এছিয়া কাপৰ হাই ভল্টেজ যুঁজত আজি মুখামুখি হ’ব ভাৰত-পাকিস্তান

ভাৰত আৰু পাকিস্তান ক্ৰিকেট দল যেতিয়াই খেলপথাৰলৈ আহিছে, তেতিয়াই বহু বিবাদ, উত্তেজনা আৰু সংঘৰ্ষৰ সৃষ্টি হৈছে । অৱশ্যে এইবাৰৰ পৰিৱেশ বিগত কেইবছৰমানৰ তুলনাত পৃথক । পহলগাম সন্ত্ৰাসবাদী আক্ৰমণৰ পিছত পুনৰ তিক্ত হৈ পৰিছে দুয়োখন দেশৰ সম্পৰ্ক । ভাৰতে এই আক্ৰমণৰ প্ৰত্যুত্তৰ দি অপাৰেচন সিন্দুৰৰ জৰিয়তে বহু সন্ত্ৰাসবাদী আত্মগোপন স্থান ধ্বংস কৰে । দুয়োখন দেশৰ মাজত যুদ্ধও আৰম্ভ হয় । ইয়াৰ বাবেই এছিয়া কাপত দেওবাৰে অনুষ্ঠিত হ’বলগীয়া ভাৰত আৰু পাকিস্তানৰ খেলখন সন্দৰ্ভত দেশত প্ৰতিবাদৰ কণ্ঠ তীব্ৰতৰ হৈ পৰিছে । এনে পৰিস্থিতিত দুয়োখন দেশৰ মাজত ডুবাইত অনুষ্ঠিত হ’বলগীয়া এই মেচখন উত্তেজনাৰে ভৰা হ’ব পাৰে । কিন্তু পাকিস্তানৰ বিৰুদ্ধে ভাৰতক শক্তিশালী বুলি গণ্য কৰা এই মেচখনৰ বাবে টিম ইণ্ডিয়াৰ প্ৰশিক্ষক আৰু অধিনায়ক সম্পূৰ্ণ সাজু ।

ইফালে ভাৰত আৰু পাকিস্তানৰ এই খেলখন বৰ্জন কৰাৰ দাবী উত্থাপন হৈছে । টিম ইণ্ডিয়াক এছিয়া কাপৰ গ্ৰুপ এত স্থান দিয়া হৈছে য’ত পাকিস্তান দলো আছে । এইবাৰ দুয়োটা দলৰ মাজত ফাইনেলত সংঘৰ্ষ হোৱাৰ সম্ভাৱনা আছে যিটো পূৰ্বে কেতিয়াও হোৱা নাছিল । প্ৰথমখন খেলত ভাৰতে ইউ এ ইক ৯ উইকেটত পৰাস্ত কৰাৰ বিপৰীতে পাকিস্তানে প্ৰথমখন খেলত ওমানক ৯৩ ৰানত পৰাস্ত কৰি এছিয়া কাপত নিজৰ অভিযান আৰম্ভ কৰে । অভিজ্ঞতা আৰু যুৱ খেলুৱৈৰ মিশ্ৰণ থকা ভাৰতীয় দলটো দেখাত অতি শক্তিশালী । বৰ্তমানৰ টি-২০ বিশ্বকাপ চেম্পিয়ন ভাৰতে নিজৰ খিতাপ ৰক্ষাৰ বাবে এই প্ৰতিযোগিতাত প্ৰৱেশ কৰিছে ।

ভাৰতৰ তুলনাত পাকিস্তানৰ দলটো দুৰ্বল । এই দলটোত বাবৰ আজম আৰু মহম্মদ ৰিজৱানৰ দৰে তাৰকা খেলুৱৈ নাই । বিশ্বকাপত হোৱা লজ্জাজনক পৰাজয়ৰ পিছত পাকিস্তানী দলত বিশৃংখলতাৰ সৃষ্টি হৈছে । দলত অধিনায়ক আৰু প্ৰশিক্ষকক ধাৰাবাহিকভাৱে সলনি কৰি আছে । ক’ব পাৰি যে এই সময়ত পাকিস্তানৰ দলত অস্থিৰতাই বিৰাজ কৰিছে । ওমানক ৬৭ ৰানত আউট কৰাৰ পাছত পাকিস্তানে প্ৰথমে বেটিং কৰি ১৬০ ৰান সংগ্ৰহ কৰিবলৈ সংগ্ৰাম কৰিব লগা হৈছিল । ওমানৰ দৰে সৰু দলৰ বিৰুদ্ধেও দলটোৱে সংগ্ৰাম কৰিব লগা পৰিলক্ষিত হৈছিল ।

