ট্ৰাম্পৰ ৪৮ ঘণ্টীয়া আল্টিমেটামৰ পিছত ইৰাণৰ স্থিতি কিছু কোমল হৈছে।ইৰাণে এতিয়া স্পষ্ট কৰি দিছে যে হৰমুজ প্ৰণালী সম্পূৰ্ণৰূপে বন্ধ নহয়, বৰঞ্চ শত্ৰু দেশৰ জাহাজৰ বাহিৰে সকলো দেশৰ জাহাজৰ বাবে এই পথ মুকলি হৈ আছে।

ইৰাণ আৰু আমেৰিকাৰ মাজত চলি থকা উত্তেজনাই এতিয়া বিপদজনক টাৰ্নিং পইণ্টত উপনীত হৈছে।বিশ্বৰ অন্যতম গুৰুত্বপূৰ্ণ তেলৰ পথ হৰমুজ প্ৰণালীৰ সন্দৰ্ভত ইৰাণৰ স্থিতি হঠাতে পৰিৱৰ্তন হোৱা যেন লাগিছে।

দৰাচলতে, আমেৰিকাৰ ৰাষ্ট্ৰপতি ড’নাল্ড ট্ৰাম্পে ইৰাণক প্ৰত্যক্ষ সতৰ্কবাণী দিছিল যে, যদি ৪৮ ঘণ্টাৰ ভিতৰত এই সামুদ্ৰিক পথ পুনৰ মুকলি কৰা নহয়, তেন্তে আমেৰিকাই ইৰাণৰ বিদ্যুৎ কেন্দ্ৰক লক্ষ্য কৰি ল’ব। এই ভাবুকিৰ মাত্ৰ কেইঘণ্টামানৰ পিছতে ইৰাণে এক বৃহৎ বিবৃতি প্ৰকাশ কৰিছে।

ইৰাণে কয় যে তেওঁলোকে এই পথটো সম্পূৰ্ণৰূপে বন্ধ কৰি ৰাখিব নিবিচাৰে। আন্তঃৰাষ্ট্ৰীয় সামুদ্ৰিক সংস্থাত ইৰাণৰ প্ৰতিনিধি আলী মৌছাভিয়ে দেওবাৰে কয় যে ‘শত্ৰু দেশ’ৰ জাহাজৰ বাহিৰে সকলো দেশৰ জাহাজৰ বাবে এই পথ মুকলি হৈ আছে।

ইয়াত “শত্ৰু” বুলি তেওঁলোকে পোনপটীয়াকৈ আমেৰিকা আৰু ইজৰাইলক বুজাইছে।ইৰাণে কয় যে যদি কোনো জাহাজে নিজৰ নিৰাপত্তা নিয়ম মানি চলে আৰু যদি তেওঁলোকৰ শত্ৰুৰ লগত কোনো সম্পৰ্ক নাই, তেন্তে ইয়াৰ মাজেৰে পাৰ হৈ যাব লৈ কোনো অসুবিধাৰ সন্মুখীন নহ’ব।

লগতে পঢ়ক: হৰমুজৰ সমিপতে ধ্বংস কৰা হ’ল শত্ৰুৰ এফ-১৫ যুঁজাৰু জেট; ইৰাণৰ ডাঙৰ দাবী

ইৰাণৰ সংবাদ মাধ্যমে দাবী কৰিছে যে, দেশখনৰ দক্ষিণ উপকূলৰ সমীপত শত্ৰুৰ এখন যুদ্ধ বিমান ধ্বংস কৰা হৈছে। এই বিমানখন এফ-১৫ যুদ্ধ বিমান আছিল।

