টি-২০ বিশ্বকাপৰ পৰা ইতিমধ্যে বাহিৰ হৈছে বাংলাদেশ । দলটোক আনুষ্ঠানিকভাৱে বাহিৰ কৰিছে আইচিচিয়ে । ইয়াৰ পিছতে এতিয়া এই মেগা প্ৰতিযোগিতাত প্ৰৱেশ ঘটিছে এই দলৰ…

২০২৬ চনৰ টি-২০ বিশ্বকাপৰ পৰা আনুষ্ঠানিকভাৱে বাহিৰ হ’ল বাংলাদেশ । আন্তঃৰাষ্ট্ৰীয় ক্ৰিকেট পৰিষদে নিশ্চিত কৰিছে যে বাংলাদেশৰ ঠাইত স্কটলেণ্ডক প্ৰতিযোগিতাখনত অন্তৰ্ভুক্ত কৰা হৈছে । এই সিদ্ধান্তৰ বিষয়ে আইচিচিয়ে পত্ৰযোগে বাংলাদেশক অৱগত কৰিছে ।

বাংলাদেশক বাদ দিয়াৰ পিছত স্কটলেণ্ডে আইচিচি পুৰুষৰ টি-২০ বিশ্বকাপ ২০২৬ত স্থান লাভ কৰিছে । স্কটলেণ্ডক গ্ৰুপ চিত স্থান দিয়া হৈছে, য’ত ইংলেণ্ড, ৱেষ্ট ইণ্ডিজ, নেপাল, ইটালীৰ বিৰুদ্ধে খেলিব দলটোৱে ।

আই চি চিৰ ভোটিঙত পৰাস্ত বাংলাদেশ-

উল্লেখ্য যে বাংলাদেশ আৰু আইচিচিৰ মাজত প্ৰায় তিনি সপ্তাহ ধৰি চলি আছে এই বিতৰ্ক । বাংলাদেশে ভাৰতত বিশ্বকাপ খেলিব নোৱাৰাৰ লগতে নিজৰ মেচসমূহ শ্ৰীলংকালৈ স্থানান্তৰিত কৰাৰ বাবে জোৰ দিছিল । অৱশ্যে আইচিচিয়ে মেচসমূহ ভাৰতে অনুষ্ঠিত হ’ব বুলি স্পষ্ট কৰি দিছিল  । শেষত আইচিচি ব’ৰ্ডে ১৪-২ সংখ্যাগৰিষ্ঠতাৰে ভোটদানত ভাৰতত বাংলাদেশৰ খেলত অনুমোদন জনায় । এই ভোটিঙত কেৱল পাকিস্তানে বাংলাদেশৰ সপক্ষে ভোট দিয়ে ।

বিতৰ্কৰ সূত্ৰপাত-

এই সমগ্ৰ বিতৰ্ক আৰম্ভ হৈছিল আই পি এল ২০২৬ৰ নিলামৰ পিছত । কলকাতা নাইট ৰাইডাৰ্ছে বাংলাদেশী বেগী বলাৰ মুস্তাফিজুৰ ৰহমানক ৯.২০ কোটি ধনেৰে নিজৰ দলত অন্তৰ্ভূক্ত কৰে । কিন্তু এই পদক্ষেপে বাংলাদেশত হিন্দুসকলৰ ওপৰত অত্যাচাৰৰ বাতৰিৰ উদ্ধৃতি দি ভাৰতত প্ৰতিবাদৰ সূত্ৰপাত ঘটায় । ইয়াৰ পিছতে বিচিচিআইয়ে ৰহমানক আই পি এলৰ পৰা ৰিলিজ কৰি দিয়ে ।

