নিৰ্মীয়মাণ ৫৪০ মেগাৱাট ক্ষমতা সম্পন্ন কোৱাৰ জলবিদ্যুৎ প্ৰকল্পৰ সমীপত আজি এক বৃহৎ ভূমিস্খলন সংঘটিত হয়
জম্মু আৰু কাশ্মীৰত প্ৰবল বৃষ্টিপাতে সৃষ্টি কৰিছে এক ভয়ংকৰ পৰিস্থিতিৰ । ৰাজ্যখনৰ কিশ্তৱাৰ জিলাৰ নিৰ্মীয়মাণ ৫৪০ মেগাৱাট ক্ষমতা সম্পন্ন কোৱাৰ জলবিদ্যুৎ প্ৰকল্পৰ সমীপত আজি এক বৃহৎ ভূমিস্খলন সংঘটিত হয় । এই প্ৰাকৃতিক দুৰ্যোগৰ ফলত অঞ্চলটোত থকা কেইবাখনো বাহন ধ্বংসাৱশেষৰ তলত আৱদ্ধ হৈ পৰে আৰু ব্যাপক ক্ষতিসাধন হয় ।
বোকা-মাটিৰ তলত আৱদ্ধ বাহন: চলিছে উদ্ধাৰ অভিযান
জানিব পৰা মতে প্ৰবল বৃষ্টিপাতৰ বাবে অহা বোকা-মাটিৰ খহনীয়াৰ তলত বহু বাহন আৱদ্ধ হৈ পৰিছে । ইয়াৰে বহুখন বাহন গুৰুতৰভাৱে ক্ষতিগ্ৰস্ত হৈছে ।
ক্ষতিগ্ৰস্ত বাহনসমূহ উদ্ধাৰ কৰিবলৈ আৰু অঞ্চলটোলৈ যাতায়াত ব্যৱস্থা পুনৰ স্বাভাৱিক কৰি তুলিবলৈ উদ্ধাৰকাৰী দল আৰু গধুৰ যন্ত্ৰ-পাতি ততালিকে কামত লগোৱা হৈছে বুলি প্ৰশাসনে জানিবলৈ দিছে ।
ডোডো জিলাত আকস্মিক বান
কেৱল কিশ্তৱাৰেই নহয়, ইফালে ডোডো জিলাৰ কিছু অংশতো ফ্লেছ ফ্লাড অৰ্থাৎ আকস্মিক বানে তীব্ৰ ত্ৰাসৰ সৃষ্টি কৰিছে । হঠাতে অহা এই বানে অঞ্চলটোৰ স্বাভাৱিক জনজীৱন সম্পূৰ্ণৰূপে ব্যাহত কৰি তুলিছে আৰু কেইবাটাও স্থানত সম্পত্তিৰ বিস্তৰ ক্ষতিসাধন কৰিছে । অৱশ্যে, বৰ্তমানলৈকে কোনো লোকক্ষতি বা প্ৰাণহানিৰ খবৰ অহা নাই বুলি বাতৰিত প্ৰকাশ পাইছে ।
কোৱাৰ জলবিদ্যুৎ প্ৰকল্প সুৰক্ষিত: কেন্দ্ৰীয় মন্ত্ৰী ড০ জীতেন্দ্ৰ সিং
এই ঘটনা সন্দৰ্ভত কেন্দ্ৰীয় মন্ত্ৰী ড০ জীতেন্দ্ৰ সিঙে এক্স হেণ্ডেলত এটা পোষ্ট শ্বেয়াৰ কৰি পৰিস্থিতিৰ বিষয়ে অৱগত কৰে । তেওঁ কয় যে কিশ্তৱাৰৰ নিৰ্মীয়মাণ কোৱাৰ জলবিদ্যুৎ প্ৰকল্পৰ চৌহদত আকস্মিক বানৰ পানী সোমাই পৰাৰ খবৰ পোৱাৰ পিছতে তেওঁ ডিভিজনেল কমিছনাৰ ৰমেশ কুমাৰৰ সৈতে কথা পাতিছে ।
মন্ত্ৰীগৰাকীয়ে দেশবাসীক আশ্বস্ত কৰি পুনৰ কয়, “ভাগ্যবশতঃ কোনো জীৱন বা সম্পত্তিৰ ক্ষতি হোৱা নাই । প্ৰকল্পৰ সৈতে জড়িত কিছুমান গধুৰ যন্ত্ৰ-পাতিও কোনো ক্ষতি নোহোৱাকৈ নিৰাপদ স্থানলৈ আঁতৰাই নিয়া হৈছে ।” সামগ্ৰিকভাৱে, নিৰ্মীয়মাণ জলবিদ্যুৎ প্ৰকল্পটোৰ প্ৰতিটো অংশ বৰ্তমান সম্পূৰ্ণ সুৰক্ষিত অৱস্থাত আছে ।
লগতে পঢ়ক : বেয়া বতৰৰ বাবে ব্যাহত দিল্লী-মুম্বাইৰ বিমান সেৱা