ইৰাণৰ চৰকাৰী সংবাদ মাধ্যম প্ৰেছ টিভিয়ে দাবী কৰিছে যে দেশখনৰ দক্ষিণ উপকূলৰ সমীপত শত্ৰুৰ এখন যুদ্ধ বিমান ধ্বংস কৰা হৈছে। প্ৰতিবেদন অনুসৰি, এই বিমানখন এফ-১৫ যুদ্ধ বিমান আছিল, য’ত ইৰাণৰ বায়ু প্ৰতিৰক্ষা ব্যৱস্থাই বাধা দিয়াৰ পিছত লক্ষ্য কৰি লৈছিল।

আমেৰিকা আৰু ইৰাণৰ মাজত চলি থকা সংঘাতৰ মাজতে আমেৰিকাৰ সেনাবাহিনীয়ে এক বৃহৎ বিপৰ্যয়ৰ সন্মুখীন হৈছে।খবৰ অনুসৰি আমেৰিকাই এতিয়ালৈকে কমেও ১৭খন সামৰিক বিমান হেৰুৱাইছে,য’ত ১২ খন ড্ৰোন আৰু ৪ খন মানৱ সম্পন্ন বিমান অন্তৰ্ভূক্ত আছে।ইয়াৰোপৰি এফ-৩৫ যুঁজাৰু বিমান এখনো ক্ষতিগ্ৰস্ত হৈছে।

লগতে পঢ়ক: ৪৮ ঘন্টাৰ ভিতৰত মুকলি কৰক হৰমুজ প্ৰণালীঃ ইৰাণক অন্তিম সকীয়নি ট্ৰাম্পৰ

ইৰাণৰ সৈতে চলি থকা সংঘাতৰ মাজতে আমেৰিকাৰ মিত্ৰ দেশসমূহে নিজকে ইয়াৰ পৰা আঁতৰাই ৰাখিছে। তাৰ মাজতে আমেৰিকা সন্দৰ্ভত ছুইজাৰলেণ্ডে এক বৃহৎ সিদ্ধান্ত গ্ৰহণ কৰিছে।

ইৰাণৰ সৈতে সংঘাতৰ মাজতে আমেৰিকাৰ অতি ঘনিষ্ঠ মিত্ৰ চুইজাৰলেণ্ডে আমেৰিকাৰ পৰা নিজকে আঁতৰাই ৰাখিছে।ইউৰোপীয় ৰাষ্ট্ৰ চুইজাৰলেণ্ডে কয় যে তেওঁলোকে ইৰাণৰ ওপৰত চলি থকা আক্ৰমণক লৈ আমেৰিকালৈ অস্ত্ৰ ৰপ্তানিৰ বাবে কোম্পানীসমূহক অনুজ্ঞাপত্ৰ প্ৰদান নকৰে।

চুইজাৰলেণ্ডে কয় যে তেওঁলোকে কোনো কাৰণতে যুদ্ধক ইন্ধন যোগোৱা নাই, বৰঞ্চ নিৰপেক্ষ হৈয়েই আছে।এনে পৰিস্থিতিত আমেৰিকালৈ অস্ত্ৰ ৰপ্তানি অব্যাহত ৰাখিব নোৱাৰে।

চুইজাৰলেণ্ড চৰকাৰে এক বিবৃতিত কয় যে,ইৰাণৰ সৈতে চলি থকা আন্তঃৰাষ্ট্ৰীয় সশস্ত্ৰ সংঘাতৰ সৈতে জড়িত দেশসমূহক সংঘাত চলি থকালৈকে যুদ্ধ সামগ্ৰী ৰপ্তানিৰ অনুমতি দিব নোৱাৰি। বৰ্তমান আমেৰিকালৈ যুদ্ধ সামগ্ৰী ৰপ্তানিৰ অনুমতি দিয়া নহ’ব।

লগতে পঢ়ক: ‘খেমেইনীৰ হত্যাৰ প্ৰতিশোধ লোৱা হ’ব,ইয়াৰ মূল্য দিব লাগিব’; ট্ৰাম্পৰ ভাবুকি ইৰাণৰ