ভাৰতীয় দলত উৎকৃষ্ট বেটছমেন আৰু বলাৰ আছ । কুলদীপ যাদৱ, বৰুণ চক্ৰৱৰ্তী আৰু বুমৰাহ-হাৰ্দিকে ডুবাইৰ খেলপথাৰত পাকিস্তানী বেটছমেনক বিপদত পেলাব পাৰে । ২০২৪ চনৰ টি-২০ বিশ্বকাপত ভাৰত আৰু পাকিস্তানৰ মাজত খেলা মেচখনলৈকে দুয়োটা দলৰ মাজত ১৩ বাৰ সংঘৰ্ষ হৈছে য’ত ভাৰতে ১০খন মেচত জয়লাভ কৰাৰ বিপৰীতে পাকিস্তানে ৩খন খেলত জয়লাভ কৰিছে ।

ভাৰতৰ সম্ভাব্য মূল একাদশ-

অভিষেক শৰ্মা, শুভমন গীল, সঞ্জু চেমছন, সূৰ্য্যকুমাৰ যাদৱ (অধিনায়ক), তিলক বাৰ্মা, শিৱম ডুবে, হাৰ্দিক পাণ্ডিয়া, অক্ষৰ পেটেল, কুলদীপ যাদৱ, যশপ্ৰীত বুমৰাহ আৰু বৰুণ চক্ৰৱৰ্তী ।

পাকিস্তানৰ সম্ভাব্য মূল একাদশ-

ছাইম আয়ুব, চাহিবজাদা ফাৰহান, মহম্মদ হাৰিছ (উইকেটকীপাৰ), ছলমান আঘা (অধিনায়ক), ফাখৰ জামান, হাছান নৱাজ, মহম্মদ নৱাজ, ফাহীম আছৰাফ, শ্বাহীন আফ্ৰিদি, আব্ৰাৰ আহমেদ আৰু চুফিয়ান মুকিম ।

লগতে পঢ়ক : ক্ৰিকেটত পাকিস্তান, হকীত চীনৰ সৈতে যুঁজ… ‘ছুপাৰ ছানডে’ত ভাৰতৰ সন্মুখত অগ্নিপৰীক্ষা

ক্ৰিকেটত পাকিস্তান, হকীত চীনৰ সৈতে যুঁজ

ক্ৰীড়াপ্ৰেমীৰ বাবে এই দেওবাৰ উৎসৱতকৈ কম নহয় । এই দিনটোত ভাৰতৰ দুটা ভিন্ন দলৰ নিজৰ চিৰ প্ৰতিদ্বন্দ্বী পাকিস্তান আৰু চীনৰ সৈতে সংঘৰ্ষ হ’ব । এফালে ডুবাইত অনুষ্ঠিত হ’বলগীয়া এছিয়া কাপৰ ক্ৰিকেট মেচত পাকিস্তানৰ বিৰুদ্ধে খেলিব টিম ইণ্ডিয়াই । আনহাতে, মহিলা হকী এছিয়া কাপৰ খিতাপৰ যুঁজ হাংঝুৰ মাটিত অনুষ্ঠিত হ’ব, য’ত ভাৰতীয় দলটোৱে আয়োজক চীনৰ সৈতে মুখামুখি হ’ব ।

ক্ৰিকেট আৰু হকী দুখন বেলেগ খেল হ’লেও এছিয়াৰ দুখন ঐতিহাসিক প্ৰতিদ্বন্দ্বিতাই একেদিনাই আৰু সন্ধিয়া উত্তেজনাৰ ধুমুহা সৃষ্টি কৰিবলৈ সাজু । ক্ৰীড়াৰ এই ছুপাৰ ছানডে’ কেৱল স্ক’ৰতে সীমাবদ্ধ নাথাকিব, ই গৌৰৱ, আবেগ আৰু প্ৰতিপত্তিৰ প্ৰতীক হৈ পৰিব । সমগ্ৰ বিশ্বৰ চকু এই খেলৰ ওপৰত থাকিব ।

