এই নিৰ্বাচনত তিনিগৰাকী প্ৰাক্তন মুখ্যমন্ত্ৰীৰ পুত্ৰৰ শোচনীয় পৰাজয় ঘটিছে

সোমবাৰে (৪ মে) ঘোষিত অসম বিধানসভা নিৰ্বাচনৰ ফলাফলত ভাৰতীয় জনতা পাৰ্টি নেতৃত্বাধীন নেচনেল ডেম’ক্ৰেটিক এলায়েন্স চমুকৈ এন ডি এ-য়ে ১২৬ খন আসনৰ ভিতৰত ১০১ খন আসন লাভ কৰি ধাৰাবাহিকভাৱে তৃতীয়বাৰৰ বাবে ক্ষমতা দখল কৰে । এই নিৰ্বাচনত কংগ্ৰেছ নেতৃত্বাধীন বিৰোধী সম্পূৰ্ণৰূপে ধূলিস্যাৎ হয় । কংগ্ৰেছ দল কেৱল ১৯ খন আসনতে থমকি ৰ’ব লগা হয় । ইফালে এই নিৰ্বাচনত তিনিগৰাকী প্ৰাক্তন মুখ্যমন্ত্ৰীৰ পুত্ৰৰ শোচনীয় পৰাজয়ৰ ফলত ৰাজ্যখনৰ ৰাজনৈতিক দৃশ্যপটত এক বিশেষ পৰিৱৰ্তন পৰিলক্ষিত হৈছে ।

গৌৰৱ গগৈ-

পৰাজিতসকলৰ ভিতৰত আছিল প্ৰদেশ কংগ্ৰেছৰ সভাপতি তথা বৰ্তমানৰ সাংসদ গৌৰৱ গগৈ । গৌৰৱ গগৈ হৈছে অসমৰ সৰ্বাধিক ১৫ বছৰকাল শাসন কৰা প্ৰাক্তন মুখ্যমন্ত্ৰী তৰুণ গগৈৰ পুত্ৰ । যোৰহাট বিধানসভা সমষ্টিত বিজেপিৰ হিতেন্দ্ৰ নাথ গোস্বামীৰ হাতত ২৩,১৮২ টা ভোটৰ ব্যৱধানত গৌৰৱ গগৈ পৰাস্ত হয় ।

দেৱব্ৰত শইকীয়া-

একেদৰে নাজিৰা সমষ্টিত পৰাজয়ৰ সন্মুখীন হয় বিধানসভাৰ বিৰোধী দলপতি দেৱব্ৰত শইকীয়া । তেওঁ অসমৰ দুবাৰৰ মুখ্যমন্ত্ৰী প্ৰয়াত হিতেশ্বৰ শইকীয়াৰ পুত্ৰ । ২০১১ চনৰ পৰা ধাৰাবাহিকভাৱে নাজিৰা সমষ্টিৰ পৰা নিৰ্বাচিত হৈ অহা শইকীয়াই এইবাৰ বিজেপিৰ ময়ূৰ বৰগোহাঁইৰ হাতত ৪৬,০০০ তকৈও অধিক ভোটত পৰাস্ত হয় । উল্লেখ্য যে এসময়ত এই সমষ্টিটো তেওঁৰ পিতৃ আৰু মাতৃ হেমপ্ৰভা শইকীয়াই প্ৰতিনিধিত্ব কৰিছিল ।

দিগন্ত বৰ্মন-

তৃতীয়গৰাকী প্ৰাৰ্থী দিগন্ত বৰ্মনে বৰক্ষেত্ৰী সমষ্টিৰ পৰা প্ৰতিদ্বন্দ্বিতা কৰিছিল । তেওঁ প্ৰয়াত ভূমিধৰ বৰ্মনৰ পুত্ৰ, যিয়ে হিতেশ্বৰ শইকীয়াৰ মৃত্যুৰ পিছত চুটি সময়ৰ বাবে মুখ্যমন্ত্ৰী হিচাপে কাৰ্যনিৰ্বাহ কৰিছিল । এই নিৰ্বাচনত দিগন্ত বৰ্মন বিজেপিৰ নাৰায়ণ ডেকাৰ হাতত ৮৪,০০০ তকৈও অধিক ভোটত ধৰাশায়ী হয় ।