এই সিদ্ধান্তই বাংলাদেশ ব’ৰ্ডক ক্ষুব্ধ কৰি তুলিছিল আৰু টি-২০ বিশ্বকাপ বৰ্জনৰ ভাবুকি দিছিল । বিচিবিয়ে আইচিচিলৈ এখন পত্ৰ লিখি ভাৰতত নিজৰ মেচ খেলিব নোৱাৰিব বুলি উল্লেখ কৰে । দলটোৰ মেচসমূহ শ্ৰীলংকা বা পাকিস্তানলৈ স্থানান্তৰিত কৰাৰ দাবী জনাইছিল বাংলাদেশে ।

বাংলাদেশে যুক্তি দিছিল যে ভাৰতত তেওঁলোকৰ খেলুৱৈৰ সুৰক্ষাৰ প্ৰতি ভাবুকি আহিব পাৰে । অৱশ্যে আইচিচিয়ে নিজৰ নিৰাপত্তা প্ৰতিবেদনত কোনো ধৰণৰ সম্ভাৱ্য ভাবুকিৰ কথা অস্বীকাৰ কৰে । শেষত আইচিচিয়ে স্পষ্ট কৰি দিয়ে যে বাংলাদেশে ভাৰতত টি-২০ বিশ্বকাপ খেলিব লাগিব । যদি দলটো ভাৰতলৈ নাহে তেতিয়া প্ৰতিযোগিতাৰ বাহিৰ হ’ব লাগিব বুলি স্পষ্ট কৰি দিছিল আইচিচিয়ে ।

যেতিয়া বাংলাদেশে আইচিচিৰ এই নিৰ্দেশ মানি ল’বলৈ অস্বীকাৰ কৰে, তেতিয়া আইচিচিয়ে ভোটিঙৰ সহায় লয়, য’ত বাংলাদেশে পৰাস্ত হয় । বাংলাদেশৰ ঠাইত এতিয়া স্কটলেণ্ডে টি-২০ বিশ্বকাপত স্থান লাভ কৰিছে ।

লগতে পঢ়ক : অষ্ট্ৰেলিয়াৰ বিৰুদ্ধে টেষ্টৰ বাবে ঘোষণা ভাৰতীয় দল, অসমৰ এইগৰাকী খেলুৱৈয়ে পালে সুযোগ…

ভাৰতত টি-২০ বিশ্বকাপ খেলা সন্দৰ্ভত প্ৰতিক্ৰিয়া প্ৰকাশ কৰিছে বাংলাদেশ ক্ৰিকেট দলৰ অধিনায়ক লিটন দাসে । এই প্ৰতিক্ৰিয়াই চলি থকা বিতৰ্কটোক আৰু অধিক জটিল কৰি তুলিছে ।

বাংলাদেশৰ অধিনায়ক লিটন দাসৰ শেহতীয়া বক্তব্যই টি-২০ বিশ্বকাপ ২০২৬ত বাংলাদেশৰ অংশগ্ৰহণক লৈ চলি থকা বিতৰ্কত অধিক ইন্ধন যোগাইছে । আন্তঃৰাষ্ট্ৰীয় ক্ৰিকেট পৰিষদ আৰু বাংলাদেশ ক্ৰিকেট ব’ৰ্ডৰ মাজত স্থান আৰু নিৰাপত্তাক লৈ হোৱা বিবাদে পৰিস্থিতি ইমানেই জটিল কৰি তুলিছে যে প্ৰতিযোগিতা আৰম্ভ হ’বলৈ মাত্ৰ কেইদিনমান বাকী থকাৰ সময়তে বাংলাদেশ ভাৰতলৈ আহিব নে নাহে সেয়া স্পষ্ট হোৱা নাই ।

