ভাৰতীয় অ’পেনাৰ অভিষেক শৰ্মাই ইংলেণ্ডৰ বিৰুদ্ধে প্ৰথম টি-২০আন্তঃৰাষ্ট্ৰীয়ত ২৪ বলত ৫৯ ৰানৰ দুৰ্দান্ত ইনিংছ খেলি ইতিহাস সৃষ্টি কৰিলে।

ইংলেণ্ডৰ বিৰুদ্ধে প্ৰথমখন টি-২০ আন্তঃৰাষ্ট্ৰীয় মেচত ভাৰতীয় বেটছমেন অভিষেক শৰ্মাই নিজৰ বিস্ফোৰক বেটিঙেৰে এনে এক অভিলেখ গঢ়িলে, যিটো বিশ্বৰ ডাঙৰ ডাঙৰ পাৱাৰ হিটৰেও গঢ়িব পৰা নাছিল। ভাৰতৰ দুৰ্বল আৰম্ভণিৰ মাজতে অভিষেকে কেৱল আগ্ৰাসী বেটিং কৰি দলৰ ইনিংছ পৰিচালনা কৰাই নহয়, বৰঞ্চ টি-২০ আন্তঃৰাষ্ট্ৰীয়  ক্ৰিকেটত ফুল মেম্বাৰ ৰাষ্ট্ৰৰ (পূৰ্ণকালীন সদস্য দেশ) ভিতৰত আটাইতকেই কম বলত ১০০টা ছিক্সাৰ মৰা বেটছমেন হিচাপেও পৰিগণিত হ’ল।

চেষ্টাৰ-লে-ষ্ট্ৰীটত অনুষ্ঠিত হোৱা খেলখনত ভাৰতে টছত জিকি প্ৰথমে বেটিং কৰাৰ সিদ্ধান্ত লয়, কিন্তু আৰম্ভণিতেই সঞ্জু চেমচন আৰু ঈশান কিষাণৰ উইকেট হেৰুৱাই দলটো চাপত পৰে। এনে কঠিন সময়ত অভিষেক শৰ্মাই দায়িত্ব লৈ ইংলেণ্ডৰ বলাৰসকলৰ ওপৰত ওলোটা আক্ৰমণ চলায়। তেওঁ স্পিনাৰ লিয়াম ডছনৰ বলত এটা সুন্দৰ ছিক্সাৰ কোবায় ইয়াৰ পাছতে ছাকিব মাহমুদৰ বলত একেৰাহে দুটা ছয় মাৰি টি-২০ কেৰিয়াৰত ১০০টা ছয় সম্পূৰ্ণ কৰে।এই স্থানত উপনীত হ’বলৈ অভিষেকে মাত্ৰ ৭৮৫টা বলৰ সন্মুখীন হয়, যিটো যিকোনো পূৰ্ণকালীন সদস্য দেশৰ বেটছমেনৰ দ্বাৰা আটাইতকৈ দ্ৰুতগতিত ১০০টা ছিক্সাৰ সম্পূৰ্ণ কৰাৰ কৃতিত্ব। এই অভিলেখেৰে তেওঁ ৱেষ্ট ইণ্ডিজৰ বিস্ফোৰক বেটছমেন এভিন লুইছৰ অভিলেখ ভংগ কৰে।টি-২০ আন্তঃৰাষ্ট্ৰীয়ত লুইছে ৭৮৯টা বলত  ১০০টা ছিক্সাৰ সম্পূৰ্ণ কৰিছিল।

T20I ত আটাইতকেই কম বলত ১০০টা ছিক্সাৰ মৰা বেটছমেনসমূহ:

• ৭৮৫ বল – অভিষেক শৰ্মা
• ৭৮৯ বল – এভিন লুইছ
• ৮৭১ বল – ফিন এলিন
• ৯৩১ বল – টিম ডেভিড

