তিনিখন মেচৰ শৃংখলা দখলৰ লক্ষ্যৰে আজি ৰায়পুৰত নামিব আত্মবিশ্বাসী টীম ইণ্ডিয়া

আজি ৰায়পুৰত অনুষ্ঠিত হ’ব ভাৰত আৰু দক্ষিণ আফ্ৰিকাৰ মাজৰ শৃংখলাৰ দ্বিতীয়খন এদিনীয়া । ইতিমধ্যে ৰাঁচীত অনুষ্ঠিত হোৱা প্ৰথমখন এদিনীয়াত জয়লাভ কৰি শৃংখলাত ১-০ ব্যৱধানত অগ্ৰগতি লাভ কৰা আত্মবিশ্বাসী টীম ইণ্ডিয়াই শৃংখলা দখলৰ লক্ষ্যৰে আজি খেলপথাৰত নামিব । অৱশ্যে ৰায়পুৰত অনুষ্ঠিত হ’বলগীয়া দ্বিতীয়খন মেচৰ পূৰ্বে কেইবাটাও প্ৰশ্ন ৰৈ গৈছে । কোহলীৰ শতক আৰু ৰোহিত শৰ্মাৰ আগ্ৰাসী ৫৭ ৰানেৰে প্ৰথম এদিনীয়াত ভাৰতৰ জয় নিশ্চিত হ’ল যদিও দলৰ সংমিশ্ৰণক লৈ কিছু উদ্বেগ অব্যাহত আছে ।

ৰায়পুৰৰ শ্বহীদ বীৰ নাৰায়ণ সিং ষ্টেডিয়ামত আজি অনুষ্ঠিত হ’ব এই দ্বিতীয় এদিনীয়া । এই ষ্টেডিয়ামত মাত্ৰ এখন এদিনীয়া খেল অনুষ্ঠিত হৈছে । ২০২৩ চনৰ জানুৱাৰী মাহত নিউজীলেণ্ডৰ বিৰুদ্ধে অনুষ্ঠিত হৈছিল এই মেচ । খেলখনত মহম্মদ ছামি আৰু ছিৰাজে প্ৰচণ্ড ছুইং আৰু ছিম মুভমেণ্টৰ সুযোগ লৈ কিৱি দলক ১০৮ ৰানত অল আউট কৰিছিল । ইয়াৰ পিছতে ৩০ অভাৰ বাকী থকা অৱস্থাত ভাৰতে ৮ উইকেটত জয়লাভ কৰে । ইয়াত শেষৰখন আন্তঃৰাষ্ট্ৰীয় মেচ ২০২৩ চনৰ ডিচেম্বৰ মাহত টি-২০ ফৰ্মেটত অনুষ্ঠিত হৈছিল, য’ত টীম ইণ্ডিয়াই অষ্ট্ৰেলিয়াক ২০ ৰাণত পৰাস্ত কৰিছিল ।

ইফালে আজিৰ দ্বিতীয়খন এদিনীয়াত ঋষভ পন্টৰ প্ৰত্যাৱৰ্তনৰ সম্ভাৱনাক লৈ উৎফুল্লিত হৈ আছে অনুৰাগী । বৰ্তমান সময়ত দল পৰিচালনাই তেওঁক লৈ খৰখেদা কৰা নাই । অৱশ্যে আজি পন্টৰ প্ৰত্যাৱৰ্তনত সন্দেহৰো সৃষ্টি হৈছে ।

কি হ’ব ভাৰতৰ সাম্ভাব্য মূল একাদশ ?

প্ৰথমখন মেচত জয়লাভৰ পিছতো টীম ইণ্ডিয়াত এটা বা দুটা পৰিৱৰ্তন দেখা যাব পাৰে । আটাইতকৈ ডাঙৰ প্ৰশ্নটো হ’ল ৰুতুৰাজ গাইকোৱাদ । তেওঁক চাৰি নম্বৰত বেটিঙৰ বাবে পঠোৱা হৈছিল যদিও সহজ নাছিল । ৱাশ্বিংটন সুন্দৰো বেটিং ক্ৰমৰ সঘনাই পৰিৱৰ্তনৰ সন্মুখীন হৈছে । প্ৰথমখন মেচত পাঁচ নম্বৰত আহিছিল যদিও দীঘলীয়া ইনিংছ খেলাত ব্যৰ্থ হয় সুন্দৰ । লগতে তেওঁ মাত্ৰ তিনি অভাৰহে বলিং কৰে ।