বিচিবি-আইচিচিৰ যুঁজ-

বাংলাদেশ ক্ৰিকেট ব’ৰ্ডে দলটোৰ টি-২০ বিশ্বকাপৰ মেচসমূহ ভাৰতৰ পৰা শ্ৰীলংকালৈ স্থানান্তৰিত কৰিবলৈ দাবী জনাইছে । নিৰাপত্তাজনিত উদ্বেগ প্ৰকাশ কৰিছে ব’ৰ্ডে । কিন্তু আইচিচিয়ে এই দাবীত এতিয়াও সন্মতি দিয়া নাই আৰু কেইবাবাৰো বৈঠক অনুষ্ঠিত হোৱাৰ পিছতো কোনো সিদ্ধান্তত উপনীত হোৱা নাই । এই অচলাৱস্থাই বাংলাদেশক বিভ্ৰান্তিৰ মাজলৈ ঠেলি দিছে । খেলুৱৈৰ পৰা অনুৰাগীলৈকে সকলোৱে চূড়ান্ত সিদ্ধান্তৰ বাবে অপেক্ষা কৰি আছে ।

অধিনায়ক লিটন দাসৰ প্ৰতিক্ৰিয়া-

মঙলবাৰৰ বাংলাদেশ প্ৰিমিয়াৰ লীগৰ খেলখনৰ পিছত প্ৰতিযোগিতাখনৰ পিটচসমূহ টি-২০ বিশ্বকাপৰ প্ৰস্তুতিৰ ক্ষেত্ৰত সহায়ক হৈছে নে নাই বুলি সোধাত অধিনায়ক লিটন দাসে স্পষ্ট কৰি দিয়ে যে এই সময়ত তেওঁ এই বিষয়ত কথা ক’ব পৰা অৱস্থাত নাই ।

লিটন দাসে কয়, “আপুনি নিশ্চিতভাৱে কৈছেনে যে আমি টি-২০ বিশ্বকাপ খেলিম ? মই অনিশ্চিত, সকলোৱে অনিশ্চিত । মই ভাবো সমগ্ৰ বাংলাদেশ বৰ্তমান অনিশ্চিত । মই উত্তৰ নিদিওঁ । আপুনি কি সুধিছে মই বুজি পাইছো । উত্তৰ দিয়াটো মোৰ বাবে নিৰাপদ নহয় । মোৰ উত্তৰ নাই ।” এই বক্তব্যই সমগ্ৰ বিতৰ্কটোক খেলুৱৈসকলৰ সুৰক্ষা আৰু অৱস্থাৰ ওপৰত পুনৰ কেন্দ্ৰীভূত কৰিছে । ছ’চিয়েল মিডিয়াত বৃহৎ সংখ্যক অনুৰাগীয়ে প্ৰশ্ন উত্থাপন কৰিছে যে কি হেঁচাত অধিনায়কগৰাকীয়ে মুকলিকৈ কথা কোৱাত সমস্যাৰ সন্মুখীন হৈছে ।

ইয়াৰ পূৰ্বে বাংলাদেশ চৰকাৰৰ ক্ৰীড়া উপদেষ্টা আছিফ নজৰুলেও সংবাদ মাধ্যমত স্পষ্ট বক্তব্য আগবঢ়াইছিল যে আইচিচিয়ে ২১ জানুৱাৰীৰ সময়সীমা নিৰ্ধাৰণ কৰিলেও কোনো কাৰণতে বাংলাদেশে বিশ্বকাপ খেলিবলৈ ভাৰতলৈ নাযায় ।

লগতে পঢ়ক : বিশ্বকাপৰ বাবে প্ৰস্তুতি চলোৱাৰ শেষ সুযোগ, আজিৰে পৰা ভাৰত-নিউজীলেণ্ডৰ টি-২০ শৃংখলা

আই চি চি আৰু বাংলাদেশ ক্ৰিকেট ব’ৰ্ডৰ মাজত টি–২০ বিশ্বকাপৰ মেচ খেলিবলৈ অস্বীকাৰ কৰা বিষয়টোলৈ বৈঠক অনুষ্ঠিত হ’ব । খেলুৱৈসকলৰ সুৰক্ষাক অজুহাত হিচাপে দেখুৱাই বি চি বিয়ে মেচৰ স্থান সলনি কৰাৰ দাবী উত্থাপন কৰিছিল ।