প্ৰথমে বেটিং কৰিবলৈ নমা ভাৰতীয় দলটোৰ ইনিংছৰ আৰম্ভণি বৰ বিশেষ ভাল নাছিল। ২ অভাৰৰ ভিতৰতে সঞ্জু চেমচন আৰু ঈশান কিষাণ পেভিলিয়নলৈ উভতি যায়। আৰম্ভণিতে বিপৰ্যয়ৰ অন্তত অভিষেকে দ্ৰুতগতিত ৰান সংগ্ৰহ কৰি ইংলেণ্ডৰ বলাৰসকলৰ ছন্দত ব্যাঘাত জন্মায়। তেওঁ মাত্ৰ ২০টা বলত অৰ্ধশতক সম্পূৰ্ণ কৰে আৰু ২০০তকৈ অধিক ষ্ট্ৰাইক ৰেটেৰে বেটিং কৰি খেলৰ গতি সলনি কৰি দিয়ে। অৱশ্যে তেওঁৰ এই ধুমুহা সদৃশ ইনিংছৰ অন্ত পেলায় ছেম কাৰনে। অভিষেকে ২৪টা বলত ৫৯ ৰান কৰে, য’ত ৬টা চাৰি আৰু ৪টা ছয় অন্তৰ্ভুক্ত আছিল। তেওঁৰ এই ইনিংছৰ বলতেই ভাৰতে ১০ অভাৰত ৩টা উইকেট হেৰুৱাই স্ক’ৰবৰ্ডত ৯৯ ৰান সংগ্ৰহ কৰিবলৈ সক্ষম হয়।

লগতে পঢ়ক: অভিষেক শৰ্মাক  পিছ পেলাই শীৰ্ষত ঈশান কিষাণ; টি-২০ৰ ৰেংকিঙৰ ১ নম্বৰ বেটছমেন

নিজৰ সতীৰ্থ অভিষেক শৰ্মাক চেৰ পেলাই ঈশান কিষাণে টি-২০ আন্তঃৰাষ্ট্ৰীয় মেচত বিশ্বৰ ১ নম্বৰ বেটছমেন হিচাপে পৰিগণিত হৈছে।

শেহতীয়া আইচিচি টি-২০ ৰেংকিঙত এক অদ্ভুত সালসলনি পৰ্যবেক্ষণ কৰা হৈছে, যাৰ ফলত ক্ৰিকেট জগত আৰু অনুৰাগী উভয়ে আচৰিত হৈ পৰিছে।টিম ইণ্ডিয়াৰ তাৰকা উইকেটকীপাৰ-বেটছমেন ঈশান কিষাণে প্ৰথমবাৰৰ বাবে বিশ্বৰ ১ নম্বৰ টি-২০ বেটছমেন হিচাপে পৰিগণিত হৈছে।

যুৱ বেটছমেন ঈশান কিষাণে টি-২০ আন্তঃৰাষ্ট্ৰীয় ৰেংকিঙত নিজৰে সতীৰ্থ অভিষেক শৰ্মাক পিছ পেলাই নম্বৰ-১ বেটছমেনৰ খিতাপ দখল কৰিছে। আক্ৰমণাত্মক বেটিং আৰু অনবদ্য প্ৰদৰ্শনৰ বলত  ক্ৰিকেটাৰ গৰাকীয়ে এই সফলতা অৰ্জন কৰিছে, যাৰ ফলত ভাৰতীয় দলৰ বেটিং লাইন-আপ অধিক শক্তিশালী দেখা গৈছে।