ইয়াৰ বিপৰীতে কুলদীপ যাদৱে ৬৮ ৰান দি চাৰিটা উইকেট দখল কৰিছিল যদিও তেওঁৰ ভেৰাইটি ভাৰতৰ বাবে প্লাছ পইণ্ট । বেগী বলাৰসকলৰ ভিতৰত হৰ্ষিত ৰাণা, প্ৰসিদ্ধ কৃষ্ণ আৰু অৰ্শদ্বীপ সিঙে খেলাটো প্ৰায় নিশ্চিত ।

ভাৰতৰ সম্ভাৱ্য মূল একাদশ-

ৰোহিত শৰ্মা, যশস্বী জয়ছোৱাল, বিৰাট কোহলী, ৰুতুৰাজ গাইকোৱাদ, কে এল ৰাহুল (অধিনায়ক), ৱাশ্বিংটন সুন্দৰ, ৰবীন্দ্ৰ জাডেজা, কুলদীপ যাদৱ, হৰ্ষিত ৰাণা, প্ৰসিদ্ধ কৃষ্ণ, অৰ্শদীপ সিং ।

লগতে পঢ়ক : বিশ্ব চেম্পিয়ন ৩ মহিলা ক্ৰিকেটাৰলৈ ৰে’লৱেৰ বিশেষ উপহাৰ; লাভ কৰিব এইসমূহ সুবিধা

শ্বেখ হাছিনাৰ মৃত্যুদণ্ডৰ ৰায়দানৰ প্ৰভাৱ!

অহা মাহৰ ভাৰত বনাম বাংলাদেশৰ শৃংখলা পিছুৱাই দিছে ভাৰতীয় ক্ৰিকেট নিয়ন্ত্ৰণ ব’ৰ্ডে । প্ৰকাশিত এক বাতৰি অনুসৰি ভাৰতীয় ক্ৰিকেট নিয়ন্ত্ৰণ ব’ৰ্ডে এই শৃংখলাৰ সময় পুনৰ নিৰ্ধাৰণ কৰাৰ চেষ্টা চলাইছে । ভাৰত আৰু বাংলাদেশৰ ৰাজনৈতিক সম্পৰ্কৰ অৱনতি ঘটাৰ বাবে এই শৃংখলা পিছুৱাই দিয়া হৈছে বুলি কোৱা হৈছে । যোৱা সোমবাৰে আদালতে বাংলাদেশৰ প্ৰাক্তন প্ৰধানমন্ত্ৰী শ্বেখ হাছিনাক মানৱতাৰ বিৰুদ্ধে অপৰাধৰ বাবে মৃত্যুদণ্ডৰ শাস্তি প্ৰদান কৰে । খবৰ ওলাইছে যে এই শাস্তি প্ৰদানৰ সিদ্ধান্তই ভাৰত-বাংলাদেশ শৃংখলাতো প্ৰভাৱ পেলাব পাৰে ।

আইচিচিৰ ফিউচাৰ্ছ ট্যুৰছ প্ৰগ্ৰেমৰ অংশ হিচাপে ভাৰত আৰু বাংলাদেশৰ মহিলা ক্ৰিকেট দলে তিনিখন এদিনীয়া আৰু তিনিখন টি-২০ মেচ খেলাৰ কথা আছিল । কলকাতা আৰু কটকত অনুষ্ঠিত হ’ব বুলি আশা কৰা হৈছিল এই মেচ ।

শে্হতীয়াকৈ জানিব পৰা মতে  ডিচেম্বৰ মাহত বিকল্প ধাৰাবাহিক আয়োজন কৰাৰ চেষ্টা কৰিব পাৰে বিচিচিআইয়ে । বাংলাদেশৰ বিৰুদ্ধে এই শৃংখলাটো ২০২৫ চনৰ মহিলা বিশ্বকাপ জয় কৰাৰ পাছত ভাৰতৰ প্ৰথমখন শৃংখলা হোৱাৰ কথা আছিল ।

