বিধানসভা নিৰ্বাচনৰ পূৰ্বে নলবাৰী ৰাজীৱ ভৱন ভাঙি লণ্ড-ভণ্ড কৰিলে একাংশ দলীয় কৰ্মীয়ে। ইমানেই নহয় ভাৰপ্ৰাপ্ত সভাপতি নিযুক্তিক লৈ ক্ষুব্ধ কংগ্ৰেছ কৰ্মীয়ে ৰাজীৱ ভৱনত ওলমালে তলা।
নিৰ্বাচনৰ দিন চমু চাপি অহাৰ লগে লগে ৰাজ্যৰ প্ৰধান বিৰোধী দল কংগ্ৰেছত অন্তঃকন্দলে গুৰুতৰ ৰূপ ধাৰণ কৰা পৰিলক্ষিত হৈছে। টিকট বঞ্চিত প্ৰাৰ্থীৰ লগতে একাংশ দলীয় কৰ্মী-সমৰ্থকে প্ৰদেশ কংগ্ৰেছৰ সভাপতি গৌৰৱ গগৈৰ বিৰুদ্ধে প্ৰকাশ্যে বিদ্ৰোহ ঘোষণা কৰিছে। সমান্তৰালভাবে দলটোত অব্যাহত আছে পদত্যাগৰ জোৱাৰ।
দেওবাৰে নলবাৰীতো কংগ্ৰেছৰ অভ্যন্তৰত চলি থকা গুৰুতৰ কন্দল পোহৰলৈ আহে। দলীয় কৰ্মীয়ে উগ্ৰ প্ৰতিবাদৰ সাব্যস্ত কৰাৰ লগে লগে জিলা কংগ্ৰেছ কাৰ্যালয় লণ্ড-ভণ্ড কৰাৰ লগতে তলা ওলমোৱাৰ দৰে ঘটনা সংঘটিত হয়।
নলবাৰী জিলা কংগ্ৰেছ কমিটিৰ কাৰ্যকৰী সভাপতি হিচাপে দিব্যজ্যোতি হালৈক নিযুক্তি দিয়াৰ পিছতেই এই উত্তপ্ত পৰিস্থিতিৰ সৃষ্টি হয়। এই সিদ্ধান্তই দলৰ একাংশ কৰ্মীৰ মাজত তীব্ৰ অসন্তুষ্টিৰ সৃষ্টি কৰে। জিলা কংগ্ৰেছৰ সভাপতি ৰাতুল পাটোৱাৰীয়ে টিহু বিধানসভা সমষ্টিৰ পৰা নিৰ্বাচনত অৱতীৰ্ণ হোৱাৰ বাবে পদটো খালী হৈ পৰিছিল। তেওঁৰ অনুপস্থিতিত জ্যেষ্ঠ নেতা অশোক শৰ্মা আৰু বিধায়ক দিগন্ত বৰ্মনৰ সমৰ্থনত হালৈক নিযুক্তি দিয়া কাৰ্যই কৰ্মীসকলক ক্ষোভিত কৰি তোলে ।
প্ৰতিবাদকাৰী কৰ্মীসকলে অভিযোগ কৰে যে এই পদৰ বাবে বিবেচনাধীন হৈ থকা ড০ নীলকমল ভূঞাক ষড়যন্ত্ৰমূলকভাৱে একাষৰীয়া কৰা হৈছে। এই অসন্তুষ্টিয়ে পূৰ্ণ পৰ্যায়ৰ আন্দোলনৰ ৰূপ লয় আৰু কৰ্মীসকলে ৰাজীৱ ভৱনৰ আচবাব ভাঙি লণ্ডভণ্ড কৰাৰ লগতে দলীয় নেতৃত্বৰ বিৰুদ্ধে শ্লোগান দিয়ে।
প্ৰত্যক্ষদৰ্শীৰ মতে, উত্তেজিত কৰ্মীসকলে কাৰ্যালয়ৰ ভিতৰত চকী-মেজ ভাঙি এক বিশৃংখল পৰিৱেশৰ সৃষ্টি কৰে । পৰিস্থিতি অধিক উত্তপ্ত হৈ পৰাত প্ৰতিবাদকাৰীসকলে ৰাজীৱ ভৱনৰ মূল গেটত তলা লগাই দিয়ে আৰু সকীয়াই দিয়ে যে যেতিয়ালৈকে এই সিদ্ধান্ত প্ৰত্যাহাৰ কৰি নতুন কাৰ্যকৰী সভাপতি নিযুক্তি দিয়া নহয়, তেতিয়ালৈকে কাৰ্যালয়টো বন্ধ থাকিব। তেওঁলোকে হালৈৰ নিযুক্তি স্পষ্টভাৱে প্ৰত্যাখ্যান কৰি কয় যে কোনো পৰিস্থিতিতে তেওঁক এই পদত গ্ৰহণ কৰা নহ’ব।
তদুপৰি, আন্দোলনকাৰী কৰ্মীসকলে দিব্যজ্যোতি হালৈক “বিজেপিৰ এজেণ্ট” আখ্যা দি গুৰুতৰ অভিযোগ উত্থাপন কৰে। তেওঁলোকে হালৈৰ লগতে অশোক শৰ্মা আৰু দিগন্ত বৰ্মনক দলীয় কাৰ্যালয়ত প্ৰৱেশ কৰাত বাধা দিব বুলিও হুংকাৰ প্ৰদান কৰে।
লগতে পঢ়ক: ৰাইজৰ দল ত্যাগ টিকট বঞ্চিত শ্বেৰমান আলীৰ, তৃণমূলৰ পৰা খেলিব নিৰ্বাচন
