ভ্লাদিমিৰ পুটিনে মোজতাবা খামেনেইক ইৰাণৰ নতুন নেতা হিচাপে নিৰ্বাচিত হোৱাৰ বাবে অভিনন্দন জনাই

ৰাছিয়াৰ ৰাষ্ট্ৰপতি ভ্লাদিমিৰ পুটিনে মোজতাবা খামেনেইক ইৰাণৰ নতুন নেতা হিচাপে নিৰ্বাচিত হোৱাৰ বাবে অভিনন্দন জনাই । পুটিনে শুভেচ্ছা বাৰ্তাত কয় যে তেওঁ নিজৰ পিতৃৰ কাম সন্মানেৰে অব্যাহত ৰাখিব বুলি আত্মবিশ্বাসী । উল্লেখ্য যে, ইৰাণৰ প্ৰাক্তন সৰ্বোচ্চ নেতা আলী খামেনেইৰ পুত্ৰ মোজতাবা খামেনেই । ২৮ ফেব্ৰুৱাৰীত আমেৰিকা আৰু ইজৰাইলৰ আক্ৰমণত নিহত হৈছিল আলী খামেনেই । তেতিয়াৰ পৰাই মোজতাবা খামেনেইৰ নাম ইৰাণৰ সৰ্বোচ্চ নেতা হিচাবে চৰ্চা চলিছিল ।

ইৰাণৰ উচ্চতম নেতা হিচাপে মোজতাবা খামেনেইক অভিনন্দন জনোৱা বিশ্বৰ প্ৰথম নেতাসকলৰ ভিতৰত পুটিন অন্যতম । ক্ৰেমলিনে প্ৰকাশ কৰা এক বিবৃতিত পুটিনে কয় যে, “মই নিশ্চিত যে আপুনি আপোনাৰ পিতৃৰ কাম সন্মানেৰে অব্যাহত ৰাখিব আৰু কঠিন পৰিস্থিতিত ইৰাণৰ জনসাধাৰণক একত্ৰিত কৰিব ।”

ৰাছিয়াৰ ৰাষ্ট্ৰপতিগৰাকীয়ে আৰু কয়, “মোৰ ফালৰ পৰা মই তেহৰাণৰ প্ৰতি আমাৰ অটল সমৰ্থন আৰু আমাৰ ইৰাণী বন্ধুসকলৰ সৈতে আমাৰ সংহতি পুনৰ দৃঢ় কৰিব বিচাৰিছো ।” উল্লেখ্য যে, আমেৰিকাৰ হেঁচা সত্ত্বেও ৰাছিয়াৰ ৰাষ্ট্ৰপতিয়ে মোজতাবা খামেনেইক অভিনন্দন জনোৱাটোৱে ৰাছিয়াৰ স্থিতি স্পষ্টভাৱে প্ৰমাণ কৰিছে ।

ট্ৰাম্পৰ হুংকাৰ-

ইফালে ইৰাণৰ নতুন নেতা তেওঁ বাছনি কৰিব বুলি উল্লেখ কৰিছে আমেৰিকাৰ ৰাষ্ট্ৰপতি ট্ৰাম্পে । তেওঁ মোজতাবা খামেনেইক ভাবুকি দি কয় যে তেওঁও আমেৰিকাৰ আক্ৰমণত নিহত হ’ব ।

দেওবাৰে আমেৰিকাৰ ৰাষ্ট্ৰপতি ড’নাল্ড ট্ৰাম্পে কয় যে ৱাশ্বিংটনৰ অনুমোদন অবিহনে ইৰাণৰ পৰৱৰ্তী নেতা “বহু দিন টিকি নাথাকিব” । এক সাক্ষাৎকাৰত ৰাষ্ট্ৰপতি ট্ৰাম্পে কয় যে তেওঁ আমাৰ পৰা অনুমতি ল’ব লাগিব । “যদি তেওঁ আমাৰ পৰা অনুমোদন নাপায় তেন্তে তেওঁ বৰ বেছি দিন নাথাকিব ।”

আনহাতে আমেৰিকাৰ তীব্ৰ হেঁচাৰ পাছতো পুটিনে ইৰাণৰ নতুন নেতাক অভিনন্দন জনাই ৰাছিয়াৰ অটল সমৰ্থনৰ প্ৰতিশ্ৰুতি দিয়ে । পুটিনে কয় যে, “ইৰাণৰ ইছলামিক ৰিপাব্লিকৰ সৰ্বোচ্চ নেতা আয়াতুল্লাহ ছেইয়দ মোজতাবা হোছেইনী খামেনেই… ইৰাণৰ সৰ্বোচ্চ নেতা হিচাপে নিৰ্বাচিত হোৱাৰ বাবে মোৰ অভিনন্দন গ্ৰহণ কৰক ।”