আনহাতে কংগ্ৰেছৰ এই তিনিগৰাকী হেভীৱেইট প্ৰাৰ্থীৰ পৰাজয়ৰ সন্দৰ্ভত প্ৰতিক্ৰিয়া ব্যক্ত কৰি মুখ্যমন্ত্ৰী ড০ হিমন্ত বিশ্ব শৰ্মাই কয়, “কাৰোবাৰ পৰাজয়ত আনন্দিত হ’বলগীয়া একো নাই, বিশেষকৈ হিতেশ্বৰ শইকীয়াৰ পুত্ৰৰ পৰাজয়ত ।” অৱশ্যে মুখ্যমন্ত্ৰীগৰাকীয়ে মন্তব্য কৰে যে এই পৰাজয় হ’ল জনসাধাৰণৰ দ্বাৰা “নীলা তেজৰ ৰাজনীতি”ৰ প্ৰত্যাখ্যান । তেওঁ কয়, “ৰাইজে বংশবাদ বা নীলা তেজৰ ৰাজনীতিক প্ৰত্যাখ্যান কৰিছে । তেওঁলোকে যোৱা তিনি-চাৰিটা নিৰ্বাচনত জয়ী হৈছিল আৰু নিজৰ পৰিচয় গঢ়িবলৈ যথেষ্ট সময় পাইছিল, কিন্তু তেওঁলোকে সেয়া কৰিব নোৱাৰিলে ।”

কেৱল তিনিগৰাকী প্ৰাক্তন মুখ্যমন্ত্ৰীৰ পুত্ৰই নহয়, প্ৰাক্তন কেন্দ্ৰীয় মন্ত্ৰী পৱন সিং ঘাটোৱাৰৰ পুত্ৰ প্ৰাঞ্জল ঘাটোৱাৰৰ দৰে আন কেইবাজনো বংশধৰ এই নিৰ্বাচনত পৰাস্ত হোৱা বুলি তেওঁ উল্লেখ কৰে । চাবুৱা-লাহোৱাল সমষ্টিত প্ৰাঞ্জল ঘাটোৱাৰ বিজেপিৰ বিনোদ হাজৰিকাৰ হাতত ৮৯,০০০ তকৈও অধিক ভোটৰ ব্যৱধানত পৰাজিত হয় ।

লগতে পঢ়ক : অসমত গেৰুৱা ধুমুহা : ৮২খন আসনত বিজেপিৰ বিশাল জয়, পুনৰ শাসনৰ গাদীত মিত্ৰজোঁট

নিৰ্বাচনী ৰাজনীতিত পুনৰ ব্যৰ্থ চৰ্চিত দুই গগৈ । বিৰোধী ঐক্যমঞ্চৰ অন্যতম শক্তি হিচাপে বিবেচিত হোৱা ‘তিনি গগৈ’ৰ যুঁজত মুখ থেকেচা খালে দুই গগৈয়ে ।

ৰাজ্যৰ নিৰ্বাচনী ৰাজনীতিৰ এক নাটকীয় পৰিৱৰ্তন । নিৰ্বাচনী ৰাজনীতিত পুনৰ ব্যৰ্থ চৰ্চিত দুই গগৈ । বিৰোধী ঐক্যমঞ্চৰ অন্যতম শক্তি হিচাপে বিবেচিত হোৱা ‘তিনি গগৈ’ৰ যুঁজত মুখ থেকেচা খালে দুই গগৈয়ে । গৌৰৱ গগৈৰ পিছতেই এইবাৰ পৰাজয়ৰ সোৱাদ ল’বলগীয়া হ’ল অসম জাতীয় পৰিষদৰ সভাপতি লুৰীণজ্যোতি গগৈয়ে ।

যোৰহাটত গৌৰৱ গগৈৰ শোচনীয় পৰাজয়-

সকলোৰে দৃষ্টি নিৱদ্ধ হৈ থকা যোৰহাট বিধানসভা সমষ্টিত কংগ্ৰেছৰ হেভিৱেইট প্ৰাৰ্থী তথা বিৰোধীৰ মুখ্যমন্ত্ৰী পদৰ প্ৰাৰ্থী গৌৰৱ গগৈ পৰাজিত হৈছে । তীব্ৰ প্ৰতিদ্বন্দ্বিতা হ’ব বুলি আশা কৰা হৈছিল যদিও ফলাফলত তেওঁ ২৩,১৮২টা ভোটৰ ব্যৱধানত বিজেপিৰ হিতেন্দ্ৰনাথ গোস্বামীৰ বিৰুদ্ধে পৰাজয় বৰণ কৰে ।

