অজিত পাৱাৰৰ মৃত্যুত প্ৰধানমন্ত্ৰী মোদী, ৰাষ্ট্ৰপতিৰ শোক প্ৰকাশ । মহাৰাষ্ট্ৰৰ পৰা দিল্লীলৈ শোকৰ লহৰ ।

মহাৰাষ্ট্ৰৰ বাৰামাটিত সংঘটিত হোৱা এক কৰুণ বিমান দুৰ্ঘটনাত মৃত্যু হৈছে ৰাজ্যখনৰ উপ-মুখ্যমন্ত্ৰী তথা এন চি পি নেতা অজিত পাৱাৰৰ । তেওঁৰ চাৰ্টাৰ্ড বিমানখন বাৰামাটিত অৱতৰণ কৰাৰ সময়তে সংঘটিত হয় এই দুৰ্ঘটনা । অসামৰিক বিমান পৰিবহণ সঞ্চালকালয়ে নিশ্চিত কৰিছে যে বিমানখনত থকা পাঁচজন লোকেই নিহত হৈছে । কোনো ব্যক্তিক জীৱিত অৱস্থাত উদ্ধাৰ কৰা হোৱা নাই । দুৰ্ঘটনাটোৰ পিছতে প্ৰধানমন্ত্ৰী নৰেন্দ্ৰ মোদীয়ে মহাৰাষ্ট্ৰৰ মুখ্যমন্ত্ৰী দেৱেন্দ্ৰ ফাড়নৱীছক ফোন কৰি পৰিস্থিতি সন্দৰ্ভত বুজ লয় ।

দুৰ্ঘটনাটোৰ খবৰ পোৱাৰ লগে লগে প্ৰধানমন্ত্ৰী নৰেন্দ্ৰ মোদীয়ে মহাৰাষ্ট্ৰৰ মুখ্যমন্ত্ৰী দেৱেন্দ্ৰ ফাড়নবিছক ফোন কৰি সমগ্ৰ ঘটনাৰ বুজ লয় । মহাৰাষ্ট্ৰ চৰকাৰে উল্লেখ কৰে যে প্ৰধানমন্ত্ৰী মোদী আৰু কেন্দ্ৰীয় গৃহমন্ত্ৰী অমিত শ্বাহে মুখ্যমন্ত্ৰীৰ সৈতে যোগাযোগ কৰি এই শোকাৱহ ঘটনাক লৈ শোক প্ৰকাশ কৰে । প্ৰধানমন্ত্ৰী মোদীয়ে সামাজিক মাধ্যমৰ এটা পোষ্টত অজিত পাৱাৰৰ মৃত্যুত গভীৰ শোক প্ৰকাশ কৰে ।

প্ৰধানমন্ত্ৰী মোদীয়ে কয় যে অজিত পাৱাৰ এজন গণনেতা আৰু জনসাধাৰণৰ সৈতে তেওঁৰ গভীৰ সম্পৰ্ক আছিল । মহাৰাষ্ট্ৰৰ জনসাধাৰণৰ সেৱাত সদায় আগৰণুৱা এজন কঠোৰ পৰিশ্ৰমী নেতা হিচাপে পৰিচিত আছিল তেওঁ । প্ৰশাসনিক বিষয়ত তেওঁৰ বুজাবুজি আৰু দৰিদ্ৰ আৰু সমস্যাত আক্ৰান্তৰজনৰ সবলীকৰণৰ প্ৰতি তেওঁৰ আবেগ প্ৰশংসনীয় আছিল । তেওঁৰ অকাল মৃত্যু গভীৰভাৱে দুখজনক । তেখেতৰ পৰিয়াল আৰু অগণন সমৰ্থকলৈ মোৰ সমবেদনা জ্ঞাপন কৰিলোঁ ।

