গুজৰাট টাইটানছৰ বিুৰুদ্ধে ৬ ৰানত জয়লাভ কৰিছে ৰাজস্থান ৰয়েলছে

আই পি এল) ২০২৬ৰ শনিবাৰে অনুষ্ঠিত হোৱা এখন ৰোমাঞ্চকৰ মেচত গুজৰাট টাইটানছৰ বিুৰুদ্ধে ৬ ৰানত জয়লাভ কৰিছে ৰাজস্থান ৰয়েলছে । আহমেদাবাদৰ নৰেন্দ্ৰ মোদী ষ্টেডিয়ামত অনুষ্ঠিত হৈছিল মেচখন । জয়ী হ’বলৈ ২১১ ৰানৰ প্ৰয়োজন হোৱা গুজৰাট টাইটানছে ৮ উইকেটত মাত্ৰ ২০৪ ৰানহে কৰিবলৈ সক্ষম হয় ।

মেচখন শেষ অভাৰলৈ চলিছিল আৰু যথেষ্ট ৰোমাঞ্চকৰ আছিল । অন্তিম অভাৰত জয়ী হ’বলৈ গুজৰাট টাইটানছক প্ৰয়োজন হৈছিল ১১ ৰানৰ । অৱশ্যে সেই অভাৰত বেগী বলাৰ তুষাৰ দেশপাণ্ডেয়ে শক্তিশালী বলিঙৰে মাত্ৰ ৪ ৰানহে দিছিল আৰু লগতে অধিনায়ক ৰছিদ খানৰ উইকেট দখল কৰিছিল । ক্ৰীজত ৰছিদ খান আৰু কাগিছ’ ৰাবাদা স্থিৰ হৈ আছিল যদিও তুষাৰে অন্তিম অভাৰত দুয়োকে সম্পূৰ্ণৰূপে বান্ধি ৰাখে ।

চলিত ছিজনত এয়া আছিল ৰাজস্থান ৰয়েলছৰ ধাৰাবাহিক দ্বিতীয়টো জয় । ইফালে চলিত ছিজনৰ একেৰাহে দ্বিতীয়খন মেচত পৰাস্ত হৈছে গুজৰাট টাইটানছ । গুজৰাট টাইটানছৰ ছিজনৰ আৰম্ভণি বেয়া, প্ৰথমখন মেচত পঞ্জাব কিংছৰ হাতত তিনিটা উইকেটত পৰাস্ত হৈছিল দলটো । ইফালে ৰাজস্থান ৰয়েলছে ৫ বাৰৰ চেম্পিয়ন চেন্নাই ছুপাৰ কিংছক প্ৰথমখন খেলত ৮ উইকেটত পৰাস্ত কৰে ।

গুজৰাটৰ ইনিংছ-

গুজৰাট টাইটানছৰ লক্ষ্য অনুসৰণ কৰি এক সুন্দৰ আৰম্ভণি কৰে । কুমাৰ কুশগ্ৰা আৰু সাই সুদৰ্শনে প্ৰথম উইকেটত ৭৮ ৰান সংযোজন কৰে । কুশগ্ৰাই ১৮ ৰান সংগ্ৰহ কৰে । ৰাজস্থানৰ অধিনায়ক ৰিয়ান পৰাগে কুশগ্ৰাৰ উইকেট দখল কৰে । তাৰ পিছত সুদৰ্শনৰ ৰূপত গুজৰাট টাইটানছ আঘাতৰ সন্মুখীন হয় । সুদৰ্শনে ৪৪টা বলৰ মুখামুখি হৈ ৯টা চাৰি আৰু তিনিটা ছয়কে ধৰি ৭৩ ৰান সংগ্ৰহ কৰে । সুদৰ্শনক আউট কৰে স্পীনাৰ ৰবি বিষ্ণোই, যিয়ে ইমপেক্ট চাব হিচাপে খেলিছিল ।

