প্ৰধানমন্ত্ৰীগৰাকীয়ে সেই ক’লা অধ্যায়ৰ বিৰুদ্ধে যুঁজ দিয়া আৰু গণতান্ত্ৰিক মূল্যবোধ ৰক্ষা কৰা দেশৰ সকলো নাগৰিকলৈ গভীৰ শ্ৰদ্ধাঞ্জলি জ্ঞাপন কৰে
প্ৰধানমন্ত্ৰী নৰেন্দ্ৰ মোদীয়ে বৃহস্পতিবাৰে ১৯৭৫ চনৰ ঐতিহাসিক জৰুৰীকালীন অৱস্থাক ভাৰতীয় সংবিধানৰ ওপৰত এক “প্ৰত্যক্ষ আক্ৰমণ” বুলি তীব্ৰ সমালোচনা কৰে । জৰুৰীকালীন অৱস্থা জাৰি কৰাৰ ৫১ সংখ্যক বাৰ্ষিকী উপলক্ষে সামাজিক মাধ্যম ‘এক্স’ত কৰা এটা পোষ্টত প্ৰধানমন্ত্ৰীগৰাকীয়ে সেই ক’লা অধ্যায়ৰ বিৰুদ্ধে যুঁজ দিয়া আৰু গণতান্ত্ৰিক মূল্যবোধ ৰক্ষা কৰা দেশৰ সকলো নাগৰিকলৈ গভীৰ শ্ৰদ্ধাঞ্জলি জ্ঞাপন কৰে ।
প্ৰধানমন্ত্ৰী মোদীয়ে জৰুৰীকালীন অৱস্থাৰ সময়ত নাগৰিক স্বাধীনতা কৰ্তন আৰু কঠোৰ ‘আভ্যন্তৰীণ নিৰাপত্তা ৰক্ষণাবেক্ষণ আইন’ বা মিছা (MISA)ৰ অধীনত ৰাজনৈতিক নেতাসকলক গ্ৰেপ্তাৰ কৰাৰ কথা স্মৰণ কৰে ।
সংবিধান আমাৰ গণতন্ত্ৰৰ ভেটি : প্ৰধানমন্ত্ৰী
‘এক্স’ত কৰা পোষ্টটোত প্ৰধানমন্ত্ৰী নৰেন্দ্ৰ মোদীয়ে লিখিছে :
“আজি আমি ভাৰতৰ ইতিহাসৰ অন্যতম ক’লা অধ্যায়, অৰ্থাৎ জৰুৰীকালীন অৱস্থাৰ সময়ত গণতান্ত্ৰিক মূল্যবোধক দৃঢ়তাৰে ৰক্ষা কৰা সকলোৰে প্ৰতি শ্ৰদ্ধাঞ্জলি জ্ঞাপন কৰিছোঁ । জৰুৰীকালীন অৱস্থা আমাৰ সংবিধানৰ ওপৰত এক প্ৰত্যক্ষ আক্ৰমণ আছিল । ইয়াৰ ফলত নাগৰিক স্বাধীনতা কৰ্তন, বাক-স্বাধীনতাৰ ওপৰত বাধা-নিষেধ, ৰাজনৈতিক নেতা, সাংবাদিক, সমাজকৰ্মীসকলক গ্ৰেপ্তাৰ কৰা হৈছিল আৰু আমাৰ গণতন্ত্ৰৰ ভেটিস্বৰূপ প্ৰতিষ্ঠানসমূহৰ ওপৰত আক্ৰমণ চলোৱা হৈছিল ।”
