ভয়ংকৰ বনজুইৰ ফলত এক হাহাকাৰ পৰিস্থিতিৰ সৃষ্টি হৈছে

স্পেইনৰ দক্ষিণ প্ৰান্তৰ আন্দালুছিয়া অঞ্চলত এক ভয়ংকৰ বনজুইৰ ফলত এক হাহাকাৰ পৰিস্থিতিৰ সৃষ্টি হৈছে । চৰকাৰী সূত্ৰই প্ৰকাশ কৰা অনুসৰি, এই ভয়াৱহ অগ্নিকাণ্ডত বৰ্তমানলৈকে অতি কমেও ১১ জন লোকৰ কৰুণ মৃত্যু হৈছে । ইয়াৰ উপৰিও ১৯ জন লোক এতিয়াও সন্ধানহীন হৈ আছে আৰু প্ৰায় ৬০০ জন বাসিন্দাই নিজৰ ঘৰ-দুৱাৰ এৰি সুৰক্ষিত স্থানলৈ পলায়ন কৰিবলগীয়া হৈছে ।

বতাহৰ দিশ সলনি হোৱাৰ সম্ভাৱনাই উদ্ধাৰকাৰী দল আৰু স্থানীয় প্ৰশাসনৰ চিন্তা আৰু অধিক বৃদ্ধি কৰিছে । বৰ্তমান যুদ্ধকালীন তৎপৰতাৰে জুই নিৰ্বাপনৰ অভিযান অব্যাহত ৰখা হৈছে ।

আন ঠাইলৈ বিয়পিছে জুই-

আন্দালুছিয়াৰ আঞ্চলিক চৰকাৰে এক বিবৃতিত নিশ্চিত কৰিছে যে লছ গালাৰ্ডোছ পৌৰসভাত এই বনজুইৰ উৎপত্তি হৈছিল । প্ৰথমাৱস্থাত ১২ জন লোকৰ মৃত্যুৰ খবৰ ওলাইছিল যদিও পিছত চৰকাৰে ইয়াক সংশোধন কৰি ১১ জন বুলি স্পষ্ট কৰে । বৰ্তমান এই জুই আলমেৰিয়া প্ৰদেশৰ লছ গালাৰ্ডোছ, বেদায়াৰ আৰু আন্তাছ পৌৰসভালৈ ভয়ংকৰভাৱে বিয়পি পৰিছে । চৰকাৰী হিচাপ মতে, ইতিমেধ্যে প্ৰায় ৩,১৫০ হেক্টৰ বনভূমি এই জুইত ভস্মীভূত হৈছে ।

৬০০ লোক গৃহহীন: থিয়েটাৰ হ’লত ল’বলগীয়া হৈছে আশ্ৰয়

বনজুইৰ সংহাৰী ৰূপৰ বাবে প্ৰায় ৬০০ গৰাকী বাসিন্দা গৃহহীন হৈ পৰিছে । কেৱল যোৱা নিশাৰ ভিতৰতে প্ৰায় ১২০ জন লোকক সুৰক্ষিত স্থানলৈ স্থানান্তৰ কৰা হয় । আলমোচাইজাৰ, ফুয়েন্টে ডেল আলবাৰিকো, লছ পিনোছ, লা চেনেৰা আৰু বেদায়াৰৰ পিনাৰ অঞ্চলৰ লোকসকলক বৰ্তমান লুব্ৰিন থিয়েটাৰ আৰু গাৰুচা থিয়েটাৰত অস্থায়ীভাৱে আশ্ৰয় দিয়া হৈছে । দুয়োটা থিয়েটাৰতে ৭৪ জনকৈ লোকক থকাৰ ব্যৱস্থা কৰা হৈছে ।

চৰকাৰৰ জৰুৰীকালীন নিৰ্দেশনা-

আন্দালুছিয়াৰ জৰুৰীকালীন পৰিস্থিতি মন্ত্ৰী এণ্টনিঅ’ ছাঞ্জ কেবেলোই ছ’চিয়েল মিডিয়া প্লেটফৰ্ম ‘X’-ত এক পোষ্টযোগে ৰাইজক সজাগ হ’বলৈ আহ্বান জনাইছে । তেওঁ কয়:

“মই সকলোৰে দায়িত্ববোধৰ ওচৰত আহ্বান জনাব বিচাৰো । জৰুৰীকালীন পৰিস্থিতিত কৰ্তৃপক্ষৰ নিৰ্দেশনাসমূহ কেৱল পৰামৰ্শ বা অনুৰোধ নহয়, এইবোৰ আপোনালোকৰ জীৱন ৰক্ষাৰ বাবেহে প্ৰস্তুত কৰা হৈছে । গতিকে প্ৰশাসনে স্থানান্তৰৰ নিৰ্দেশ দিলে লগে লগে নিৰ্ধাৰিত সুৰক্ষিত পথেৰে নিজকে স্থানান্তৰ কৰক ।”

কেইবাজনো লোক গুৰুতৰভাৱে অগ্নিদগ্ধ

প্ৰশাসনে জনোৱা মতে, চাৰিজন লোক জুইৰ ফলত গুৰুতৰভাৱে অগ্নিদগ্ধ হোৱাৰ লগতে ধোঁৱাৰ বাবে উশাহ-নিশাহত কষ্ট পাইছে । তেওঁলোকক উন্নত চিকিৎসাৰ বাবে ছেভিলৰ বিখ্যাত ভাৰ্জেন ডেল ৰচিঅ’ চিকিৎসালয়লৈ স্থানান্তৰ কৰাৰ কথা বিবেচনা কৰা হৈছে । আনহাতে, সামান্যভাৱে আঘাতপ্ৰাপ্ত আন ৪ জন লোকক ঘটনাস্থলীতে প্ৰাথমিক চিকিৎসা প্ৰদান কৰা হয় ।

বৰ্তমান জুইৰ আগ্ৰাসন কিছু পৰিমাণে থমকি ৰৈছে যদিও বতাহৰ গতি সলনি হ’লে জুই পুনৰ ভয়াৱহ হৈ পৰাৰ আশংকাত সমগ্ৰ আলমেৰিয়া অঞ্চলত সতৰ্কতা বাহাল ৰখা হৈছে ।

লগতে পঢ়ক : অসহনীয় তাপপ্ৰৱাহৰ মাজতে বনজুইৰ তাণ্ডৱ, সহস্ৰাধিক লোকক স্থানান্তৰ