ৰাজ্যত পুনৰ হ’ব বিজেপি চৰকাৰ; পুনৰ মুখ্যমন্ত্ৰী হ’ব ড০ হিমন্ত বিশ্ব শৰ্মা ! সমীক্ষাত প্ৰকাশ পালে ডাঙৰ তথ্য…
সমাগত ৰাজ্যৰ বিধানসভা নিৰ্বাচন । এই নিৰ্বাচনক লৈ চলি থকা জল্পনা-কল্পনাৰ মাজতেই এক সমীক্ষাত বিজেপি নেতৃত্বাধীন মিত্ৰজোঁটে পুনৰ এবাৰ অসমত চৰকাৰ গঠন কৰিব বুলি প্ৰকাশ পাইছে ।
২০২৬ চনৰ জানুৱাৰী মাহত চলোৱা ‘ইণ্ডিয়া টুডে-চি ভোটাৰ মুড অৱ দ্য নেচন’ জৰীপ অনুসৰি, যদি আজি অসমত বিধানসভা নিৰ্বাচন অনুষ্ঠিত হয়, তেন্তে বিজেপি নেতৃত্বাধীন মিত্ৰজোঁটে স্পষ্ট বহুমতেৰে পুনৰ ক্ষমতা দখল কৰিব । আনহাতে, কংগ্ৰেছ দল ৰাজ্যখনৰ মুখ্য প্ৰতিদ্বন্দ্বী হিচাপে থাকিব ।
অসমত আগন্তুক বিধানসভা নিৰ্বাচনৰ প্ৰস্তুতি চলি থকাৰ সময়ত ৰাজ্যখনৰ নিৰ্বাচনী পৰিৱেশে এক দ্বি-মেৰু কেন্দ্ৰিক প্ৰতিদ্বন্দ্বিতাৰ ইংগিত দিছে । ইয়াত ভোটাৰৰ পছন্দ স্পষ্টভাৱে দুটা ৰাষ্ট্ৰীয় দলৰ প্ৰতি থকা দেখা গৈছে আৰু আঞ্চলিক বা সৰু দলসমূহৰ বাবে নিৰ্বাচনী যুঁজত অৱকাশ যথেষ্ট সীমিত হৈ পৰিছে ।
‘মুড অফ দ্য নেচন’ (MoTN)ৰ সমীক্ষা অনুসৰি, যদি আজিৰ দিনটোত বিধানসভা নিৰ্বাচন অনুষ্ঠিত হয়, তেন্তে বিজেপি নেতৃত্বাধীন মিত্ৰজোঁটে ৫০.২ শতাংশ ভোট লাভ কৰিব । ইয়াৰ বিপৰীতে ৪৪ শতাংশ ভোটেৰে কংগ্ৰেছ দ্বিতীয় স্থানত থকাৰ বিপৰীতে অন্যান্য দলসমূহে মুঠ ৫.৮ শতাংশ ভোটাৰৰ সমৰ্থন লাভ কৰিব ।
এই পৰিসংখ্যাই সূচাইছে যে বিজেপি নেতৃত্বাধীন মিত্ৰজোঁট ৰাজ্যখনৰ সৰ্ববৃহৎ ৰাজনৈতিক শক্তি হিচাপে আত্মপ্ৰকাশ কৰিব আৰু কংগ্ৰেছে মূল বিৰোধী শক্তি হিচাপে নিজৰ স্থিতি অটুট ৰাখিব ।
হিন্দু উত্তৰদাতাসকলৰ মাজত বিজেপি নেতৃত্বাধীন মিত্ৰজোঁটে এক বৃহৎ অগ্ৰগতি লাভ কৰিছে । সমীক্ষা অনুসৰি, যদি আজি নিৰ্বাচন অনুষ্ঠিত হয়, তেন্তে ৬৭.১ শতাংশ হিন্দু ভোটাৰে বিজেপি মিত্ৰজোঁটক নিৰ্বাচন কৰিব ।
এই শিতানত কংগ্ৰেছ বহুখিনি পিছপৰি আছে, আনহাতে ক্ষুদ্ৰ দলসমূহে মিলি মুঠ ৮.২ শতাংশ হিন্দু ভোটাৰৰ পছন্দ লাভ কৰিছে ।
ইফালে, মুছলমান ভোটাৰসকলৰ মাজত কংগ্ৰেছে সৰ্বাধিক সমৰ্থন লাভ কৰা দেখা গৈছে । ‘মুড অফ দ্য নেচন’ৰ সমীক্ষা অনুসৰি, ৭৮.৫ শতাংশ মুছলমান উত্তৰদাতাই কংগ্ৰেছৰ প্ৰতি তেওঁলোকৰ পছন্দ প্ৰকাশ কৰিছে । ইয়াৰ বিপৰীতে, মুছলমান ভোটাৰৰ মাজত বিজেপি নেতৃত্বাধীন মিত্ৰজোঁটে ১৮.৫ শতাংশ সমৰ্থন লাভ কৰিছে । ক্ষুদ্ৰ দলসমূহে মিলি মুছলমান ভোটৰ ৩ শতাংশ সমৰ্থন লাভ কৰিছে ।