ইফালে এই ঘটনাৰ পিছতে শৰদ পাৱাৰৰ পৰিয়ালো শোকত ভাগি পৰিছে । খবৰ অনুসৰি দিল্লীৰ পৰা বাৰামাটি অভিমুখে ৰাওনা হৈছে সুপ্ৰিয়া চুলে, অজিত পাৱাৰৰ পত্নী সুনেত্ৰা পাৱাৰ আৰু তেওঁলোকৰ পুত্ৰ পাৰ্থ পাৱাৰ । তিনিওজনেই একেলগে শাৰদ পাৱাৰৰ বাসগৃহত উপস্থিত আছিল ।

অজিত পাৱাৰৰ মৃত্যুত শোক প্ৰকাশ ৰাষ্ট্ৰপতিৰ-

উপ-মুখ্যমন্ত্ৰী অজিত পাৱাৰৰ মৃত্যুত শোক প্ৰকাশ কৰিছে ৰাষ্ট্ৰপতি দ্ৰৌপদী মুৰ্মুৱে । এটা পোষ্টত ৰাষ্ট্ৰপতিগৰাকীয়ে কয় যে, “মহাৰাষ্ট্ৰৰ বাৰামাটিত বিমান দুৰ্ঘটনাত মহাৰাষ্ট্ৰৰ উপ-মুখ্যমন্ত্ৰী অজিত পাৱাৰৰ লগতে আন কেইবাজনো লোকৰ মৃত্যুৰ খবৰ গভীৰভাৱে দুখজনক । অজিত পাৱাৰৰ অকাল মৃত্যু এক অপূৰণীয় ক্ষতি । মহাৰাষ্ট্ৰৰ উন্নয়নত বিশেষকৈ সমবায় খণ্ডত তেওঁৰ উল্লেখযোগ্য অৱদানৰ বাবে তেওঁক সদায় স্মৰণ কৰা হ’ব । তেওঁৰ পৰিয়াল, সমৰ্থক আৰু প্ৰশংসকসকললৈ সমবেদনা জ্ঞাপন কৰিছোঁ । ঈশ্বৰে দুৰ্ঘটনাত মৃত্যু হোৱা সকলোৰে পৰিয়ালক এই ক্ষতি সহ্য কৰিবলৈ শক্তি প্ৰদান কৰক ।”

এই ঘটনাক লৈ সমগ্ৰ ৰাজনৈতিক মহলৰ পৰা শোকবাৰ্তা প্ৰকাশ পাইছে । শিৱসেনাৰ সাংসদ অৰবিন্দ সাৱন্তে কয়, “বৰামাটিৰ উন্নয়নত অজিত পাৱাৰে মুখ্য ভূমিকা পালন কৰিছিল । সমগ্ৰ পাৱাৰ পৰিয়াললৈ মোৰ সমবেদনা জ্ঞাপন কৰিছো ।” কংগ্ৰেছ নেতা ডি কে শিৱকুমাৰেও তেওঁৰ মৃত্যুক মহাৰাষ্ট্ৰৰ ৰাজনীতিৰ বাবে ডাঙৰ ক্ষতি বুলি অভিহিত কৰে ।

লগতে পঢ়ক : বাৰামাটিত বিমান দুৰ্ঘটনা; প্ৰাণ হেৰুৱালে মহাৰাষ্ট্ৰৰ উপ-মুখ্যমন্ত্ৰী অজিত পাৱাৰে

ভাৰতীয় জনতা পাৰ্টীৰ নৱ নিৰ্বাচিত অধ্যক্ষ নীতিন নৱীনক অভনন্দন জনাই প্ৰধানমন্ত্ৰী মোদীয়ে কয় যে, তেওঁ মোৰ বছ আৰু মই কাৰ্যকৰ্তা । তেওঁ স্পষ্টকৈ উল্লেখ কৰে যে দলত পদ নহয়, কাৰ্যকৰ্তা মনোভাৱ সকলোতকৈ ওপৰত ।