এই বাঁওহতীয়া বেটছমেনগৰাকীয়ে চলিত বৰ্ষৰ আৰম্ভণিতে দীৰ্ঘদিনৰ বিৰতিৰ পিছত টি-২০ আন্তঃৰাষ্ট্ৰীয় দললৈ প্ৰত্যাৱৰ্তন কৰিছিল, যেতিয়া তেওঁ ২০২৫/২৬ ছিজনত ঝাৰখণ্ডক প্ৰথমবাৰৰ বাবে ছৈয়দ মুস্তাক আলী ট্ৰফীৰ খিতাপ জয় কৰাইছিল। ৰেংকিঙৰ শীৰ্ষত ঈশান কিষাণৰ এই আৰোহণ ২০২৬ চনৰ টি-২০ বিশ্বকাপত তেওঁৰ দুৰ্দান্ত প্ৰদৰ্শনৰ ফল, আনহাতে অভিষেক শৰ্মাৰ প্ৰদৰ্শন তুলনামূলকভাৱে ম্লান আছিল।

ভাৰত বনাম আয়াৰলেণ্ড টি-২০ আন্তঃৰাষ্ট্ৰীয় শৃংখলাত কিষাণে মাত্ৰ ১ আৰু ১২ ৰানহে সংগ্ৰহ কৰে, তথাপিও তেওঁ অভিষেকক পিছ পেলাই ৰেংকিঙৰ শীৰ্ষস্থান দখল কৰিবলৈ সক্ষম হয়। আনহাতে, অভিষেক শৰ্মাই দুখন মেচত ৪৯ আৰু ০ ৰান কৰে।ঈশান কিষাণে ২০২৬ চনৰ টি-২০ বিশ্বকাপত প্ৰায় ২০০ ষ্ট্ৰাইক ৰেটেৰে ৩১৭ ৰান সংগ্ৰহ কৰিছিল, য’ত কলম্বোত পাকিস্তানৰ বিৰুদ্ধে খেলা মেচ বিজয়ী ইনিংছটোও অন্তৰ্ভুক্ত আছিল। বৰ্তমান ঈশান কিষাণৰ ৰেটিং পইণ্ট ৮৭৬, আনহাতে অভিষেকৰ ৮৬৯ পইণ্ট আছে। শীৰ্ষ ১০ গৰাকী খেলুৱৈৰ ভিতৰত থকা আন ভাৰতীয় বেটছমেনসকলৰ ভিতৰত তিলক বাৰ্মা (পঞ্চম) আৰু সূৰ্যকুমাৰ যাদৱ (অষ্টম) স্থানত আছে।

২০২৬ বৰ্ষত ঈশান কিষাণে ১৫ খন টি-২০ আন্তঃৰাষ্ট্ৰীয় মেচ খেলি ৫৪৫ ৰান সংগ্ৰহ কৰিছে। তেওঁৰ সৰ্বোচ্চ স্ক’ৰ হৈছে ১০৩ ৰান। এই সময়ছোৱাত তেওঁ ৪ টা অৰ্ধশতক আৰু ১ টা শতক অৰ্জন কৰিছে। আইপিএল ২০2৬ ত সুন্দৰ প্ৰদৰ্শন কৰাৰ পিছত তেওঁ আয়াৰলেণ্ড আৰু ইংলেণ্ডৰ বিৰুদ্ধে শৃংখলাৰ বাবে দলত নিজৰ স্থান অক্ষুণ্ণ ৰাখিছে আৰু নম্বৰ-৩ বেটছমেন হিচাপে তেওঁ এগৰাকী বিশ্বাসযোগ্য খেলুৱৈ প্ৰমাণিত হৈছে। আনহাতে, টি-২০ বিশ্বকাপত অভিষেক শৰ্মাৰ প্ৰদৰ্শন আশাপ্ৰদ নাছিল। তেওঁ মাত্ৰ দুটা ভাল ইনিংছ খেলিছিল— এটা জিম্বাবুৱেৰ বিৰুদ্ধে ছুপাৰ-৮ ৰ মেচত আৰু আনটো ফাইনেলত। আইপিএলত ভাল প্ৰদৰ্শন কৰা স্বত্বেও আয়াৰলেণ্ডৰ বিৰুদ্ধে শৃংখলাত তেওঁ বিশেষ চমক দেখুৱাব নোৱাৰিলে।

