কেইটামান দিন পূৰ্বে সংবাদমেলযোগে গৌৰৱ গগৈৰ পাকিস্তান সংযোগ উন্মোচন কৰা মুখ্যমন্ত্ৰীয়ে সোমবাৰে পুনৰ আন এক বিস্ফোৰণ ঘটায় ।

গৌৰৱ গগৈৰ পাকিস্তান সংযোগৰ এটা দ্বিতীয় অধ্যায়ও আছে । দ্বিতীয় অধ্যায়ত থকা তথ্য অধিক বিস্ফোৰক আৰু ভয়ানক । কেইটামান দিন পূৰ্বে সংবাদমেলযোগে গৌৰৱ গগৈৰ পাকিস্তান সংযোগ উন্মোচন কৰা মুখ্যমন্ত্ৰীয়ে সোমবাৰে এই মন্তব্যৰে পুনৰ আন এক বিস্ফোৰণ ঘটায় । মুখ্যমন্ত্ৰী ড০ হিমন্ত বিশ্ব শৰ্মাৰ মতে গৌৰৱ গগৈৰ পাকিস্তান লিংক এতিয়াও শেষ হোৱা নাই । গৌৰৱ গগৈৰ পাকিস্তান কানেকচনৰ দ্বিতীয় অধ্যায় এটাও আছে ।

প্ৰদেশ কংগ্ৰেছৰ প্ৰাক্তন সভাপতি তথা জ্যেষ্ঠ কংগ্ৰেছ নেতা ভূপেন বৰাই সোমবাৰে দল ত্যাগৰ পিছতে গৌৰৱ গগৈৰ পাকিস্তান সংযোগক লৈ আন বিস্ফোৰণ ঘটায় মুখ্যমন্ত্ৰী ড০ হিমন্ত বিশ্ব শৰ্মাই । তেওঁ কয়- গৌৰৱ গগৈৰ পাকিস্তান লিংকৰ বিচাৰ হ’বয়ে । ৰাষ্ট্ৰীয় নিৰাপত্তাৰ স্বাৰ্থত মই যিখিনি ৰাজহুৱা কৰিলোঁ তাৰ পিছত আৰু এটা অধ্যায় আছে । গৌৰৱ গগৈৰ পাকিস্তান সংযোগক লৈ যিখিন কলোঁ তাৰ দ্বিতীয় এখন কিতাপো আছে । কিন্তু এই কথাখিনি মই ৰাজহুৱা কৰিব নোৱাৰো কাৰণ মোৰ পদৰ গোপনীয়তাৰ শপত আছে ।

গৌৰৱ গগৈয়ে পাকিস্তানত থকা ১০ দিন সময় কি কৰিছিল, ক’ত আছিল তাৰ ভিডিঅ’ আছে বুলিও দাবী কৰে মুখ্যমন্ত্ৰী ড০ শৰ্মাই । তেওঁ কয়- গৌৰৱ গগৈয়ে পাকিস্তানত ১০ টা দিন থকা আৰু তেওঁ তাত কি কৰিছিল তাৰ ভিডিঅ’ও আমাৰ হাতত আছে । এই অধ্যায়টো ইয়াতেই শেষ যোৱা নাই । কিন্তু সেইখিনি মই প্ৰকাশ কৰিব নোৱাৰোঁ । সেইখিনি কেন্দ্ৰীয় তদন্তকাৰী সংস্থাই আমাৰ পৰা পাব । গতিকে বহুত ঘটনা ঘটিবলৈ বাকী আছে ।

২০২৯লৈ কংগ্ৰেছত নাথাকে কোনো হিন্দু-

ইফালে ২০২৯ চনলৈ কংগ্ৰেছ দলত কোনো হিন্দু মানুহ নাথাকে বুলি মন্তব্য কৰে মুখ্যমন্ত্ৰী হিমন্ত বিশ্ব শৰ্মাই । তেওঁ কয় যে, যিকেইজনৰ একেবাৰে উপাই নাই আৰু যিসকলৰ সমষ্টি সংখ্যালঘু তেওঁলোকৰ দৰে দুই-এজন লোক কংগ্ৰেছত থাকিব । তেওঁ লগতে কয়- শিৱসাগৰ, ডিব্ৰুগড়ৰ টিকট নিৰ্বাচনৰ বাবে ৰেকিবুদ্দিন আহমেদ, আছিফ নজৰ আৰু আব্দুৰ ৰহিমক কিয় পঠাইছে কংগ্ৰেছে । এই আটাইকেইজনেই ৰকিবুল হুছেইনৰ মানুহ ।