পাকিস্তানৰ সৈতে ভাৰতৰ যুঁজ-

ডুবাই খেলপথাৰত ভাৰত আৰু পাকিস্তানৰ মাজত অনুষ্ঠিত হ’ব এছিয়া কাপৰ গ্ৰুপ পৰ্যায়ৰ মেচ । এই মেচখন গুৰুত্বপূৰ্ণ কাৰণ পহলগাম সন্ত্ৰাসবাদী আক্ৰমণ আৰু অপাৰেচন সিন্দুৰৰ পিছত দুয়োখন দেশৰ দলৰ মাজত প্ৰথমবাৰৰ বাবে সংঘৰ্ষ হ’ব । এই মেচ সন্দৰ্ভত বিৰোধিতাও তুংগত আছে । কিন্তু সদায়ৰ দৰেই উৎসাহো অক্ষত আছে ।

দেওবাৰে নিশা ৮ বজাৰ পৰা আৰম্ভ হ’ব ভাৰত আৰু পাকিস্তানৰ মাজৰ মেচ । ভাৰত আৰু পাকিস্তানৰ ইতিহাস যদি চোৱা যায় তেন্তে টি-২০ মেচত ১৩ বাৰ মুখামুখি হৈছে দুয়োখন দেশ । ইয়াত ভাৰতে পাকিস্তানক ৯ বাৰ পৰাস্ত কৰাৰ বিপৰীতে পাকিস্তানে ৩ বাৰ জয়লাভ কৰিছে । এখন মেচ আছিল টাই, যিখন খেলত ভাৰতে বল আউট ৰুলত জয়লাভ কৰিছিল ।

এছিয়া কাপ জয়তো ভাৰতৰ চকু আছে । দুয়োটা দলৰ মাজত টি-২০ ফৰ্মেটত ৩ বাৰ সংঘৰ্ষ হৈছে আৰু ভাৰতে ২ বাৰ জয়লাভ কৰিছে । কিন্তু মেচখন অনুষ্ঠিত হোৱা ডুবাই খেলপথাৰত আগবাঢ়ি আছে পাকিস্তান । এই খেলপথাৰত খেলা ৩ খন খেলৰ ভিতৰত ২ খনত পাকিস্তানে জয়লাভ কৰিছে ।

চীন মুখামুখি হ’ব মহিলা হকী দলৰ-

দেওবাৰে মহিলা হকী এছিয়া কাপৰ ফাইনেলত মুখামুখি হ’ব চীন আৰু ভাৰত । ভাৰতীয় মহিলা হকী দলে জাপানৰ বিৰুদ্ধে ১-১ গ’লত ড্ৰ’ কৰে । ইয়াৰ পিছত ভাৰতীয় দলৰ চকু চীন আৰু কোৰিয়াৰ মাজত চলি থকা মেচখনত আছিল । এই খেলখনত আয়োজক চীনে ছুপাৰ ৪ পৰ্যায়ৰ অন্তিমখন খেলত কোৰিয়াক ১-০ গ’লত পৰাস্ত কৰি ফাইনেলত প্ৰৱেশ কৰে । কোৰিয়াৰ পৰাজয়ৰ লগে লগে ভাৰতীয় দলৰ ফাইনেলৰ টিকট নিশ্চিত হয় ।

এই চূড়ান্ত খেলখনত যিয়ে জয়ী হ’ব, সেই অহা বছৰ বেলজিয়াম আৰু নেদাৰলেণ্ডত অনুষ্ঠিত হ’বলগীয়া বিশ্বকাপৰ বাবে যোগ্যতা অৰ্জন কৰিব । উল্লেখ্য যে এছিয়া কাপৰ ফাইনেলত ভাৰতীয় পুৰুষ হকী দলে জয়লাভ কৰে ।

লগতে পঢ়ক : এছিয়া কাপত কাইলৈ মুখামুখি হ’ব চিৰ প্ৰতিদ্বন্দ্বী ভাৰত-পাকিস্তান… কি ৰণনীতিৰে নামিব দুয়ো দল