ইয়াৰ পাছতে ৰবি বিষ্ণোইয়ে গ্লেন ফিলিপছ (৩ ৰান) আৰু ৱাশ্বিংটন সুন্দৰক (৪ ৰান) আউট কৰে । ভাল বেটিং কৰি থকা জোছ বাটলাৰে (২৬ ৰান) নন্দ্ৰে বাৰ্গাৰৰ হাততো উইকেট হেৰুৱাই গুজৰাট টাইটানছক বিপদত পেলায় । ইয়াৰ পিছতে ৰবি বিষ্ণইয়ে মাত্ৰ ১২ ৰানতে ৰাহুল তেৱতিয়াক আউট কৰে । শ্বাহৰুখ খানে ১১ ৰান সংগ্ৰহ কৰি ৰান আউট হয় । ইয়াৰ পিছতে কাগিছ’ ৰাবাদা (২৩ ৰান নট আউট) আৰু ৰছিদ খানে (২৪ ৰান) খেলখন ৰোমাঞ্চকৰ কৰি তুলিছিল ।

ৰাজস্থান ৰয়েলছৰ ইনিংছ-

ৰাজস্থান ৰয়েলছে টছত জয়লাভ কৰি প্ৰথমে বেটিং কৰিবলৈ সিদ্ধান্ত লয় আৰু ৬ উইকেটত ২১০ ৰান সংগ্ৰহ কৰে । ৰাজস্থান ৰয়েলছে শক্তিশালী আৰম্ভণি কৰে । বৈভৱ সূৰ্যবংশী আৰু যশস্বী জয়ছোৱালে ৭০ ৰানৰ অংশীদাৰিত্ব গঢ়ে । বৈভৱ সূৰ্যবংশীয়ে ১৮টা বলত ৩১ ৰান সংগ্ৰহ কৰে । অধিনায়ক ৰছিদ খানৰ বলত বৈভৱৰ উইকেটৰ পতন ঘটে । বৈভৱ আউট হোৱাৰ পাছত ধ্ৰুৱ জুৰেলৰ সৈতে যশস্বীয়ে দ্বিতীয় উইকেটত ৫৬ ৰান সংযোজন কৰে ।

যশস্বী জয়ছোৱালে ৩৬টা বলত ৫৫ ৰান সংগ্ৰহ কৰে । তেওঁক কাগিছ’ ৰাবাডাই এক চমৎকাৰ ডেলিভাৰীৰে ক্লীন বল্ড কৰে । অধিনায়ক ৰিয়ান পৰাগ (৮ ৰান), শ্বিমৰন হেটমায়াৰ (১৮ ৰান) আৰু ড’নভান ফেৰেইৰাই (১ ৰান) বিশেষ প্ৰভাৱ পেলোৱাত ব্যৰ্থ হয় ।

উইকেট পতনৰ মাজতে ক্ৰীজত থাকি ধ্ৰুৱ জুৰেলে উজ্জ্বল ইনিংছ খেলে । জুৰেলে ৪২টা বলত ৭৫ ৰান সংগ্ৰহ কৰে । গুজৰাট টাইটানছৰ হৈ কাগিছ’ ৰাবাদাই সৰ্বাধিক দুটা উইকেট দখল কৰে । ৰছিদ খান, প্ৰসিদ্ধ কৃষ্ণ, অশোক শৰ্মা আৰু মহম্মদ চিৰাজে এটাকৈ উইকেট দখল কৰে ।

এই মেচত গুজৰাট টাইটানছৰ অধিনায়কত্ব কৰিছিল ৰছিদ খানে । আঘাতৰ বাবে নিয়মীয়া অধিনায়ক শুভমন গীলে এই মেচত অংশ লোৱা নাছিল ।

লগতে পঢ়ক : ধুৰন্ধৰ মুডত সূৰ্যকুমাৰ যাদৱ; অক্ষয় খান্নাৰ জনপ্ৰিয় গীতত আইকনিক ষ্টেপ

বৰ্ষাপাৰা ক্ৰিকেট ষ্টেডিয়ামত অনুষ্ঠিত হোৱা মেচখনত চেন্নাই ছুপাৰ কিংছক ৮ উইকেটত পৰাস্ত কৰে ৰাজস্থানে

