আই চি চি টি ২০ বিশ্বকাপ
অহা বছৰ অনুষ্ঠিত হ’বলগা আই চি চি টি ২০ বিশ্বকাপৰ সময়সূচী মঙলবাৰে ঘোষণা কৰা হয় । ২০টা দলৰ এই বিশ্বকাপ প্ৰতিযোগিতা ভাৰত আৰু শ্ৰীলংকাই যৌথভাৱে আয়োজন কৰিব । খিতাপ ৰক্ষাৰ উদ্দেশ্যেৰে এই প্ৰতিযোগিতাত প্ৰৱেশ কৰিব ডিফেণ্ডিং চেম্পিয়ন ভাৰতীয় দলে । ৰোহিত শৰ্মাৰ অধিনায়কত্বত ভাৰতে ২০২৪ চনত দক্ষিণ আফ্ৰিকাক পৰাস্ত কৰি এই ট্ৰফী লাভ কৰিছিল । এইবাৰ এই প্ৰতিযোগিতাৰ দশম সংস্কৰণ অনুষ্ঠিত হ’ব । ৭ ফেব্ৰুৱাৰীৰ পৰা আৰম্ভ হ’ব এই টি-২০ বিশ্বকাপ প্ৰতিযোগিতা ।
কেইবাগৰাকীও বিশিষ্ট ব্যক্তিৰ উপস্থিতিত আই চি চি টি ২০ বিশ্বকাপ ২০২৬ৰ সূচী প্ৰকাশ কৰা হয় । এই অনুষ্ঠানত আই চি চিৰ অধ্যক্ষ জয় শ্বাহ, ভাৰতীয় মহিলা দলৰ অধিনায়ক হৰমনপ্ৰীত কৌৰ, ২০২৪ চনৰ টি ২০ বিশ্বকাপক নেতৃত্ব দিয়া ভাৰতীয় দলৰ প্ৰাক্তন অধিনায়ক ৰোহিত শৰ্মা, বৰ্তমানৰ ভাৰতীয় টি-২০ অধিনায়ক সূৰ্যকুমাৰ যাদৱ, ভাৰতীয় ক্ৰিকেট নিয়ন্ত্ৰণ ব’ৰ্ডৰ অধ্যক্ষ মিথুন মানহাছ, সচিব দেৱজিৎ শইকীয়া, উপাধ্যক্ষ ৰাজীৱ শুক্লা আদিয়ে অংশগ্ৰহণ কৰে ।
আঠটা স্থানত অনুষ্ঠিত হ’ব মেচ-
আই চি চিৰ সভাপতি জয় শ্বাহে উল্লেখ কৰে যে ২০২৬ চনৰ টি ২০ বিশ্বকাপ ভাৰত আৰু শ্ৰীলংকাৰ আঠটা স্থানত অনুষ্ঠিত হ’ব । ভাৰতত মুঠ পাঁচটা স্থানত খেল অনুষ্ঠিত হ’ব, আনহাতে শ্ৰীলংকাৰ তিনিটা স্থানত এই প্ৰতিযোগিতাৰ বাবে মেচ অনুষ্ঠিত হ’ব । ভাৰতত দিল্লী, মুম্বাই, চেন্নাই, কলকাতা আৰু আহমেদাবাদত খেল অনুষ্ঠিত হ’ব । ইফালে শ্ৰীলংকাৰ কলম্বোৰ আৰ প্ৰেমদাছা আৰু এছ স্প’ৰ্টছ ক্লাবত মেচ অনুষ্ঠিত হ’ব, আনহাতে কেণ্ডিৰ পালেকেলে আন্তঃৰাষ্ট্ৰীয় ষ্টেডিয়ামতো মেচ অনুষ্ঠিত হ’ব ।
প্ৰথমবাৰৰ বাবে অংশগ্ৰহণ কৰিব ইটালীয়ে-
যোৱাবাৰৰ দৰেই ২০টা দলে টি ২০ বিশ্বকাপত অংশগ্ৰহণ কৰিছে । এই সকলোবোৰ দলকে চাৰিটা গ্ৰুপত ভাগ কৰা হৈছে, প্ৰতিটো গ্ৰুপত পাঁচটা দল ৰখা হৈছে । গ্ৰুপ পৰ্যায়ৰ পিছত ছুপাৰ এইট পৰ্যায়ৰ মেচ অনুষ্ঠিত হ’ব । প্ৰতিটো গ্ৰুপৰ পৰা শীৰ্ষ দুটা দলে এই পৰ্যায়ৰ বাবে যোগ্যতা অৰ্জন কৰিব । ছুপাৰ এইট পৰ্যায়ত আঠটা দলক দুটা গ্ৰুপত ভাগ কৰা হ’ব, প্ৰতিটো গ্ৰুপত চাৰিটা দল থাকিব ।
