ভাৰত-অষ্ট্ৰেলিয়াৰ এদিনীয়া শৃংখলাৰ দ্বিতীয়খন মেচ

ভাৰত আৰু অষ্ট্ৰেলিয়াৰ তিনিখন মেচৰ এদিনীয়া শৃংখলাৰ দ্বিতীয়খন খেল ২৩ অক্টোবৰ, বৃহস্পতিবাৰে এডিলেইডৰ অ’ভেলত অনুষ্ঠিত হ’ব । পাৰ্থত অনুষ্ঠিত শৃংখলাৰ প্ৰথমখন মেচত ডি এল এছ পদ্ধতিৰে ৭ উইকেটত পৰাস্ত হয় ভাৰত । গতিকে দ্বিতীয়খন মেচ ভাৰতীয় দলৰ বাবে অত্যন্ত প্ৰত্যাহ্বানজনক হ’ব । পুৱা ৯ বজাৰ পৰা আৰম্ভ হ’ব এই মেচখন ।

উল্লেখ্য যে, এই এদিনীয়া শৃংখলাৰ জৰিয়তে দীৰ্ঘদিনৰ অন্তত এদিনীয়া আন্তঃৰাষ্ট্ৰীয়ত প্ৰত্যাৱৰ্তন ঘটাইছে ভাৰতীয় দলৰ দুই মহা তাৰকা বিৰাট কোহলী আৰু ৰোহিত শৰ্মাই । দীৰ্ঘদিনৰ অন্তত এদিনীয়ালৈ প্ৰত্যাৱৰ্তন ঘটোৱা এই দুই তাৰকা বেটছমেনৰ পৰা অনুৰাগীয়ে বিস্ফোৰক প্ৰদৰ্শনৰ আশা কৰিছিল । কিন্তু অনুৰাগীৰ আশাত চেঁচা পানী ঢালি প্ৰথমখন এদিনীয়াত হতাশাজনক প্ৰদৰ্শন কৰে ৰোহিত আৰু বিৰাটে । সেয়েহে এতিয়া দ্বিতীয়খন এদিনীয়াত দুয়োগৰাকী তাৰকাই ব্যৰ্থতাৰ অন্ত পেলাই বিস্ফোৰক প্ৰদৰ্শন আগবঢ়াব বুলি আশা কৰিছে অনুৰাগীয়ে ।

কোহলীৰ ওপৰত থাকিব চকু-

এডিলেইড এদিনীয়াত সকলোৰে দৃষ্টি থাকিব টিম ইণ্ডিয়াৰ প্ৰাক্তন অধিনায়ক বিৰাট কোহলীৰ ওপৰত । এই খেলপথাৰত কোহলীৰ অভিলেখ যথেষ্ঠ ভাল । এডিলেইড অ’ভেলত তিনিওটা ফৰ্মেটতে মুঠ ১২খন মেচ খেলি গড়ে ৬৫ত ৯৭৫ ৰান সংগ্ৰহ কৰিছে কোহলীয়ে । এই সময়ছোৱাত কোহলীয়ে ৫টা শতক অৰ্জন কৰিছে । এই খেলপথাৰত কোহলীয়ে চাৰিখন এদিনীয়া খেলিছে, দুটা শতককে ধৰি গড়ে ৬১.০০ত ২৪৪ ৰান সংগ্ৰহ কৰিছে তেওঁ । এতিয়া কোহলীয়ে পুনৰ এবাৰ নিজৰ প্ৰিয় খেলপথাৰখনত বিস্ফোৰক প্ৰদৰ্শন আগবঢ়াব বুলি অনুৰাগীয়ে আশা কৰিছে ।

বিৰাট কোহলীৰ দৰে ভাৰতীয় দলটোৱেও এডিলেইড অ’ভেলত অসাধাৰণ প্ৰদৰ্শন আগবঢ়াইছে । এই খেলপথাৰত ভাৰতে ১৫খন এদিনীয়া খেলিছে, ইয়াৰে ৯ খন জয় আৰু ৫ খনত পৰাজয়ৰ বিপৰীতে এখন মেচ টাইত সমাপ্ত হৈছে । এই খেলপথাৰত ভাৰতীয় দলৰ অন্তিমখন এদিনীয়া পৰাজয় আছিল ২০০৮ চনৰ ১৭ ফেব্ৰুৱাৰীত ।