খোৱাঙত লুৰীণজ্যোতি গগৈক প্ৰত্যাখ্যান: পুনৰ শূন্য হ’ল অজাপ

আনহাতে, খোৱাং সমষ্টিত অসম জাতীয় পৰিষদৰ সভাপতি লুৰীণজ্যোতি গগৈ বিজেপিৰ চক্ৰধৰ গগৈৰ হাতত পৰাজিত হয় । পৰাজয়ৰ ব্যৱধান ৯,৯৮৪ টা ভোট । এই পৰাজয়ৰ লগে লগে ৰাজ্যৰ ৰাজনীতিত পুনৰবাৰ শূন্য হৈ পৰিল অসম জাতীয় পৰিষদ । ২০২১ৰ বিধানসভা নিৰ্বাচনতো দুটাকৈ সমষ্টিত প্ৰতিদ্বন্দ্বিতা কৰিও পৰাস্ত হৈছিল লুৰীণজ্যোতি গগৈ । এইবাৰ খোৱাঙত অজাপৰ সভাপতিগৰাকীক লৈ চৰ্চা যথেষ্ঠ হৈছিল যদিও তীব্ৰ প্ৰত্যাহ্বান জনাই দুবাৰৰ বিধায়ক বিজেপিৰ চক্ৰধৰ গগৈৰ হাতত পৰাজয় বৰণ কৰে তেওঁ ।

অখিল গগৈৰ যুঁজ অব্যাহত-

বিৰোধীৰ ‘তিনি গগৈ’ৰ ভিতৰত একমাত্ৰ অখিল গগৈয়ে এতিয়ালৈকে নিজৰ অগ্ৰগতি অক্ষুণ্ণ ৰাখিবলৈ সক্ষম হৈছে । শেহতীয়া খবৰ অনুসৰি অখিল গগৈ বৰ্তমান ১২,৬৭৯টা ভোটত আগবাঢ়ি আছে । মন কৰিবলগীয়া যে, সমষ্টিটোত এতিয়াও ৪ ৰাউণ্ডৰ ভোট গণনা বাকী আছে । তেওঁৰ নিকটতম প্ৰতিদ্বন্দ্বি বিজেপিৰ কুশল দুৱৰীৰ বিৰুদ্ধে তীব্ৰ যুঁজত অৱতীৰ্ণ হৈছে ।

লগতে পঢ়ক : যোৰহাটত মুখ ঠেকেচা বিৰোধীৰ মুখ্যমন্ত্ৰী পদৰ প্ৰাৰ্থী গৌৰৱ গগৈৰ

কংগ্ৰেছক তীব্ৰ সমালোচনা কৰি ফেচবুক লাইভত গৌৰৱ গগৈৰ প্ৰত্যাহ্বান গ্ৰহণ কৰি বটদ্ৰৱালৈ আমন্ত্ৰণ জনালে মুখ্যমন্ত্ৰীয়ে

কংগ্ৰেছ নেতা গৌৰৱ গগৈৰ প্ৰত্যাহ্বান গ্ৰহণ মুখ্যমন্ত্ৰী ড০ হিমন্ত বিশ্ব শৰ্মাৰ । কংগ্ৰেছক তীব্ৰ সমালোচনা কৰি ফেচবুক লাইভত গৌৰৱ গগৈৰ প্ৰত্যাহ্বান গ্ৰহণ কৰি বটদ্ৰৱালৈ আমন্ত্ৰণ জনালে মুখ্যমন্ত্ৰীয়ে । লগতে গৌৰৱ গগৈক বটদ্ৰৱা থানত উপস্থিত হৈ শপত ল’বলৈ মুখ্যমন্ত্ৰীগৰাকীয়ে মুকলি প্ৰত্যাহ্বান জনায় ।

ফেচবুক লাইভৰ জৰিয়তে মুখ্যমন্ত্ৰী ড০ শৰ্মাই কয় যে তেওঁ নিজৰ সম্পত্তি, পৰিয়ালৰ সৈতে জড়িত যিকোনো বিদেশী সম্পত্তি, বেংক একাউণ্ট আৰু পাছপ’ৰ্ট সন্দৰ্ভত গীতাত হাত থৈ শপত ল’বলৈ গৌৰৱ গগৈয়ে জনোৱা প্ৰত্যাহ্বান গ্ৰহণ কৰিছে । লগতে তেওঁ দুয়োগৰাকী নেতাই বুধবাৰে পুৱা ৯ বজাত ৰাজহুৱা শপত গ্ৰহণৰ বাবে বটদ্ৰৱা থানত উপস্থিত হোৱাৰ প্ৰস্তাৱ দিয়ে ।