পুটিনে কয় যে ৰাছিয়াই তেহৰাণৰ সৈতে থিয় দিব । তেওঁ তেহৰাণৰ প্ৰতি অটল সমৰ্থন আৰু আমাৰ ইৰাণী বন্ধুসকলৰ সৈতে সংহতি নিশ্চিত কৰিব বিচাৰে বুলি কয় ।

লগতে পঢ়ক : ইৰানৰ নতুন সৰ্বোচ্চ নেতা হ’ল মোজতাবা খেমেইনী; আনুষ্ঠানিকতাৰ পিছতেই ট্ৰাম্পৰ ভাবুকি

উপসাগৰীয় আৰব ৰাষ্ট্ৰসমূহৰ ফালে এতিয়াও ক্ষেপণাস্ত্ৰ আৰু ড্ৰোন আক্ৰমণ অব্যাহত ৰাখিছে ইৰাণে

ইৰাণৰ ৰাষ্ট্ৰপতি মাছুদ পেজেছকিয়ানে শনিবাৰে চুবুৰীয়া দেশসমূহৰ ওপৰত আক্ৰমণৰ বাবে ক্ষমা বিচাৰিছিল যদিও উপসাগৰীয় আৰব ৰাষ্ট্ৰসমূহৰ ফালে দেশখনে এতিয়াও ক্ষেপণাস্ত্ৰ আৰু ড্ৰোন আক্ৰমণ অব্যাহত ৰাখিছে । ইয়াৰ মাজতে ইৰাণে পুনৰবাৰ ডুবাইত আক্ৰমণ চলাইছে । এই আক্ৰমণত এজন লোকৰ মৃত্যু হোৱা বুলি বাতৰি প্ৰকাশ পাইছে । ডুবাই চৰকাৰে এই কথা নিশ্চিত কৰি কয় যে তেওঁলোকৰ বায়ু প্ৰতিৰক্ষা ব্যৱস্থাই আক্ৰমণক সফলতাৰে বাধা দিছিল যদিও সৰি পৰা ধ্বংসাৱশেষে মেৰিনাৰ এটা টাৱাৰৰ বাহিৰৰ অংশৰ ক্ষতিসাধন কৰে ।

ইউ এ ইৰ বিষয়াসকলে জনোৱা মতে, ডুবাইত ক্ষেপণাস্ত্ৰ আক্ৰমণৰ ফলত ধ্বংসাৱশেষৰ আঘাতত এজন ব্যক্তিৰ মৃত্যু হয় । মৃত লোকজন এছিয়াৰ নাগৰিক আৰু উপসাগৰীয় চহৰখনৰ প্ৰধান আল বাৰ্ছা অঞ্চলত গাড়ী চলাই থকাৰ সময়তে মৃত্যু হয় ।

উল্লেখ্য যে, ইৰাণৰ উপসাগৰীয় আৰব দেশসমূহৰ ফালে ক্ষেপণাস্ত্ৰ আৰু ড্ৰোন নিক্ষেপ অব্যাহত থকাৰ সময়তে দেশখনৰ ৰাষ্ট্ৰপতি মাছুদ পেজেছকিয়ানে চুবুৰীয়া দেশসমূহৰ ওপৰত আক্ৰমণৰ বাবে শনিবাৰে ক্ষমা বিচাৰিছিল । ইয়াৰ পৰা বুজা যায় যে তেহৰাণৰ ৰাজনৈতিক নেতৃত্বৰ ইৰাণৰ সশস্ত্ৰ বাহিনীৰ ওপৰত সম্পূৰ্ণ নিয়ন্ত্ৰণৰ অভাৱ । আমেৰিকাৰ ৰাষ্ট্ৰপতি ড’নাল্ড ট্ৰাম্পে বাৰে বাৰে কৰা আত্মসমৰ্পণৰ দাবীও নাকচ কৰে পেজেস্কিয়ানে ।

লগতে পঢ়ক : ইৰাণৰ ওপৰত আজি হ’ব ভীষণ আক্ৰমণঃ ড’নাল্ড ট্ৰাম্পৰ হুংকাৰ

আমেৰিকাৰ ৰাষ্ট্ৰপতি ড’নাল্ড ট্ৰাম্পে ইৰাণৰ বিৰুদ্ধে এতিয়ালৈকে তেওঁৰ আটাইতকৈ কঠোৰ সতৰ্কবাণী জাৰি কৰিছে