এছিয়া কাপত কাইলৈ মুখামুখি হ’ব চিৰ প্ৰতিদ্বন্দ্বী ভাৰত-পাকিস্তান

চলিত এছিয়া কাপত জয়ৰে আৰম্ভণি কৰিছে ভাৰত আৰু পাকিস্তান দলে । দুয়োটা দলে প্ৰথমখন মেচত দৰ্শনীয় জয় সাব্যস্ত কৰিছে । এতিয়া দুয়োটা দলে মুখামুখি হ’বলৈ সাজু হৈছে । দেওবাৰে ডুবাইত ভাৰত আৰু পাকিস্তানৰ মাজত অনুষ্ঠিত হ’ব হাইভল্টেজ মেচ । এই মেচখন দুয়োটা দলৰ বাবে অতি গুৰুত্বপূৰ্ণ । কাৰণ এই মেচখনৰ বিজয়ী দলটোৱে ছুপাৰ ৪ত উপনীত হোৱাৰ সম্ভাৱনা বৃদ্ধি কৰিব । দুয়ো দলেই জয়ৰ বাবে মৰণপণ যুঁজত অৱতীৰ্ণ হ’ব । খিতাপৰ বাবে শক্তিশালী প্ৰতিদ্বন্দ্বী ভাৰতে ৮ বাৰ এছিয়া কাপৰ খিতাপ দখল কৰাৰ বিপৰীতে পাকিস্তানে দুবাৰকৈ খিতাপ দখল কৰিছে । ডুবাইৰ পৰিস্থিতিয়ে দুয়োটা দলৰ স্পীনাৰক উপকৃত কৰিব ।

ইয়াৰ পূৰ্বেও ডুবাইত ভাৰত আৰু পাকিস্তানে মেচ খেলিছে । ক্ৰিকেট খেলপথাৰত যেতিয়া ভাৰত-পাকিস্তান মুখামুখি হয় তেতিয়া দৰ্শকৰ উত্তেজনাৰ সকলো সীমা অতিক্ৰম কৰে । হাজাৰ হাজাৰ ক্ৰিকেট অনুৰাগী এই মেচৰ সৈতে আৱেগিকভাৱে আকৃষ্ট হৈ পৰে । অৱশ্যে এই মেচৰ পূৰ্বে দুয়োটা দলৰ বাবে আটাইতকৈ ডাঙৰ প্ৰত্যাহ্বান হ’ব সঠিক মূল একাদশ বাছি লোৱা ।

পাকিস্তানৰ বিৰুদ্ধে কি হ’ব ভাৰতীয় দলৰ ৰণকৌশল-

পাকিস্তানৰ বিৰুদ্ধে টিম ইণ্ডিয়াৰ মূল একাশক লৈ চৰ্চা চলিছে । বিশেষকৈ অৰ্শদীপ সিঙৰ স্থানৰ বিষয়ে । ইউ এ ইৰ বিৰুদ্ধে প্ৰথমখন খেলত শুভমন গীল আৰু অভিষেক শৰ্মাই অ’পেনিং কৰে । এনে পৰিস্থিতিত পাকিস্তানৰ বিৰুদ্ধেও তেওঁলোকক মুকলি কৰা দেখা যাব পাৰে । একে সময়তে মিডল অৰ্ডাৰৰ দায়িত্ব সূৰ্যকুমাৰ যাদৱ, তিলক বাৰ্মা, সঞ্জু ছেমচন আৰু শিৱম ডুবেৰ ওপৰত থাকিব ।

অল ৰাউণ্ডাৰ হিচাপে হাৰ্দিক পাণ্ডিয়া, অক্ষৰ পেটেল আৰু শিৱম ডুবেই দলৰ মাজত ভাৰসাম্য ৰক্ষা কৰিব । সঞ্জু চেমছনে উইকেটকীপাৰ বেটছমেন হিচাপে ফিনিছাৰৰ ভূমিকা পালন কৰিব পাৰে । বলিং বিভাগত যশপ্ৰীত বুমৰাহ, হাৰ্দিক পাণ্ডিয়া, শিৱম ডুবে, বৰুণ চক্ৰৱৰ্তী, কুলদীপ যাদৱ আৰু অক্ষৰ পেটেলে ভাৰতীয় আক্ৰমণক শক্তিশালী কৰিব ।

পাকিস্তানৰ দলে এই খেলুৱৈসকলক সুযোগ দিবনে ?

