অষ্ট্ৰেলিয়াত উপস্থিত প্ৰধানমন্ত্ৰী মোদী । বাণিজ্য-প্ৰতিৰক্ষাক লৈ এন্থনী আলবানিজৰ সৈতে হ’ব গুৰুত্বপূৰ্ণ আলোচনা ।

ইন্দোনেছিয়াৰ সফল ভ্ৰমণ সমাপ্ত কৰি তিনিখন দেশ ভ্ৰমণৰ দ্বিতীয় পৰ্যায়ত বুধবাৰে অষ্ট্ৰেলিয়াত উপস্থিত হয় ভাৰতৰ প্ৰধানমন্ত্ৰী নৰেন্দ্ৰ মোদী । বিমানবন্দৰত প্ৰধানমন্ত্ৰীগৰাকীক আনুষ্ঠানিক তথা উষ্ম আদৰণি জনোৱা হয় । এই গুৰুত্বপূৰ্ণ তিনিদিনীয়া ভ্ৰমণকালত প্ৰধানমন্ত্ৰী মোদীয়ে অষ্ট্ৰেলিয়াৰ প্ৰধানমন্ত্ৰী এন্থনী আলবানিজৰ (Anthony Albanese) সৈতে এক গুৰুত্বপূৰ্ণ দ্বিপাক্ষিক আলোচনাত মিলিত হ’ব ।

ভাৰত-অষ্ট্ৰেলিয়া অংশীদাৰিত্বত নতুন গতি

প্ৰধানমন্ত্ৰী মোদীয়ে সামাজিক মাধ্যম ‘এক্স’-ত এটা পোষ্টৰ জৰিয়তে প্ৰকাশ কৰে যে এই ভ্ৰমণে ভাৰত-অষ্ট্ৰেলিয়াৰ ‘ব্যাপক কৌশলগত অংশীদাৰিত্ব’ক অধিক শক্তিশালী আৰু সজীৱ কৰি তুলিব ।

প্ৰধানমন্ত্ৰীগৰাকীয়ে লিখে—

“মই প্ৰধানমন্ত্ৰী আলবানিজৰ সৈতে হ’বলগীয়া আলোচনালৈ আগ্ৰহেৰে বাট চাই আছোঁ । ইয়াৰ উপৰিও মই ভাৰতীয় প্ৰব্ৰজনকাৰী সকলৰ সৈতেও বাৰ্তালাপ কৰাৰ সুযোগ পাম, যিসকল আমাৰ এই দ্বিপাক্ষিক অংশীদাৰিত্বৰ এক অন্যতম গুৰুত্বপূৰ্ণ স্তম্ভ ।”

কোন কোন ক্ষেত্ৰত হ’ব বিশেষ আলোচনা?

প্ৰধানমন্ত্ৰী মোদী আৰু তেওঁৰ অষ্ট্ৰেলিয়াৰ সমকক্ষ এন্থনী আলবানিজে দুয়োখন দেশৰ সম্পৰ্কক এক নতুন মাত্ৰা প্ৰদান কৰাৰ সম্ভাৱনা আছে । বিশেষকৈ কেইবাটাও বিষয়ৰ ওপৰত এই বৈঠকত বিশেষ গুৰুত্ব প্ৰদান কৰা হ’ব:

-প্ৰতিৰক্ষা আৰু নিৰাপত্তা

-বাণিজ্য আৰু বিনিয়োগ

-শিক্ষা আৰু গতিশীলতা

-উদীয়মান তথা গুৰুত্বপূৰ্ণ প্ৰযুক্তি

-ক্ৰীড়া আৰু ক্ৰীড়া বিজ্ঞান

মেলবৰ্ণত ব্যাপক উৎসাহ: ফিলিপ গ্ৰীনৰ বার্তা

ভাৰতত নিযুক্ত অষ্ট্ৰেলিয়াৰ হাই কমিছনাৰ ফিলিপ গ্ৰীনে মেলবৰ্ণৰ পৰা এটা ভিডিঅ’ বাৰ্তাৰ জৰিয়তে প্ৰধানমন্ত্ৰী মোদীৰ এই ভ্ৰমণক লৈ চহৰখনত সৃষ্টি হোৱা ব্যাপক উৎসাহৰ কথা সদৰী কৰে ।

গ্ৰীনে এক্স-ত লিখিছে, “নমস্তে প্ৰধানমন্ত্ৰী মোদী! মেলবৰ্ণ চহৰখন বৰ্তমান উখল-মাখল হৈ আছে আৰু আপোনাক উষ্ম আদৰণি জনাবলৈ সম্পূৰ্ণ সাজু । এই সপ্তাহটো অষ্ট্ৰেলিয়া-ভাৰত অংশীদাৰিত্বৰ বাবে বাৰ্তালাপ, সংযোগ আৰু প্ৰগতিৰ এক বৃহৎ সুযোগ ।”

