ৰাষ্ট্ৰীয় ভোটাৰ দিৱসত প্ৰধানমন্ত্ৰী মোদীয়ে নতুনকৈ ভোটাধিকাৰ লাভ কৰা যুৱ বন্ধুসকলক এক বিশেষ বাৰ্তা প্ৰেৰণ কৰে । ভোটাৰ হোৱাটো এক বৃহৎ দায়িত্ব বুলি উল্লেখ কৰে তেওঁ ।
প্ৰধানমন্ত্ৰী নৰেন্দ্ৰ মোদীয়ে দেশবাসীক ৰাষ্ট্ৰীয় ভোটাৰ দিৱসত অভিনন্দন জ্ঞাপন কৰে । ভোটাৰ হোৱাটো উদযাপনৰ এক গৌৰৱময় সুযোগ বুলিও তেওঁ কয় । তেওঁ “মাই ইণ্ডিয়া”ৰ স্বেচ্ছাসেৱকসকললৈ এখন পত্ৰ লিখি প্ৰথমবাৰৰ বাবে ভোটাৰ হোৱা সকলক আনন্দ উদযাপন কৰিবলৈ আহ্বান জনায় ।
এই সন্দৰ্ভত তেওঁ ছ’চিয়েল মিডিয়া প্লেটফৰ্ম এক্সত এখন চিঠি শ্বেয়াৰ কৰে । তেওঁ লিখিছে, “প্ৰিয় দেশবাসী, ৰাষ্ট্ৰীয় ভোটাৰ দিৱসত আপোনালোক, আপোনালোকৰ পৰিয়াল, বন্ধু-বান্ধৱীলৈ মোৰ আন্তৰিক শুভেচ্ছা । এই দেশৰ নাগৰিক হিচাপে আপোনালোকৰ লগত যোগদান কৰি মই আনন্দিত হৈছো । আপোনালোক সকলোৰে দৰে ভাৰতীয় গণতন্ত্ৰক লৈ মই অসীম গৌৰৱ অনুভৱ কৰিছো ।”
ভাৰত গণতন্ত্ৰৰ মাতৃঃ প্ৰধানমন্ত্ৰী
ভাৰতক বিশ্বৰ সৰ্ববৃহৎ গণতন্ত্ৰ বুলি কোৱা হয় আৰু সেয়া সঠিক । আমিও গৌৰৱান্বিত যে ভাৰত গণতন্ত্ৰৰ মাতৃ, যাৰ গণতান্ত্ৰিক মূল্যবোধৰ শতিকা পুৰণি ইতিহাস আছে । গণতন্ত্ৰ, বিতৰ্ক, আলোচনা আমাৰ সংস্কৃতিত গভীৰভাৱে শিপাই আছে । ১৯৫১ চনৰ পৰা দেশত সাধাৰণ নিৰ্বাচন আৰম্ভ হৈছিল, অৰ্থাৎ আমি এই বছৰ ৭৫ বছৰীয়া জয়ন্তী উদযাপন কৰিছো । ১৯৫২ চনত অনুষ্ঠিত এই নিৰ্বাচনে ভাৰতীয়ৰ স্বভাৱত যে গণতান্ত্ৰিক মনোভাৱ শিপাই আছে সেই কথা বিশ্ববাসীৰ আগত প্ৰমাণ কৰিলে ।
ভোটাৰ হোৱাটো এক বৃহৎ দায়িত্ব-
প্ৰধানমন্ত্ৰী মোদীয়ে কয় যে, গণতন্ত্ৰত ভোটাৰ হোৱাটো এক বৃহৎ দায়িত্ব । ভোটদান এক সাংবিধানিক অধিকাৰ যি ভাৰতৰ ভৱিষ্যতৰ প্ৰতি নাগৰিকৰ অংশগ্ৰহণৰ প্ৰতীক । ভোটাৰ ৰাষ্ট্ৰৰ ভাগ্য নিৰ্মাতা । ভোটদানৰ সময়ত আঙুলিত প্ৰয়োগ কৰা অমিত চিয়াঁহীয়ে প্ৰমাণ কৰে যে আমাৰ গণতন্ত্ৰ সজীৱ আৰু এক গভীৰ উদ্দেশ্য সাধন কৰে ।
তেওঁ আৰু কয়, “আপোনাৰ বন্ধু বা আত্মীয়ৰ মাজত হয়তো বহু যুৱক-যুৱতী প্ৰথমবাৰৰ বাবে ভোটাধিকাৰ লাভ কৰিছে । এয়া তেওঁলোকৰ জীৱনৰ এক গুৰুত্বপূৰ্ণ মুহূৰ্ত । প্ৰথমবাৰৰ বাবে ভোটাধিকাৰ লাভ কৰাসকলক গণতন্ত্ৰলৈ আদৰণি জনোৱা উচিত, কিয়নো তেওঁলোকৰ দেশৰ ভাগ্য সলনি কৰাৰ সম্ভাৱনা আছে ।”
ৰাইজলৈ আবেদন-
প্ৰধানমন্ত্ৰী মোদীয়ে কয়- আজি আপোনালোক সকলোকে এক বিশেষ আহ্বান জনাব বিচাৰিছো । যেতিয়া আপুনি বা আপোনাৰ ওচৰ-চুবুৰীয়া কোনো প্ৰথমবাৰৰ বাবে ভোটাৰ হয় তেতিয়া অনুগ্ৰহ কৰি উদযাপন কৰক । ঘৰতে বা চুবুৰী বা এপাৰ্টমেণ্টত মিঠাই বিতৰণ কৰি উদযাপন কৰিব পাৰে । গণতান্ত্ৰিক মূল্যবোধক শক্তিশালী কৰাৰ ক্ষেত্ৰত আমাৰ বিদ্যালয়-মহাবিদ্যালয়সমূহে নাৰ্চাৰী হিচাপে গুৰুত্বপূৰ্ণ ভূমিকা পালন কৰে । মই তেওঁলোকক আহ্বান জনাইছো যে তেওঁলোকৰ ছাত্ৰ-ছাত্ৰীসকলে প্ৰথমবাৰৰ বাবে ভোটাধিকাৰ লাভ কৰাটো উদযাপন কৰক । ইয়াৰ বাবে নতুন ভোটাৰক সন্মান জনোৱা অনুষ্ঠানৰ আয়োজন কৰিব পাৰি । ইয়াৰ দ্বাৰা তেওঁলোকে নিজৰ নতুন দায়িত্বৰ গুৰুত্ব উপলব্ধি কৰিব পাৰিব ।
তেওঁ কয় যে, আমাৰ বিদ্যালয় আৰু মহাবিদ্যালয়ৰ চৌহদসমূহো প্ৰচাৰৰ কেন্দ্ৰ হ’ব পাৰে যাতে প্ৰতিজন যোগ্য যুৱক-যুৱতীক ভোটাৰ হিচাপে পঞ্জীয়ন কৰা হয় । প্ৰতিবছৰৰ ২৫ জানুৱাৰী ৰাষ্ট্ৰীয় ভোটাৰ দিৱস এই কাৰ্যসূচীৰ বাবে এক সুযোগ্য অনুষ্ঠান ।
লগতে পঢ়ক : গণৰাজ্য দিৱসত প্ৰদৰ্শিত হ’ব ভাৰতৰ শক্তি ! ফ্লাইপাষ্টত গৰজিব ৰাফেল আৰু চুখই-৩০