পাকিস্তানৰ সম্ভাৱ্য প্লেইং ১১ৰ কথা ক’বলৈ গ’লে ছেম আয়ুব, শ্বাহিবজাদা ফাৰহান, মহম্মদ হাৰিছ, ফাখৰ জামান আৰু ছলমান আঘাই বেটিঙৰ দায়িত্ব চম্ভালিব পাৰে । আনহাতে বলিংত মহম্মদ নৱাজ, ফাহীম আশ্ৰাফ, শ্বাহীন আফ্ৰিদি, চুফিয়ান মুকীম আৰু আব্ৰাৰ আহমেদে গুৰুত্বপূৰ্ণ ভূমিকা পালন কৰিব ।

ভাৰতৰ সম্ভাৱ্য মূল একাদশ-

শুভমন গীল, অভিষেক শৰ্মা, তিলক বাৰ্মা, সূৰ্য্যকুমাৰ যাদৱ (অধিনায়ক), সঞ্জু ছেমচন (উইকেটকীপাৰ), হাৰ্দিক পাণ্ডিয়া, শিৱম ডুবে, অক্ষৰ পেটেল, বৰুণ চক্ৰৱৰ্তী, কুলদীপ যাদৱ, যশপ্ৰীত বুমৰাহ ।

পাকিস্তান সম্ভাৱ্য মূল একাদশ-

ছেম আয়ুব, চাহিবজাদা ফাৰহান, মহম্মদ হাৰিছ (উইকেটকীপাৰ), ফখৰ জামান, ছলমান আঘা (অধিনায়ক), হাছান নৱাজ, মহম্মদ নৱাজ, ফাহীম আশ্ৰফ, শ্বাহীন আফ্ৰিদি, চুফিয়ান মুকীম, আব্ৰাৰ আহমেদ ।

লগতে পঢ়ক : ‘ভাৰতীয় দল বিজয়ী হৈ উভতি আহিব…’; এছিয়া কাপক লৈ কপিল দেৱৰ ডাঙৰ মন্তব্য

ফেব্ৰুৱাৰীত অনুষ্ঠিত হ’ব পাৰে ২০২৬ৰ টি২০ বিশ্বকাপ

৭ ফেব্ৰুৱাৰীৰ পৰা ৮ মাৰ্চলৈ অনুষ্ঠিত হ’ব পাৰে ২০২৬ বৰ্ষৰ টি২০ বিশ্বকাপ । এই প্ৰতিযোগিতা ভাৰত আৰু শ্ৰীলংকাই যৌথভাৱে আয়োজন কৰিব । প্ৰকাশিত এক প্ৰতিবেদন অনুসৰি ভাৰতৰ কমেও পাঁচটা স্থানত টি ২০ বিশ্বকাপৰ খেল অনুষ্ঠিত হ’ব, আনহাতে শ্ৰীলংকাৰ দুটা স্থানত এই প্ৰতিযোগিতাৰ মেচ অনুষ্ঠিত হ’ব ।

আহমেদাবাদ বা কলম্বোত অনুষ্ঠিত হ’ব ফাইনেল-

আহমেদাবাদ বা কলম্বোত অনুষ্ঠিত হ’ব টি২০ বিশ্বকাপৰ ফাইনেল । পাকিস্তানে ফাইনেলত প্ৰৱেশ কৰিব নে নাই তাৰ ওপৰত নিৰ্ভৰ কৰিব এই কথা । ভাৰত আৰু পাকিস্তান দলে ইখনে সিখন দেশত খেলা নাই, যাৰ বাবে তেওঁলোকৰ মেচ নিৰপেক্ষ স্থানত অনুষ্ঠিত হৈ আছে । আই চি চিয়ে এতিয়াও সূচী চূড়ান্ত কৰি আছে যদিও প্ৰতিবেদন অনুসৰি প্ৰতিযোগিতাখনৰ উইণ্ডো নিৰ্ধাৰণ কৰি অংশগ্ৰহণকাৰী দেশসমূহৰ সৈতে শ্বেয়াৰ কৰা হৈছে ।