ভাৰত আৰু বাংলাদেশৰ ৰাজনৈতিক সম্পৰ্কৰ অৱনতি ঘটাৰ বাবেই এই শৃংখলা পিছুৱাই দিয়াৰ সিদ্ধান্ত লোৱা হৈছে বুলি অনুমান কৰা হৈছে । অৱশ্যে এতিয়ালৈকে এই কথা নিশ্চিত হোৱা নাই । উল্লেখ্য যে শ্বেখ হাছিনা অপসাৰিত হোৱাৰ পাছত বাংলাদেশ এৰি ভাৰতত আশ্ৰয় লৈ আছে ।

উল্লেখ্য যে এইবাৰ বিচিচিআইয়ে বাংলাদেশৰ সৈতে পুৰুষ দলৰ শৃংখলা ২০২৬ চনৰ ছেপ্টেম্বৰলৈ পিছুৱাই দিছিল ।

লগতে পঢ়ক : গুৱাহাটীলৈ নাহে শুভমন গীল! দ্বিতীয় টেষ্টত খেলাক লৈ সংশয়

ভাৰত-পাকিস্তানৰ হাই ভল্টেজ মেচ

ৰাইজিং ষ্টাৰছ এছিয়া কাপৰ এখন হাই ভল্টেজ মেচত আজি ভাৰত আৰু পাকিস্তানৰ যুৱ দল মুখামুখি হ’ব । দুয়োটা দলৰ মাজত টি-২০ ফৰ্মেটৰ এই মেচখন ভাৰতীয় সময় অনুসৰি নিশা আঠ বজাৰ পৰা দোহাত অনুষ্ঠিত হ’ব । এই মেচত আকৌ এবাৰ সকলোৰে দৃষ্টি পূৰ্বৰ মেচত বিস্ফোৰক শতক অৰ্জন কৰা তাৰকা বেটছমেন বৈভৱ সূৰ্যবংশীৰ ওপৰত ।

বি চি চি আইৰ নীতি মানি চলিব দলে-

ভাৰত আৰু পাকিস্তানৰ মাজত অব্যাহত থকা উত্তেজনাপূৰ্ণ সম্পৰ্কৰ প্ৰভাৱ ক্ৰিকেট খেলপথাৰতো দেখা গৈছে । এছিয়া কাপৰ সময়ত ছিনিয়ৰ জাতীয় দলটোৱে পাকিস্তানৰ খেলুৱৈৰ সৈতে হেণ্ডশ্বেক কৰা নাছিল যাৰ বাবে বহু বিতৰ্কৰ সৃষ্টি হৈছিল । এতিয়া জিতেশ শৰ্মাৰ নেতৃত্বত ইণ্ডিয়া এ দলেও ভাৰতীয় ক্ৰিকেট নিয়ন্ত্ৰণ ব’ৰ্ডৰ এই নীতি মানি চলিব ।

ডাঙৰ ইনিংছ খেলিব বিচাৰিব বৈভৱে-

এই হাই ভল্টেজ মেচখনৰ সময়ত পাকিস্তানৰ আক্ৰমণক স্তব্ধ কৰি ৰখাৰ উদ্দেশ্যেৰে খেলপথাৰত নামিব বৈভৱ । চলিত প্ৰতিযোগিতাত ইণ্ডিয়া এৰ অধিনায়ক জিতেশেও নিজৰ ছিনিয়ৰৰ পদাংক অনুসৰণ কৰি পাকিস্তান শ্বাহিনছৰ অধিনায়ক ইৰফান খানৰ সৈতে টছৰ সময়তো নহয় মেচৰ পিছতো হাত নিমিলোৱাৰ সম্ভাৱনা আছে ।

কিন্তু সকলোৰে দৃষ্টি থাকিব আই পি এলত শতক অৰ্জন কৰি বিশ্ব ক্ৰিকেটক জোকাৰি যোৱা ১৪ বছৰীয়া সূৰ্য্যবংশীৰ ওপৰত । পূৰ্বৰ খেলখনত ইউ এ ইৰ বিৰুদ্ধে ১৫টা ৬ৰে ৫২টা বলত অবিশ্বাস্য ১৪৪ ৰান সংগ্ৰহ কৰি ছিনিয়ৰ আন্তঃৰাষ্ট্ৰীয় (এ টিম) ক্ৰিকেটত শতক অৰ্জন কৰা আটাইতকৈ কম বয়সীয়া ভাৰতীয় বেটছমেন হিচাপে পৰিগণিত হয় বৈভৱ ।

লগতে পঢ়ক : আই পি এল ২০২৬ : কোন ফ্ৰেঞ্চাইজিয়ে কোন খেলুৱৈক কৰিলে ৰিলিজ ?