জয়েৰে আই পি এল ২০২৬ৰ অভিযান আৰম্ভ কৰিছে ৰাজস্থান ৰিয়ান পৰাগ নেতৃত্বাধীন ৰাজস্থান ৰয়েলছে । সোমাৰে গুৱহাটীৰ বৰ্ষাপাৰা ক্ৰিকেট ষ্টেডিয়ামত অনুষ্ঠিত হোৱা মেচখনত চেন্নাই ছুপাৰ কিংছক ৮ উইকেটত পৰাস্ত কৰে ৰাজস্থানে । টছত জয়লাভ কৰি ৰাজস্থানে প্ৰথমে বলিং কৰিবলৈ সিদ্ধান্ত লয় । প্ৰথমে বেটিঙৰ আমন্ত্ৰণ লাভ কৰি ১২৭ ৰানহে কৰিবলৈ সক্ষম হয় চেন্নাই দলে । ইয়াৰ প্ৰতিক্ৰিয়া স্বৰূপে ৰাজস্থানে ১৩ নং অভাৰতে লক্ষ্যত উপনীত হয় । বৈভৱ সূৰ্যবংশীয়ে পুনৰবাৰ ৰাজস্থানৰ হৈ বিস্ফোৰক ইনিংছ খেলি মাত্ৰ ১৫টা বলত অৰ্ধ শতক অৰ্জন কৰে ।

ৰাজস্থানৰ ইনিংছ-

১২৮ ৰানৰ লক্ষ্য আগত লৈ ৰাজস্থানৰ হৈ বৈভৱ সূৰ্যবংশী আৰু যশস্বী জয়ছোৱালে ইনিংছ মুকলি কৰে । বৈভৱে প্ৰথম বলৰ পৰাই আক্ৰমণ আৰম্ভ কৰি মাত্ৰ ১৫টা বলত অৰ্ধ শতক অৰ্জন কৰে । বৈভৱৰ উইকেটৰ পতনৰ সময়ত ৰাজস্থানৰ স্কৰ আছিল ৭৫ ৰান । বৈভৱে চাৰিটা চাৰি আৰু ৫টা ছয়ৰ সহায়ত ১৭টা বলত ৫২ ৰান সংগ্ৰহ কৰে । বৈভৱৰ পিছতে ধ্ৰুৱ জুৰেলে বেটিং কৰিবলৈ আহে । নৱম অভাৰত অংশুল কম্বোজৰ বলত আউট হোৱাৰ পূৰ্বে তেওঁ ১৮ ৰান সংগ্ৰহ কৰে । অৱশ্যে অধিনায়ক ৰিয়ান পৰাগ আৰু যশস্বী জয়ছোৱালে দায়িত্ব গ্ৰহণ কৰি ১৩ নং অভাৰত ৰাজস্থানৰ জয় নিশ্চিত কৰে ।

চেন্নাইৰ ইনিংছ-

চি এছ কেৰ হৈ সঞ্জু চেমছন আৰু ৰুতুৰাজ গাইকোৱাদে প্ৰথমে বেটিং কৰি ইনিংছ মুকলি কৰে । অৱশ্যে টি-২০ বিশ্বকাপৰ নায়ক সঞ্জু এই মেচত ব্যৰ্থ হয় । দ্বিতীয় অভাৰত নন্দ্ৰে বাৰ্গাৰে সঞ্জুক মাত্ৰ ৬ ৰানতে বল্ড কৰে । অধিনায়ক ৰুতুৰাজ গাইকৱাদেও পৰৱৰ্তী অভাৰতে নিজৰ উইকেট হেৰুৱাই । তেওঁ ৬ ৰানহে কৰিবলৈ সক্ষম হয় । তাৰ পাছত বাৰ্গাৰে চতুৰ্থ অভাৰৰ প্ৰথমটো বলত আয়ুষ ম্হাত্ৰেক আউট কৰে । মেথিউ শ্বৰ্টৰ ওপৰত চি এছ কেৰ বহু আশা আছিল যদিও তেওঁও ষষ্ঠ অভাৰত মাত্ৰ দুই ৰান সংগ্ৰহ কৰি আউট হয় ।