হাই কমিছনাৰগৰাকীয়ে লগতে উল্লেখ কৰে যে প্ৰব্ৰজনকাৰীসকলৰ কাৰ্যসূচীৰ উপৰিও দুয়োখন দেশৰ মাজৰ বাণিজ্যিক সম্পৰ্ক অতি গুৰুত্বপূৰ্ণ । প্ৰথম পৰ্যায়ৰ মুক্ত বাণিজ্য চুক্তিয়ে ইতিমধ্যে বাণিজ্য খণ্ডক গতি প্ৰদান কৰিছে আৰু আগন্তুক দিনত ইয়াক আৰু অধিক শক্তিশালী কৰা হ’ব । সাংস্কৃতিক চহৰ মেলবৰ্ণই ভাৰতৰ সৈতে কলা আৰু সংস্কৃতিৰ ক্ষেত্ৰতো অংশীদাৰিত্ব বৃদ্ধি কৰিবলৈ আগ্ৰহী বুলি তেওঁ জানিবলৈ দিয়ে ।

লগতে পঢ়ক : ব্ৰাহ্মোছৰ পৰা IIM কেম্পাছলৈ… প্ৰধানমন্ত্ৰী মোদীৰ ভ্ৰমণকালত ভাৰত-ইণ্ডোনেছিয়াৰ ঐতিহাসিক চুক্তি

ইণ্ডোনেছিয়াত প্ৰধানমন্ত্ৰী মোদী । ৰাষ্ট্ৰপতি প্ৰাৱোৱোৰ অভূতপূৰ্ব আদৰণি । আকাশমাৰ্গত যুঁজাৰু বিমানৰ সুৰক্ষা বেষ্টনী ।

তিনিখন দেশৰ চৰকাৰী ভ্ৰমণসূচীৰ প্ৰথম পৰ্যায়ত সোমবাৰে ইণ্ডোনেছিয়াত উপস্থিত হয় ভাৰতৰ প্ৰধানমন্ত্ৰী নৰেন্দ্ৰ মোদী । জাকাৰ্টা বিমানবন্দৰত অৱতৰণ কৰাৰ পিছতে প্ৰধানমন্ত্ৰীগৰাকীক এক অভূতপূৰ্ব আৰু উষ্ম আদৰণি জনোৱা হয় । এক বিশেষ সন্মান প্ৰদৰ্শন স্বৰূপে, ইণ্ডোনেছিয়াৰ ৰাষ্ট্ৰপতি প্ৰাৱোৱো চুবিয়ান্টোৱে নিজেই বিমানবন্দৰত উপস্থিত থাকি প্ৰধানমন্ত্ৰী মোদীক আদৰণি জনায় ।

কেৱল ইমানেই নহয়, প্ৰধানমন্ত্ৰী মোদীৰ বিমানখনে ইণ্ডোনেছিয়াৰ আকাশমাৰ্গত প্ৰৱেশ কৰাৰ মুহূৰ্তৰে পৰা ইণ্ডোনেছিয়াৰ বায়ুসেনাৰ যুঁজাৰু বিমানে তেওঁৰ বিমানখনক বিশেষ সুৰক্ষা বেষ্টনীৰে সংগ দিয়ে ।

জাকাৰ্টাত সাংস্কৃতিক কাৰ্যসূচী উপভোগ প্ৰধানমন্ত্ৰীৰ

প্ৰধানমন্ত্ৰী নৰেন্দ্ৰ মোদী বৰ্তমান ইণ্ডোনেছিয়াত এক গুৰুত্বপূৰ্ণ তিনিদিনীয়া ভ্ৰমণসূচীত আছে । জাকাৰ্টাত উপস্থিত হোৱাৰ পিছতেই তেওঁৰ বাবে আয়োজন কৰা এক বিশেষ সাংস্কৃতিক কাৰ্যসূচী উপভোগ কৰে । এই ভ্ৰমণে দুয়োখন দেশৰ মাজত থকা শতিকাপ্ৰাচীন সাংস্কৃতিক সম্পৰ্কক পুনৰবাৰ প্ৰতিষ্ঠা কৰিব বুলি আশা কৰা হৈছে ।

