বনজুইৰ কবলত ৮৭০০ হেক্টৰতকৈও অধিক বনাঞ্চল । ভয়াৱহ জুয়ে এতিয়া আৱাসিক এলেকাসমূহলৈকো ভাবুকি কঢ়িয়াই আনিছে।
ইউৰোপত চলি থকা তীব্ৰ গৰম আৰু খৰাং পৰিস্থিতিৰ ভয়াৱহ প্ৰভাৱ এতিয়া ফ্ৰান্সত স্পষ্টকৈ দেখা গৈছে । প্ৰচণ্ড গৰমৰ মাজতে ভূতৰ ওপৰত দানহ পৰাদি দেশখনত আন এক বিপদে জুৰুলা কৰিছে । দেশখনৰ দক্ষিণ প্ৰান্তৰ বনাঞ্চলসমূহত লগা ভয়াৱহ জুয়ে এতিয়া আৱাসিক এলেকাসমূহলৈকো ভাবুকি কঢ়িয়াই আনিছে । তীব্ৰ বতাহ আৰু শুকান বতৰৰ বাবে এই জুই ক্ষিপ্ৰতাৰে বিয়পি পৰিছে, যাৰ ফলত হাজাৰ হাজাৰ লোকক সুৰক্ষিত স্থানলৈ স্থানান্তৰ কৰিবলগীয়া হৈছে ।
আন্তঃৰাষ্ট্ৰীয় সংবাদ মাধ্যমত প্ৰকাশিত বাতৰি অনুসৰি বৰ্তমানলৈকে দেশখনৰ ৮,৭০০ হেক্টৰতকৈও অধিক ভূমি বনজুইত জাহ গৈছে । ২০০০ তকৈও অধিক অগ্নিনিৰ্বাপক কৰ্মী, হেলিকপ্টাৰ আৰু বিশেষ বিমান উদ্ধাৰ অভিযানত নিয়োজিত হৈছে ।
ইফালে কেম্পচাইটৰ পৰা প্ৰায় ১,৫০০ লোকক সুৰক্ষিত স্থানলৈ লৈ যোৱা হৈছে । লগতে এই বনজুইৰ বাবে পাৰ্পিনিয়ঁ (Perpignan) বিমানবন্দৰ সাময়িকভাৱে বন্ধ ঘোষণা কৰিছে প্ৰশাসনে ।
স্পেইন সীমান্তত জুইৰ ভয়াৱহ প্ৰভাৱ-
দক্ষিণ ফ্ৰান্সৰ ভূমধ্যসাগৰীয় উপকূলীয় অঞ্চলত তীব্ৰ বতাহে বনজুইৰ তীব্ৰতা আৰু অধিক ভয়াৱহ কৰি তুলিছে । স্পেইনৰ সীমান্তৰ ওচৰত অৱস্থিত কানে-এন-ৰুচিয়ঁ অঞ্চলত এই দুৰ্যোগে আটাইতকৈ ভয়ংকৰ ৰূপ ধাৰণ কৰিছে । ইয়াত থকা এটা মেৰিনা আৰু কেইবাটাও বাণিজ্যিক গুডাম জুইৰ কবলত পৰিছে । পৰিস্থিতি ইমানেই নিয়ন্ত্ৰণৰ বাহিৰলৈ গৈছে যে স্থানীয় প্ৰশাসনে পাৰ্পিনিয়ঁ বিমানবন্দৰটো সাময়িকভাৱে বন্ধ কৰিবলৈ বাধ্য হৈছে ।
জুই নুমুৱাবলৈ ২০০০ অগ্নিনিৰ্বাপক কৰ্মী আৰু যুদ্ধকালীন প্ৰস্তুতি
পৰিস্থিতি নিয়ন্ত্ৰণ কৰিবলৈ ফ্ৰান্স চৰকাৰে সৰ্বশক্তি প্ৰয়োগ কৰিছে । প্ৰায় ২,০০০ অগ্নিনিৰ্বাপক বাহিনীৰ কৰ্মীয়ে দিনে-নিশাই কাম কৰি আছে । কেৱল কানে-এন-ৰুচিয়ঁ এলেকাতে ৪ খন হেলিকপ্টাৰ আৰু ৩ খন বিশেষ কানাডেয়াৰ অগ্নি নিৰ্বাপক বিমান নিয়োজিত কৰা হৈছে ।
ইফালে অড অঞ্চলত প্ৰতি ঘণ্টাত ৭০ কিলোমিটাৰ বেগত বলা বতাহে উদ্ধাৰকাৰ্যত আটাইতকৈ ডাঙৰ হেঙাৰ হৈ থিয় দিছে । অৱশ্যে, ফ্ৰান্সৰ দ্বিতীয় বৃহত্তম চহৰ মাৰ্চেইৰ উপকণ্ঠ অঞ্চলৰ জুই বৰ্তমান নিয়ন্ত্ৰণলৈ অনা হৈছে ।
ঔদ্যোগিক ক্ষেত্ৰলৈ জুইৰ ভাবুকি: উদ্বিগ্ন প্ৰধানমন্ত্ৰী
ফ্ৰান্সৰ প্ৰধানমন্ত্ৰী চেবেষ্টিয়ান লেকৰ্ণুৱে প্ৰকাশ কৰা অনুসৰি, এই বছৰ ৮,৭০০ হেক্টৰতকৈও অধিক ভূমি জুইত ধ্বংস হৈছে, যাৰ ভিতৰত ১২০০ হেক্টৰ এলেকা অতি কম সময়ৰ ভিতৰতে জ্বলি ছাৰখাৰ হৈ যায় । জুই এতিয়া এটা ডাঙৰ ঔদ্যোগিক অঞ্চলৰ ওচৰ চাপিছে, য’ত দাহ্য আৰু প্ৰদূষণকাৰী ৰাসায়নিক পদাৰ্থ মজুত আছে। ফলত প্ৰশাসনে সেই অঞ্চলটোত সৰ্বোচ্চ সতৰ্কতা জাৰি কৰিছে ।
তাপপ্ৰবাহৰ বাবে ১০০০ লোকৰ মৃত্যুৰ আশংকা
ফ্ৰান্সৰ বতৰ বিজ্ঞান সংস্থাৰ মতে, অহা সপ্তাহত দেশখনত পুনৰ আন এক ভয়াৱহ তাপপ্ৰবাহ অহাৰ পূৰ্ণ সম্ভাৱনা আছে । স্বাস্থ্য বিষয়াসকলে অনুমান কৰিছে যে জুন মাহৰ শেষৰফালে হোৱা অভিলেখ ভংগকাৰী গৰমৰ বাবে ফ্ৰান্সত ইতিমধ্যে প্ৰায় ১,০০০ অতিৰিক্ত লোকৰ মৃত্যু হৈছে । বতৰৰ এই চৰম ৰূপৰ মাজতে সাহায্য আৰু উদ্ধাৰ অভিযান বৰ্তমান তীব্ৰগতিত চলাই থকা হৈছে ।
লগতে পঢ়ক : ইতিহাসৰ আটাইতকৈ ভয়ংকৰ গৰম! ভাঙিব পাৰে পূৰ্বৰ সকলো অভিলেখ
