এছিয়া কাপ ট্ৰফী বিতৰ্ক
এছিয়া কাপ ২০২৫ত চেম্পিয়নৰ খিতাপ দখল কৰিলেও এতিয়ালৈকে এই প্ৰতিযোগিতাৰ ট্ৰফী লাভ কৰা নাই ভাৰতীয় ক্ৰিকেট দলে । পাকিস্তানক পৰাস্ত কৰি চেম্পিয়ন হোৱাৰ পিছত ভাৰতীয় দলটোৱে এছিয়ান ক্ৰিকেট কাউন্সিলৰ মুৰব্বী মহছিন নাকৱীৰ পৰা ট্ৰফী গ্ৰহণ কৰিবলৈ অস্বীকাৰ কৰিছিল । তাৰ পিছত নাকৱীয়ে এই ট্ৰফী লৈ উভতি যায় । পিছত ট্ৰফীটো এছিয়ান ক্ৰিকেট কাউন্সিলৰ কাৰ্যালয়ত ৰখা হয় ।
ভাৰতীয় দলে এতিয়াও এছিয়া কাপৰ ট্ৰফী লাভ কৰা নাই । ভাৰতীয় ক্ৰিকেট নিয়ন্ত্ৰণ ব’ৰ্ডে এতিয়া আন্তঃৰাষ্ট্ৰীয় ক্ৰিকেট পৰিষদত মহছিন নাকৱীৰ বিষয়ে অভিযোগ দাখিল কৰাৰ সিদ্ধান্ত গ্ৰহণ কৰিছে । অহা ৪ নৱেম্বৰৰ পৰা ৭ নৱেম্বৰলৈ ডুবাইত অনুষ্ঠিত হ’বলগীয়া আই চি চি ব’ৰ্ডৰ বৈঠকত বি চি চি আইয়ে সমগ্ৰ বিষয়টো উত্থাপন কৰিব ।
ইয়াৰ পূৰ্বে বি চি চি আইয়ে আনুষ্ঠানিকভাৱে মহছিন নাকৱীক ইমেইল কৰি এছিয়া কাপৰ ট্ৰফী অতি সোনকালে ভাৰতক গতাই দিবলৈ কৈছিল যদিও এ চি চিৰ মুৰব্বী নাকৱীৰ নিজৰ জেদত অটল হৈ আছে ।
এ চি চিৰ মুৰব্বী মহছিন নাকৱীয়ে বি চি চি আইক দিয়া উত্তৰত কয় যে এ চি চিৰ কাৰ্যালয়ৰ পৰা ট্ৰফী সংগ্ৰহ কৰিব পাৰিব কিন্তু বি চি চি আইৰ এজন বিষয়া বা খেলুৱৈয়ে আহি তেওঁলোকৰ পৰা সংগ্ৰহ কৰিব লাগিব ।
ইফালে ডুবাইত অনুষ্ঠিত হ’বলগা আই চি চিৰ বৈঠকত এই বিষয়টো ভাৰতীয় ক্ৰিকেট নিয়ন্ত্ৰণ ব’ৰ্ডে কেনেদৰে উত্থাপন কৰিব আৰু ইয়াৰ সমাধান কেনেকৈ ওলাব তাকে লৈ এতিয়া চৰ্চা চলিছে ।
লগতে পঢ়ক : ভাৰতীয় সেনাৰ লেফটেনেণ্ট কৰ্ণেল হ’ল নীৰজ চোপ্ৰা