লগতে পঢ়ক : ‘ভূপেন বৰা প্ৰকৃত কংগ্ৰেছী নেতা’; ভূপেন বৰাৰ পদত্যাগ পত্ৰ স্বীকাৰ কৰা নাই জিতেন্দ্ৰ সিঙে

গৌৰৱ গগৈক মুখ্যমন্ত্ৰীৰ সম্পত্তিৰ সৈতে জড়িত কোনো ৰাজহুৱা মন্তব্য বা বিবৃতি প্ৰদান কৰাত নিষেধাজ্ঞা আৰোপ কৰা হৈছে ।

মুখ্যমন্ত্ৰী হিমন্ত বিশ্ব শৰ্মাই তৰা ৫০০ কোটি টকীয়া মানহানিৰ গোচৰৰ সন্দৰ্ভত বৃহস্পতিবাৰে আদালতে এক গুৰুত্বপূৰ্ণ নিৰ্দেশনা জাৰি কৰাৰ লগতে বিষয়টোত অন্তৱৰ্তীকালীন স্থগিতাদেশ প্ৰদান কৰে । আদালতৰ নিৰ্দেশ অনুসৰি, পৰৱৰ্তী নিৰ্দেশ নিদিয়ালৈকে প্ৰদেশ কংগ্ৰেছৰ সভাপতি তথা লোকসভাৰ সাংসদ গৌৰৱ গগৈক মুখ্যমন্ত্ৰীৰ সম্পত্তিৰ সৈতে জড়িত কোনো ৰাজহুৱা মন্তব্য বা বিবৃতি প্ৰদান কৰাত নিষেধাজ্ঞা আৰোপ কৰা হৈছে । কংগ্ৰেছ নেতা জীতেন্দ্ৰ সিং আৰু ছত্তীশগড়ৰ প্ৰাক্তন মুখ্যমন্ত্ৰী ভূপেশ বাঘেলৰ বিৰুদ্ধেও অনুৰূপ নিৰ্দেশনা জাৰি কৰিছে আদালতে ।

আদালতে এই গোচৰৰ সন্দৰ্ভত ‘অসমীয়া প্ৰতিদিন’ৰ স্বত্বাধিকাৰী জয়ন্ত বৰুৱাকো নিৰ্দেশ প্ৰদান কৰিছে । তদুপৰি, আদালতে গৌৰৱ গগৈকে ধৰি সাতজন ব্যক্তিক অহা ৯ মাৰ্চত আদালতত হাজিৰ হ’বলৈ নিৰ্দেশ দিছে, যিদিনা এই বিষয়টোৰ পৰৱৰ্তী শুনানি গ্ৰহণ কৰা হ’ব ।

মুখ্যমন্ত্ৰী ড০ শৰ্মাই তেওঁৰ ব্যক্তিগত সম্পত্তি আৰু সততাৰ বিৰুদ্ধে তেওঁৰ ৰাজহুৱা ভাবমূৰ্তি নষ্ট কৰাৰ উদ্দেশ্যে অসত্য, মানহানিকাৰক আৰু বিদ্বেষপূৰ্ণ মন্তব্য কৰা বুলি অভিযোগ কৰি গৌৰৱ গগৈ, ভূপেশ বাঘেল আৰু জীতেন্দ্ৰ সিঙৰ বিৰুদ্ধে ৫০০ কোটি টকাৰ ক্ষতিপূৰণ বিচাৰি মানহানিৰ গোচৰ ৰুজু কৰিছিল । উল্লেখ্য যে, অসমত বৃদ্ধি পোৱা ৰাজনৈতিক তৎপৰতাৰ মাজতে এই গোচৰটোৱে বিশেষ গুৰুত্ব বহন কৰিছে, য’ত যোৱা কেইবামাহধৰি শাসকীয় বিজেপি আৰু বিৰোধী কংগ্ৰেছৰ মাজত অভিযোগ আৰু প্ৰতি-অভিযোগ তীব্ৰতৰ হৈ পৰিছে ।

অন্তৱৰ্তীকালীন স্থগিতাদেশ প্ৰদান কৰাৰ সময়ত আদালতে সংযম বজাই ৰখাৰ প্ৰয়োজনীয়তাৰ ওপৰত গুৰুত্ব আৰোপ কৰে আৰু চলি থকা ন্যায়িক প্ৰক্ৰিয়া যাতে ৰাজহুৱা বিবৃতি বা সংবাদ মাধ্যমৰ বাতৰিৰ দ্বাৰা প্ৰভাৱিত নহয় সেয়া নিশ্চিত কৰিবলৈ কয় ।