উপসাগৰীয় দেশসমূহৰ তেল আৰু গেছৰ কেন্দ্ৰসমূহত আক্ৰমণৰ পিছত ছৌদি আৰব, কুৱেইট, কাটাৰ, ইউ এ ইৰ তেল শোধনাগাৰসমূহ জ্বলি উঠিছে। ইয়াৰ মাজতে ইৰাণে কৈছে যে প্ৰতিশোধ এতিয়াও সম্পূৰ্ণ হোৱা নাই।

উপসাগৰীয় দেশসমূহৰ তেল শোধনাগাৰত আক্ৰমণৰ ধাৰাবাহিকতাৰ পিছতো ইৰাণৰ আক্ৰমণ বন্ধ হোৱাৰ কোনো লক্ষণ দেখা পোৱা নাই।ইৰাণে কয় যে তেওঁলোকৰ গেছক্ষেত্ৰত আক্ৰমণৰ প্ৰতিশোধ এতিয়াও সম্পূৰ্ণ হোৱা নাই।ইৰাণৰ এই স্থিতিয়ে এটা স্পষ্ট বাৰ্তা প্ৰেৰণ কৰিছে যে অনাগত দিনত উপসাগৰীয় দেশসমূহৰ শক্তি কেন্দ্ৰসমূহত আক্ৰমণ অব্যাহত থাকিব পাৰে।

ইৰাণৰ সশস্ত্ৰ বাহিনীৰ যৌথ কমাণ্ডৰ মুখপাত্ৰই জনাইছে যে,ইৰাণৰ শক্তি আন্তঃগাঁথনিৰ ওপৰত ইজৰাইলৰ আক্ৰমণৰ প্ৰতিশোধ এতিয়াও সমাপ্ত হোৱা নাই।

সশস্ত্ৰ বাহিনীৰ যৌথ কমাণ্ডৰ এগৰাকী মুখপাত্ৰই সতৰ্কবাণী জাৰি কৰিছে যে এনেধৰণৰ আক্ৰমণৰ যদি পুনৰাবৃত্তি হয় তেন্তে হয়টো ইৰাণে “বহুত বেছি বলপূৰ্বক প্ৰতিশোধমূলক আক্ৰমণ” চলাব। ইৰাণে কয় যে, ইয়াৰ প্ৰতিশোধ হিচাপে শত্ৰুৰ শক্তি আন্তঃগাঁথনিৰ লগতে তেওঁলোকৰ মিত্ৰশক্তিৰ আন্তঃগাঁথনিকো লক্ষ্য কৰি লোৱা হ’ব।

IRGC ৰ খাটাম আল-আনবিয়া কেন্দ্ৰীয় মুখ্য কাৰ্যালয়ৰ এগৰাকী মুখপাত্ৰই জনোৱা মতে, আমি শত্ৰুক সকীয়াই দিওঁ যে, ইৰাণৰ শক্তি আন্তঃগাঁথনি আক্ৰমণ কৰি আপোনালোকে এক ডাঙৰ ভুল কৰিলে।যদি ইয়াৰ পুনৰাবৃত্তি হয় তেন্তে শত্ৰু আৰু ইয়াৰ সহযোগী সকলৰ শক্তিৰ আন্তঃগাঁথনিৰ ওপৰত পৰৱৰ্তী আক্ৰমণ বন্ধ নহ’ব।

লগতে পঢ়ক: ‘ধেমালীৰ বাবেও তেহৰানৰ তেলৰ ঠিকনাত…’; ইৰাণত মুকলি ভাবুকি ট্ৰাম্পৰ

আমেৰিকাই হৰমুজৰ প্ৰণালীৰ সমুদ্ৰৰ পথ মুকলি কৰিবৰ বাবে ইৰাণৰ ক্ষেপণাস্ত্ৰ ঘাটিত ৫ হাজাৰ পাউণ্ডৰ ‘বাংকাৰ বাষ্টাৰ’ বোমা নিক্ষেপ কৰিছে।