২০২৪ চনৰ দৰেই থাকিব ফৰ্মেট-

টি২০ বিশ্বকাপ ২০২৬ৰ ফৰ্মেট ২০২৪ চনৰ দৰেই থাকিব য’ত ২০টা দলক চাৰিটা গ্ৰুপত ভাগ কৰা হ’ব আৰু প্ৰতিটো গ্ৰুপত পাঁচটা দল থাকিব । প্ৰতিটো গ্ৰুপৰ পৰা শীৰ্ষ দুটা দলে ছুপাৰ এইট পৰ্যায়ৰ বাবে যোগ্যতা অৰ্জন কৰিব আৰু এই আঠটা দলক চাৰিটাকৈ দুটাকৈ গ্ৰুপত ভাগ কৰা হ’ব । ইয়াৰ ভিতৰত প্ৰতিটো গ্ৰুপৰ পৰা শীৰ্ষ দুটা দলে ছেমি ফাইনেলত প্ৰৱেশ কৰিব । ভাৰতীয় দলটোৱে ২০২৪ চনত দক্ষিণ আফ্ৰিকাক ফাইনেলত পৰাস্ত কৰি খিতাপ দখল কৰিছিল । এইবাৰ প্ৰতিযোগিতাখনত মুঠ ৫৫খন খেল অনুষ্ঠিত হ’ব ।

বৰ্তমান ১৫ টা দলে অৰ্জন কৰিছে যোগ্যতা-

বৰ্তমান ১৫ টা দলে টি-২০ বিশ্বকাপ ২০২৬ৰ বাবে যোগ্যতা অৰ্জন কৰিছে য’ত ভাৰত, শ্ৰীলংকা, আফগানিস্তান, অষ্ট্ৰেলিয়া, বাংলাদেশ, ইংলেণ্ড, দক্ষিণ আফ্ৰিকা, আমেৰিকা, ৱেষ্ট ইণ্ডিজ, নিউজীলেণ্ড, পাকিস্তান, আয়াৰলেণ্ড, কানাডা, নেদাৰলেণ্ড আৰু ইটালী অন্তৰ্ভুক্ত আছে । ইটালীৰ দলটোৱে প্ৰথমবাৰৰ বাবে এই প্ৰতিযোগিতাত খেলিব । বাকী পাঁচটা দল কোৱালিফায়াৰৰ জৰিয়তে নিৰ্বাচিত কৰা হ’ব, ইয়াৰে দুটা দল আফ্ৰিকা অঞ্চলৰ কোৱালিফায়াৰৰ পৰা নিৰ্বাচিত হ’ব, আনহাতে এছিয়া আৰু ইষ্ট এছিয়া পেচিফিক কোৱালিফায়াৰৰ পৰা তিনিটা দল নিৰ্বাচিত কৰা হ’ব ।

লগতে পঢ়ক : আজিৰে পৰা আৰম্ভ এছিয়া কাপৰ যুঁজ… সূচীৰ পৰা দললৈকে জানক প্ৰতিটো প্ৰশ্নৰ উত্তৰ

আজিৰে পৰা আৰম্ভ এছিয়া কাপৰ যুঁজ

আজিৰে পৰা আৰম্ভ হ’ব ক্ৰিকেট এছিয়া কাপ প্ৰতিযোগিতা ২০২৫ । আবুধাবিৰ শ্বেখ জায়েদ ষ্টেডিয়ামত আজি আফগানিস্তান আৰু হংকঙৰ মাজত অনুষ্ঠিত হ’ব এছিয়া কাপৰ উদ্বোধনী খেলখন । আনহাতে ভাৰতীয় দলটোৱে ১০ ছেপ্টেম্বৰৰ পৰা ডুবাই আন্তঃৰাষ্ট্ৰীয় ক্ৰিকেট ষ্টেডিয়ামত সংযুক্ত আৰব আমিৰশ্বাহী (ইউ এ ই)ৰ বিৰুদ্ধে এখন খেলৰ জৰিয়তে নিজৰ অভিযান আৰম্ভ কৰিব । তাৰ পিছত ১৪ ছেপ্টেম্বৰ (দেওবাৰ)ত ডুবাই খেলপথাৰত তীব্ৰ প্ৰতিদ্বন্দ্বী পাকিস্তানৰ বিৰুদ্ধে মুখামুখি হ’ব ভাৰতীয় দল ।

প্ৰথমবাৰৰ বাবে দুটা গ্ৰুপত ভাগ কৰা এছিয়া কাপত ৮টা দলে অংশগ্ৰহণ কৰিব । গ্ৰুপ এত আছে ভাৰত, পাকিস্তান, ওমান আৰু ইউ এ ই । গ্ৰুপ বিত আছে হংকং, আফগানিস্তান, শ্ৰীলংকা আৰু বাংলাদেশ । দুয়োটা গ্ৰুপৰ শীৰ্ষ দুটা দলে ছুপাৰ-৪ পৰ্যায়ত প্ৰৱেশ কৰাৰ সুযোগ পাব । ছুপাৰ-৪ ৰাউণ্ডৰ শীৰ্ষ দুটা দলে ২৮ ছেপ্টেম্বৰত খিতাপৰ মেচ খেলিব ।

কেতিয়া আৰু ক’ত চাব পাৰিব খেল ?

