ৰাষ্ট্ৰপতি ড’নাল্ড ট্ৰাম্পে সকীয়াই দিয়ে যে যদিহে ইৰাণে ৪৮ ঘণ্টাৰ ভিতৰত হৰমুজ প্ৰণালী মুকলি নকৰে তেন্তে আমেৰিকাই ধ্বংসলীলাৰ সৃষ্টি কৰিব
হৰমুজ প্ৰণালীক লৈ আমেৰিকাই ইৰাণক সতৰ্কবাণী জাৰি কৰিছে । দেওবাৰে আমেৰিকাৰ ৰাষ্ট্ৰপতি ড’নাল্ড ট্ৰাম্পে সকীয়াই দিয়ে যে যদিহে ইৰাণে ৪৮ ঘণ্টাৰ ভিতৰত হৰমুজ প্ৰণালী মুকলি নকৰে তেন্তে আমেৰিকাই ধ্বংসলীলাৰ সৃষ্টি কৰিব । আমেৰিকাই স্পষ্টভাৱে উল্লেখ কৰিছে যে তেওঁলোকে ইৰাণৰ পাৱাৰ প্লান্টত আক্ৰমণ সংঘটিত কৰিব ।
ট্ৰুথ ছ’চিয়েলত দিয়া এটা পোষ্টত ট্ৰাম্পে ইৰাণক হৰমুজ জলপথ ৪৮ ঘন্টাৰ ভিতৰত মুকলি কৰিবলৈ নিৰ্দেশ দিয়ে । উল্লেখ্য য়ে, আমেৰিকা-ইজৰাইলৰ আক্ৰমণ আৰু ইৰাণৰ প্ৰতিশোধমূলক আক্ৰমণ আৰম্ভ হোৱাৰ পিছত ইৰাণে এই গুৰুত্বপূৰ্ণ জলপথ সম্পূৰ্ণৰূপে বন্ধ কৰি দিছে । ট্ৰাম্পে পোষ্টটোত উল্লেখ কৰিছে যে যদিহে ইৰাণে ৪৮ ঘণ্টাৰ ভিতৰত হৰমুজ প্ৰণালী সম্পূৰ্ণৰূপে মুকলি নকৰে তেন্তে আমেৰিকাই তেওঁলোকৰ বিদ্যুৎ কেন্দ্ৰসমূহ আক্ৰমণ কৰি সম্পূৰ্ণৰূপে ধ্বংস কৰিব । এই আক্ৰমণ আটাইতকৈ ডাঙৰ বিদ্যুৎ কেন্দ্ৰৰ পৰা আৰম্ভ কৰিব বুলিও ট্ৰাম্পে উল্লেখ কৰে ।
ইৰানে হৰমুজ প্ৰণালীত জাহাজ চলাচলত আহি পৰা ভাবুকিৰ বাবে তেলৰ মূল্য আকাশলংঘী হোৱাৰ সময়তে ট্ৰাম্পে এই সকীয়নি প্ৰদান কৰিছে । শুকুৰবাৰে ৰাষ্ট্ৰপতিগৰাকীয়ে ইংগিত দিয়ে যে বিশ্বৰ গুৰুত্বপূৰ্ণ তেল যোগানৰ জলপথ হৰমুজ প্ৰণালী সুস্থিৰ নকৰাকৈয়ে চলি থকা সংঘাতৰ পৰা আমেৰিকাই আঁতৰি আহিব পাৰে ।
লগতে পঢ়ক : ইজৰাইলৰ পাৰমাণৱিক ঘাটিত ইৰাণৰ ভীষণ আক্ৰমণ
