পৰাজয়ৰ দিশে ভাৰতীয় দল!
গুৱাহাটীৰ বৰ্ষাপাৰা ক্ৰিকেট ষ্টেডিয়ামত ভাৰত আৰু দক্ষিণ আফ্ৰিকাৰ মাজত চলি আছে শৃংখলাৰ দ্বিতীয় তথা অন্তিম টেষ্ট । মঙলবাৰে (২৫ নৱেম্বৰ) খেলখনৰ চতুৰ্থ দিনটোত ভাৰতীয় দলে সন্মুখত লাভ কৰে ৫৪৯ ৰানৰ বিশাল বিজয় লক্ষ্য ।
ভাৰতীয় দলটো লক্ষ্যৰ পৰা এতিয়াও ৫২২ ৰান দূৰত । পঞ্চম দিনটোত ভাৰতীয় দলটোৱে কেনেদৰে খেলিব সেয়া লক্ষণীয় হ’ব ৷ চতুৰ্থ দিনা ষ্টাম্পত ভাৰতৰ স্ক’ৰ আছিল ২৭/২ । অপৰাজিত হৈ আছে ছাই সুদৰ্শন (২) আৰু কুলদীপ যাদৱ (৪) । আউট হোৱা বেটছমেন দুগৰাকী হ’ল যশস্বী জয়ছোৱাল আৰু কে এল ৰাহুল ।
ভাৰতৰ দ্বিতীয় ইনিংছ-
ভাৰতৰ দ্বিতীয় ইনিংছৰ আৰম্ভণি দুৰ্বল আছিল । কম সময়ৰ ভিতৰতে পেভিলিয়নমুখী হয় যশস্বী জয়ছোৱাল (১৩) । তেওঁ মাৰ্কো জেন্সেনৰ বলত উইকেটৰক্ষক কাইল ভেৰেইনৰ হাতত কেচ পেলাই । কিছু সময়ৰ পাছতে কে এল ৰাহুল (৬)কোছাইমন হাৰ্মাৰে বল্ড কৰি ভাৰতক আন এক আঘাত দিয়ে দক্ষিণ আফ্ৰিকাই ।
উইকেট পতনঃ ১-১৭ (যশস্বী জয়ছোৱাল, ৬.১ অভাৰ), ২-২১ (কে এল ৰাহুল, ৯.২ অভাৰ)।
এই টেষ্টত দক্ষিণ আফ্ৰিকাই প্ৰথম ইনিংছত ৪৮৯ ৰান সংগ্ৰহ কৰে । ইয়াৰ প্ৰতিক্ৰিয়া স্বৰূপে ভাৰতে প্ৰথম ইনিংছত মাত্ৰ ২০১ ৰানহে সংগ্ৰহ কৰিবলৈ সক্ষম হয় । অৰ্থাৎ প্ৰথম ইনিংছৰ ভিত্তিত দক্ষিণ আফ্ৰিকাই ২৮৮ ৰানৰ বিশাল অগ্ৰগতি লাভ কৰে । দক্ষিণ আফ্ৰিকাই ২৬০/৫ ৰে দ্বিতীয় ইনিংছ ঘোষণা কৰে ফলত ভাৰতে এই টেষ্টত জয়ৰ বাবে ৫৪৯ ৰানৰ লক্ষ্য লাভ কৰে ।
ইফালে শৃংখলা ড্ৰ’ কৰিবলৈ হ’লে এই মেচখনত জয়ী হ’ব লাগিব টিম ইণ্ডিয়া । কলকাতাত অনুষ্ঠিত শৃংখলাৰ প্ৰথমখন টেষ্টত ভাৰতীয় দলটোৱে ৩০ ৰানত পৰাজয় স্বীকাৰ কৰিছিল ।
দক্ষিণ আফ্ৰিকাৰ দ্বিতীয় ইনিংছ-
ট্ৰিষ্টান ষ্টাবছৰ ৯৪ ৰানৰ সহায়ত দক্ষিণ আফ্ৰিকাই দ্বিতীয় ইনিংছত পাঁচ উইকেট হেৰুৱাই ২৬০ ৰান সংগ্ৰহ কৰে । ষ্টাবছ আউট হোৱাৰ পিছত টেম্বা বাভুমাই ইনিংছ ঘোষণা কৰে ।
দ্বিতীয় ইনিংছত দক্ষিণ আফ্ৰিকাই স্থিৰ আৰম্ভণি কৰিছিল । তৃতীয় দিনৰ অন্তিম অধিবেশনত ৰিয়ান ৰিকেলটন আৰু এইডেন মাৰ্ক্ৰামে ভাৰতীয় বলাৰসকলক ব্যতিব্যস্ত কৰি ৰাখিছিল । কোনো উইকেট নেহেৰুৱাকৈ ৮ অভাৰ খেলে দলটোৱে । তাৰকা বেগী বলাৰ মহম্মদ চিৰাজ আৰু যশপ্ৰীত বুমৰাহে নতুন বলৰ সৈতে উইকেট দখলত ব্যৰ্থ হয় ।
খেলৰ চতুৰ্থ দিনটোত ভাৰতক প্ৰথমটো সফলতা প্ৰদান কৰে ৰবীন্দ্ৰ জাডেজাই । তেওঁ ৰিয়ান ৰিকেলটন (৩৫)ক মহম্মদ চিৰাজৰ হাতত কেচ আউট কৰোৱাই । প্ৰথম উইকেটত ৰিকেলটন আৰু এইডেন মাৰ্ক্ৰামে ৫৯ ৰান সংগ্ৰহ কৰে । ইয়াৰ পিছতে জাডেজাই পুনৰ নিজৰ স্পীন জালত পেলাই এইডেন মাৰ্কৰামক বল্ড কৰে ।
তাৰ কিছু সময়ৰ পিছতে টেম্বা বাভুমাক ৱাশ্বিংটন সুন্দৰে ৩ ৰানত আউট কৰে । তাৰ পিছত ষ্টাবছ আৰু টনি ডি জোৰ্জিয়ে ১০১ ৰানৰ দীঘলীয়া অংশীদাৰিত্ব গঢ়ে । অৱশ্যে ৰবীন্দ্ৰ জাডেজাই এই অংশীদাৰিত্বৰ অন্ত পেলাই জোৰজীক ৪৯ ৰানত আউট কৰে । দক্ষিণ আফ্ৰিকাই পঞ্চমটো আঘাতৰ সন্মুখীন হয় ষ্টাবছৰ ৰূপত, যিয়ে ১৮০ বলত ৯৪ ৰান সংগ্ৰহ কৰি জাডেজাৰ বলত পেভিলিয়নমুখী হয় । ভাৰতীয় দলৰ সৰ্বাধিক সফল বলাৰ জাডেজাই ৬২ ৰানত ৪টা উইকেট দখল কৰে ।
উইকেট পতন : ১-৫৯ (ৰিয়ান ৰিকেলটন, ১৮.৩ অভাৰ), ২-৭৪ (এইডেন মাৰ্ক্ৰাম, ২৮.১ অভাৰ), ৩-৭৭ (টেম্বা বাভুমা, ৩১.৩ অভাৰ), ৪-১৭৮ (টনি ডি জোৰ্জি, ৫৮.১ অভাৰ), ৫-২৬০ (ট্ৰিষ্টান ষ্টাবছ, ২৮.৩ অভাৰ)।
লগতে পঢ়ক : শৃংখলা হেৰুওৱাৰ দিশে ভাৰতীয় দল; বলিঙৰ পিছত বেটিঙতো শোচনীয় প্ৰদৰ্শন