ছ’নী স্প’ৰ্টছ নেটৱৰ্কে এছিয়া কাপ ২০২৫ৰ সকলো খেল ভাৰতৰ টিভিত পোনপটীয়াকৈ সম্প্ৰচাৰ কৰিব । এই প্ৰতিযোগিতাৰ লাইভ ষ্ট্ৰীমিং চ’নী এল আই ভি এপ আৰু ইয়াৰ ৱেবছাইটতো উপলব্ধ হ’ব । এইবাৰ এছিয়া কাপত মুঠ ১৯খন খেল অনুষ্ঠিত হ’ব । ইয়াৰে ১৮খন খেল ভাৰতীয় সময় অনুসৰি নিশা ৮ বজাৰ পৰা আৰম্ভ হ’ব । ১৫ ছেপ্টেম্বৰত ইউ এ ই বনাম ওমানৰ মাজৰ খেলখনহে ভাৰতীয় সময় অনুসৰি সন্ধিয়া ৫.৩০ বজাৰ পৰা আৰম্ভ হ’ব ।

এছিয়া কাপত কোন চেম্পিয়ন হৈছিল ?

এইবাৰ এছিয়া কাপৰ ১৭ সংখ্যক সংস্কৰণ অনুষ্ঠিত হৈছে । এইবাৰ এই প্ৰতিযোগিতা টি-২০ ফৰ্মেটত অনুষ্ঠিত হ’ব । ইয়াৰ উপৰিও ২০১৬ আৰু ২০২২ চনত টি-২০ ফৰ্মেটত আয়োজন কৰা হৈছিল । বাকী ১৪টা সংস্কৰণ এদিনীয়া ফৰ্মেটত আয়োজন কৰা হৈছিল । এছিয়া কাপৰ সফল দল হিচাপে ভাৰতে এতিয়ালৈকে ৮ বাৰ খিতাপ দখল কৰিছে । ১৯৮৪ চনত (প্ৰথম সংস্কৰণ), ১৯৮৮, ১৯৯০-৯১, ১৯৯৫, ২০১০, ২০১৬, ২০১৮ আৰু ২০২৩ চনত ভাৰতীয় দল চেম্পিয়ন হৈছিল । আনহাতে শ্ৰীলংকাই ৬ বাৰ (১৯৮৬, ১৯৯৭, ২০০৪, ২০০৮, ২০১৪, ২০২২) আৰু পাকিস্তানে ২ বাৰ (২০০০, ২০১২) খিতাপ দখল কৰিছিল ।

আয়োজক কোন, ক’ত অনুষ্ঠিত হ’ব মেচ ?

ভাৰতীয় ক্ৰিকেট নিয়ন্ত্ৰণ ব’ৰ্ড (বি চি চি আই) এছিয়া কাপৰ আনুষ্ঠানিক আয়োজক যদিও সকলো খেল ইউ এ ইত অনুষ্ঠিত হ’ব । ভাৰত আৰু পাকিস্তানৰ সম্পৰ্ক উত্তেজনাপূৰ্ণ, গতিকে ভাৰতৰ মাটিত সকলো মেচ আয়োজন কৰাটো কঠিন হৈ পৰিছিল । চেম্পিয়নছ ট্ৰফী ২০২৫ৰ ভাৰতৰ মেচ ডুবাইত অনুষ্ঠিত হোৱাৰ দৰেই বি চি চি আইয়ে নিৰপেক্ষ স্থানত পাকিস্তানৰ সৈতে জড়িত মেচৰ আয়োজন কৰিবলগীয়া হ’লহেঁতেন । এই কাৰণতে সমগ্ৰ প্ৰতিযোগিতাখন ইউ এ ইত অনুষ্ঠিত কৰাৰ সিদ্ধান্ত লোৱা হয় । এছিয়া কাপৰ খেলসমূহ ডুবাই (ডুবাই আন্তঃৰাষ্ট্ৰীয় ক্ৰিকেট ষ্টেডিয়াম) আৰু আবুধাবি (শ্বেখ জায়েদ ষ্টেডিয়াম)ত অনুষ্ঠিত হ’ব ।

এছিয়া কাপত নেপালে কিয় অংশ লোৱা নাই ?

