একেৰাহে তিনিবাৰকৈ পৰাজয়ৰ পিছত শুকুৰবাৰে ৰাজস্থান ৰয়েলছক পৰাস্ত কৰি পুনৰ প্ৰত্যাৱৰ্তন কৰে দিল্লী কেপিটেলছে। কিন্তু অধিনায়ক অক্ষৰ পেটেলে এই জয়ক বিশেষ গুৰুত্ব প্ৰদান কৰা নাই।

ইণ্ডিয়ান প্ৰিমিয়াৰ লীগ (আই পি এল) ২০২৬ত একেৰাহে তিনিবাৰকৈ পৰাজয়ৰ সন্মুখীন হোৱাৰ পিছত অৱশেষত দিল্লী কেপিটেলছে জয়ৰ সোৱাদ ল’লে।অৱশ্যে এই জয়ত অধিনায়ক অক্ষৰ পেটেল অত্যধিক সুখী হোৱা যেন নালাগিল।

জয়পুৰৰ ছাৱাই মানসিং ষ্টেডিয়ামত ১ মে’ত খেলা খেলখনত দিল্লীয়ে ২২৬ ৰানৰ বৃহৎ লক্ষ্য খেদি ৰাজস্থান ৰয়েলছক ৭ উইকেটত পৰাস্ত কৰে।ইয়াৰ উপৰিও আই পি এলত দিল্লীৰ সৰ্বাধিক সফল ৰান চেজ হিচাপে পৰিগণিত হয়।

এই জয়ে দলটোক প্লে অফৰ দৌৰত ৰখাই নহয়, বৰঞ্চ পূৰ্বৰ মেচখনত মাত্ৰ ৭৫ ৰানৰ বাবে বাণ্ডল আউট হোৱাৰ শ্বকৰ পৰাও সুস্থ হৈ উঠাৰ সুযোগো প্ৰদান কৰিছিল।কিন্তু মেচৰ পিছত যেতিয়া অধিনায়ক অক্ষৰ পেটেলক সুখী,গৌৰৱ আৰু সকাহৰ অনুভৱৰ বিষয়ে প্ৰশ্ন কৰাত তেওঁৰ স্পষ্ট উত্তৰ ‘না’ আছিল।

অক্ষয় পেটেলে কয় যে, পূৰ্বৰ মেচখনৰ পিছতো তেওঁ একেটা কথাকে পুনৰবাৰ কৈ আছিল যে দলটোৱে প্ৰতিটো দিন সেইটো কথাই পুনৰাবৃত্তি কৰিব লাগে যিটো সঠিক হয়। তেওঁৰ মতে, যিকোনো মুহূৰ্ততে পৰিস্থিতি সলনি হ’ব পাৰে,গতিকে প্ৰক্ৰিয়াটোৰ ওপৰত বিশ্বাস ৰখাটো অতি প্ৰয়োজনীয়।

দলটোৰ প্ৰদৰ্শনক প্ৰশংসা কৰি তেওঁ কয় যে বেটিং আৰু বলিং দুয়োটা বিভাগতে খেলুৱৈসকলে সুন্দৰ প্ৰদৰ্শন আগবঢ়ায় আৰু পৰিকল্পনাটো কল্পনা কৰা ধৰণেই কাৰ্যকৰী হ’ল। তেওঁ লগতে কয় যে, অধিনায়ক হিচাপে তেতিয়াহে আনন্দ আৰু অধিক হয় যেতিয়া পাৱাৰপ্লেৰ সময়ত বিপক্ষৰ মেচ সলনি কৰা বেটছমেনক আপুনি আউট কৰে।

মিচেল ষ্টাৰক উভতি অহাক লৈ আক্সাৰে কয় যে তেওঁৰ বলিঙে প্ৰমাণ কৰে যে তেওঁ কিয় এই খেলৰ কিংবদন্তি।তিনি মাহৰ পিছত পুনৰ উভতি অহাৰ লগতে এনে প্ৰদৰ্শন আগবঢ়োৱাটোৱে সঁচাকৈয়ে তেওঁৰ শ্ৰেণীটোক প্ৰদৰ্শন কৰে।

লগতে পঢ়ক: ‘দলটোৰ জয়ত গুৰুত্ব দিছো,সমালোচনাত নহয়’; ই-চিগাৰেট বিতৰ্কক লৈ ৰিয়ান পৰাগৰ প্ৰথম প্ৰতিক্ৰিয়া

বেংগালুৰুৰ এম চিন্নাস্বামী ষ্টেডিয়ামত অনুষ্ঠিত এই ৰোমাঞ্চকৰ খেলখনত দিল্লীয়ে ৬ উইকেটত জয়লাভ কৰে

ইণ্ডিয়ান প্ৰিমিয়াৰ লীগ ২০২৬ৰ শনিবাৰে অনুষ্ঠিত এখন মেচত বিৰুদ্ধে দিল্লী কেপিটেলছৰ হাতত ধৰাশায়ী হয় ৰয়েল চেলেঞ্জাৰ্ছ বেংগালুৰু । বেংগালুৰুৰ এম চিন্নাস্বামী ষ্টেডিয়ামত অনুষ্ঠিত এই ৰোমাঞ্চকৰ খেলখনত দিল্লীয়ে ৬ উইকেটত জয়লাভ কৰে । আৰ চি বিয়ে দিল্লী কেপিটেলছক ১৭৬ ৰানৰ লক্ষ্য নিৰ্ধাৰণ কৰি দিছিল । দিল্লীয়ে অন্তিম অভাৰত এই লক্ষ্যত উপনীত হয় ।