ভাৰতত টি–২০ বিশ্বকাপৰ মেচ খেলিবলৈ অস্বীকাৰ কৰা বিষয়টোলৈ আন্তঃৰাষ্ট্ৰীয় ক্ৰিকেট পৰিষদ (আই চি চি) আৰু বাংলাদেশ ক্ৰিকেট ব’ৰ্ড (বি চি বি)ৰ মাজত বৈঠক অনুষ্ঠিত হ’ব । নিৰাপত্তাৰ অজুহাত দেখুৱাই বাংলাদেশে ভাৰতত নিজৰ মেচসমূহ নেখেলাৰ দাবী উত্থাপন কৰিছে ।

প্ৰকাশিত এক প্ৰতিবেদন অনুসৰি, এই সন্দৰ্ভত মঙলবাৰে আলোচনা হোৱাৰ সম্ভাৱনা আছে । বৈঠকত আই চি চিয়ে বি চি বিক বাংলাদেশ দলটোৱে বৰ্তমানৰ সূচী অনুসাৰেই যাতে ভাৰতত নিজৰ গ্ৰুপ পৰ্যায়ৰ মেচসমূহ খেলিবলৈ সন্মতি প্ৰদান কৰে তাৰ বাবে অনুৰোধ জনাব ।

ভাৰতত খেলিব লাগিব চাৰিখন মেচ

টি–২০ বিশ্বকাপৰ আৰম্ভণি ৭ ফেব্ৰুৱাৰীৰ পৰা হ’ব । ভাৰত আৰু শ্ৰীলংকালৈ যৌথভাৱে টি-২০ বিশ্বকাপৰ এই সংস্কৰণ আয়োজন কৰিছে । বাংলাদেশে নিজৰ চাৰিখন লীগ মেচৰ ভিতৰত তিনিখন কলকাতাত আৰু এখন মুম্বাইত খেলিব লাগিব । বাংলাদেশৰ লীগ মেচসমূহ কলকাতাত ৱেষ্ট ইণ্ডিজ (৭ ফেব্ৰুৱাৰী), ইটালী (৯ ফেব্ৰুৱাৰী) আৰু ইংলেণ্ড (১৪ ফেব্ৰুৱাৰী)ৰ বিৰুদ্ধে অনুষ্ঠিত হ’ব আৰু মুম্বাইত নেপাল (১৭ ফেব্ৰুৱাৰী)ৰ বিৰুদ্ধে খেলিব দলটোৱে । উল্লেখ্য যে, বাংলাদেশক গ্ৰুপ ‘চি’ত ইটালী, নেপাল, ইংলেণ্ড আৰু ৱেষ্ট ইণ্ডিজৰ সৈতে অন্তৰ্ভুক্ত কৰা হৈছে ।

আই চি চিলৈ পত্ৰ প্ৰেৰণ কৰিছিল বাংলাদেশ ক্ৰিকেট বৰ্ডে-

ইয়াৰ পূৰ্বে দেওবাৰে বাংলাদেশ ক্ৰিকেট ব’ৰ্ডে (বি চি বি) আই চি চিলৈ পত্ৰ প্ৰেৰণ কৰি অনুৰোধ জনাইছিল যে ভাৰতৰ সলনি বাংলাদেশৰ মেচসমূহ শ্ৰীলংকাত অনুষ্ঠিত কৰা হওক । খেলুৱৈসকলৰ সুৰক্ষাক অজুহাত হিচাপে দেখুৱাই বাংলাদেশ ক্ৰিকেট বৰ্ডে মেচৰ স্থান সলনি কৰাৰ দাবী উত্থাপন কৰিছিল ।