এছিয়া কাপ ২০২৫ৰ বাবে ভাৰত, শ্ৰীলংকা, পাকিস্তান, বাংলাদেশ আৰু আফগানিস্তানে পোনপটীয়াকৈ প্ৰৱেশ লাভ কৰিছে  । ওমান, ইউ এ ই আৰু হংকঙে কোৱালিফাইং প্ৰতিযোগিতা (এ চি চি পুৰুষ প্ৰিমিয়াৰ কাপ ২০২৪)ৰ জৰিয়তে প্ৰৱেশ লাভ কৰে । ওমানত অনুষ্ঠিত হোৱা এ চি চি পুৰুষ প্ৰিমিয়াৰ কাপ ২০২৪ত নেপালৰ দলটোৱে চতুৰ্থ স্থান দখল কৰে, যাৰ বাবে এছিয়া কাপত অংশগ্ৰহণৰ সুযোগ নাপালে ।

এছিয়া কাপ ২০২৫ৰ সূচী (ভাৰতীয় সময় অনুসৰি)

৯ ছেপ্টেম্বৰ : আফগানিস্তান বনাম হংকং, আবুধাবি, নিশা ৮ বজাত

১০ ছেপ্টেম্বৰ : ভাৰত বনাম ইউ এ ই, ডুবাই, নিশা ৮ বজাত

১১ ছেপ্টেম্বৰ : বাংলাদেশ বনাম হংকং, আবুধাবি, নিশা ৮ বজাত

১২ ছেপ্টেম্বৰ : পাকিস্তান বনাম ওমান, ডুবাই, নিশা ৮ বজাত

১৩ ছেপ্টেম্বৰ : বাংলাদেশ বনাম শ্ৰীলংকা, আবুধাবি, নিশা ৮ বজাত

১৪ ছেপ্টেম্বৰ : ভাৰত বনাম পাকিস্তান, ডুবাই, নিশা ৮ বজাত

১৫ ছেপ্টেম্বৰ : ইউ এ ই বনাম ওমান, আবুধাবি, ৫.৩০ বজাত

১৫ ছেপ্টেম্বৰ : শ্ৰীলংকা বনাম হংকং, ডুবাই, নিশা ৮ বজাত

১৬ ছেপ্টেম্বৰ : বাংলাদেশ বনাম আফগানিস্তান, আবুধাবি, নিশা ৮ বজাত

১৭ ছেপ্টেম্বৰ : পাকিস্তান বনাম ইউ এ ই, ডুবাই, নিশা ৮ বজাত

১৮ ছেপ্টেম্বৰ : শ্ৰীলংকা বনাম আফগানিস্তান, আবুধাবি, নিশা ৮ বজাত

১৯ ছেপ্টেম্বৰ : ভাৰত বনাম ওমান, আবুধাবি, নিশা ৮ বজাত

২০ ছেপ্টেম্বৰ : বি ১ বনাম বি ২, ডুবাই, নিশা ৮ বজাত

২১ ছেপ্টেম্বৰ : এ১ বনাম এ২, ডুবাই, নিশা ৮ বজাত

২৩ ছেপ্টেম্বৰ : এ২ বনাম বি১, আবুধাবি, নিশা ৮ বজাত

২৪ ছেপ্টেম্বৰ : এ১ বনাম বি২, ডুবাই, নিশা ৮ বজাত

২৫ ছেপ্টেম্বৰ : এ২ বনাম বি২, ডুবাই, নিশা ৮ বজাত

২৬ ছেপ্টেম্বৰ : এ১ বনাম বি১, ডুবাই, নিশা ৮ বজাত

২৮ ছেপ্টেম্বৰ : ফাইনেল, ডুবাই, নিশা ৮ বজাত

লগতে পঢ়ক : কাইলৈৰ পৰা ​​আৰম্ভ হ’ব এছিয়া কাপ… সাজু যুৱ আৰু অভিজ্ঞ খেলুৱৈ, ভাৰত-পাকিস্তানৰ মেচত অনুৰাগীৰ চকু