বিজেপিত আৰম্ভ নৱীন যুগ । মঙলবাৰে ভাৰতীয় জনতা পাৰ্টীৰ নতুন ৰাষ্ট্ৰীয় সভাপতিৰ দায়িত্ব ল’লে নীতিন নৱীনে ।
অৱশেষত অপেক্ষাৰ অন্ত পৰিল । বিজেপিত আৰম্ভ হ’ল নৱীন যুগ । মঙলবাৰে ভাৰতীয় জনতা পাৰ্টিয়ে লাভ কৰিলে নতুন সভাপতি । পাঁচবাৰৰ বিধায়ক নীতিন নৱীনক দলৰ নতুন মুৰব্বী হিচাপে আনুষ্ঠানিকভাৱে ঘোষণা কৰা হয় । ইয়াৰ পূৰ্বে সোমবাৰে বিজেপিৰ ৰাষ্ট্ৰীয় সভাপতি হিচাপে বিনা প্ৰতিদ্বন্দ্বিতাৰে নিৰ্বাচিত হোৱাৰ পিছত তেওঁ এই পদত অধিষ্ঠিত হোৱা দলৰ আটাইতকৈ কম বয়সীয়া নেতা হিচাপে পৰিগণিত হয় । প্ৰধানমন্ত্ৰী নৰেন্দ্ৰ মোদীয়ে নবীনক দলৰ সভাপতি নিৰ্বাচিত হোৱোৰ পিছতে তেওঁক অভিনন্দন জনায় ।
২০২০ চনৰ পৰা দলটোৰ সভাপতিৰ পদত অধিষ্ঠিত হৈ থকা জে পি নাড্ডাৰ ঠাইত তেওঁ বিহাৰৰ শক্তিশালী ৰাজনৈতিক পটভূমিৰ পাঁচবাৰৰ বিধায়ক নীতিন নবীন আছিল দলটোৰ শীৰ্ষ পদৰ একমাত্ৰ প্ৰাৰ্থী । তেওঁৰ সমৰ্থনত প্ৰধানমন্ত্ৰী নৰেন্দ্ৰ মোদীৰ লগতে বিজেপিৰ আন জ্যেষ্ঠ নেতাসকলে মনোনয়ন পত্ৰ দাখিল কৰে । তেওঁ বিজেপিৰ দ্বাদশ ৰাষ্ট্ৰীয় সভাপতি হিচাপে পৰিগণিত হৈছে ।
বিজেপিৰ নতুন সভাপতি হিচাপে কাৰ্যভাৰ গ্ৰহণ কৰাৰ পাছতে নীতিন নৱীনক অভিনন্দন জনাই প্ৰধানমন্ত্ৰী মোদীয়ে কয়, “বিশ্বৰ সৰ্ববৃহৎ দলটোৰ ৰাষ্ট্ৰীয় সভাপতি নিৰ্বাচিত হোৱাৰ বাবে নীতিন নৱীনলৈ আন্তৰিক অভিনন্দন আৰু শুভেচ্ছা জ্ঞাপন কৰিছো । বিগত কেইবামাহ ধৰি দলটোৰ আটাইতকৈ সৰু ইউনিটৰ পৰা ৰাষ্ট্ৰীয় সভাপতিলৈকে সাংগঠনিক প্ৰক্ৰিয়াটো গণতান্ত্ৰিক পদ্ধতিৰে, বিজেপিৰ সংবিধানৰ মনোভাৱৰ লগত খাপ খুৱাই চলি আহিছে । আজি আনুষ্ঠানিকভাৱে এই প্ৰকেৰিয়াৰ সমাপ্ত হয় ।”
ইফালে দলৰ বিদায়ী ৰাষ্ট্ৰীয় সভাপতি তথা কেন্দ্ৰীয় মন্ত্ৰী জে পি নাড্ডাই নৱীনক নতুন দায়িত্বৰ বাবে অভিনন্দন জনাই কয় যে, “আমাৰ যুৱ, শক্তিশালী আৰু প্ৰতিভাশালী ৰাষ্ট্ৰীয় সভাপতি নীতিন নৱীনে বিশ্বৰ সৰ্ববৃহৎ দল বিজেপিৰ ৰাষ্ট্ৰীয় সভাপতিৰ দায়িত্ব গ্ৰহণ কৰিছে । মোৰ নিজৰ হৈ আৰু লাখ লাখ দলীয় কৰ্মীৰ হৈ মই তেওঁক আন্তৰিক অভিনন্দন জ্ঞাপন কৰিছো । এই মহান দলৰ দ্বাদশ ৰাষ্ট্ৰীয় সভাপতি হিচাপে দায়িত্ব গ্ৰহণ কৰাৰ বাবে আপোনাক বহুত অভিনন্দন আৰু শুভেচ্ছা জনাইছো ।”
লগতে পঢ়ক : ‘অসমীয়াই কোনো অচিনাকী লোকৰ ওচৰত আত্মসমৰ্পন নকৰে’; মুখ্যমন্ত্ৰী