তাৰ পিছত ভাৰতীয় দলটোৱে এডিলেইড অ’ভেলত এখনো এদিনীয়া মেচত পৰাস্ত হোৱা নাই । অৰ্থাৎ ১৭ বছৰ ধৰি এই খেলপথাৰত ৱান ডে ইণ্টাৰনেশ্যনেলত অপৰাজিত হৈ আছে ভাৰত । এই সময়ছোৱাত ভাৰতীয় দলটোৱে পাঁচখন এদিনীয়া খেলিছে আৰু চাৰিখনত জয় আৰু এখনত সমতা স্থাপন কৰিছে ।

ইফালে এদিনীয়া শৃংখলাৰ দ্বিতীয়খন এদিনীয়াত ভাৰতীয় দলৰ মূল একাদশত এটা পৰিৱৰ্তন হ’ব পাৰে । নীতিশ ৰেড্ডী অথবা ৱাশ্বিংটন সুন্দৰৰ ঠাই কুলদীপ যাদৱে ল’ব পাৰে । আনহাতে অষ্ট্ৰেলিয়াই মূল একাদশত কমেও দুটা পৰিৱৰ্তন কৰাৰ সম্ভাৱনা আছে । এই মেচত উইকেটকীপাৰ এলেক্স কেৰী আৰু লেগ স্পীনাৰ এডাম জাম্পাক খেলা দেখা যাব পাৰে । তেওঁলোকে ক্ৰমে জোছ ফিলিপ আৰু মেথিউ কুহনেমেনৰ ঠাইত ল’ব পাৰে ।

লগতে পঢ়ক : এছিয়া কাপ ট্ৰফীক লৈ বি চি চি আইয়ে ল’লে ডাঙৰ সিদ্ধান্ত!

প্ৰত্যাৱৰ্তন মেচত নচলিল ৰোহিত-কোহলীৰ যাদু

প্ৰত্যাৱৰ্তন মেচত অনুৰাগীক হতাশ কৰিলে তাৰকা খেলুৱৈ ৰোহিত শৰ্মা আৰু বিৰাট কোহলীয়ে । দিৰ্ঘদিনীয়া বিৰতিৰ অন্তত আজি অষ্ট্ৰেলিয়াৰ বিৰুদ্ধে প্ৰথমখন এদিনীয়াত খেলপথাৰত নামিছিল এই দুই মহা তাৰকা বেটছমেন । দুয়োগৰাকী প্ৰবীণ তথা তাৰকা বেটছমেনৰ পৰা বিস্ফোৰক ইনিংছ আশা কৰি আছিল অনুৰাগীয়ে । কিন্তু অনুৰাগীৰ আশাত চেঁচা পানী ঢালি চূড়ান্ত হতাশাজনক প্ৰদৰ্শন আগবঢ়ালে ৰোহিত-কোহলীয়ে ।

পাৰ্থৰ অপ্টাছ ষ্টেডিয়ামত আজি অষ্ট্ৰেলিয়াৰ বিৰুদ্ধে এদিনীয়া শৃংখলাৰ প্ৰথমখন খেল খেলিছে ভাৰতীয় দলে । এই মেচতে বিৰাট কোহলী আৰু ৰোহিত শৰ্মাই আন্তঃৰাষ্ট্ৰীয় ক্ৰিকেটত প্ৰত্যাৱৰ্তন ঘটাইছে । ৰোহিত আৰু কোহলীয়ে শেষবাৰৰ বাবে ভাৰতৰ হৈ আই চি চি চেম্পিয়নছ ট্ৰফী ২০২৫ত নিউজীলেণ্ডৰ বিৰুদ্ধে খেলিছিল, যিখন আছিল চূড়ান্ত মেচ । এই মেচত নিউজীলেণ্ডক পৰাস্ত কৰি ভাৰতে খিতাপ দখল কৰিছিল ।