পশ্চিম এছিয়াত অব্যাহত থকা উত্তেজনাৰ মাজতে আমেৰিকাৰ ৰাষ্ট্ৰপতি ড’নাল্ড ট্ৰাম্পে ইৰাণৰ বিৰুদ্ধে এতিয়ালৈকে তেওঁৰ আটাইতকৈ কঠোৰ সতৰ্কবাণী জাৰি কৰিছে । ট্ৰাম্পে স্পষ্টকৈ উল্লেখ কৰিছে যে আজি ইৰাণক তীব্ৰ আক্ৰমণেৰে আক্ৰমণ কৰা হ’ব । তেওঁ ইৰাণক “পশ্চিম এছিয়াৰ লুজাৰ” বুলি অভিহিত কৰি কয় যে তেওঁলোকৰ অহংকাৰ এতিয়া শেষ হৈছে । ইৰাণে চুবুৰীয়া উপসাগৰীয় দেশসমূহৰ ওচৰত ক্ষমা বিচৰাৰ পিছতে ট্ৰাম্পৰ এই মন্তব্য প্ৰকাশ পাইছে ।

আমেৰিকাৰ ৰাষ্ট্ৰপতি ট্ৰাম্পে নিজৰ ছ’চিয়েল মিডিয়া প্লেটফৰ্ম “ট্ৰুথ ছ’চিয়েল”ত ইৰাণক তীব্ৰ সমালোচনা কৰে । ট্ৰাম্পে কয় যে ইৰাণ এতিয়া পশ্চিম এছিয়াত গুৰু্ত্বপূৰ্ণ শক্তি নহয়, বৰঞ্চ ইৰাণ “পৰাজিত” খেলুৱৈ হৈ পৰিছে । ট্ৰাম্পৰ মতে ইৰাণৰ এই দুৰ্দশাৰ কাৰণ হৈছে আমেৰিকা আৰু ইজৰাইলৰ সামৰিক এক্সন । তেওঁ দাবী কৰে যে ইৰাণক যুদ্ধত তীব্ৰ প্ৰহাৰ কৰাৰ বাবেই চুবুৰীয়া ৰাষ্ট্ৰৰ ওচৰত আত্মসমৰ্পণ কৰিছে ।

ট্ৰাম্পে নিজৰ পোষ্টত লিখিছে যে হাজাৰ হাজাৰ বছৰৰ পাছত এইবাৰ প্ৰথমবাৰৰ বাবে ইৰাণক চুবুৰীয়া মধ্যপ্ৰাচ্যৰ দেশসমূহৰ হাতত এনেদৰে পৰাস্ত কৰা হৈছে । তেওঁ কয়, “ইৰাণে প্ৰতিশ্ৰুতি দিছে যে তেওঁলোকে আৰু নিজৰ চুবুৰীয়া দেশসমূহৰ ওপৰত আক্ৰমণ নকৰে । তেওঁলোকৰ সমগ্ৰ পশ্চিম এছিয়া জয় কৰি শাসন কৰাৰ সপোন এতিয়া ছিন্নভিন্ন হৈ পৰিছে ।”

ট্ৰাম্প লগতে তেওঁ ইৰাণক সম্পূৰ্ণৰূপে ধ্বংস কৰাৰ ভাবুকি দিয়ে । তেওঁ ঘোষণা কৰে যে ইৰাণে সম্পূৰ্ণৰূপে আত্মসমৰ্পণ নকৰালৈকে বা সম্পূৰ্ণৰূপে ধ্বংস নোহোৱালৈকে ইৰাণ “পৰাজিত” হৈ থাকিব । তেওঁ কঠোৰ শব্দৰে কয় যে ইৰাণ এতিয়া “সম্পূৰ্ণ ধ্বংস আৰু নিশ্চিত মৃত্যু”ৰ সীমাত থিয় দিছে ।

বক্তব্যৰ শেষত আমেৰিকাৰ ৰাষ্ট্ৰপতিগৰাকীয়ে স্পষ্ট কৰি দিয়ে যে আজি ইৰাণক ভয়াৱহ আঘাত কৰা হ’ব । তেওঁৰ বক্তব্যৰ পিছতে সমগ্ৰ বিশ্বৰ দৃষ্টি পশ্চিম এছিয়ালৈ কেন্দ্ৰীভূত হৈছে । আমেৰিকা আৰু ইজৰাইলে যৌথভাৱে ইৰাণৰ বিৰুদ্ধে বৃহৎ সামৰিক অভিযান আৰম্ভ কৰিব পাৰে বুলি ধাৰণা কৰা হৈছে । ট্ৰাম্পৰ আগ্ৰাসী স্থিতিৰ পৰা স্পষ্ট হৈ পৰিছে যে তেওঁ যিকোনো মূল্যৰ বিনিময়ত ইৰাণক ৰেহাই দিবলৈ ইচ্ছুক নহয় ।

লগতে পঢ়ক : যুদ্ধৰ মাজতে ডুমছডে ক্ষেপণাস্ত্ৰ পৰীক্ষণ আমেৰিকাৰ, হিৰোচিমাতকৈ সৃষ্টি কৰিব পাৰে অধিক ধ্বংসলীলাৰ