিগত ১২ ঘণ্টাৰ ভিতৰত এইবাৰ দ্বিতীয়বাৰৰ বাবে ইৰাণৰ সৰ্বোচ্চ নেতা আয়াতুল্লাহ আলী খামেইনীয়ে আমেৰিকাক ভাবুকি দিছে । ইয়াৰ পূৰ্বে খামেইনীয়ে সকীয়াই দিছিল, “এইবাৰ যুদ্ধ সহজে শেষ নহয় । যদি আমেৰিকাই আক্ৰমণ কৰে তেন্তে ক্ষেত্ৰীয় যুদ্ধৰ সূচনা হ’ব । আমেৰিকাই জনা উচিত যে যদি আপোনালেকে যুদ্ধ আৰম্ভ কৰে তেন্তে ইয়াক ক্ষেত্ৰীয় যুদ্ধলৈ পৰিণত হোৱাৰ বাবে সাজু থাকক । আমি প্ৰৰোচিত কৰা ধৰণৰ নহয় আৰু আমি কোনো দেশক আক্ৰমণ কৰিব নিবিচাৰো, কিন্তু ইৰাণে ইয়াক আক্ৰমণ বা অশান্তি দিয়া যিকোনো দেশ বা ব্যক্তিক তীব্ৰ আঘাত দিব ।”

ইয়াৰ এদিন পূৰ্বে তেহৰাণত অনুষ্ঠিত এক ৰাষ্ট্ৰীয় অনুষ্ঠানত আমেৰিকাৰ সৈতে বৃদ্ধি পোৱা উত্তেজনাৰ মাজতে সেনা প্ৰধান আমিৰ হাতামীয়ে ইৰাণৰ সেনাবাহিনীৰ প্ৰস্তুতিৰ ওপৰত গুৰুত্ব আৰোপ কৰে । তেওঁ কয়, “আজি ইৰাণৰ ইছলামিক ৰিপাব্লিকৰ সেনাই সম্পূৰ্ণ সাজু হৈ আছে আৰু অঞ্চলটোত শত্ৰুৰ গতিবিধি তীক্ষ্ণভাৱে নিৰীক্ষণ কৰি আছে । আমাৰ আঙুলি ট্ৰিগাৰত আছে ।” তেওঁ আৰু কয় যে যদি শত্ৰুৱে ভুল কৰে তেন্তে ই নিঃসন্দেহে নিজৰ নিৰাপত্তা, ইজৰাইলৰ আৰু অঞ্চলটোৰ নিৰাপত্তা বিপন্ন কৰিব ।

লগতে পঢ়ক : ইৰাণৰ পৰা নহয়, ভেনিজুৱেলাৰ পৰা তেল ক্ৰয় কৰিব ভাৰতেঃ ড’নাল্ড ট্ৰাম্পৰ দাবী!

ভাৰতে এতিয়া ইৰাণৰ পৰিৱৰ্তে ভেনিজুৱেলাৰ পৰা খাৰুৱা তেল ক্ৰয় কৰিব বুলি দাবী কৰিছে মাৰ্কিন ৰাষ্ট্ৰপতি ট্ৰাম্পে । ট্ৰাম্পে কয় যে চীনেও আমেৰিকাৰ সৈতে তেলৰ বাবে চুক্তি কৰিব পাৰে ।

আমেৰিকাৰ ৰাষ্ট্ৰপতি ড’নাল্ড ট্ৰাম্পে খাৰুৱা তেলক লৈ বিভিন্ন ধৰণৰ বক্তব্য আগবঢ়াই আহিছে । শেহতীয়াকৈ ট্ৰাম্পে দাবী কৰিছে যে ভাৰতে এতিয়া ইৰাণৰ পৰিৱৰ্তে ভেনিজুৱেলাৰ পৰা খাৰুৱা তেল ক্ৰয় কৰিব । ট্ৰাম্পে কয় যে আমেৰিকাই ইতিমধ্যে এই সন্দৰ্ভত চুক্তিৰ ধাৰণা তৈয়াৰ কৰিছে ।

ইতিমধ্যে আমেৰিকাই ইৰাণৰ ওপৰত অসংখ্য নিষেধাজ্ঞা আৰোপ কৰিছে । এই নিষেধাজ্ঞা সমূহৰ বাবেই ভাৰতে দীৰ্ঘদিন ধৰি ইৰাণৰ পৰা বৃহৎ পৰিমাণত তেল ক্ৰয় কৰিব পৰা নাই । তদুপৰি এই নিষেধাজ্ঞা জাৰি কৰাৰ পূৰ্বে ইৰাণ ভাৰতৰ অন্যতম বৃহৎ খাৰুৱা তেলৰ যোগানকাৰী দেশ আছিল ।

এতিয়ালৈকে ভাৰতে তেলৰ প্ৰয়োজনীয়তাৰ মূল অংশ ইৰাণৰ পৰা ক্ৰয় কৰি আহিছিল । ইয়াৰ কেইবাটাও কাৰণ আছে : ইৰাণৰ তেল সস্তা আছিল আৰু ভাৰতৰ শোধনাগাৰ ব্যৱস্থাৰ সৈতে সামঞ্জস্যপূৰ্ণ আছিল ।

তেল ক্ৰয়ক লৈ কি ক’লে ট্ৰাম্পে ?