প্ৰকৃততে, আই পি এলৰ পৰা মুস্তাফিজুৰ ৰহমানক বাহিৰ কৰা পিছৰে পৰাই বাংলাদেশ ক্ৰিকেট বৰ্ড অসন্তুষ্ট হৈ পৰিছে । ভাৰত আৰু বাংলাদেশৰ মাজত বিতৰ্ক তেতিয়াৰে পৰা অধিক তীব্ৰ হৈছে যেতিয়া ভাৰতীয় ক্ৰিকেট নিয়ন্ত্ৰণ ব’ৰ্ডে (বি চি চি আই) আই পি এল ফ্ৰেঞ্চাইজী কলকাতা নাইট ৰাইডাৰ্ছ (কে কে আৰ)ক বাংলাদেশৰ ফাষ্ট বলাৰ মুস্তাফিজুৰ ৰহমানক দলৰ পৰা বাদ দিবলৈ নিৰ্দেশ দিয়ে ।

উল্লেখযোগ্য যে, কে কে আৰে যোৱা মাহত অনুষ্ঠিত হোৱা মিনি নিলামত মুস্তাফিজুৰক ৯.২০ কোটি টকাৰ বিনিময়ত ক্ৰয় কৰিছিল । কিন্তু বি চি চি আইৰ নিৰ্দেশ অনুসৰি কে কে আৰে এই বাংলাদেশী বলাৰগৰাকীক দলৰ পৰা বাহিৰ কৰি দিয়ে ।

আই চি চিলৈ প্ৰেৰণ কৰা পত্ৰত বি চি বিয়ে উল্লেখ কৰে যে, বৰ্তমানৰ পৰিস্থিতি বিবেচনা কৰি ভাৰতত থকা বা ভাৰতলৈ যোৱা বাংলাদেশী নাগৰিকসকলৰ সুৰক্ষাক লৈ উদ্বেগ প্ৰকাশ কৰা বাংলাদেশ চৰকাৰৰ পৰামৰ্শ অনুসৰি তেওঁলোকে এই সিদ্ধান্ত লৈছে । অৱশ্যে বি চি বিয়ে সতর্কতামূলক অৱস্থান গ্ৰহণ কৰিছে যদিও বাংলাদেশ চৰকাৰে এতিয়ালৈকে কোনো ভ্ৰমণ পৰামৰ্শ জাৰি কৰা নাই আৰু নিজৰ নাগৰিকসকলৰ ভাৰতলৈ অহা-যোৱা বা ভাৰতত থকাৰ ক্ষেত্ৰতো কোনো ধৰণৰ নিষেধাজ্ঞা আৰোপ কৰা নাই ।

আই চি চিৰ উত্তৰৰ অপেক্ষা

এই বিষয়টোৰ সন্দৰ্ভত আই চি চিয়ে এতিয়ালৈকে কোনো ৰাজহুৱা মন্তব্য কৰা নাই আৰু উত্থাপিত প্ৰশ্নসমূহৰো উত্তৰ দিয়া নাই । সোমবাৰে মুম্বাইস্থিত বি চি চি আইৰ মুখ্য কাৰ্যালয়ত আই চি চিৰ শীৰ্ষ বিষয়াসকল (অধ্যক্ষ জয় শ্বাহো আছে)এই ঘটনাক্ৰম আৰু আগলৈ ল’বলগীয়া পদক্ষেপসমূহ সন্দৰ্ভত আলোচনা কৰিবলৈ উপস্থিত আছিল ।

বি চি বিৰ ক্ষেত্ৰত বুজা গৈছে যে এই বিষয়ত আই চি চি আৰু বাংলাদেশ চৰকাৰৰ সৈতে আলোচনাৰ বাবে বৰ্ডৰ সভাপতি আমিনুল ইছলাম আৰু মুখ্য কাৰ্যবাহী বিষয়া নিজামুদ্দিন চৌধুৰীকহে অধিকাৰ দিয়া হৈছে ।

লগতে পঢ়ক : নিউজীলেণ্ডৰ বিৰুদ্ধে এদিনীয়া শৃংখলাৰ পূৰ্বে শ্ৰেয়াছ আয়াৰৰ শক্তিশালী প্ৰত্যাৱৰ্তন…