ইয়াৰ পিছতে ছৰফৰাজ খানে ইনিংছ সুস্থিৰ কৰাৰ চেষ্টা কৰে । অৱশ্যে জাডেজাই তেওঁক তেওঁৰ প্ৰথম অভাৰতে আউট কৰে । ছৰফৰাজে ১৭ ৰান সংগ্ৰহ কৰে । ছৰফৰাজ আউট হোৱাৰ সময়ত চি এছ কেৰ স্ক’ৰ আছিল ৫১-৫ । ইয়াৰ পিছতে জাডেজাই একেটা অভাৰতে শিৱম ডুবেক আউট কৰে । ১০ অভাৰৰ অন্তত চি এছ কেৰ স্ক’ৰ ৭১-৬ । ১১ অভাৰত কাৰ্তিকেও নিজৰ উইকেট হেৰুৱাই । কাৰ্তিক শৰ্মাই ১৮ ৰান সংগ্ৰহ কৰে । ইয়াৰ পিছতে ৰাজস্থানৰ বলাৰসকলে খেলখন সম্পূৰ্ণৰূপে নিয়ন্ত্ৰণলৈ আনে । অৱশ্যে জিমি অভাৰটনৰ ৪৩ ৰানৰ ইনিংছত চেন্নাইৰ স্ক’ৰ ১২৭ লৈ বৃদ্ধি পায় ।

লগতে পঢ়ক : নতুন জাৰ্চিত পুৰণি দলৰ সৈতে সংঘৰ্ষ, আজি আই পি এলত সঞ্জু-জাডেজাৰ মুখামুখি

ৰবীন্দ্ৰ জাডেজাইও নিজৰ পূৰ্বৰ ফ্ৰেঞ্চাইজিৰ বিৰুদ্ধে খেলিব, যিয়ে মেচখন এক ৰোমাঞ্চকৰ পৰ্যায়লৈ লৈ যাব বুলি আশা কৰা হৈছে

ইণ্ডিয়ান প্ৰিমিয়াৰ লীগৰ তৃতীয়খন খেল সোমবাৰে চেন্নাই ছুপাৰ কিংছ আৰু ৰাজস্থান ৰয়েলছৰ মাজত অনুষ্ঠিত হ’ব । গুৱহাটীৰ বৰ্ষাপাৰা ষ্টেডিয়ামত অনুষ্ঠিত হ’ব এই মেচখন । এটা দশকৰো অধিক সময় ধৰি ৰাজস্থান ৰয়েলছৰ সৈতে জড়িত সঞ্জু চেমছনৰ বাবে এই মেচখন অতি আৱেগিক হ’ব । তেওঁৰ পূৰ্বৰ দল ৰাজস্থান ৰয়েলছৰ বিৰুদ্ধে চেন্নাই ছুপাৰ কিংছৰ হৈ খেলিব । ইফালে ৰবীন্দ্ৰ জাডেজাইও নিজৰ পূৰ্বৰ ফ্ৰেঞ্চাইজিৰ বিৰুদ্ধে খেলিব, যিয়ে মেচখন এক ৰোমাঞ্চকৰ পৰ্যায়লৈ লৈ যাব বুলি আশা কৰা হৈছে ।

উল্লেখ্য য়ে, এটা দশকৰো অধিক সময় ৰাজস্থান ৰয়েলছৰ মুখ আছিল চেমছন । তেওঁ দলটোৰ মূল বেটছমেন, অধিনায়ক আৰু আগশাৰীৰ ৰাণ সংগ্ৰহকাৰী হিচাপে ২০২২ চনৰ ফাইনেলত দলটোক নেতৃত্ব দিছিল ।

এম এছ ধোনী যেনেকৈ চেন্নাই ছুপাৰ কিংছৰ মুখ আছিল, চেমছন আছিল ৰাজস্থান ৰয়েলছৰ মুখ । কিন্তু জাডেজা ৰাজস্থানলৈ উভতি অহাৰ লগে লগে কেৰালাৰ বেটছমেনগৰাকীক এতিয়া হালধীয়া জাৰ্চি পিন্ধা দেখা যাব ।