লগতে পঢ়ক: এছিয়ান গেমছ ২০২৬-ৰ বাবে ভাৰতীয় মহিলা ক্ৰিকেট দল ঘোষণা; নেতৃত্বত হৰমনপ্ৰীত

অধিনায়ক সূৰ্যকুমাৰ যাদৱে পাকিস্তানৰ বিুৰুদ্ধে মেচৰ পূৰ্বে অভিষেক শৰ্মাক লৈ ডাঙৰ মন্তব্য কৰিছে ।

টি-২০ বিশ্বকাপত পাকিস্তানৰ বিৰুদ্ধে হাইভল্টেজ মেচৰ পূৰ্বে টীম ইণ্ডিয়ালৈ সুখবৰ । এই মেচখন অনুষ্ঠিত হোৱাৰ পূৰ্বে অধীৰ আগ্ৰহেৰে ৰৈ থকা ভাৰতীয় অনুৰাগীয়ে লাভ কৰিছে এটা ভাল খবৰ । অধিনায়ক সূৰ্যকুমাৰ যাদৱে শনিবাৰে নিশ্চিত কৰিছে যে দেওবাৰে কলম্বোত অভিষেক শৰ্মাই চিৰ প্ৰতিদ্বন্দ্বী পাকিস্তানৰ বিৰুদ্ধে খেলিব । বিস্ফোৰক বেটছমেনগৰাকীয়ে শেহতীয়াকৈ নামিবিয়াৰ বিৰুদ্ধে খেলখনৰ বাবে ভাৰতীয় মূল একাদশ স্থানত স্থান লাভ নাছিল । অসুস্থতাৰ বাবে তেওঁক চিকিৎসালয়ত ভৰ্তি কৰা হৈছিল যদিও তাৰ পিছত তেওঁক যাবলৈ দিয়া হয় ।

অভিষেকৰ প্ৰত্যাৱৰ্তন-

টি-২০ বিশ্বকাপৰ এই হাই ভল্টেজ সংঘৰ্ষৰ পূৰ্বে ভাৰতীয় অধিনায়ক সূৰ্যকুমাৰ যাদৱে নিশ্চিত কৰে যে অভিষেক শৰ্মাই এই মেচত খেলিব । তেওঁ কয়, “আপোনালোক সকলোৱে যদি অভিষেক শৰ্মাই খেলাটো বিচাৰে তেন্তে আমি তেওঁক খেলোৱাম ।” চলিত প্ৰতিযোগিতাত অভিষেকে এতিয়ালৈকে মাত্ৰ এখন খেলহে খেলিছে । আমেৰিকাৰ বিৰুদ্ধে তেওঁ শূণ্যতে আউট হয় । লগতে অসুস্থতাৰ বাবে নামিবিয়াৰ বিৰুদ্ধে খেলখনত অংশ ল’ব নোৱাৰিলে তেওঁ । এতিয়া পাকিস্তানৰ বিৰুদ্ধে খেলখনৰ বাবে দললৈ উভতি আহিব বিস্ফোৰক অ’পেনাৰ অভিষেক শৰ্মা ।

লগতে পঢ়ক : ভাৰত-পাকিস্তানৰ খেলত খলনায়ক হ’ব পাৰে বৰষুণ; শ্ৰীলংকাৰ বতৰ বিজ্ঞান বিভাগৰ সতৰ্কবাণী জাৰি

ভাৰতীয় ক্ৰিকেট দলটোৱে টি-২০ বিশ্বকাপৰ দ্বিতীয়খন খেলৰ পূৰ্বে এক বৃহৎ বিপৰ্যয়ৰ সন্মুখীন হ’বলগীয়া হৈছে।চিকিৎসালয়ত ভৰ্তি কৰোৱা হয় অ’পেনাৰ অভিষেক শৰ্মাক।