প্ৰতিটো গ্ৰুপৰ পৰা শীৰ্ষ দুটা দল ছেমি ফাইনেলত প্ৰৱেশ কৰিব, তাৰ পিছত দুটা দলে ফাইনেল খেলিব । এইবাৰ প্ৰতিযোগিতাত অংশগ্ৰহণ কৰা দলসমূহৰ ভিতৰত আছে ভাৰত, নামিবিয়া, নেদাৰলেণ্ড, পাকিস্তান, আমেৰিকা, বাংলাদেশ, ইটালী, ইংলেণ্ড, নেপাল, ৱেষ্ট ইণ্ডিজ, অষ্ট্ৰেলিয়া, আয়াৰলেণ্ড, ওমান, শ্ৰীলংকা, জিম্বাবুৱে, আফগানিস্তান, কানাডা, নিউজীলেণ্ড, দক্ষিণ আফ্ৰিকা, আৰু ইউ এ ই ।
একেটা গ্ৰুপত ভাৰত-পাকিস্তান-
ভাৰত আৰু পাকিস্তান এই প্ৰতিযোগিতাৰ একেটা গ্ৰুপতে আছে । ভাৰতৰ উপৰিও গ্ৰুপ এত পাকিস্তান, আমেৰিকা, নেদাৰলেণ্ড, নামিবিয়া আছে । গ্ৰুপ বিত আছে অষ্ট্ৰেলিয়া, সহ-আয়োজক শ্ৰীলংকা, আয়াৰলেণ্ড, জিম্বাবুৱে, আৰু ওমান । গ্ৰুপ চিত আছে ইংলেণ্ড, ৱেষ্ট ইণ্ডিজ, বাংলাদেশ, নেপাল, আৰু ইটালী । গ্ৰুপ ডিত নিউজীলেণ্ড, দক্ষিণ আফ্ৰিকা, আফগানিস্তান, কানাডা, ইউ এ ই আছে ।
কলম্বোত অনুষ্ঠিত হ’ব ভাৰত-পাকিস্তানৰ মেচ-
ভাৰতে অহা ৭ ফেব্ৰুৱাৰীৰ পৰা আমেৰিকাৰ বিৰুদ্ধে টুৰ্ণামেণ্টত নিজৰ অভিযান আৰম্ভ কৰিব । এই মেচখন মুম্বাইত অনুষ্ঠিত হ’ব । ইয়াৰ পিছতে ১২ ফেব্ৰুৱাৰীত নতুন দিল্লীত মুখামুখি হ’ব ভাৰত আৰু নামিবিয়া । আনহাতে ভাৰত আৰু পাকিস্তানৰ মাজত প্ৰতিযোগিতাখনৰ হাইভল্টেজ মেচখন ১৫ ফেব্ৰুৱাৰীত কলম্বোৰ আৰ প্ৰেমদাছা ষ্টেডিয়ামত অনুষ্ঠিত হ’ব ।
আই চি চি, বি চি চি আই, আৰু পাকিস্তান ক্ৰিকেট ব’ৰ্ডৰ মাজত হোৱা চুক্তি অনুসৰি ২০২৭ চনলৈকে ভাৰত-পাকিস্তানৰ সকলো খেল নিৰপেক্ষ স্থানত অনুষ্ঠিত হ’ব । এই বাবেই কলম্বোৱে দুয়োটা দলৰ মাজত খেলখন আয়োজন কৰিব । অহা ১৮ ফেব্ৰুৱাৰীত আহমেদাবাদত ভাৰতৰ গ্ৰুপ পৰ্যায়ৰ অন্তিমখন খেল অনুষ্ঠিত হ’ব ।
ৰোহিত শৰ্মা টুৰ্ণামেণ্টৰ এম্বেছাদৰ-
আই চি চিৰ অধ্যক্ষ জয় শ্বাহে ঘোষণা কৰে যে ভাৰত আৰু শ্ৰীলংকাই আয়োজন কৰিবলগীয়া টি-২০ বিশ্বকাপৰ বাবে ৰোহিত শৰ্মাক এম্বেছাদৰ হিচাপে নিযুক্তি দিয়া হৈছে । শ্বাহে কয় যে ২০২৪ চনৰ টি-২০ বিশ্বকাপ বিজয়ী অধিনায়ক আৰু এতিয়ালৈকে ৯টা সংস্কৰণতে খেলা খেলুৱৈতকৈ এই ইভেণ্টৰ উত্তম প্ৰতিনিধি থাকিব নোৱাৰে ।
লগতে পঢ়ক : গুৱাহাটী টেষ্টত পৰাজয়ৰ গৰাহত ভাৰতীয় দল! সন্মুখত বিশাল লক্ষ্য…
