প্ৰধানমন্ত্ৰী নৰেন্দ্ৰ মোদীয়ে আজি ৰাষ্ট্ৰীয় ৰাজধানীৰ হায়দৰাবাদ হাউচত ভেনিজুৱেলাৰ কাৰ্যবাহী ৰাষ্ট্ৰপতি ডেলচি ৰড্ৰিগেজক সাক্ষাৎ কৰে
ভাৰত আৰু দক্ষিণ আমেৰিকাৰ দেশ ভেনিজুৱেলাৰ মাজত দ্বিপাক্ষিক সহযোগিতা বৃদ্ধিৰ লক্ষ্যৰে এক গুৰুত্বপূৰ্ণ পদক্ষেপ গ্ৰহণ কৰা হৈছে । প্ৰধানমন্ত্ৰী নৰেন্দ্ৰ মোদীয়ে আজি ৰাষ্ট্ৰীয় ৰাজধানীৰ হায়দৰাবাদ হাউচত ভেনিজুৱেলাৰ কাৰ্যবাহী ৰাষ্ট্ৰপতি ডেলচি ৰড্ৰিগেজক সাক্ষাৎ কৰে । এই উচ্চস্তৰীয় বৈঠকত দুয়োগৰাকী নেতাই দুয়োখন দেশৰ মাজৰ সম্পৰ্কৰ সামগ্ৰিক দিশ পৰ্যালোচনা কৰাৰ লগতে কেইবাটাও গুৰুত্বপূৰ্ণ খণ্ডত সহযোগিতা বৃদ্ধিৰ বাবে বিশদ আলোচনাত মিলিত হয় ।
বৈদেশিক পৰিক্ৰমা মন্ত্ৰালয় (MEA)এ প্ৰকাশ কৰা অনুসায়ী, এই বৈঠকত বিশেষকৈ শক্তি সুৰক্ষা, বাণিজ্য আৰু বিনিয়োগ, ফাৰ্মাচিউটিকেল, স্বাস্থ্যসেৱা, পৰিবহন আৰু নৱীকৰণযোগ্য শক্তি খণ্ডৰ ওপৰত অধিক গুৰুত্ব আৰোপ কৰা হৈছে । এই আলোচনাই আগন্তুক দিনবোৰত দুয়োখন দেশৰ অংশীদাৰিত্বক এক নতুন গতি প্ৰদান কৰিব বুলি আশা কৰা হৈছে ।
বৈদেশিক পৰিক্ৰমা মন্ত্ৰীৰ সৈতে বৈঠক-
প্ৰধানমন্ত্ৰী মোদীক সাক্ষাৎ কৰাৰ পূৰ্বে ভেনিজুৱেলাৰ কাৰ্যবাহী ৰাষ্ট্ৰপতিগৰাকীয়ে ভাৰতৰ বৈদেশিক পৰিক্ৰমা মন্ত্ৰী এছ. জয়শংকৰৰ সৈতেও এক বৈঠকত মিলিত হয় । বৈঠকৰ অন্তত বৈদেশিক পৰিক্ৰমা মন্ত্ৰীগৰাকীয়ে চচিয়েল মিডিয়া প্লেটফৰ্ম X-ত (পূৰ্বৰ টুইটাৰ) এক পোষ্টৰ জৰিয়তে সন্তোষ প্ৰকাশ কৰে । তেওঁ উল্লেখ কৰে যে নতুন দিল্লীত কাৰ্যবাহী ৰাষ্ট্ৰপতি ডেলচি ৰড্ৰিগেজক সাক্ষাৎ কৰি তেওঁ অত্যন্ত আনন্দিত । ভাৰত-ভেনিজুৱেলা সম্পৰ্কৰ প্ৰতি ৰড্ৰিগোজৰ দীৰ্ঘদিনীয়া প্ৰতিশ্ৰুতিক তেওঁ গভীৰভাৱে শলাগ লয় । জয়শংকৰে লগতে কয় যে প্ৰধানমন্ত্ৰী মোদীৰ সৈতে হোৱা এই বৈঠকে দুয়োখন দেশৰ মাজৰ পাৰস্পৰিক সহযোগিতাক এক নতুন মাত্ৰা দিব ।
