শনিবাৰে টি-২০ বিশ্বকাপৰ বাবে ঘোষণা কৰা ভাৰতীয় দলৰ পৰা বাদ পৰিল তাৰকা বেটছমেন শুভমন গীল । খেলুৱৈগৰাকীক নিৰ্বাচন নকৰা সন্দৰ্ভত অজিত আগাৰকাৰে প্ৰকাশ কৰিলে এই কথা…

আই চি চি টি-২০ বিশ্বকাপ ২০২৬ৰ বাবে ঘোষণা কৰা হ’ল ভাৰতীয় দল । সূৰ্যকুমাৰ যাদৱৰ অধিনায়কত্বত টিম ইণ্ডিয়াই নিজৰ খিতাপ অক্ষুন্ন ৰখাৰ উদ্দেশ্যৰে যুঁজত নামিব । অধিনায়ক সূৰ্য্য, মুখ্য নিৰ্বাচক অজিত আগৰকাৰ, বি চি চি আইৰ সচিব দেৱজিৎ শইকীয়া উপস্থিত থকা সংবাদমেলত এই দলটো ঘোষণা কৰা হয় । সংবাদমেলত আটাইতকৈ ডাঙৰ আলোচনাৰ বিষয় আছিল শেহতীয়াকৈ টি-২০ দলৰ সহ-অধিনায়ক হিচাপে দায়িত্বত থকা তাৰকা বেটছমেন শুভমন গীল দলৰ পৰা বাদ পৰাটো । মুখ্য নিৰ্বাচক অজিত আগৰকাৰে গীল বিশ্বকাপৰ দলৰ পৰা বাদ পৰাৰ মূল কাৰণ ব্যাখ্যা কৰে ।

কিয় বাদ দিয়া হ’ল শুভমন গীলক ?

মুখ্য নিৰ্বাচক অজিত আগৰকাৰে শুভমন গীল বাদ পৰাৰ কাৰণ প্ৰকাশ কৰি কয় যে গীলৰ শেহতীয়া ছন্দ আৰু দলৰ সংমিশ্ৰণৰ বাধাই এই সিদ্ধান্তৰ আঁৰৰ কাৰণ । অজিত আগৰকাৰে কয়, “আমি জানো যে তেওঁ কিমান মানসম্পন্ন খেলুৱৈ, কিন্তু হয়তো তেওঁ এই মুহূৰ্তত তেওঁৰ কেইটামান ৰান কম আছে । যোৱা বিশ্বকাপতো বাদ পৰাটো দুৰ্ভাগ্যজনক আছিল, কিয়নো আমি বিভিন্ন কম্বিনেচনৰ সৈতে গৈছিলো । কিন্তু এই সিদ্ধান্ত আন সকলোতকৈ বেছি কম্বিনেচনৰ বাবেই লোৱা হৈছে । যেতিয়া ১৫জন বাছনি কৰা হয়, তেতিয়া কোনোবা বাদ পৰিব লগা হয় হয় আৰু দুৰ্ভাগ্যজনকভাৱে, এইবাৰ গীলৰ ক্ষেত্ৰত এনে হয় ।”

উল্লেখ্য যে, শুভমন গীলৰ শেহতীয়া প্ৰদৰ্শন যথেষ্ট দুৰ্বল । দক্ষিণ আফ্ৰিকাৰ বিৰুদ্ধে টি-২০ শৃংখলাত তেওঁ সম্পূৰ্ণৰূপে ব্যৰ্থ হৈছিল । তেওঁ মাত্ৰ ৪, ৪, ০, আৰু ২৮ ৰানৰ ইনিংছ খেলিছিল । তদুপৰি ২০২৫ চনত টি-২০ ফৰ্মেটত তেওঁ এটাও ডাঙৰ ইনিংছ খেলিব পৰা নাছিল, এটাও অৰ্ধশতক অৰ্জন কৰিব পৰা নাছিল । ইয়াৰ ফলত নিৰ্বাচকসকলে এই উল্লেখযোগ্য সিদ্ধান্ত ল’বলৈ বাধ্য হয় । পৰৱৰ্তী সময়ত তেওঁ আঘাতৰ বাবে চূড়ান্ত মেচত অংশ লোৱাত ব্যৰ্থ হয় ।

আনহাতে, উইকেটকীপাৰ-বেটছমেন জিতেশ শৰ্মাও দলত স্থানৰ পৰা বঞ্চিত হয় । আগৰকাৰে কয় যে তেওঁ শীৰ্ষ ক্ৰমত অধিক উইকেটৰক্ষক থকাতো বিচাৰে আৰু তেনে কৰিবলৈ তেওঁ এজন মূল বেটছমেনক ত্যাগ কৰিব লগা হয় । আগৰকাৰে কয়, “আমি কম্বিনেচনটো চাইছো । জিতেশে বিশেষ ভুল কৰা নাই । অৱশ্যে তেওঁ নিম্ন ক্ৰমত বেটিং কৰে আৰু শীৰ্ষ ক্ৰমত উইকেটকীপাৰ-বেটছমেনৰ প্ৰয়োজনীয়তাৰ বাবে ঈশান কিষনক তেওঁৰ ঠাইত সুযোগ দিয়া হৈছে ।”

