অৱশেষত নিয়তিৰ ওচৰত হাৰ মানিলে নলবাৰী কাণ্ডৰ ভুক্তভোগী মৃদুমুদ্ৰাই
গুৱাহাটী চিকিৎসা মহাবিদ্যালয় আৰু হাস্পতালত নলবাৰী কাণ্ডৰ ভুক্তভোগী মৃদুমুদ্ৰা ডেকাই শেষ নিশ্বাস ত্যাগ কৰে
নলবাৰী জিলাত সংঘটিত এক জঘন্য আক্ৰমণৰ ঘটনাই সমগ্ৰ ৰাজ্যখনক জোকাৰি যোৱাৰ এমাহতকৈও অধিক সময়ৰ পিছত, আজি ৩ জুলাইত গুৱাহাটী চিকিৎসা মহাবিদ্যালয় আৰু হাস্পতালত ১৮ বছৰীয়া মৃদুমুদ্ৰা ডেকাই শেষ নিশ্বাস ত্যাগ কৰে ।
এমাহজোৰা জীৱন যুদ্ধৰ অৱসান :
যোৱা ৩০ মে’ৰ নিশা মুকালমুৱাৰ অন্তৰ্গত গংগাপুৰত সংঘটিত হোৱা এই আক্ৰমণৰ ঘটনাত গুৰুতৰভাৱে আহত হৈছিল ছাত্ৰীগৰাকী । তেতিয়াৰে পৰা মৃদুমুদ্ৰাই GMCH-ৰ অতিশয় জৰুৰীকালীন কক্ষত চিকিৎসাধীন হৈ আছিল । এমাহতকৈও অধিক সময় ধৰি চিকিৎসকে চলোৱা চেষ্টাৰ পিছতো অৱশেষত আজি তেওঁ জীৱন যুদ্ধত হাৰ মানে । উল্লেখ্য যে এই একেটা আক্ৰমণতে মৃদুমুদ্ৰাৰ সম্পৰ্কীয় ভাতৃ তথা ১৯ বছৰীয়া মাধুৰ্য বৰ্মন নামৰ আন এজন যুৱকৰ থিতাতে মৃত্যু হৈছিল । চামতাৰ বালিপথাৰৰ বাসিন্দা মাধুৰ্যই পশ্চিম নলবাৰী আঞ্চলিক ছাত্ৰ সন্থাৰ সহকাৰী সাধাৰণ সম্পাদক হিচাপে কাৰ্যনিৰ্বাহ কৰি আছিল ।
কেনেকৈ ঘটিছিল এই ঘটনা?
ঘটনাৰ দিনা মৃদুমুদ্ৰা আৰু মাধুৰ্যই স্কুটীৰে নলবাৰী চহৰৰ পৰা ঘৰলৈ উভতি আহিছিল । তেনে সময়তে গংগাপুৰত ৰোজ আলী নামৰ দুৰ্বৃত্তটোৱে তেওঁলোকক আধাবাটতে ভেটি ধৰি চোকা অস্ত্ৰৰে বৰ্বৰভাৱে আক্ৰমণ কৰিছিল ।
পাছত পথৰ কাষত তেওঁলোকক ক্ষত-বিক্ষত আৰু ৰক্তাক্ত অৱস্থাত পৰি থকা প্ৰত্যক্ষ কৰি উদ্ধাৰ কৰা হয় । মাধুৰ্যক ঘটনাস্থলীতে মৃত ঘোষণা কৰা হয় যদিও মৃদুমুদ্ৰাক সংকটজনক অৱস্থাত প্ৰথমতে স্থানীয় চিকিৎসালয়লৈ আৰু পিছলৈ উন্নত চিকিৎসাৰ বাবে গুৱাহাটীৰ GMCH-লৈ প্ৰেৰণ কৰা হৈছিল ।
ৰাইজৰ ক্ষোভ আৰু আৰক্ষীৰ এনকাউণ্টাৰ:
এই ঘটনাই সমগ্ৰ অসমতে তীব্ৰ ক্ষোভৰ সৃষ্টি কৰিছিল । স্থানীয় ৰাইজ, ছাত্ৰ সংগঠন তথা বিভিন্ন দল-সংগঠনে দোষীৰ বিৰুদ্ধে অতি শীঘ্ৰে ব্যৱস্থা গ্ৰহণৰ দাবী জনাই তীব্ৰ প্ৰতিবাদ সাব্যস্ত কৰিছিল । আনহাতে, একাংশই এই ঘটনাৰ আঁৰত “লাভ জেহাদ”ৰ সম্পৰ্ক থকা বুলি অভিযোগ তুলিছিল । ইফালে, ঘটনাৰ মূল অভিযুক্ত ৰোজ আলীক মুকালমুৱাত অসম আৰক্ষীয়ে চলোৱা এক এনকাউণ্টাৰত মৃত্যু হয় । আৰক্ষীৰ জিম্মাৰ পৰা পলায়ন কৰিবলৈ চেষ্টা কৰাৰ সময়তেই সংঘটিত হৈছিল এই এনকাউণ্টাৰ ।
মৃদুমুদ্ৰাৰ মৃত্যুৰ পিছতে এতিয়া ৰাজ্যৰ লগতে সমগ্ৰ অঞ্চলটোত শোকৰ ছাঁ পৰিছে ।
লগতে পঢ়ক : ডিমা হাচাওৰ জাটিংগা দলঙৰ কাষত ভয়ংকৰ ঘটনা