এই বিতৰ্কৰ প্ৰতিক্ৰিয়া প্ৰকাশ কৰি পূৰ্বে মুখ্যমন্ত্ৰীগৰাকীয়ে নিজৰ মৰ্যাদা ৰক্ষাৰ বাবে আইনী ব্যৱস্থা গ্ৰহণ কৰিব বুলি উল্লেখ কৰিছিল আৰু দৃঢ়তাৰে কৈছিল যে ৰাজহুৱা ভাষণত উত্তৰদায়ীত্ব থাকিব লাগে, বিশেষকৈ যেতিয়া কোনো প্ৰমাণ অবিহনে গুৰুতৰ অভিযোগ উত্থাপন কৰা হয় ।

৯ মাৰ্চৰ পৰৱৰ্তী শুনানিৰ সময়ত আদালতে সকলো পক্ষৰ দাখিলসমূহ পুনৰ পৰীক্ষা কৰাৰ সম্ভাৱনা আছে, যিদিনা উত্তৰদাতাসকলক উপস্থিত থাকিবলৈ কোৱা হৈছে ।

লগতে পঢ়ক : ১৪ফেব্ৰুৱাৰীত অসমলৈ আহিব প্ৰধানমন্ত্ৰী মোদী; অসমবাসীক দিব উপহাৰৰ টোপোলা

হোৰাহোৰে খহিছে কংগ্ৰেছৰ ভেটি । গৌৰৱ গগৈৰ ‘পাকিস্তান লিংক’ক লৈ ক্ষুব্ধ হৈ দল ত্যাগ জ্যেষ্ঠ নেতা ড০ সঞ্জু বৰুৱাৰ ।

মুখ্যমন্ত্ৰী ড০ হিমন্ত বিশ্ব শৰ্মাই দেওবাৰে সংবাদমেলযোগে সাসংদ গৌৰৱ গগৈৰ ‘পাকিস্তান লিংক’ উন্মোচন কৰাৰ পিছতেই হোৰাহোৰে খহিছে কংগ্ৰেছ দলৰ ভেটি । সাসংদ গৌৰৱ গগৈৰ ‘পাকিস্তান লিংক’ উন্মোচিত হোৱাৰ পিছতেই ৰাজ্যজুৰি প্ৰদেশ কংগ্ৰেছৰ বৰ্তমানৰ সভাপতিগৰাকীৰ বিৰুদ্ধে ক্ষোভিত হৈ দলত্যাগ কৰিছে বহু নেতা-কৰ্মীয়ে ।

সোমবাৰে পুনৰ কংগ্ৰেছৰ ভেটিত কঁপনি তুলি দলটোৰ পৰা পদত্যাগ কৰিলে আন এগৰাকী জ্যেষ্ঠ নেতাই । গৌৰৱ গগৈৰ প্ৰতি বিষেদগাৰ প্ৰকাশ কৰি এইবাৰ দল এৰিলে প্ৰদেশ কংগ্ৰেছৰ নিৰ্বাচনী সমিতিৰ উপাধ্যক্ষ আৰু APCCৰ জ্যেষ্ঠ মুখপাত্ৰ ড০ সঞ্জু বৰুৱাই । উত্থাপিত ‘পাকিস্তান লিংক’ৰ অভিযোগৰ স্পষ্টীকৰণ দিবলৈ প্ৰদেশ কংগ্ৰেছৰ সভাপতি গৌৰৱ গগৈয়ে অনুষ্ঠিত কৰা সংবাদমেলৰ পিছতেই দলৰ পৰা পদত্যাগ কৰে প্ৰদেশ কংগ্ৰেছৰ অন্যতম প্ৰভাৱশালীনেতাগৰাকীয়ে ।