উল্লেখ্য যে, চেমছন বৰ্তমান শক্তিশালী ফৰ্মত আছে । শেহতীয়াকৈ ভাৰতৰ টি-২০ বিশ্বকাপ জয়ত তেওঁ গুৰুত্বপূৰ্ণ ভূমিকা পালন কৰিছিল । ৱেষ্ট ইণ্ডিজ, ইংলেণ্ড আৰু নিউজীলেণ্ডৰ বিৰুদ্ধে জয়ী হোৱা মেচত একেৰাহে তিনিটা অৰ্ধশতক অৰ্জন কৰি দেশৰ নতুন তাৰকা হিচাপে আত্মপ্ৰকাশ কৰিছে তেওঁ ।

সঞ্জু চেমছন আৰু অধিনায়ক ৰুতুৰাজ গাইকোৱাদে ইনিংছ মুকলি কৰিব আৰু দলৰ নেতৃত্বৰ এক গুৰুত্বপূৰ্ণ অংশ হ’ব, কিয়নো আঘাতৰ বাবে এম এছ ধোনী কমেও দুসপ্তাহৰ বাবে আই পি এলৰ পৰা আঁতৰি থাকিব । দলটোৰ সৈতে ধোনী গুৱাহাটীলৈ অহা নাই আৰু তেওঁৰ অনুপস্থিতিত চেমছন আৰু গাইকোৱাদৰ অতিৰিক্ত দায়িত্ব থাকিব ।

বৈভৱ সূৰ্য্যবংশীৰ ওপৰত থাকিব চকু-

ৰাজস্থান ৰয়েলছৰ বাবে চেমছনৰ বিদায়ে এটা যুগৰ অন্ত আৰু নতুন যুগৰ আৰম্ভণিৰ সূচনা কৰিছে । এতিয়া দলটোৰ অধিনায়ক ৰিয়ান পৰাগ । অধিনায়ক হিচাবে আজি ঘৰুৱা খেলপথাৰত অভিষেক ঘটাব ৰিয়ানে । ৰবীন্দ্ৰ জাডেজাৰ প্ৰত্যাৱৰ্তনে ৰাজস্থানক অভিজ্ঞতা আৰু ভাৰসাম্য প্ৰদান কৰিব যদিও তেওঁৰ ফিনিছিং ক্ষমতা হ্ৰাস পোৱাটো চিন্তাৰ বিষয় হ’ব পাৰে ।

দলটোৰ বেটিং এতিয়া বহুলাংশে নিৰ্ভৰ কৰিব বৈভৱ সূৰ্যবংশী আৰু যশস্বী জয়ছোৱালৰ ওপৰত । অৱশ্যে ৰাজস্থানৰ বলিং চিন্তাৰ বিষয় হৈ আছে । ২০২৫ চনৰ হতাশাজনক ছিজনৰ পিছত পৰিৱৰ্তন হৈছে যদিও জোফ্ৰা আৰ্চাৰৰ নেতৃত্বত চলি থকা ফাষ্ট বলিং আক্ৰমণৰ ধাৰাবাহিকতাক লৈ প্ৰশ্ন উত্থাপন হৈছে ।

ৰাজস্থানৰ সম্ভাৱ্য মূল একাদশ : যশস্বী জয়ছোৱাল, বৈভৱ সূৰ্যবংশী, ৰিয়ান পৰাগ, শ্বিমৰন হেটমায়াৰ, ধ্ৰুৱ জুৰেল, ৰবীন্দ্ৰ জাডেজা, দছুন চানাকা, জোফ্ৰা আৰ্চাৰ, সন্দীপ শৰ্মা, ৰবি বিষ্ণোই, আদম মিলনে ।

ইমপেক্ট প্লেয়াৰ: অমন ৰাও পেৰালা

চেন্নাই ছুপাৰ কিংছৰ সম্ভাৱ্য মূল একাদশ : সঞ্জু চেমছন (উইকেটকীপাৰ), ৰুতুৰাজ গাইকোৱাড (অধিনায়ক), আয়ুছ মাহাত্ৰে, দেৱাল্ড ব্ৰুইছ, শিৱম ডুবে, প্ৰশান্ত বীৰ, জেমী অভাৰটন, অংশুল কামোজ, ৰাহুল চহৰ, নূৰ আহমেদ, খলিল আহমেদ