ৰয়টাৰৰ এক প্ৰতিবেদন অনুসৰি ড’নাল্ড ট্ৰাম্পে শনিবাৰে তেল ক্ৰয় সন্দৰ্ভত এই মন্তব্য কৰে । ৱাশ্বিংটন ডি চিৰ পৰা ফ্ল’ৰিডালৈ যোৱাৰ সময়ত তেওঁ এয়াৰ ফৰ্চ ৱানত সাংবাদিকৰ সৈতে বাৰ্তালাপ কৰে । ট্ৰাম্পে কয় যে চীনে আমেৰিকাৰ সৈতেও তেলৰ বাবে চুক্তি কৰিব পাৰে । ভাৰতেও এতিয়া ইৰাণৰ সলনি ভেনিজুৱেলাৰ পৰা তেল ক্ৰয় কৰিব ।

সংবাদ মাধ্যমৰ সৈতে হোৱা বাৰ্তালাপৰ সময়ত ট্ৰাম্পে দাবী কৰিছিল যে আমেৰিকাই এতিয়া ভেনিজুৱেলাত ক্ষমতা দখল কৰিছে । গ্ৰেপ্তাৰ হোৱা ৰাষ্ট্ৰপতি নিকোলাছ মাদুৰোৰ ঠাইত ডেলচি ৰড্ৰিগোজক অন্তৱৰ্তীকালীন নেতা হিচাপে থাকিবলৈ দিয়া হৈছে বুলিও তেওঁ কয় । ৰড্ৰিগোজে আমেৰিকাৰ সকলো চৰ্ত মানি চলিব বাবে তেওঁক এই পদ দিয়া হৈছে বুলিও কয় ট্ৰাম্পে ।

লগতে পঢ়ক : ট্ৰাম্পৰ সকীয়নিক বুঢ়া আঙুলি ইৰাণৰ; পুনৰ নিৰ্মাণ কৰিলে পাৰমাণৱিক ঘাটী

মাৰ্কিন ৰাষ্ট্ৰপতি ট্ৰাম্পৰ সকীয়নিৰ পিছতো পিছুৱাই যোৱা নাই ইৰাণ । ট্ৰাম্পৰ সকীয়নিক বুঢ়া আঙুলি দেখুৱাই ইৰানে পুনৰ নিৰ্মাণ কৰিছে পাৰমাণৱিক ঘাটী ।

ইজৰাইল আৰু আমেৰিকাৰ বিধ্বংসী বিমান আক্ৰমণৰ পিছত ইৰাণৰ পাৰমাণৱিক স্থানসমূহত গতিবিধি পুনৰ স্পষ্ট হৈ পৰিছে । শেহতীয়া উপগ্ৰহযোগে লোৱা ছবিসমূহে দেখুৱাইছে যে ইৰাণে নিজৰ দুটা প্ৰধান পাৰমাণৱিক কেন্দ্ৰ ইছফাহান আৰু নাটাঞ্জত নতুন নিৰ্মাণ কৰিছে আৰু ক্ষতিগ্ৰস্ত গঠনসমূহৰ ওপৰত আৱৰণ ৰাখিছে ।

শেহতীয়াকৈ প্ৰকাশ কৰা উপগ্ৰহ ছবিয়ে তেহৰানে আক্ৰমণৰ পিছত ৰক্ষা পৰা স্পৰ্শকাতৰ পাৰমাণৱিক সম্পদ লুকুৱাবলৈ বা উদ্ধাৰৰ চেষ্টা কৰিব পাৰে বুলি আন্তঃৰাষ্ট্ৰীয় সম্প্ৰদায়ৰ উদ্বেগ বৃদ্ধি কৰিছে । যোৱা বছৰৰ জুন মাহত ইজৰাইল আৰু ইৰাণৰ মাজত ১২ দিনীয়া যুদ্ধৰ পিছত যিকোনো বোমা আক্ৰমণ কৰা পাৰমাণৱিক স্থানত দেখা পোৱা এইটোৱেই হৈছে প্ৰথমটো বৃহৎ নিৰ্মাণ কাৰ্য ।

উপগ্ৰহৰ নিৰীক্ষণক ঢাকি ৰখাৰ প্ৰয়াস!

