অন্ন সেৱা আঁচনিৰ শুভাৰম্ভ

ৰাজ্যত সোমবাৰে শুভাৰম্ভ কৰা হয় অন্ন সেৱা আঁচনিৰ । কলাক্ষেত্ৰত মুখ্যমন্ত্ৰী ড০ হিমন্ত বিশ্ব শৰ্মাই এই আঁচনিৰ শুভাৰম্ভ কৰে । ৰাজ্য চৰকাৰে অন্ন সেৱা যোজনা সম্প্ৰসাৰণ কৰি ৰাজসাহায্যযুক্ত হাৰত তিনিবিধ অত্যাৱশ্যকীয় সামগ্ৰী- দালি, চেনি আৰু নিমখ অন্তৰ্ভুক্ত কৰি ৰাষ্ট্ৰীয় খাদ্য সুৰক্ষা আইনৰ অধীনত প্ৰায় ৭০ লাখ পৰিয়ালক উপকৃত কৰে ।

ৰাজ্যৰ ৩৩ হাজাৰ সুলভ মূল্যৰ দোকানত আনুষ্ঠানিকভাৱে এই অন্ন সেৱা আঁচনিখন প্ৰৱৰ্তন কৰা হয়, য’ত এই উপলক্ষে হিতাধিকাৰী, মন্ত্ৰী, বিধায়ক আৰু বিষয়াসকলৰ অংশগ্ৰহণেৰে বিশেষ সভা অনুষ্ঠিত কৰা হয় ।

গুৱাহাটীৰ শ্ৰীমন্ত শংকৰদেৱ কলাক্ষেত্ৰত অনুষ্ঠিত অন্ন সেৱা আঁচনিৰ কেন্দ্ৰীয় শুভাৰম্ভণি অনুষ্ঠানত মুখ্যমন্ত্ৰী ড০ হিমন্ত বিশ্ব শৰ্মাই কয় যে এই পদক্ষেপে চৰকাৰৰ “সমন্বিত উন্নয়ন”ৰ প্ৰতি দায়বদ্ধতাক পুনৰ দৃঢ় কৰি তুলিছে ।

মুখ্যমন্ত্ৰী ড০ শৰ্মাই কয় যে,‘এতিয়াৰ পৰা ৰেচন কাৰ্ড থকা প্ৰতিখন ঘৰে ৰাজসাহায্যযুক্ত হাৰত দালি, চেনি, নিমখ লাভ কৰিব ।’

এই অন্ন সেৱা আঁচনিৰ অধীনত ৬৯ টকাত ১ কেজি দালি, ৩৮ টকাত চেনী আৰু ১০ টকাত নিমখ লাভ কৰিব (মুঠ ১১৭ টকা) । অৱশ্যে ১ জানুৱাৰীৰ পৰা এই সংযুক্ত মূল্য প্ৰতি ঘৰে ঘৰে মাহে ১০০টকালৈ হ্ৰাস কৰা হ’ব ।

মুখ্যমন্ত্ৰী ড০ হিমন্ত বিশ্ব শৰ্মাই কয়-“৬৯ টকা দি ১ টকা সলনিৰ চিন্তা কৰাৰ পৰিৱৰ্তে আমি সিদ্ধান্ত লৈছিলো যে ১ জানুৱাৰীৰ পৰা আপুনি কেৱল ১০০ টকা দি দালি, চেনি আৰু নিমখ লাভ কৰিব ।”

আনহাতে দৰিদ্ৰ পৰিয়ালৰ বাবে এল পি জিৰ মূল্যৰ বোজা লাঘৱ কৰাৰ বাবেও এক অতিৰিক্ত ব্যৱস্থাৰ কথা ঘোষণা কৰে মুখ্যমন্ত্ৰী ড০ শৰ্মাই । তেওঁ কয়- “উজালা কাৰ্ড থকাসকলৰ বাবে এই গেছৰ দাম ৫৫০ টকা, কিন্তু এই কাৰ্ড অবিহনে ৰন্ধন গেছৰ মূল্য ৯৫০ টকাৰ পৰা ১০০০ টকাৰ ভিতৰত হ’ব পাৰে । ইয়াক সহজ কৰি তুলিবলৈ, গেছ ক্ৰয়ৰ বাবে আমি ২৫০ টকা পোনপটীয়াকৈ আপোনাৰ একাউণ্টত জমা কৰিম।”

ভাষণত মুখ্যমন্ত্ৰী ড০ শৰ্মাই পৰম্পৰাগত কল্যাণ বিতৰণ আৰ্হিৰ পৰা প্ৰত্যক্ষ লাভ হস্তান্তৰ (ডিবিটি)লৈ পৰিৱৰ্তনৰ ওপৰত আলোকপাত কৰে আৰু প্ৰধানমন্ত্ৰী নৰেন্দ্ৰ মোদীৰ শাসন সংস্কাৰক ইয়াৰ কৃতত্ব দিয়ে ।

তেওঁ কয়, “যেতিয়া মোদী জীয়ে বেংক একাউণ্ট বাধ্যতামূলক কৰিছিল, তেতিয়া বহুতে ভাবিছিল যে কিয় এনে কৰা হ’ল । কিন্তু যেতিয়া দুখীয়াই গেছ ৰাজসাহায্য আৰু ক’ভিড সাহায্য পোনপটীয়াকৈ তেওঁলোকৰ একাউণ্টত লাভ কৰিবলৈ আৰম্ভ কৰিছিল, তেতিয়া সকলোৱে তেওঁৰ দূৰদৰ্শিতা বুজি পাইছিল ।”

পূৰ্বৰ চৰকাৰৰ সৈতে তুলনা কৰি মুখ্যমন্ত্ৰীগৰাকীয়ে কয় যে “পূৰ্বৰ চৰকাৰে কেইবছৰমানৰ মূৰে মূৰে এবাৰ ধূতী, কম্বল, চাদৰ বিতৰণ কৰিছিল; ইয়াৰ দীৰ্ঘম্যাদী লাভ কম আছিল ।” তেওঁ কয়- “আগতে মানুহে সভাত উপস্থিত থাকি কোনে কি পাব সেই লৈ তৰ্ক কৰিব লাগিছিল । আজি প্ৰতিটো টকা পোনপটীয়াকৈ দুখীয়াৰ হাতলৈ যায় ।”

মুখ্যমন্ত্ৰী হিমন্ত বিশ্ব শৰ্মাই ভাষণত প্ৰতিশ্ৰুতি দিয়ে যে তেওঁৰ চৰকাৰে ঘৰুৱা কল্যাণমূলক আঁচনিসমূহ আৰু অধিক শক্তিশালী কৰিব । তেওঁ কয়, “আমি আপোনালোকক চাউল, মচুৰ দাইল, চেনি, নিমখ, অৰুণোদয়, নিজুত মইনা দিছো । এতিয়া যদি আপোনালোকে আমাক নিৰ্বাচনত জয়ী কৰায় তেন্তে আমি এক লিটাৰ সৰিয়হৰ তেল দিম । তেতিয়া আপোনালোকৰ ঘৰৰ সকলো চিন্তা নাইকিয়া হৈ যাব ।”

লগতে পঢ়ক : ‘ৰৈ ৰৈ বিনালে’ৰ পাইৰেছী কৰা সকলৰ বিৰুদ্ধে কঠোৰ হ’ব চৰকাৰ’; মুখ্যমন্ত্ৰী