ইমপেক্ট প্লেয়াৰ: কাৰ্তিক শৰ্মা

লগতে পঢ়ক : বিৰাট কোহলীৰ বিস্ফোৰক অৰ্ধ শতক, আই পি এল ২০২৬ৰ প্ৰথমখন মেচত আৰ চি বিৰ জয়

বিধানসভা নিৰ্বাচনৰ উত্তেজনাৰ মাজতে আজি বৰ্ষাপাৰাত আজি ৰাজস্থান ৰয়েলছ বনাম চেন্নাই ছুপাৰ কিংছৰ হাই-ভল্টেজ মেচৰ বাবে সাজু হৈছে ক্ৰিকেট অনুৰাগী সকল। ঘৰুৱা খেলপথাৰত ধোনী বাহিনীৰ বিৰুদ্ধে যুঁজিবলৈ সাজু হৈছে ৰিয়ান পৰাগৰ ৰাজস্থান ৰয়েলছ।

বৰ্ষণমুখৰ পৰিৱেশত বৰ্ষাপাৰাত আজি আই পি এল ২০২৬ৰ তৃতীয়খন মেচ চেন্নাই ছুপাৰ কিংছ আৰু ৰাজস্থান ৰয়েলছৰ মাজত অনুষ্ঠিত হ’ব।ঘৰুৱা খেলপথাৰত ধোনী বাহিনীৰ বিৰুদ্ধে যুঁজিবলৈ সাজু হৈছে ৰিয়ান পৰাগৰ ৰাজস্থান ৰয়েলছ।

IPLৰ এই হাই-ভল্টেজ মেচখনৰ বাবে অসমৰ ক্ৰিকেটপ্ৰেমীসকলৰ মাজত ব্যাপক উৎসাহ দেখিবলৈ পোৱা গৈছে।প্ৰথমবাৰলৈ RR-ৰ পূৰ্ণাংগ অধিনায়কৰূপে খেলিব অসম সন্তান ৰিয়ান পৰাগে।মেচখন সন্ধিয়া ৭:৩০ বজাৰ পৰা আৰম্ভ হ’ব।

কিন্তু এই মেচত প্ৰাক্তন অধিনায়ক এম এছ ধোনীয়ে খেলাৰ সম্ভাৱনা নাই। শনিবাৰে চেন্নাই ছুপাৰ কিংছৰ তৰফৰ পৰা এটা পোষ্টত উল্লেখ কৰিছে যে ধোনীয়ে আই পি এল ২০২৬ৰ প্ৰথম দুসপ্তাহ খেলিব নোৱাৰিব।তেওঁ পেশীৰ ষ্ট্ৰেইনৰ বাবে চিকিৎসাধীন হৈ আছে। মহেন্দ্ৰ সিং ধোনীৰ অনুপস্থিতিক লৈ অনুৰাগী সকল হতাশ হৈছে।

ইফালে এই হাই-ভল্টেজ মেচখনত বৰষুণে বিধি-পথালি দিয়াৰো সম্ভাৱনা আছে।গুৱাহাটীৰ বৰ্ষাপাৰা ক্ৰিকেট ষ্টেডিয়ামত অনুষ্ঠিত হ‘বলগীয়া এই গুৰুত্বপূৰ্ণ মেচখনৰ সময়ত আকাশ ডাৱৰীয়া হৈ থকাৰ লগতে বৰষুণ অহাৰ পূৰ্ণ সম্ভাৱনা আছে।

লগতে পঢ়ক: আই পি এল ২০২৬ৰ প্ৰথম দিনাই অলেখ অভিলেখ

আই পি এলত ৰাজস্থান ৰয়েলছৰ যাত্ৰা ২০০৮ চনত শ্বেন ৱাৰ্ণৰ অধিনায়কত্বত হৈছিল

আই পি এলৰ ১৯ সংখ্যক ছিজনলৈ মাত্ৰ কেইদিনমান বাকী থকা অৱস্থাত প্ৰকাশ পাইছে এক গুৰুত্বপূৰ্ণ খবৰ । আই পি এলৰ ফ্ৰেঞ্চাইজি ৰাজস্থান ৰয়েলছৰ মালিকীস্বত্বৰ দৌৰ এতিয়া অন্ত পৰিল । আমেৰিকাৰ ব্যৱসায়ী কাল সোমানীয়ে এতিয়া এই ফ্ৰেঞ্চাইজি লাভ কৰিছে ।