ভাৰত-ইণ্ডোনেছিয়া ‘ব্যাপক কৌশলগত অংশীদাৰিত্ব’ৰ নতুন অধ্যায়

উল্লেখ্য যে, ২০১৮ চনত প্ৰধানমন্ত্ৰী মোদীৰ প্ৰথম ইণ্ডোনেছিয়া ভ্ৰমণৰ সময়ত ভাৰত আৰু ইণ্ডোনেছিয়াই তেওঁলোকৰ দ্বিপাক্ষিক সম্পৰ্কক এক ‘ব্যাপক কৌশলগত অংশীদাৰিত্ব’লৈ উন্নীত কৰিছিল । এই ঐতিহাসিক উন্নয়নৰ পিছত ইণ্ডোনেছিয়ালৈ এয়া প্ৰধানমন্ত্ৰী মোদীৰ প্ৰথমখন দ্বিপাক্ষিক ভ্ৰমণ । অলপতে ২০২৫ চনৰ ২৬ জানুৱাৰীত ভাৰতৰ গণৰাজ্য দিৱসৰ কাৰ্যসূচীত মুখ্য অতিথি হিচাপে উপস্থিত থকা ৰাষ্ট্ৰপতি প্ৰাৱোৱোৰ ভাৰত ভ্ৰমণৰ পিছতেই প্ৰধানমন্ত্ৰী মোদীৰ এই ইণ্ডোনেছিয়া যাত্ৰা যথেষ্ট তাৎপৰ্যপূৰ্ণ বিবেচিত হৈছে ।

ইণ্ডোনেছিয়ালৈ ৰাওনা হোৱাৰ পূৰ্বে প্ৰধানমন্ত্ৰীগৰাকীয়ে কয়- “ভাৰত আৰু ইণ্ডোনেছিয়াই দুই সহস্ৰাব্দযোৰা সুদৃঢ় সভ্যতাগত আৰু জনসাধাৰণৰ মাজত পাৰস্পৰিক সম্পৰ্ক শ্বেয়াৰ কৰে । এই ভ্ৰমণে দুয়োখন দেশৰ বহুমুখী অংশীদাৰিত্বৰ সকলো দিশক অধিক গভীৰ কৰিব । ভ্ৰমণকালত মই ইণ্ডোনেছিয়াত থকা প্ৰবাসী ভাৰতীয়সকলৰ সৈতে বাৰ্তালাপ কৰিম আৰু ৰাষ্ট্ৰপতি প্ৰাৱোৱোৰ সৈতে যোগিয়াকাৰ্টাৰ প্ৰম্বানন মন্দিৰ প্ৰাংগণো দৰ্শন কৰিম ।”

ইণ্ডোনেছিয়াৰ পিছত অষ্ট্ৰেলিয়া আৰু নিউজিলেণ্ড ভ্ৰমণ

১৯৯১ চনত ভাৰত চৰকাৰে ‘পূবলৈ চোৱা নীতি’ গ্ৰহণ কৰাৰ পিছৰে পৰা ৰাজনৈতিক, নিৰাপত্তা, প্ৰতিৰক্ষা, বাণিজ্যিক আৰু সাংস্কৃতিক ক্ষেত্ৰত ভাৰত-ইণ্ডোনেছিয়াৰ সম্পৰ্কৰ দ্ৰুত বিকাশ ঘটিছে । এই তিনিদিনীয়া ভ্ৰমণসূচী শেষ কৰি প্ৰধানমন্ত্ৰী মোদীয়ে ইণ্ডোনেছিয়াৰ পৰা অষ্ট্ৰেলিয়ালৈ ৰাওনা হ’ব আৰু তাৰ পিছত নিউজীলেণ্ডো ভ্ৰমণ কৰিব ।

লগতে পঢ়ক : ইণ্ডোনেছিয়াৰ পৰা নিজীলেণ্ডলৈ…৬দিনীয়া ভ্ৰমণসূচীৰে ৰাওনা প্ৰধানমন্ত্ৰী মোদী

চিচিলিৰ আন্তঃৰাষ্ট্ৰীয় বিমানবন্দৰত উপস্থিত হোৱাৰ লগে লগে প্ৰধানমন্ত্ৰীগৰাকীক উষ্ম আদৰণি জনোৱা হয়

তিনিদিনীয়া ভ্ৰমণসূচীৰে শনিবাৰে চিচিলিৰ ৰাজধানীত উপস্থিত হয় প্ৰধানমন্ত্ৰী নৰেন্দ্ৰ মোদী । ভাৰত মহাসাগৰীয় দেশখনৰ সৈতে দ্বিপাক্ষিক সম্পৰ্ক অধিক সুদৃঢ় কৰাৰ লক্ষ্যৰে তেওঁ এই ভ্ৰমণসূচী হাতত লৈছে ।

