পাকিস্তানৰ সৈতে কি সম্পৰ্ক গৌৰৱ গগৈৰ? ৮ ফেব্ৰুৱাৰীত ফাদিল হ’ব ৰহস্যৰ !
গৌৰৱ গগৈৰ পাকিস্তান সম্পৰ্কৰ অভিযোগৰ বিশেষ তদন্তকাৰী দলৰ প্ৰতিবেদন শীঘ্ৰেই ৰাজহুৱা কৰা হ’ব । মুখ্যমন্ত্ৰী ড০ হিমন্ত বিশ্ব শৰ্মাই এই সন্দৰ্ভত বিস্ফোৰক মন্তব্য কৰিছে ।
মুখ্যমন্ত্ৰী ড০ হিমন্ত বিশ্ব শৰ্মাই মঙলবাৰে ঘোষণা কৰে যে কংগ্ৰেছ নেতা গৌৰৱ গগৈ, তেওঁৰ পত্নী এলিজাবেথ কলবাৰ্ন গগৈ আৰু পাকিস্তানৰ মাজত থকা সম্পৰ্কৰ অভিযোগৰ বিশেষ তদন্তকাৰী দলৰ প্ৰতিবেদন অহা ৮ ফেব্ৰুৱাৰীত ৰাজহুৱা কৰা হ’ব ।
মুখ্যমন্ত্ৰী ড০ শৰ্মাই কয় যে এছ আই টিয়ে পাকিস্তানৰ সৈতে তিনিজন ব্যক্তিৰ মাজত সম্পৰ্ক থকাৰ প্ৰমাণ পাইছে : আলী টৌকীৰ শ্বেখ, গৌৰৱ গগৈ আৰু তেওঁৰ পত্নী এলিজাবেথ কলবাৰ্ন । মুখ্যমন্ত্ৰীয়ে কয়, “৭ ফেব্ৰুৱাৰীত কেবিনেট বৈঠক অনুষ্ঠিত হ’ব, আৰু এই বিষয়ত কেবিনেট মেমোৰেণ্ডাম গৃহীত কৰা হ’ব । ৮ ফেব্ৰুৱাৰীত আমি সংবাদমেলৰ জৰিয়তে এলিজাবেথ কলবাৰ্ন আৰু গৌৰৱ গগৈৰ বিষয়ে স্পৰ্শকাতৰ তথ্য জনসাধাৰণৰ আগত উত্থাপন কৰিম । এছ আই টিৰ হাতত তিনিওজন ব্যক্তি আৰু পাকিস্তানৰ মাজত সম্পৰ্ক থকাৰ প্ৰমাণ আছে ।”
মুখ্যমন্ত্ৰী ড০ শৰ্মাই লগতে কয় যে নিৰ্বাচন চমু চাপি অহাৰ লগে লগে একাংশ লোকে গগৈক ৰক্ষা কৰিবলৈ চেষ্টা কৰিব । অৱশ্যে সাধাৰণ মানুহৰ বাবে এয়া এক চাঞ্চল্যকৰ আৰু স্পৰ্শকাতৰ প্ৰতিবেদন ।
উল্লেখ্য যে, বিগত কেইসপ্তাহমানৰ পৰা মুখ্যমন্ত্ৰী হিমন্ত বিশ্ব শৰ্মাই গৌৰৱ গগৈক পাকিস্তানৰ সৈতে সম্পৰ্ক থকা বুলি অভিযোগ উত্থাপন কৰি আহিছে । এই বিষয়ক লৈ অসমত শাসকীয় বিজেপি আৰু কংগ্ৰেছৰ মাজত তিক্ত ৰাজনৈতিক সংঘাতৰ সৃষ্টি হৈছে ।
বিজেপিয়ে কৈছে যে ৰাষ্ট্ৰীয় নিৰাপত্তা আৰু জনসাধাৰণৰ জবাবদিহিতাৰ স্বাৰ্থত তদন্ত প্ৰয়োজনীয় । কংগ্ৰেছ নেতাগৰাকীৰ কিছুমান বক্তব্য আৰু কাৰ্য ৰাজহুৱা তদন্তৰ প্ৰয়োজনীয়তা থকা গুৰুতৰ প্ৰশ্ন উত্থাপন কৰা বুলি অভিযোগ কৰি ড০ শৰ্মাই কয় যে ৰাজ্য চৰকাৰৰ তদন্ত প্ৰক্ৰিয়াত লুকুৱাবলগীয়া একো নাই ।
লগতে পঢ়ক : ৰাহুল গান্ধীৰ বিৰুদ্ধে উত্তৰ-পূবক অপমান কৰাৰ অভিযোগ বিজেপিৰ