উল্লেখ্য যে, প্ৰত্যাৱৰ্তন মেচত বিৰাট কোহলী আৰু ৰোহিত শৰ্মাই সকলোকে হতাশ কৰে । ৰোহিত শৰ্মাই ১৪টা বলত ৮ ৰান সংগ্ৰহ কৰাৰ বিপৰীতে কোহলীয়ে ৮টা বলৰ মুখামুখি হয় যদিও কোনো ৰান সংগ্ৰহত ব্যৰ্থ হয় । সোঁহতীয়া বেগী বলাৰ জোছ হেজেলউডে হিটমেনক শ্বৰ্ট অফ লেংথ ডেলিভাৰী দিয়ে আৰু দ্বিতীয় শ্লিপত মেথিউ ৰেনশ্বৱে তেওঁক কেচ আউট কৰে । ৰোহিতে বলটো জোৰেৰে কোবাইছিল যদিও তেওঁৰ টাইমিং সঠিক নাছিল । বলটো তেওঁৰ বেটৰ কাষত লাগি লৈ ফিল্ডাৰৰ ওচৰলৈ যায় ।

ৰোহিত শৰ্মা পেভিলিয়নমুখী হোৱাৰ পিছত বিৰাট কোহলীৰ পৰা এক শক্তিশালী প্ৰদৰ্শন আশা কৰিছিল দল আৰু অনুৰাগীয়ে । কিন্তু সকলোকে হতাশ কৰি প্ৰত্যাৱৰ্তন মেচত একাউন্ট নোখোলাকৈয়ে পেভিলিয়নৰ বাট বুলে বিৰাট কোহলীয়ে । তেওঁক আগ্ৰাসী বেগী বলাৰ মিচেল ষ্টাৰ্কে আউট কৰে ।

ইয়াৰ লগে লগে বিৰাট কোহলীয়ে এক লজ্জাজনক অভিলেখো গঢ়ে । অষ্ট্ৰেলিয়াত প্ৰথমবাৰৰ বাবে আন্তঃৰাষ্ট্ৰীয় এদিনীয়া মেচত শূণ্যত আউট হয় কোহলী । বিস্ফোৰক তাৰকা বেটছমেনগৰাকীয়ে এতিয়ালৈকে অষ্ট্ৰেলিয়াত ৩০খন এদিনীয়া ইনিংছ খেলিছে । এদিনীয়া মেচত দুবাৰকৈ শূণ্যত বিৰাট কোহলীক আউট কৰা দ্বিতীয়জন বলাৰ হিচাবে পৰিগণিত হৈছে মিচেল ষ্টাৰ্ক । ষ্টাৰ্কৰ পূৰ্বে কেৱল ইংলেণ্ডৰ জেমছ এণ্ডাৰছনেহে এই কৃতিত্ব অৰ্জন কৰিছিল ।

শুভমনেও কৰিলে হতাশ-

এই মেচত সকলোকে আশাহত কৰে অধিনায়ক শুভমন গীলেও । তেওঁ নাথান এলিছৰ বলত মাত্ৰ ৮ ৰানতে উইকেটকীপাৰ জোছ ফিলিপৰ হাতত নিজৰ উইকেট বিসৰ্জন দিয়ে । এই মেচত ৰোহিতে ৮ ৰান, গীল ১০ আৰু কোহলীয়ে কোনো ৰান সংগ্ৰহ নকৰাকৈয়ে উইকেট বিসৰ্জন দিয়ে । কোনো এদিনীয়া আন্তঃৰাষ্ট্ৰীয়ত তিনিওজনৰে এয়াই সৰ্বনিম্ন মুঠ স্ক’ৰ । ইয়াৰ পূৰ্বে এই তিনিওগৰাকীৰে সৰ্বনিম্ন স্ক’ৰ আছিল ২৫ ৰান । ২০২৩ চনত পাকিস্তানৰ বিৰুদ্ধে পল্লেকেলে এদিনীয়াত ৰোহিত ১১, গীল ১০ আৰু কোহলীয়ে ৪ ৰান কৰি আউট হৈছিল ।