চিচিলিৰ আন্তঃৰাষ্ট্ৰীয় বিমানবন্দৰত উপস্থিত হোৱাৰ লগে লগে প্ৰধানমন্ত্ৰীগৰাকীক উষ্ম আদৰণি জনোৱা হয় । বিমানৰ পৰা নামিয়েই প্ৰধানমন্ত্ৰী মোদীয়ে এই ভ্ৰমণ অত্যন্ত ফলপ্ৰসূ হ’ব বুলি আশা প্ৰকাশ কৰে ।

ছ’চিয়েল মিডিয়া প্লেটফৰ্ম ‘এক্স’ত প্ৰধানমন্ত্ৰীয়ে বিমানবন্দৰত চিচিলিৰ ৰাষ্ট্ৰপতি ড০ পেট্ৰিক হাৰ্মিনিয়ে আগবঢ়োৱা উষ্ম আদৰণিৰ বাবে গভীৰ কৃতজ্ঞতা প্ৰকাশ কৰে । তেওঁ দেশখনক ভাৰতৰ এখন “মূল্যৱান সামুদ্ৰিক অংশীদাৰ” আৰু “ঘনিষ্ঠ বন্ধু” বুলি অভিহিত কৰে ।

প্ৰধানমন্ত্ৰীয়ে সামাজিক মাধ্যমত শ্বেয়াৰ কৰা নিজৰ পোষ্টত কয়, “বিমানবন্দৰত ড০ পেট্ৰিক হাৰ্মিনিয়ে আগবঢ়োৱা উষ্ম আদৰণিৰ বাবে মই গভীৰ কৃতজ্ঞ । চিচিলি ভাৰত মহাসাগৰত আমাৰ এখন মূল্যৱান সামুদ্ৰিক অংশীদাৰ আৰু ঘনিষ্ঠ বন্ধু । আমাৰ দীৰ্ঘদিনীয়া সম্পৰ্কক আৰু অধিক শক্তিশালী কৰিবলৈ আৰু আমাৰ দেশৰ জনসাধাৰণৰ স্বাৰ্থত সহযোগিতা বৃদ্ধিৰ বাবে এক ফলপ্ৰসূ ভ্ৰমণৰ অপেক্ষাত আছোঁ ।”

প্ৰধানমন্ত্ৰী মোদীয়ে বিমানবন্দৰৰ আদৰণি দৃশ্যসমূহ ‘এক্স’ত শ্বেয়াৰ কৰি তাত উপস্থিত থকা প্ৰবাসী ভাৰতীয়সকলৰ মৰমৰ বাবেও ধন্যবাদ জ্ঞাপন কৰে ।

উল্লেখ্য যে, প্ৰধানমন্ত্ৰী মোদীৰ এই চিচিলি ভ্ৰমণ ঐতিহাসিক বুলি গণ্য কৰা হৈছে । কাৰণ ১৯৭৬ চনত ব্ৰিটেইনৰ পৰা স্বাধীনতা লাভৰ ৫০ বছৰ পূৰ্ণ হোৱা উপলক্ষে আয়োজিত চিচিলিৰ ‘ৰাষ্ট্ৰীয় দিৱসৰ স্বৰ্ণ জয়ন্তী’ত প্ৰধানমন্ত্ৰী মোদীয়ে মুখ্য অতিথি হিচাপে অংশগ্ৰহণ কৰিব ।

চিচিলি যাত্ৰাৰ পূৰ্বে তেওঁ ‘এক্স’ত লিখিছিল, “এইবাৰৰ ভ্ৰমণ অধিক বিশেষ, কাৰণ এই বছৰ স্বৰ্ণ জয়ন্তী উদযাপন কৰা হৈছে ।”

তেওঁ লগতে কয় যে এই ভ্ৰমণৰ আঁৰত এক বৃহৎ কূটনৈতিক লক্ষ্য আছে । তেওঁ চিচিলিক “মূল্যৱান সামুদ্ৰিক চুবুৰীয়া” বুলি অভিহিত কৰি নতুন দিল্লীৰ ‘ভিজন মহাসাগৰআৰু ‘গ্ল’বেল ছাউথ’ৰ স্বাৰ্থত ভাৰতৰ প্ৰচেষ্টাত দেশখনৰ গুৰুত্বপূৰ্ণ ভূমিকাৰ ওপৰতো আলোকপাত কৰে ।

লগতে পঢ়ক : তিনিদিনীয়া ঐতিহাসিক ভ্ৰমণসূচীৰে ছেচেলছলৈ ৰাওনা প্ৰধানমন্ত্ৰী মোদী