মধ্যপ্ৰাচ্যত ইৰাণ, আমেৰিকা, ইজৰাইলৰ যুদ্ধ তীব্ৰৰ পৰা তীব্ৰতৰ হৈ পৰিছে।বিশ্বজুৰি তেল যোগানৰ বাবে আটাইতকৈ জটিল পথ হিচাপে বহুলভাৱে গণ্য কৰা হৰমুজ প্ৰণালী পুনৰ মুকলি কৰাৰ বাবে আমেৰিকাই সম্পূৰ্ণ চেষ্টা কৰিছে।

আমেৰিকাৰ সেনাই সেই ইৰাণৰ ক্ষেপণাস্ত্ৰ ঘাটিবোৰত আক্ৰমণ চলাইছে,য’ৰ পৰা সাগৰত যাত্ৰা কৰা জাহাজবোৰক লক্ষ্য কৰি লোৱা হৈছিল। এই আক্ৰমণত আমেৰিকাই নিজৰ অস্ত্ৰভাণ্ডাৰৰ আটাইতকৈ ভয়ংকৰ অস্ত্ৰ অৰ্থাৎ ৫০০০ পাউণ্ডৰ ‘বাংকাৰ বাষ্টাৰ’ বোমা নিক্ষেপ কৰিছে।

আমেৰিকাৰ চেণ্ট্ৰেল কমাণ্ডে ‘এক্স’ (টুইটাৰ)ত এই তথ্য শ্বেয়াৰ কৰি কয় যে, কেইঘণ্টামানৰ আগতে আমেৰিকাৰ সেনাবাহিনীয়ে হৰমুজ প্ৰণালীৰ সমিপত থকা ইৰাণৰ দুৰ্গম ক্ষেপণাস্ত্ৰ ঘাটিত বৃহৎ বোমাৰে ধ্বংস কৰি পেলাইছে। দৰাচলতে, এইটো সেইটো ঠিকনা হয় য’ৰ পৰা ইৰাণৰ জাহাজ বিৰোধী ক্ষেপণাস্ত্ৰই আন্তঃৰাষ্ট্ৰীয় জাহাজ চলোৱাৰ বাবে ভাবুকি কঢ়িয়াই আনিছিল। উল্লেখ্য যে, ইৰাণে এই পথটো বন্ধ কৰি দিছিল,যাৰ মাজেৰে বিশ্বৰ প্ৰায় ২০% তেল পাৰ হয়।ফলত সমগ্ৰ বিশ্বতে পেট্ৰ’ল আৰু ডিজেলৰ দাম আকাশলংঘী হ’বলৈ ধৰিলে আৰু সামুদ্ৰিক পথত ভয়ৰ পৰিৱেশ বিৰাজ কৰিলে।

আমোদজনকভাৱে এই যুদ্ধত ট্ৰাম্পে নিজকে অকলশৰীয়া অনুভৱ কৰিছে।তেওঁ নাটোকে ধৰি নিজৰ পুৰণা মিত্ৰ দেশসমূহৰ পৰা সহায় বিচাৰিছিল,কিন্তু বেছিভাগেই এই যুদ্ধত একত্ৰিত হ’বলৈ অস্বীকাৰ কৰিছে।যাৰ বাবে ট্ৰাম্প যথেষ্ট ক্ষোভিত হৈছে যে বছৰ বছৰ ধৰি আমেৰিকাই নাটোক সমৰ্থন কৰি আহিছে,কিন্তু এতিয়া আমেৰিকাক সহায়ৰ প্ৰয়োজন হোৱাত কোনো দেশেই এখন সৰু জাহাজ পঠিয়াবলৈও ইচ্ছুক নহয়।

লগতে পঢ়ক: হৰমুজ পাৰ হৈ ভাৰত পালেহি নন্দাদেৱী, কঢ়িয়াই আনিছে ৪৭ হাজাৰ মেট্ৰিক টন গেছ