খবৰ অনুসৰি, কাল সোমানীয়ে ১০০ শতাংশ অংশীদাৰিত্বকে ধৰি এই আই পি এল ফ্ৰেঞ্চাইজিটো প্ৰায় ১.৬৩ বিলিয়ন ডলাৰ (প্ৰায় ১৫ হাজাৰ কোটি টকা)ৰ বৃহৎ মূল্যত অধিগ্ৰহণ কৰিছে । এই চুক্তিৰ জৰিয়তে ৰাজস্থান ৰয়েলছ বিশ্বৰ আটাইতকৈ দামী ফ্ৰেঞ্চাইজি হিচাপে পৰিগণিত হৈছে ।

খবৰ অনুসৰি কাল সোমানী হৈছে ইন্ট্ৰাএজ, একাডেমিয়ান আৰু ট্ৰুয়ো.এআইৰ প্ৰতিষ্ঠাপক । এই কনচৰ্টিয়ামটো ৱালমাৰ্ট পৰিয়ালৰ সৈতে জড়িত আমেৰিকান ব্যৱসায়ী ৰব ৱাল্টনেও সমৰ্থন কৰে । তদুপৰি ইয়াত ডেট্ৰাইট লায়ন্স দলৰ মালিক হেম্প পৰিয়ালটোও অন্তৰ্ভুক্ত হৈছে । খবৰ অনুসৰি এই নতুন মালিকীস্বত্বৰ প্ৰভাৱ আই পি এল ২০২৬ৰ পিছত কাৰ্যকৰী হ’ব ।

এই নতুন চুক্তিৰ পূৰ্বে ব্ৰিটিছ-ভাৰতীয় ব্যৱসায়ী মনোজ বাদালেৰ ৰাজস্থান ৰয়েলছৰ ৬৫% অংশীদাৰিত্ব আছিল । অৱশ্যে কাল সোমানীয়ে এতিয়া ১০০% অংশীদাৰিত্বৰ মালিক হ’ব । অৱশ্যে এই চুক্তি ভাৰতত ক্ৰিকেট নিয়ন্ত্ৰণ ব’ৰ্ডৰ অনুমোদনৰ আওতাত আছে আৰু অতি সোনকালে এই চুক্তি স্বাক্ষৰিত হোৱাৰ সম্ভাৱনা আছে ।

জানিব পৰা মতে অহা চাৰি-পাঁচ দিনৰ ভিতৰত এই চুক্তি ঘোষণা হোৱাৰ সম্ভাৱনা আছে । ইফালে আই পি এলৰ আন এটা ডাঙৰ দল আৰ চি বি (ডিফেণ্ডিং চেম্পিয়ন)ও বিক্ৰীৰ বাবে সাজু হৈছে বুলি কোৱা হৈছে ।

আই পি এলত ৰাজস্থান ৰয়েলছৰ যাত্ৰা-

আই পি এলত ৰাজস্থান ৰয়েলছৰ যাত্ৰা ২০০৮ চনত শ্বেন ৱাৰ্ণৰ অধিনায়কত্বত হৈছিল । এই মেগা প্ৰতিযোগিতাৰ প্ৰথমটো ছিজনতে ফ্ৰেঞ্চাইজিটোৱে প্ৰথম খিতাপ দখল কৰিছিল । অৱশ্যে ইয়াৰ পিছতো দলটোৱে অবিৰত সংগ্ৰামৰ সন্মুখীন হ’বলগীয়া হৈছে । ২০২২ চনত দলটোৱে ফাইনেলত প্ৰৱেশ কৰিছিল যদিও খিতাপ দখল কৰিছিল গুজৰাট টাইটানছে ।

লগতে পঢ়ক : দক্ষিণ আফ্ৰিকাৰ বিৰুদ্ধে ভাৰতীয় দলত অসমৰ উমা চেত্ৰী