তেওঁ লগতে কয় যে এই কঠিন সময়ে দেশৰ অসংখ্য নাগৰিকৰ অসাধাৰণ সাহসো প্ৰদৰ্শন কৰিছিল, যিসকলে অন্যায়ৰ বিৰুদ্ধে মনে মনে থকিবলৈ অস্বীকাৰ কৰি সংবিধানৰ আদৰ্শসমূহ অক্ষুণ্ণ ৰাখিছিল । ১৪০ কোটি ভাৰতীয়ৰ আশা-আকাংক্ষা, অধিকাৰ আৰু কৰ্তব্যৰ প্ৰতীকস্বৰূপ সংবিধানৰ প্ৰতি থকা সংকল্প দোহাৰি মোদীয়ে ন্যায়, স্বাধীনতা, সমতা আৰু ভ্ৰাতৃত্ববোধেৰে এখন শক্তিশালী ভাৰত গঢ়াৰ প্ৰতিশ্ৰুতি দিয়ে ।
১৯৭৫ চনৰ জৰুৰীকালীন অৱস্থা-
১৯৭৫ চনৰ ২৫ জুনত তদানীন্তন ৰাষ্ট্ৰপতি ফখৰুদ্দিন আলী আহমেদে “আভ্যন্তৰীণ অশান্তি”ৰ দোহাই দি সংবিধানৰ ৩৫২ অনুচ্ছেদৰ অধীনত দেশত জৰুৰীকালীন অৱস্থা ঘোষণা কৰিছিল । ইয়াৰ পিছতে ১৯৭৫ চনৰ ২৫ জুনৰ পৰা ১৯৭৭ চনৰ ২১ মাৰ্চলৈ- প্ৰায় ২১ মাহ ভাৰত জৰুৰীকালীন অৱস্থাৰ কৱলত আছিল ।
তদানীন্তন প্ৰধানমন্ত্ৰী ইন্দিৰা গান্ধীক এই সময়ছোৱাত দেশৰ জনসাধাৰণৰ মৌলিক অধিকাৰ খৰ্ব কৰা আৰু মইমতালিৰে শাসন চলোৱাৰ বাবে তীব্ৰ সমালোচনা কৰা হয় । সেই সময়ত বিখ্যাত নেতা জয়প্ৰকাশ নাৰায়ণকে ধৰি দেশৰ বহু শীৰ্ষ বিৰোধী নেতাক কঠোৰ ‘মিছা’ (MISA) আইনৰ অধীনত কাৰাগাৰত বন্দী কৰা হৈছিল । উল্লেখ্য যে, জে পি নাৰায়ণে ১৯৭০-ৰ দশকত কংগ্ৰেছ চৰকাৰৰ বিৰুদ্ধে ঐতিহাসিক ‘সম্পূৰ্ণ ক্ৰান্তি বিহাৰ আন্দোলন’ৰ নেতৃত্ব দিছিল ।
শ্বাহ আয়োগৰ প্ৰতিবেদন আৰু ‘সংবিধান হত্যা দিৱস’
পৰৱৰ্তী সময়ত গঠন হোৱা শ্বাহ আয়োগৰ প্ৰতিবেদন অনুসৰি, জৰুৰীকালীন অৱস্থাৰ সময়ছোৱাত সমগ্ৰ দেশতে ব্যাপক হাৰত গণ গ্ৰেপ্তাৰ, সংবাদ মাধ্যমৰ ওপৰত কঠোৰ চেঞ্চৰশ্বিপ অভিযান চলোৱা হৈছিল ।
গণতন্ত্ৰৰ এই ক’লা অধ্যায়টোক স্মৰণ কৰি শাসনাধীষ্ঠ ভাৰতীয় জনতা পাৰ্টীয়ে যোৱা বছৰ জৰুৰীকালীন অৱস্থাৰ ৫০ সংখ্যক বাৰ্ষিকীৰ দিনটোক চৰকাৰীভাৱে “সংবিধান হত্যা দিৱস” হিচাপে পালন কৰিছিল ।
লগতে পঢ়ক : ভেনিজুৱেলাৰ ভয়াৱহ ভূমিকম্পত প্ৰধানমন্ত্ৰী মোদীৰ গভীৰ শোক প্ৰকাশ