টি-২০ বিশ্বকাপ ২০২৬ৰ মাজতে বৃদ্ধি পাইছে টিম ইণ্ডিয়াৰ চিন্তা। অ’পেনাৰ অভিষেক শৰ্মাক চিকিৎসালয়ত ভৰ্তি কৰিবলগীয়া হৈছে।

পেটৰ সংক্ৰমণৰ বাবে যোৱা দুদিন ধৰি দিল্লীৰ এখন ব্যক্তিগত চিকিৎসালয়ত ভৰ্তি হৈ আছে অভিষেক শৰ্মা। যুৱ অ’পেনাৰগৰাকীৰ স্বাস্থ্যৰ হঠাৎ অৱনতি ঘটাৰ পিছত দল পৰিচালনা সমিতি সতৰ্ক অৱস্থাত আছে,বিশেষকৈ যেতিয়া ভাৰতে পৰৱৰ্তী মেচত নামিবিয়াৰ মুখামুখি হ’ব লাগিব।

ইয়াৰ পূৰ্বে টিম ইণ্ডিয়াৰ সহকাৰী প্ৰশিক্ষক ৰিয়ান টেন ড’শ্বেটে অভিষেক পেটৰ বিষত ভুগি থকা বুলি কৈছিল। যাৰ বাবে দিল্লীৰ অৰুণ জেটলী ষ্টেডিয়ামত অনুষ্ঠিত নামিবিয়াৰ খেলৰ পূৰ্বে দলৰ অনুশীলনত অভিষেক শৰ্মাই যোগদান কৰিব নোৱাৰিলে।

মেচৰ পূৰ্বে অনুষ্ঠিত সংবাদমেলত টেন ড’শ্বেটে অভিষেকৰ সুস্থতাৰ বিষয়ে আশা প্ৰকাশ কৰে।তেওঁ কয় যে অভিষেক সম্প্ৰতি পেট সম্পৰ্কীয় কিছু সমস্যাত ভুগি আছে, কিন্তু আমি আশা কৰিছো যে দুদিন পিছত তেওঁ মেচ খেলিবলৈ উপলব্ধ হ’ব পাৰিব।

টি-২০ বিশ্বকাপত আমেৰিকাৰ বিৰুদ্ধে ভাৰতৰ প্ৰথমখন খেলৰ সময়তো অসুস্থ হৈ পৰিছিল অভিষেক শৰ্মা।ইয়াৰ পিছতো তেওঁ মুম্বাইত খেলখন খেলিছিল।

অৱশ্যে, তেওঁ অসুস্থতাৰ বাবে ফিল্ডিং কৰিব নোৱাৰিলে।প্ৰথম আৰু দ্বিতীয় মেচৰ মাজত ভাৰতে পাঁচ দিনৰ বিৰতি পাইছে,কিন্তু আশা কৰা ধৰণে তেওঁৰ স্বাস্থ্যৰ উন্নতি হোৱা নাই।

যোৱা ২৪ ঘন্টাত অভিষেকৰ অৱস্থা অধিক বেয়া হৈ পৰে, যাৰ বাবে টীম ইণ্ডিয়াৰ মুখ্য প্ৰশিক্ষককো চিন্তিত হৈ পৰিছে।

অভিষেকৰ অনুপস্থিতিত ঈশান কিষান আৰু সঞ্জু চেমছনে প্ৰথমে নেট অনুশীলন কৰে আৰু নামিবিয়াৰ বিৰুদ্ধে ইনিংছ মুকলি কৰাৰ বাবে দুয়োকে শক্তিশালী প্ৰতিদ্বন্দ্বী হিচাপে গণ্য কৰা হয়।

লগতে পঢ়ক: কঠোৰ হৈছে বিচিচিআই; টি-২০ বিশ্বকাপত নাকচ ভাৰতীয় খেলুৱৈৰ দাবী