লগতে পঢ়ক : আজি ভাৰত-অষ্ট্ৰেলিয়াৰ প্ৰথম এদিনীয়া মেচ; ৰোহিত-কোহলীয়ে কঁপাব পাৰ্থ

আজি ভাৰত-অষ্ট্ৰেলিয়াৰ প্ৰথম এদিনীয়া মেচ

ভাৰত আৰু অষ্ট্ৰেলিয়াৰ তিনিখন খেলৰ এদিনীয়া শৃংখলাৰ প্ৰথমখন মেচ আজি পাৰ্থৰ অপ্টাছ ষ্টেডিয়ামত অনুষ্ঠিত হ’ব । এই শৃংখলাত ভাৰতীয় দলৰ অধিনায়ক শুভমন গীল অষ্ট্ৰেলিয়ান দলৰ নেতৃত্ব দিব মিচেল মাৰ্ছে । পুৱা ৯ বজাৰ পৰা আৰম্ভ হ’ব এই এদিনীয়া মেচ ।

অধিনায়ক হিচাপে প্ৰথমবাৰৰ বাবে এদিনীয়া ক্ৰিকেটত ভাৰতীয় দলটোক নেতৃত্ব দিব শুভমন গীলে । তেওঁৰ বাবে এই মেচখন অতি বিশেষ । প্ৰবীণ বেটছমেন ৰোহিত শৰ্মা আৰু বিৰাট কোহলীয়েও এই মেচৰ জৰিয়তে আন্তঃৰাষ্ট্ৰীয় ক্ৰিকেটত প্ৰত্যাৱৰ্তন ঘটাইছে । ২২৪ দিনৰ অন্তত ভাৰতৰ হৈ খেলিব লগা ৰোহিত আৰু কোহলীৰ যুটীয়ে অনুৰাগীৰ মাজত প্ৰচণ্ড উত্তেজনাৰ সৃষ্টি কৰিছে । দুয়োগৰাকী খেলুৱৈক চলিত বৰ্ষৰ মাৰ্চ মাহত ভাৰতীয় দলৰ হৈ আই চি চি চেম্পিয়নছ ট্ৰফীত খেলা দেখা গৈছিল, য’ত ৰোহিত ব্ৰিগেডে খিতাপ দখল কৰিছিল ।

নিজৰ কেৰিয়াৰত বিৰাট কোহলী আৰু ৰোহিত শৰ্মা ইমান দীঘলীয়া সময়ৰ বাবে ভাৰতীয় দলৰ পৰা আঁতৰি থকাটো খুব কমেইহে দেখা গৈছে আৰু সেয়াও আঘাত নোহোৱাকৈ । উল্লেখ্য যে ৰোহিত আৰু কোহলী দুয়োজনেই টেষ্ট আৰু টি-২০ আন্তঃৰাষ্ট্ৰীয় খেলৰ পৰা অৱসৰ গ্ৰহণ কৰিছে, গতিকে দুয়োজনেই এতিয়া কেৱল এদিনীয়া ক্ৰিকেটৰ ওপৰত গুৰুত্ব আৰোপ কৰিছে । এদিনীয়াৰ অধিনায়ক পদৰ পৰাও ৰোহিতক অপসাৰণ কৰা হৈছে, য’ত “হিটমেন”য়ে বিশেষ বেটছমেন হিচাপে খেলিব ।

কোহলী-ৰোহিতৰ অন্তিম ছিৰিজ !