৫ দিনীয়া আনুষ্ঠানিক ভাৰত ভ্ৰমণ-
উল্লেখযোগ্য যে, দ্বিপাক্ষিক সম্পৰ্ক অধিক শক্তিশালী কৰাৰ উদ্দেশ্যে ভেনিজুৱেলাৰ কাৰ্যবাহী ৰাষ্ট্ৰপতি ডেলচি ৰড্ৰিগেজে যোৱা বুধবাৰে এক ৫ দিনীয়া কাৰ্যসূচীৰে নতুন দিল্লীত উপস্থিত হৈছিল । বৈদেশিক পৰিক্ৰমা মন্ত্ৰালয়ৰ জাননী অনুসায়ী, ৩ জুনৰ পৰা ৭ জুনলৈ তেওঁৰ এই আনুষ্ঠানিক ভ্ৰমণসূচী নিৰ্ধাৰণ কৰা হৈছে । নতুন দিল্লীত উপস্থিত হোৱাৰ পিছতে বৈদেশিক পৰিক্ৰমা মন্ত্ৰালয়ে তেওঁক উষ্ম আদৰণি জনায় আৰু কয় যে এই ভ্ৰমণে দুয়োখন দেশৰ বাবে দ্বিপাক্ষিক অংশীদাৰিত্বৰ গতিবেগ বৃদ্ধি কৰাৰ এক সোণালী সুযোগ আনিব ।
পূৰ্বৰ পৰিকল্পনা অনুসায়ী, ৰড্ৰিগোজে ১ জুনত অনুষ্ঠিত হ’বলগীয়া ‘আন্তঃৰাষ্ট্ৰীয় বিগ কেট এলায়েন্স’ সন্মিলনত অংশ লবলৈ ভাৰতলৈ অহাৰ কথা আছিল । কিন্তু কিছু অপৰিহাৰ্য কাৰণবশতঃ উক্ত সন্মিলন পিছুৱাই দিয়াৰ বাবে তেওঁ বৰ্তমান এই আনুষ্ঠানিক কৰ্মৰত ভ্ৰমণসূচী হাতত লৈছে ।
উচ্চস্তৰীয় প্ৰতিনিধি দলৰ অংশগ্ৰহণ-
ভেনিজুৱেলাৰ কাৰ্যবাহী ৰাষ্ট্ৰপতিগৰাকীৰ সৈতে এই ভ্ৰমণত দেশখনৰ এক উচ্চস্তৰীয় প্ৰতিনিধি দলো ভাৰতলৈ আহিছে । এই দলটোত ভেনিজুৱেলাৰ :
-বৈদেশিক পৰিক্ৰমা মন্ত্ৰী
-অৰ্থনীতি আৰু বিত্ত মন্ত্ৰী
-বিজ্ঞান আৰু প্ৰযুক্তি মন্ত্ৰী
-যোগাযোগ আৰু তথ্য মন্ত্ৰী, আৰু
-পৰিবহন মন্ত্ৰী অন্তৰ্ভুক্ত আছে
ভাৰত চৰকাৰৰ বৈদেশিক পৰিক্ৰমা মন্ত্ৰালয়ৰ মতে, এই উচ্চস্তৰীয় প্ৰতিনিধি দলটোৰ উপস্থিতিয়ে স্পষ্ট কৰে যে ভেনিজুৱেলাই ভাৰতৰ সৈতে অৰ্থনৈতিক, প্ৰযুক্তিগত আৰু কূটনৈতিক সম্পৰ্ক বৃদ্ধিৰ ক্ষেত্ৰত যথেষ্ট গুৰুত্ব আৰোপ কৰিছে । আগন্তুক দিনত দুই দেশৰ মাজত বাণিজ্যিক লেনদেন আৰু কৌশলগত সহযোগিতা আৰু অধিক মজবুত হ’ব বুলি ৰাজনৈতিক মহলত চৰ্চা হৈছে ।
লগতে পঢ়ক : ভাৰত-নেপাল সীমান্ত বিবাদ : ‘কোনো তৃতীয় পক্ষৰ হস্তক্ষেপ গ্ৰহণ কৰা নহ’ব’, নতুন দিল্লীৰ স্পষ্ট হুংকাৰ