‘অন্যান্য’ শ্ৰেণীত, য’ত ক্ষুদ্ৰ ধৰ্মীয় আৰু সামাজিক গোটসমূহ অন্তৰ্ভুক্ত হৈ আছে, তাতো বিজেপি নেতৃত্বাধীন মিত্ৰজোঁটে ৫৭.৭ শতাংশ সমৰ্থন লাভ কৰিছে । এইক্ষেত্ৰত কংগ্ৰেছ পিছ পৰি থকাৰ বিপৰীতে ক্ষুদ্ৰ দলসমূহৰ হাতত ২.৯ শতাংশ ভোটাৰৰ সমৰ্থন আছে ।
‘মুড অৱ দ্য নেচন’ৰ সমীক্ষাই অসমৰ নিৰ্বাচনী ৰাজনীতিত ক্ষুদ্ৰ আৰু আঞ্চলিক দলসমূহৰ ক্ৰমান্বয়ে হ্ৰাস পোৱা প্ৰভাৱৰ দিশটো আলোকপাত কৰিছে । সকলো সম্প্ৰদায়ৰ মাজত ‘অন্যান্য’ দলসমূহৰ সামগ্ৰিক ভোটৰ অংশীদাৰিত্ব মাত্ৰ ৫.৮ শতাংশহে । হিন্দু, মুছলমান আৰু অন্যান্য ভোটাৰ গোটসমূহৰ মাজতো তেওঁলোকৰ সমৰ্থন অতি সীমিত হৈ ৰৈছে, যিয়ে ইংগিত দিয়ে যে অসমৰ ভোটাৰৰ পছন্দ এতিয়া বিজেপি নেতৃত্বাধীন মিত্ৰজোঁট আৰু কংগ্ৰেছ— এই দুই মেৰুত কেন্দ্ৰীভূত হৈ পৰিছে ।
ইফালে ২০২৬ চনৰ জানুৱাৰী মাহত চলোৱা ইণ্ডিয়া টুডে-চি ভোটাৰ ‘মুড অফ দ্য নেচন’ (MOTN) সমীক্ষা অনুসৰি, অসমৰ মুখ্যমন্ত্ৰী পদটোৰ বাবে চলি থকা যুঁজখন বৰ্তমানৰ মুখ্যমন্ত্ৰী হিমন্ত বিশ্ব শৰ্মা আৰু কংগ্ৰেছ সাংসদ গৌৰৱ গগৈৰ মাজত এক পোনপটীয়া প্ৰতিদ্বন্দিতালৈ ৰূপান্তৰিত হৈছে । সমীক্ষাৰ ফলাফল অনুসৰি হিমন্ত বিশ্ব শৰ্মাৰাজ্যজুৰি ৪৭.৫ শতাংশ সমৰ্থনেৰে মুখ্যমন্ত্ৰীৰ পছন্দৰ দৌৰত আগবাঢ়ি আছে । আনহাতে গৌৰৱ গগৈয়ে ৪২.৬ শতাংশ সমৰ্থন লাভ কৰিছে ।
এই সমীক্ষাত বৰ্তমানৰ মুখ্যমন্ত্ৰী হিমন্ত বিশ্ব শৰ্মাই হিন্দু ভোটাৰসকলৰ বিপুল সমৰ্থন লাভ কৰিছে, য’ত ৬৫.২ শতাংশ লোকে তেওঁক নিজৰ পচন্দৰ মুখ্যমন্ত্ৰী হিচাপে সমৰ্থন কৰিছে । ইয়াৰ উপৰিও, ‘অন্যান্য’ শ্ৰেণীৰ অন্তৰ্ভুক্ত উত্তৰদাতাসকলৰ মাজতো তেওঁ জনপ্ৰিয়তা তথা সমৰ্থন লাভ কৰিছে আৰু এই শ্ৰেণীৰ ৫৩.৩ শতাংশ লোকে ড০ শৰ্মাক সমৰ্থন জনাইছে ।
আনহাতে, গৌৰৱ গগৈয়ে মুছলমান ভোটাৰসকলৰ মাজত আধিপত্য বিস্তাৰ কৰা পৰিলক্ষিত হৈছে । জৰীপ অনুসৰি ৭৬.৪ শতাংশ মুছলমান উত্তৰদাতাই গৌৰৱ গগৈক মুখ্যমন্ত্ৰী হিচাপে পচন্দ কৰিছে, আনহাতে এই বিশেষ শ্ৰেণীটোৰ মাত্ৰ ১৭.৭ শতাংশ লোকেহে হিমন্ত বিশ্ব শৰ্মাক সমৰ্থন কৰিছে ।
এই ফলাফলবোৰে বিভিন্ন সম্প্ৰদায়ৰ মাজত ভোটদানৰ পছন্দৰ এক স্পষ্ট বিভাজনৰ ইংগিত দিয়ে; য’ত বিজেপি নেতৃত্বাধীন চৰকাৰে অ-মুছলমান ভোটাৰসকলৰ মাজত নিজৰ স্থিতি সুদৃঢ় কৰি ৰাখিছে, আনহাতে কংগ্ৰেছ দলে মুছলমান উত্তৰদাতাসকলৰ সমৰ্থন লাভ কৰা দেখা গৈছে ।
লগতে পঢ়ক : উত্তৰ-পূবৰ বাবে চৰকাৰৰ বৃহৎ পৰিকল্পনা… ‘চিকেন নেক’ত চলিব ভূগৰ্ভস্থ ৰে’ল