বিগত কেইবছৰমানৰ পৰা ভাৰতীয় ক্ৰিকেটত বহু যুৱ তাৰকাৰ উন্মেষ ঘটিছে যদিও বিৰাট কোহলী আৰু ৰোহিত শৰ্মাৰ দৰে ফেন ফ’ল’ৱাৰ কোনো এগৰাকীৰেই নাই । দুয়োজনে এদিনীয়া ক্ৰিকেটত ইমানেই অভিলেখ গঢ়িছে যে এই ফৰ্মেটত তেওঁলোকক শ্ৰেষ্ঠ খেলুৱৈৰ ভিতৰত গণ্য কৰা হয় । অষ্ট্ৰেলিয়াৰ দৰ্শকৰ বাবে ৰোহিত আৰু কোহলীয়ে একেলগে খেলা চোৱাটো এক ৰোমাঞ্চকৰ অভিজ্ঞতা হ’ব । ইফালে এইখনেই অষ্ট্ৰেলিয়াত তেওঁলোকৰ শেষ ছিৰিজ হ’ব পাৰে বুলিও চৰ্চা চলিছে ।

প্ৰথমখন এদিনীয়াত বিৰাট কোহলী, ৰোহিত শৰ্মা, অধিনায়ক শুভমন গীল, শ্ৰেয়াছ আয়াৰ আৰু কে এল ৰাহুলৰ ওপৰত নিৰ্ভৰশীল হ’ব ভাৰতীয় বেটিং । ইফালে, বেগী বলাৰ মহম্মদ চিৰাজে এবছৰতকৈ অধিক সময়ৰ পিছত প্ৰথম এদিনীয়া খেলিব । প্ৰসিদ্ধ কৃষ্ণ, অৰ্শদীপ সিং আৰু হৰ্ষিত ৰানাৰ সৈতে চিৰাজে ফাষ্ট বলিং ইউনিট গঠন কৰিছে । কুলদীপ যাদৱ আৰু অক্ষৰ পেটেলে স্পীন বিভাগত উল্লেখযোগ্য দায়িত্ব কান্ধত ল’ব, আনহাতে হাৰ্দিক পাণ্ডিয়াৰ অনুপস্থিতিত নীতিশ কুমাৰ ৰেড্ডীৰ ভূমিকা গুৰুত্বপূৰ্ণ হৈ পৰিব ।

ইফালে অষ্ট্ৰেলিয়া আঘাত বা তাৰকা খেলুৱৈৰ অনুপস্থিতিৰ বাবে অসুবিধাৰ সন্মুখীন হৈছে । আঘাতৰ বাবে অধিনায়ক পেট কামিন্স খেলপথাৰৰ পৰা আঁতৰি থকাৰ বাবে মিচেল মাৰ্ছে দলটোৰ নেতৃত্ব দিবলৈ আছে । কেমেৰুন গ্ৰীণো আঘাতপ্ৰাপ্ত আৰু তেওঁৰ ঠাইত মাৰ্নাছ লাবুশ্বানে দলত স্থান লাভ কৰিছে ।

লগতে পঢ়ক : ভাৰত-অষ্ট্ৰেলিয়াৰ এদিনীয়া শৃংখলাঃ ৰোহিত-কোহলীৰ ওপৰত নিবদ্ধ থাকিব সকলোৰে দৃষ্টি

অষ্ট্ৰেলিয়াৰ বিৰুদ্ধে যুঁজলৈ সাজু টিম ইণ্ডিয়া

ভাৰত আৰু অষ্ট্ৰেলিয়াৰ মাজত অনুষ্ঠিত হ’বলগীয়া তিনিখন মেচৰ এদিনীয়া শৃংখলাত অংশগ্ৰহণৰ বাবে বৃহল্পতিবাৰে পুৱা পাৰ্থত উপস্থিত হয় ভাৰতীয় এদিনীয়া দলৰ গুৰুত্বপূৰ্ণ খেলুৱৈ বিৰাট কোহলী, ৰোহিত শৰ্মা আৰু নতুন অধিনায়ক শুভমন গীল । কোহলী, ৰোহিত আৰু গীলৰ সৈতে যোগদান কৰে কে এল ৰাহুল, যশস্বী জয়ছোৱাল, অৰ্শদীপ সিং, হৰ্ষিত ৰানা আৰু নীতিশ কুমাৰ ৰেড্ডীয়ে । সহায়ক কৰ্মচাৰীৰ একাংশ সদস্যও দলটোৰ লগত যায় । আনহাতে মুখ্য প্ৰশিক্ষক গৌতম গম্ভীৰ আৰু বাকী প্ৰশিক্ষক কৰ্মচাৰীয়ে দিল্লীৰ পৰা সন্ধিয়াৰ বিমানেৰে যাত্ৰা কৰিব আৰু দলটোত যোগদান কৰিব ।