অপেক্ষাৰ অন্ত পেলাই মঙলবাৰে ভাৰতীয় জনতা পাৰ্টীয়ে লাভ কৰিলে নতুন ৰাষ্ট্ৰীয় অধ্যক্ষ । মঙলবাৰে দলটোৰ নতুন ৰাষ্ট্ৰীয় সভাপতিৰূপে দায়িত্ব গ্ৰহণ কৰিলে নীতিন নৱীনে । প্ৰধানমন্ত্ৰী নৰেন্দ্ৰ মোদীৰ উপস্থিতিত দলৰ সভাপতিৰ দায়িত্ব গ্ৰহণ কৰে নৱীনে । এই অনুষ্ঠানত বিজেপিৰ মুখ্য কাৰ্যালয়ত প্ৰধানমন্ত্ৰী নৰেন্দ্ৰ মোদীয়ে অতি আৱেগিক আৰু ৰাজনৈতিকভাৱে তাৎপৰ্যপূৰ্ণ ভাষণ প্ৰদান কৰে । প্ৰধানমন্ত্ৰী মোদীয়ে নীতিন নৱীনক বিজেপিৰ দ্বাদশ ৰাষ্ট্ৰীয় সভাপতি নিৰ্বাচিত হোৱাৰ বাবে অভিনন্দন জনাই স্পষ্টকৈ উল্লেখ কৰে যে দলত পদ নহয়, কাৰ্যকৰ্তা মনোভাৱ সকলোতকৈ ওপৰত ।

প্ৰধানমন্ত্ৰীগৰাকীয়ে লগতে কয় যে নীতিন নৱীনে এতিয়া কেৱল বিজেপিৰেই নহয় সমগ্ৰ এন ডি এৰ সমন্বয়ৰ দায়িত্ব ল’ব । দীঘলীয়া ভাষণত প্ৰধানমন্ত্ৰীগৰায়ে সংগঠনটোৰ পৰম্পৰা, সুশাসনৰ আৰ্হি, মহিলা আৰু দৰিদ্ৰ, উত্তৰ-পূৰ্বাঞ্চলৰ বাবে আঁচনি, আৰু আগন্তুক ২৫ বছৰৰ দৃষ্টিভংগীৰ বিষয়ে বিশদভাৱে উল্লেখ কৰে । প্ৰধানমন্ত্ৰী মোদীয়ে কয়, “নীতিন নৱীন মোৰ বছ আৰু মই এজন কাৰ্যকৰ্তা ।”

নীতিন নৱীনক অভিনন্দন জনাই ভাষণৰ আৰম্ভণি কৰে প্ৰধানমন্ত্ৰী মোদীয়ে । তেওঁ কয় যে বিশ্বৰ সৰ্ববৃহৎ ৰাজনৈতিক দলৰ সভাপতি নিৰ্বাচিত হোৱাৰ বাবে নীতিন নৱীনক আন্তৰিক অভিনন্দন । সংগঠনটো পৰ্বৰ পৰা আৰম্ভ কৰি ৰাষ্ট্ৰপতি নিৰ্বাচনলৈকে সমগ্ৰ প্ৰক্ৰিয়াটো এশ শতাংশ গণতান্ত্ৰিক  বুলিও কয় তেওঁ ।

প্ৰধানমন্ত্ৰী মোদীয়ে স্পষ্ট কৰি দিয়ে যে নীতিন নৱীনৰ ভূমিকা কেৱল দলৰ সভাপতিৰ ভূমিকাতে সীমাবদ্ধ নাথাকিব । তেওঁ কয় যে এতিয়া নীতিন নৱীন আমাৰ সকলোৰে সভাপতি আৰু তেওঁৰ দায়িত্ব এন ডি এৰ সকলো অংশীদাৰৰ সৈতে সমন্বয় স্থাপন কৰাও ।

লগতে পঢ়ক : বিজেপিৰ নতুন ৰাষ্ট্ৰীয় সভাপতিৰ দায়িত্ব ল’লে নীতিন নৱীনে…