আই পি এল ২০২৬

আই পি এল ২০২৬ৰ খেলুৱৈ নিলামৰ পূৰ্বে সকলো ফ্ৰেঞ্চাইজিয়ে ৰিটেইনড আৰু ৰিলিজড খেলুৱৈৰ তালিকা প্ৰকাশ কৰিছে । পূৰ্বৰ নিলামত তৃতীয় সৰ্বাধিক দামী খেলুৱৈ ভেংকটেশ আয়াৰক মুকলি কৰি দিছে কলকাতা নাইট ৰাইডাৰ্ছে । চেন্নাই ছুপাৰ কিংছে সৰ্বাধিক খেলুৱৈ মুকলি কৰাৰ বিপৰীতে ১৬ ডিচেম্বৰত অনুষ্ঠিত হ’বলগীয়া নিলামৰ বাবে কলকাতা নাইট ৰাইডাৰ্ছৰ হাতত সৰ্বাধিক পাৰ্চ আছে । কলকাতাই ৬৪.৩ কোটিৰ পাৰ্চ লৈ নিলামত প্ৰৱেশ কৰিব ।

কোন ফ্ৰেঞ্চাইজিয়ে কোন খেলুৱৈক মুকলি কৰিলে-

কলকাতা নাইট ৰাইডাৰ্ছ : কলকাতা নাইট ৰাইডাৰ্ছে মুকলি কৰি দিছে আন্দ্ৰে ৰাছেল, ভেংকটেশ আয়াৰ, কুইণ্টন ডি কক, মইন আলী, আৰু এনৰিক নৰ্টজে । ফ্ৰেঞ্চাইজিটোৱে গুৰবাজ, স্পেন্সাৰ জনছন, চেতন ছাকাৰিয়া, আৰু লভনীথ ছিছ’দিয়াকো মুকলি কৰিছে ।

লক্ষ্ণৌ ছুপাৰ জায়েন্টছ : আই পি এল ২০২৬ত লক্ষ্ণৌ দলত দেখা নাযাব এইসকলক- লক্ষ্ণৌ ছুপাৰ জায়েন্টছে আৰিয়ান জুয়াল, ডেভিদ মিলাৰ, যুৱৰাজ চৌধুৰী, ৰাজৱৰ্ধন হাংগ্ৰিকাৰ, শাৰ্দুল ঠাকুৰ, আকাশ দীপ, ৰবি বিষ্ণয়, শ্বামাৰ জোচেফক মুকলি কৰি দিছে ।

দিল্লী কেপিটেলছ : দিল্লী কেপিটেলছে জেক ফ্ৰেজাৰ-মেকগাৰ্ক, ফাফ ডু প্লেছিছ, ডোনাভান ফেৰেইৰা, চেডিকুল্লাহ অটল, মনৱন্ত কুমাৰ, দৰ্শন নলকাণ্ডে আৰু মোহিত শৰ্মাক মুকলি কৰি দিছে । দিল্লীৰ পাৰ্চত ২১.৮ কোটি টকা বাকী আছে । ইফালে কে এল ৰাহুলক ৰিটেইন কৰিছে দলটোৱে ।