১৯ অক্টোবৰৰ পৰা ভাৰত আৰু অষ্ট্ৰেলিয়াৰ মাজত এই শৃংখলা আৰম্ভ হ’ব । প্ৰথমখন মেচ পাৰ্থত অনুষ্ঠিত হ’ব, তাৰ পিছত দ্বিতীয়খন এদিনীয়া এডিলেইডত (২৩ অক্টোবৰ) আৰু তৃতীয় আৰু অন্তিমখন মেচ ছিডনীত (২৫ অক্টোবৰ) অনুষ্ঠিত হ’ব । ইয়াৰ পিছত ২৯ অক্টোবৰৰ পৰা আৰম্ভ হ’ব দুয়োটা দলৰ মাজত পাঁচখন মেচৰ টি-২০ শৃংখলা ।

এই এদিনীয়া শৃংখলাটো বিশেষ কাৰণ চেম্পিয়নছ ট্ৰফী ২০২৫ জয়ৰ পিছত বিৰাট কোহলী আৰু ৰোহিত শৰ্মাৰ এয়া প্ৰথমখন আন্তঃৰাষ্ট্ৰীয় শৃংখলা । বিশেষকৈ শুভমন গীলক টিম ইণ্ডিয়াৰ এদিনীয়াৰ অধিনায়ক হিচাপে নিযুক্তি দিয়াৰ পিছত দুয়োজন জ্যেষ্ঠ খেলুৱৈৰ ভৱিষ্যত সন্দৰ্ভত কিছুদিনৰ পৰা জল্পনা-কল্পনাৰ সৃষ্টি হৈছে । কোহলী আৰু ৰোহিতে দুয়োজনেই টেষ্ট আৰু টি-২০ আন্তঃৰাষ্ট্ৰীয় ক্ৰিকেটৰ পৰা অৱসৰ গ্ৰহণ কৰিছে যদিও খবৰ অনুসৰি দুয়োজনে ২০২৭ চনৰ এদিনীয়া বিশ্বকাপলৈকে খেলিব বিচাৰে ।

ইফালে টিম ইণ্ডিয়াৰ নতুন অধিনায়ক শুভমন গীলেও নিজৰ বিবৃতিত স্পষ্টকৈ উল্লেখ কৰিছে যে দলটোক কোহলী আৰু ৰোহিতৰ দৰে খেলুৱৈৰ অভিজ্ঞতাৰ প্ৰয়োজন । ৱেষ্ট ইণ্ডিজৰ বিৰুদ্ধে টেষ্ট শৃংখলাত জয়লাভ কৰাৰ পিছত গীলে কয় যে, “এই দুয়োজন খেলুৱৈৰ অভিজ্ঞতা আৰু ভাৰতৰ হৈ তেওঁলোকে জয়ী হোৱা মেচৰ সংখ্যা বিৰল । এনে অভিজ্ঞতা, দক্ষতা আৰু গুণগত মানৰ খেলুৱৈ বিশ্বত বহুত কম ।” গীলৰ বক্তব্যই নিশ্চিত কৰিছে যে জ্যেষ্ঠ খেলুৱৈৰ সৈতে যুৱ অধিনায়কগৰাকীয়ে পৰৱৰ্তী বিশ্বকাপলৈকে ভাৰতীয় ক্ৰিকেটক শক্তিশালী দিশত লৈ যাব বিচাৰিছে ।

লগতে পঢ়ক : টি২০ বিশ্বকাপ ২০২৬ : নিশ্চিত ১৯ টা দল, কোনে কোনে অৰ্জন কৰিলে যোগ্যতা