কংগ্ৰেছৰ ৰাষ্ট্ৰীয় সভাপতি মল্লিকাৰ্জুন খাৰ্গেলৈ পদত্যাগ পত্ৰ প্ৰেৰণ কৰি দল ত্যাগৰ কথা ঘোষণা কৰে সঞ্জু বৰুৱাই । পদত্যাগ পত্ৰত সাসংদ তথা প্ৰদেশ কংগ্ৰেছৰ সভাপতি গৌৰৱ গগৈৰ শেহতীয়া ‘পাকিস্তান লিংক’ক লৈ অস্বস্তিত পৰাৰ বাবে দল ত্যাগৰ সিদ্ধান্ত লোৱা বুলি উল্লেখ কৰে তেওঁ । লগতে গৌৰৱ গগৈৰ নেতৃত্বত কংগ্ৰেছত কাম কৰাৰ পৰিৱেশ নাই বুলিও পদত্যাগ পত্ৰত স্পষ্টকৈ উল্লেখ কৰিছে সঞ্জু বৰুৱাই । তেওঁ কয় যে, এই সিদ্ধান্ত বহু চিন্তা আৰু নৈতিক আত্মনিৰীক্ষণৰ অন্তত লোৱা হৈছে, খৰখেদাকৈ বা আৱেগৰ ভিত্তিত লোৱা হোৱা নাই । তেওঁৰ মতে, এনে বিতৰ্কই দলৰ ভাবমূৰ্তিৰ লগতে ব্যক্তিগত ভাৱেও তেওঁক আঘাত দিছে ।

পদত্যাগ পত্ৰত ড০ সঞ্জু বৰুৱাই উল্লেখ কৰিছে-“প্ৰদেশ কংগ্ৰেছৰ বৰ্তমানৰ সভাপতি শ্ৰী গৌৰৱ গগৈৰ নেতৃত্বত কাম কৰি যাবলৈ মোৰ বিবেকে মোক কোনোধ্যেই অনুমতি দিয়া নাই । পাকিস্তানৰ চোৰাংচোৱা সংস্থা আই.এচ.আই (ISI)-ৰ সৈতে তেওঁৰ নাম সাঙোৰ খাই থকাৰ যি গুৰুতৰ অভিযোগ আৰু সন্দেহ উত্থাপন হৈছে, সেয়া দেশৰ নিৰাপত্তাৰ স্বাৰ্থত অতিশয় উদ্বেগজনক বিষয় । এনে নেতৃত্বৰ অধীনত মৌন হৈ থকা বা কাম কৰি যোৱা মানেই হ’ব মোৰ নীতি-আদৰ্শৰ সৈতে আপোচ কৰা—যিটো কৰিবলৈ মই কোনোপধ্যেই প্ৰস্তুত নহয় ।“

তেওঁ পুনৰ উল্লেখ কৰে যে- “মই এজন স্বাধীনতা সংগ্ৰামীৰ পৰিয়ালৰ সন্তান । মোৰ ককাদেউতা কেন্দ্ৰীয় আৰু ৰাজ্য চৰকাৰ উভয়ৰে দ্বাৰা স্বীকৃত এজন স্বাধীনতা সংগ্ৰামী আছিল আৰু মোৰ দেউতাই সমগ্ৰ জীৱন ভাৰতীয় জাতীয় কংগ্ৰেছৰ বাবে উচৰ্গা কৰিছিল । এই পদক্ষেপ গ্ৰহণ কৰিবলৈ পাই মই মৰ্মান্তিক বেদনা অনুভৱ কৰিছোঁ । যিহেতু মই দৃঢ়ভাৱে বিশ্বাস কৰোঁ যে দেশ সদায় প্ৰথম আৰু দল তাৰ পাছত । দুৰ্ভাগ্যবশত,  APCC-ৰ বৰ্তমানৰ নেতৃত্বত মই এতিয়া আৰু বিশ্বাস নকৰোঁ যে এই দলটো আদৰ্শগত, নৈতিক বা সাংগঠনিকভাৱে সুৰক্ষিত ।”

ইফালে পদত্যাগৰ পিছতেই সামাজিক মাধ্যমযোগে ড০ সঞ্জু বৰুৱাই এক বিশেষ পোষ্ট কৰা পৰিলক্ষিত হয় । নিজৰ ফেচবুক একাউন্টযোগে তেওঁ লিখিছে- “দেশৰ সাৰ্বভৌমত্ব, নিৰাপত্তা আৰু জননী জন্মভূমিতকৈ ডাঙৰ একো হব নোৱাৰে… জয় আই অসম ।”

লগতে পঢ়ক : এলিজাবেথ ক’লবাৰ্ণ গগৈয়ে পাকিস্তানলৈ প্ৰেৰণ কৰিছিল IBৰ গোপন ৰিপ’ৰ্ট! বিস্ফোৰক তথ্য ফাদিল