লগতে পঢ়ক : নিউজীলেণ্ডৰ বিৰুদ্ধে টি-২০ শৃংখলাৰ বাবে ভাৰতীয় দল ঘোষণা, বাদ পৰিল কেইবাজনো খেলুৱৈ

ৰোহিত শৰ্মাক ডাঙৰ দায়িত্ব

ভাৰতৰ প্ৰাক্তন অধিনায়ক তথা দুবাৰৰ টি-২০ বিশ্বকাপ বিজয়ী ৰোহিত শৰ্মাক আই চি চি পুৰুষ টি-২০ বিশ্বকাপ ২০২৬ৰ টুৰ্ণামেণ্টত ডাঙৰ দায়িত্ব প্ৰদান কৰা হৈছে । হিটমেন হিচাবে পৰিচিত ৰোহিতক টি-২০ বিশ্বকাপ ২০২৬ৰ টুৰ্ণামেন্ট এম্বেছাদৰ হিচাপে নিযুক্তি দিয়া হৈছে ।

২০২৬ চনৰ ৭ ফেব্ৰুৱাৰীৰ পৰা ৮ মাৰ্চলৈ ভাৰত আৰু শ্ৰীলংকাত অনুষ্ঠিত হ’ব টি-২০ বিশ্বকাপ প্ৰতিযোগিতা । ৭ ফেব্ৰুৱাৰীৰ পৰা আৰম্ভ হ’বলগা এই প্ৰতিযোগিতাৰ ফাইনেল ৮ মাৰ্চত অনুষ্ঠিত হ’ব । ১৫ ফেব্ৰুৱাৰীত ভাৰত আৰু পাকিস্তানৰ মাজত গ্ৰুপ পৰ্যায়ৰ হাই ভল্টেজ মেচ অনুষ্ঠিত হ’ব ।

২০২৪ চনৰ টি-২০ বিশ্বকাপত ৰোহিত শৰ্মাই নেতৃত্ব দিছিল টিম ইণ্ডিয়াক । ৪,২৩১ ৰান সংগ্ৰহ কৰি টি-২০ আন্তঃৰাষ্ট্ৰীয়ৰ পৰা ইতিমধ্যে অৱসৰ গ্ৰহণ কৰিছে ৰোহিতে । এই ফৰ্মেটত তেওঁৰ গড় ৩২.০১ আৰু ষ্ট্ৰাইক ৰেট ১৪০.৮৯ ।

উল্লেখ্য যে, ভাৰতৰ হৈ দুটা বিশ্বকাপ জয়ৰ সৈতে জড়িত আছিল হিটমেন ৰোহিত শৰ্মা । ২০০৭ চনৰ টি-২০ বিশ্বকাপৰ অভিষেক মেচতে তেওঁ দৰ্শনীয় প্ৰদৰ্শন আগবঢ়াইছিল । য’ত তেওঁ দক্ষিণ আফ্ৰিকাৰ বিৰুদ্ধে ৫০* আৰু পাকিস্তানৰ বিৰুদ্ধে ফাইনেলত ৩০* ৰান সংগ্ৰহ কৰিছিল ।

২০২৪ চনৰ টি-২০ বিশ্বকাপত ভাৰতৰ অধিনায়ক হিচাপে তেওঁ ১১ বছৰৰ পাছত ভাৰতক আই চি চি ট্ৰফীলৈ প্ৰদান কৰে । এই প্ৰতিযোগিতাত ১৫৬.৭০ ষ্ট্ৰাইক ৰেটেৰে ২৫৭ ৰান সংগ্ৰহ কৰি ভাৰতৰ সৰ্বাধিক স্ক’ৰাৰ হিচাপে পৰিগণিত হয় ৰোহিত । তেওঁৰ স্মৰণীয় ইনিংছ আছিল অষ্ট্ৰেলিয়াৰ বিৰুদ্ধে ৯২ (৪১) আৰু ইংলেণ্ডৰ বিৰুদ্ধে ৫৭ (৩৯) ৰান । বিশ্বকাপ জয়ৰ পিছতে ৰোহিতে টি-২০ ক্ৰিকেটৰ পৰা অৱসৰ লোৱাৰ কথা ঘোষণা কৰে ।

টুৰ্ণামেন্ট এম্বেছাদৰ হোৱাৰ পিছত ৰোহিত শৰ্মাই কয়, “এই প্ৰতিযোগিতাখন ভাৰতলৈ ঘূৰি অহাটো বৰ ভাল কথা । নতুন ৰূপত এই ফৰ্মেটত জড়িত হোৱাটো এক সন্মানৰ বিষয় । সকলো খেলুৱৈলৈ শুভেচ্ছা । আশাকৰোঁ তেওঁলোকে ভাৰতৰ আতিথ্য উপভোগ কৰিব আৰু স্মৰণীয় স্মৃতি ঘৰলৈ লৈ যাব ।”

লগতে পঢ়ক : ঘোষণা হ’ল আই চি চি টি ২০ বিশ্বকাপৰ দিন; ১৫ ফেব্ৰুৱাৰীত ভাৰত-পাকিস্তানৰ যুঁজ