আইচিচিয়ে আলটিমেটাম জাৰি কৰা পিছতো শিক্ষা গ্ৰহণ কৰা নাই বাংলাদেশ ক্ৰিকেট ব’ৰ্ডে । শেহতীয়াকৈ টি-২০ বিশ্বকাপক লৈ পুনৰ আন এক বিবৃতি দিছে দেশখনৰ ক্ৰীড়া পৰামৰ্শদাতা আছিফ নজৰুলে ।
বাংলাদেশৰ ক্ৰীড়া উপদেষ্টা আছিফ নাজৰুলৰ আন এক বিবৃতি জাৰি কৰিছে । তেওঁ কয় যে বিচিচিআইৰ হেঁচাত আন্তঃৰাষ্ট্ৰীয় ক্ৰিকেট পৰিষদে যদি বাংলাদেশৰ ওপৰত অযুক্তিকৰ চৰ্ত আৰোপ কৰে তেন্তে সেয়া মানি লোৱা নহ’ব । নজৰুলে বিগত সময়ত উত্তেজনামূলক বক্তব্য আগবঢ়াইছে । কেইবা সপ্তাহ ধৰি চলি থকা এই বিতৰ্কৰ এতিয়াও কোনো সঠিক সমাধান ওলোৱা নাই ।
মঙলবাৰে সচিবালয়ত বক্তব্য ৰাখি আছিফ নাজৰুলে কয় যে, “বিচিচিআইৰ হেঁচাত আইচিচিয়ে যদি আমাৰ সন্মুখত কোনো অন্যায় চৰ্ত ৰাখে, তেন্তে আমি সেইবোৰ মানি নলওঁ । আন্তঃৰাষ্ট্ৰীয় ক্ৰিকেটত ইয়াৰ উদাহৰণ আছে, যেতিয়া ভাৰতে পাকিস্তানত খেলিবলৈ অস্বীকাৰ কৰিছিল আৰু আইচিচিয়ে স্থান সলনি কৰিবলগীয়া হৈছিল । আমি টি-২০ বিশ্বকাপৰ ভেন্যু সলনি কৰিবলৈ যুক্তিসংগত অনুৰোধ জনাইছো ।”
শেহতীয়া এক প্ৰতিবেদন অনুসৰি আইচিচিয়ে বাংলাদেশ ক্ৰিকেট ব’ৰ্ডক ২১ জানুৱাৰীৰ ভিতৰত দলটোৱে খেলিবলৈ ভাৰতলৈ আহিব নে নাই সেয়া সিদ্ধান্ত ল’বলৈ এক উলটিমেটাম জাৰি কৰে । প্ৰতিবেদন অনুসৰি যদি বিচিবিয়ে নিজৰ দল ভাৰতলৈ প্ৰেৰণ কৰিবলৈ অস্বীকাৰ কৰে তেন্তে ৰেংকিঙৰ ভিত্তিত স্কটলেণ্ডক তেওঁলোকৰ সলনি বিশ্বকাপত স্থান দিয়া হ’ব ।
অৱশ্যে বিচিবিৰ মিডিয়া কমিটীৰ অধ্যক্ষ আমজাদ হুছেইনে উল্লেখ কৰে যে ১৭ জানুৱাৰীত বিচিবিৰ বিষয়াসকলে আইচিচিৰ এজন প্ৰতিনিধিক সাক্ষাৎ কৰিছিল । হুছেইনৰ মতে, সেই বৈঠকৰ পিছত আইচিচিয়ে বাংলাদেশ ক্ৰিকেট ব’ৰ্ডৰ সৈতে শীঘ্ৰে পুনৰ সংযোগ স্থাপন কৰিব বুলি উল্লেখ কৰিছিল যদিও কোনো তাৰিখ প্ৰকাশ কৰা হোৱা নাই ।
ইফালে, ২০২৬ চনৰ টি-২০ বিশ্বকাপৰ মূল সূচী সলনি কৰিবলৈ অনিচ্ছুক আইচিচি । বৰ্তমানৰ সূচী অনুসৰি বাংলাদেশক নিউজীলেণ্ড, ৱেষ্ট ইণ্ডিজ, ইটালী আৰু নেপালৰ সৈতে গ্ৰুপ চিত স্থান দিয়া হৈছে । বাংলাদেশে অহা ৭ ফেব্ৰুৱাৰীত ৱেষ্ট ইণ্ডিজৰ বিৰুদ্ধে প্ৰথমখন খেল খেলিব ।
লগতে পঢ়ক : ৰোহিত-কোহলীৰ কোটি কোটি টকা পাৰিশ্ৰমিক কৰ্তন ! কেন্দ্ৰীয় চুক্তি সলনি কৰাৰ পথত বিচিচিআই
