ভয়ংকৰ ভূমিস্খলন, কেইবাজনো লোকৰ মৃত্যুৰ আশংকা
ধাৰাষাৰ বৰষুণৰ ফলত হোৱা ভূমিস্খলনে ভয়ংকৰ পৰিস্থিতিৰ সৃষ্টি কৰিছে
নাগালেণ্ডত হোৱা প্ৰচণ্ড বৰষুণে ভয়ংকৰ পৰিস্থিতিৰ সৃষ্টি কৰিছে । দেওবাৰ, ৰাজ্যখনৰ মন (Mon) চহৰত ধাৰাষাৰ বৰষুণৰ বাবে সংঘটিত হোৱা এক ভয়ংকৰ ভূমিস্খলনত চাৰিগৰাকী মহিলাকে ধৰি অতি কমেও সাতজন লোকৰ মৃত্যু হোৱাৰ আশংকা কৰা হৈছে । এই দুৰ্ঘটনাত অসম ৰাইফলছ কেম্পৰ তলৰ অংশত ব্যাপক ক্ষতিসাধন হোৱা বুলি জানিব পৰা গৈছে ।
প্ৰাথমিক তথ্য অনুসৰি, উদ্ধাৰকাৰী দলে ক্ষতিগ্ৰস্ত লোকসকলৰ ওচৰলৈ যাবলৈ প্ৰচেষ্টা অব্যাহত ৰাখিছে । তাৰ মাজতে বহু লোক এতিয়াও ধ্বংসাৱশেষৰ তলত আৱদ্ধ হৈ থকা বুলি সন্দেহ কৰা হৈছে ।
ভূমিস্খলনৰ ফলত পকী ঘৰকে ধৰি ১০ টাতকৈও অধিক ঘৰ মাটিৰ তলত পোত গৈছে বুলি জানিব পৰা গৈছে । অঞ্চলটোত ধাৰাবাহিকভাৱে হৈ থকা ধাৰাসাৰ বৰষুণৰ মাজতে এই ঘটনা সংঘটিত হৈছে । ধাৰাষাৰ বৰষুণৰ বাবে ভূমিস্খলনৰ আশংকা আৰু অধিক বৃদ্ধি পাইছে । ঠাইডোখৰৰ অস্থিৰ ভূখণ্ড, নতুনকৈ হোৱা ভূমিস্খলন আৰু পানীৰ তীব্ৰ সোঁতৰ বাবে উদ্ধাৰ অভিযানত বাধাৰ সৃষ্টি হৈছে, যাৰ ফলত জৰুৰীকালীন কৰ্মী আৰু সঁজুলিসমূহ প্ৰভাৱিত স্থানলৈ লৈ যোৱাত পলম হৈছে ।
জীৱিতসকলৰ সন্ধান উলিয়াবলৈ আৰু ক্ষয়-ক্ষতিৰ পৰিমাণ জুখিবলৈ স্থানীয় প্ৰশাসন তথা উদ্ধাৰকাৰী সংস্থাসমূহে প্ৰত্যাহ্বানজনক পৰিস্থিতিৰ মাজত কাম কৰি আছে । অৱশ্যে, এতিয়ালৈকে নিশ্চিতভাৱে মৃতকৰ সংখ্যা প্ৰকাশ কৰা নাই অথবা এতিয়াও কিমান লোক সন্ধানহীন হৈ আছে সেই সন্দৰ্ভত কোনো তথ্য যোগান ধৰা নাই প্ৰশাসনে ।
লগতে পঢ়ক : অৰুণাচলত পুনৰ ডাৱৰ বিস্ফোৰণৰ তাণ্ডৱ; উটুৱাই নিলে পথ-দলং