ৰয়েল চেলেঞ্জাৰছ বাংগালুৰু : ৰয়েল চেলেঞ্জাৰছ বাংগালুৰুৱে ৰিলিজ কৰিছে লিয়াম লিভিংষ্টনক । লুংগি এনগিডি বহুলাংশে ৰিজাৰ্ভ খেলুৱৈ আছিল আৰু তেওঁকো ৰিসিজ দিয়া হৈছে । ৩ জুনত অনুষ্ঠিত হোৱা আই পি এলৰ ফাইনেলৰ পিছত কোনো মেচ নেখেলা যশ দয়ালক ৰিটেইন কৰিছে ফেঞ্চাইজিটোৱে । ইফালে আঘাতপ্ৰাপ্ত দেৱদত্ত পাদিক্কলৰ সলনি চুক্তিবদ্ধ হোৱা মায়ংক আগৰৱালাক ৰিলিজ কৰা হৈছে । স্বস্তিক চিকাৰা কোনো মেচ নেখেলাকৈয়ে ৰিলিজ হয় ।

পাঞ্জাব কিংছ : পঞ্জাব কিংছে মেক্সৱেল আৰু জোছ ইংলিছকে ধৰি এৰন হাৰ্ডি, কুলদীপ সেন আৰু প্ৰবীণ ডুবেক ৰিলিজ কৰিছে ।

মুম্বাই ইণ্ডিয়ানছ : আই পি এল ২০২৬ৰ বাবে মুম্বাই ইণ্ডিয়ানছে নিজৰ মূল দলটো ধৰি ৰাখিছে । ফ্ৰেঞ্চাইজিৰ পাৰ্চত ২.৭৫ কোটি টকা বাকী আছে । বেনয়ট জেকবছ, কে শ্ৰীজিথ, অৰ্জুন টেণ্ডুলকাৰ, ভিগ্ৰেশ পুথুৰ, কৰ্ণ শৰ্মা, লিজাদ উইলিয়ামছ, সত্যনাৰায়ণ ৰাজু, মুজীব উৰ ৰহমান, ৰিচ টপলীক মুকলি কৰি দিছে । মুঠ ৯ জন খেলুৱৈক মুকলি কৰি দিয়া হৈছে ।

ৰাজস্থান ৰয়েলছ : আই পি এল ২০২৬ৰ পূৰ্বে ৰাজস্থান ৰয়েলছে কুনাল ৰাথোড়, নীতিশ কুমাৰ ৰানা, ৱানন্দু হাছাৰংগা, অশোক শৰ্মা, কুমাৰ কাৰ্তিকেয়া, আকাশ মাধৱাল, মহীশ তীক্ষনা আৰু ফজলহক ফাৰুকীক মুকলি কৰি দিছে । ৰাজস্থানে ১৬.০৫ কোটিৰ পাৰ্চ লৈ নিলামত প্ৰৱেশ কৰিব ।

চেন্নাই ছুপাৰ কিংছ : চেন্নাই ছুপাৰ কিংছে সৰ্বাধিক ১১ জন খেলুৱৈক মুকলি কৰি । চেন্নাইয়ে ৰিলিজ কৰিছে আন্দ্ৰে সিদ্ধাৰ্থ, ৰাহুল ত্ৰিপাঠী, বংশ বেদী, শ্বেখ ৰছিদ, দীপক হুদা, ৰাচিন ৰবিন্দ্ৰ, বিজয় শংকৰ, কমলেশ নগৰকোটি আৰু মথিশ পাথিৰানাক । চেন্নাইৰ পাৰ্চত বাকী আছে ৪৩.৪ কোটি ।

ছানৰাইজাৰ্ছ হায়দৰাবাদ : ছানৰাইজাৰ্ছ হায়দৰাবাদে ৰিলিজ কৰিছে অভিনৱ মনোহৰ, অথৰ্ব তাৰে, শচীন বেবী, উইলন মুল্ডাৰ, মহম্মদ ছামি, ছিমৰজীত সিং, ৰাহুল চাহাৰ আৰু আদম জাম্পাক ।

গুজৰাট টাইটানছ : গুজৰাট টাইটানছে মুকলি কৰি দিছে বেভন জেকবছ, কৰ্ণ শৰ্মা, কে এল শ্ৰীজিত, লিজাৰ্ড উইলিয়ামছ, মুজীব উৰ ৰহমান, পি এছ এন ৰাজু, ৰিছ টপলি আৰু ভিগনেশ পুথুৰক ।

লগতে পঢ়ক : অক্ষৰ পেটেল নে কুলদীপ যাদৱ? দক্ষিণ আফ্ৰিকাৰ বিৰুদ্ধে প্লেয়িং একাদশত কোনে পাব স্থান