ইফালে মুখ্যমন্ত্ৰীগৰাকীয়ে গৌৰৱ গগৈ আৰু তেওঁৰ পত্নীৰ নামতো বিদেশত সম্পত্তি নাই বুলি শপত খোৱাৰ প্ৰত্যাহ্বান জনালে মুখ্যমন্ত্ৰী ড০ হিমন্ত বিশ্ব শৰ্মাই । গৌৰৱ গগৈৰ পত্নীৰ বিৰুদ্ধে উত্থাপিত ইংলেণ্ডৰ বিদেশী বেংক একাউণ্ট আৰু সম্পত্তিৰ সবিশেষ ৰাজহুৱা কৰিবলৈ কয় । ইয়াৰ উপৰিও মুখ্যমন্ত্ৰী ড০ শৰ্মাই গৌৰৱ গগৈৰ পাকিস্তান ভ্ৰমণৰ খবৰক লৈও প্ৰশ্ন উত্থাপন কৰি বিশেষকৈ ৰাৱালপিণ্ডিত থকা আৰু সাতদিনীয়া ভ্ৰমণৰ সময়ত তেওঁৰ কাম-কাজৰ বিষয়ে ৰাজহুৱা কৰিবলৈ কয় ।

ফেচবুক লাইভত মুখ্যমন্ত্ৰী ড০ হিমন্ত বিশ্ব শৰ্মাই কয়- “এইবাৰ কংগ্ৰেছে সীমা চেৰাই গ’ল । যোৱা দুদিন ধৰি বিভিন্ন পাছপোৰ্ট, ভিছা, সম্পত্তি, ফটোষ্টেট, এআই আদিৰে সীমা চেৰাই গ’ল । এতিয়া কোনো কথাকে প্ৰমাণ কৰিব নোৱাৰি কোনো সাৰসুৰ নোহোৱাকৈ গাঁতৰ ভিতৰত সোমাবলৈ বাধ্য হ’ল ।“

কংগ্ৰেছ নেতা গৌৰৱ গগৈয়ে মুখ্যমন্ত্ৰী আৰু তেওঁৰ পত্নীৰ বিদেশত কোনো সম্পত্তি নাই বুলি গীতাত ধৰি শপত খাবলৈ জনোৱা প্ৰত্যাহ্বানো গ্ৰহণ কৰে হিমন্ত বিশ্ব শৰ্মাই । তেওঁ গৌৰৱ গগৈৰ এই প্ৰত্যাহ্বান স্বীকাৰ কৰা বুলি উল্লেখ কৰি ৮ এপ্ৰিল, বুধবাৰে পুৱা ৯ বজাত বটদ্ৰৱা থানত উপস্থিত হোৱাৰ প্ৰস্তাৱ দিয়ে ।

গৌৰৱ গগৈক প্ৰত্যাহ্বান জনাই মুখ্যমন্ত্ৰীয়ে কয়-“মই ভাগৱত গীতাত হাত থৈ, গীতা মূৰত লৈ মোৰ শপত বাক্য পাঠ কৰিম আৰু মই মোৰ, পত্নীৰ, মোৰ পৰিয়ালৰ যিমান বেংক একাউন্ট আছে, পাছপোৰ্ট আছে সকলোবোৰ দাঙি ধৰিম । মোৰ মাত্ৰ এটাই অনুৰোধ একেটা কাম কৰিবলৈ আপুনি প্ৰস্তুত আছে নে নাই । আপোনাৰ পত্নীৰ পাকিস্তাৰ বেংক একাউন্ট, ইংলেণ্ডৰ সম্পত্তি এই সকলোবোৰ আপুনিও দেখুৱাব লাগিব আৰু ভাগৱত গীতাত হাত থৈ আপুনিও শপত ল’ব লাগিব যে, পাকিস্তানত থকা সময়োছোৱাত আপুনি কাৰ কাৰ আতিথ্য লৈছিল । লগতে কি ধৰণে পাকিস্তানত ৭ দিন অতিবাহিত কৰিছিল আৰু ৰাৱালপিণ্ডিলৈ কিয় গৈছিল ।“

আনহাতে বটদ্ৰৱা থানৰ সলনি গুৱাহাটীৰ কোনো স্থানো যদি গৌৰৱ গগৈয়ে নিৰ্ধাৰণ কৰে তাৰ বাবেও মুখ্যমন্ত্ৰী প্ৰস্তুত আছে বুলি উল্লেখ কৰে ।

লগতে পঢ়ক : আজি সমাপ্ত হ’ব নিৰ্বাচনী প্ৰচাৰ, বিয়লি ৫ বজাৰ পৰা ৪৮ ঘণ্টীয়া ‘চাইলেন্ট পিৰিয়ড’