নতুন নিৰ্মাণৰ বাবে উপগ্ৰহসমূৰ স্থলভাগৰ কাৰ্যকলাপ নিৰীক্ষণ কৰাত অসুবিধাৰ সৃষ্টি কৰিছে । বিশেষকৈ ইৰাণে আন্তঃৰাষ্ট্ৰীয় পাৰমাণৱিক শক্তি সংস্থাৰ পৰিদৰ্শকক দেশখনত প্ৰৱেশৰ অনুমতি দিয়া নাই । দূৰৱৰ্তী নিৰীক্ষণেই হৈছে এই ক্ষেত্ৰত নিৰীক্ষণৰ একমাত্ৰ উপায় ।

বিশেষজ্ঞসকলৰ মতে শেহতীয়া এই গঠনৰ উদ্দেশ্য নতুন পাৰমাণৱিক নিৰ্মানৰ সুবিধাতকৈ ধ্বংসাৱশেষৰ তলত পোত খাই থকা স্পৰ্শকাতৰ সঁজুলি আৰু ইউৰেনিয়ামৰ মজুত উদ্ধাৰ কৰাৰ বাবে হ’ব পাৰে । ফাউণ্ডেশ্যন ফৰ ডিফেন্স অৱ ডেম’ক্ৰেচিছৰ আন্দ্ৰেয়া ষ্ট্ৰিকাৰৰ মতে ইৰানে নিশ্চিত কৰিব বিচাৰে যে ইজৰাইল আৰু আমেৰিকাই তেওঁলোকৰ আক্ৰমণৰ পৰা কি কি ৰক্ষা পৰিল সেয়া যাতে চাব নোৱাৰে তাৰ বাবে এই নিৰ্মাণ কৰা হৈছে ।

দ্ৰুতগতিত চলিছে মিছাইল কাৰ্যসূচীৰ কাম-

উপগ্ৰহৰ ছবিয়ে দেখুৱাইছে যে ইৰানে নিজৰ বেলিষ্টিক মিছাইল কাৰ্যসূচীৰ সৈতে জড়িত স্থানসমূহত পুনৰ কাম আৰম্ভ কৰিছে । তেহৰাণৰ ওচৰৰ পাৰ্চিন সামৰিক কমপ্লেক্সত থকা “তালেঘান-২” নামৰ এই স্থানটো পুনৰ নিৰ্মাণ কৰা হৈছে, যিটো পূৰ্বতে পাৰমাণৱিক অস্ত্ৰৰ বিস্ফোৰক পৰীক্ষাৰ সৈতে জড়িত আছিল । বিশ্লেষকসকলে কয় যে ছাইটটোক অধিক শক্তিশালী আৰু আক্ৰমণৰ প্ৰতিৰোধী কৰি তোলা হৈছে ।

ইফালে দেশজুৰি প্ৰতিবাদৰ বিৰুদ্ধে তেহৰানে কৰা হিংসাত্মক দমনৰ উদ্ধৃতি দি আমেৰিকাৰ ৰাষ্ট্ৰপতি ড’নাল্ড ট্ৰাম্পে আমেৰিকাৰ সামৰিক আক্ৰমণৰ পৰা হাত সাৰিবলৈ ইৰাণক নিজৰ পাৰমাণৱিক কাৰ্যসূচীক লৈ চুক্তিবদ্ধ হ’বলৈ বাৰে বাৰে আহ্বান জনাইছে । আমেৰিকাই মধ্যপ্ৰাচ্যলৈ প্ৰেৰণ কৰিছে বিমানবাহী জাহাজ ইউ এছ এছ আব্ৰাহাম লিংকন আৰু কেইবাখনো গাইডেড-মিছাইল যুদ্ধ জাহাজ ।

ইৰাণে ধাৰাবাহিকভাৱে কৈ আহিছে যে তেওঁলোকৰ পাৰমাণৱিক কাৰ্যসূচী সম্পূৰ্ণ শান্তিপূৰ্ণ । কিন্তু পশ্চিমীয়া দেশ আৰু আই এ ই এয়ে কয় যে ইৰাণৰ ২০০৩ চনলৈকে পদ্ধতিগত পাৰমাণৱিক অস্ত্ৰৰ কাৰ্যসূচী আছিল আৰু এতিয়াও ইৰাণৰ হাতত বোমা নিৰ্মাণৰ কাৰিকৰী ক্ষমতা আছে ।

লগতে পঢ়ক : শান্তি আৰু নিৰাপত্তা দিয়াত ব্যৰ্থ ৰাষ্ট্ৰসংঘ; বিশ্ব সংস্থাক লৈ ভাৰতৰ বিস্ফোৰক মন্তব্য