দিল্লীৰ ইনিংছ-

দিল্লী কেপিটেলছৰ আৰম্ভণি ভাল নাছিল । পাৱাৰপ্লেত পাথুম নিছাংকা (১ ৰান), কৰুণ নায়াৰ (৫ ৰান), সমীৰ ৰিজভি (২ ৰান)ৰ উইকেটৰ পতন ঘটে । ভুৱনেশ্বৰ কুমাৰে তিনিওজন বেটছমেনক আউট কৰে । ইয়াৰ পিছত ট্ৰিষ্টান ষ্টাবছ আৰু কে এল ৰাহুলে চতুৰ্থ উইকেটৰ বাবে ৬৯ ৰানৰ অংশীদাৰিত্ব গঢ়ে । ৰাহুলে ৩৪টা বলত ৫৭ ৰান সংগ্ৰহ কৰে, য’ত ৬টা চাৰি আৰু দুটা ছয় আছিল । ৰাহুলৰ উইকেট দখল কৰে ক্ৰুনাল পাণ্ডিয়াই । কিন্তু তাৰ পিছত ট্ৰিষ্টান ষ্টাবছ আৰু ডেভিদ মিলাৰে এক উল্লেখযোগ্য অংশীদাৰিত্ব গঢ়ি তোলে । দুয়োজনে বিস্ফোৰক বেটিং কৰি দলটোক জয়ৰ দিশে আগুৱাই লৈ যায় । ষ্টাবছে ৪৭টা বলত অপৰাজিত ৬০ ৰান কৰাৰ বিপৰীতে মিলাৰে ১০টা বলত অপৰাজিত ২২ ৰান সংগ্ৰহ কৰে ।

ৰয়েল চেলেঞ্জাৰ্ছ বাংগালুৰুৰ ইনিংছ-

টছ হেৰুৱাই প্ৰথমে বেটিং কৰাৰ পিছত ৰয়েল চেলেঞ্জাৰছ বাংগালুৰুৱে ৮ উইকেটত ১৭৫ ৰান সংগ্ৰহ কৰে । ৰয়েল চেলেঞ্জাৰ্ছ বাংগালুৰুৱে ভাল আৰম্ভণি কৰে । প্ৰথম উইকেটত বিৰাট কোহলী আৰু ফিল ছল্টৰ মাজত ৫২ ৰানৰ অংশীদাৰিত্ব গঢ়ি উঠে । তিনিটা চাৰিৰ সহায়ত ১৯ ৰান সংগ্ৰহ কৰাৰ পাছত কোহলী লুংগি ঙিডিৰ বলত পেভিলিয়নমুখী হয় । ইয়াৰ পাছত ছল্ট আৰু দেৱদত্ত পাডিক্কালে দ্বিতীয় উইকেটৰ বাবে ৪৭ ৰানৰ অংশীদাৰিত্ব ভাগ কৰে । পাডিক্কাল (১৮ ৰান)ক অধিনায়ক অক্ষৰ পেটেলে আউট কৰে ।

ৰয়েল চেলেঞ্জাৰ্ছ বাংগালুৰুৰ তৃতীয়টো আঘাত ফিল ছল্টৰ ৰূপত লাভ কৰে । কুলদীপ যাদৱৰ হাতত তেওঁ নিজৰ উইকেট বিসৰ্জন দিয়ে । ছল্টে ৩৮টা বলত ৬৩ ৰান সংগ্ৰহ কৰে, য’ত চাৰিটা চাৰিটা আৰু তিনিটা ছয় আছিল । অধিনায়ক ৰজত পাটিদাৰে বিশেষ প্ৰদৰ্শনত ব্যৰ্থ হয় । মুকেশ কুমাৰে ৮ ৰানত অধিনায়কগৰাকীক আউট কৰে ।

তাৰ পিছৰ পৰা নিয়মীয়া ব্যৱধানত ৰয়েল চেলেঞ্জাৰ্ছ বেংগালুৰুৱে উইকেট হেৰুৱাবলৈ ধৰে । টিম ডেভিদ (২৬ ৰান), ৰোমাৰিয়া শ্বেফাৰ্ড (১ ৰান), ক্ৰুনাল পাণ্ডিয়া (১২ ৰান) আৰু জিতেশ শৰ্মাই (১৪ ৰান) সংগ্ৰহ কৰে । দিল্লী কেপিটেলছৰ হৈ লুংগী ঙিদি, কুলদীপ যাদৱ আৰু অক্ষৰ পেটেলে দুটাকৈ উইকেট দখল কৰে ।

দিল্লী কেপিটেলছ আৰু ৰয়েল চেলেঞ্জাৰ্ছ বেংগালুৰুৱে এই পৰ্যন্ত ইণ্ডিয়ান প্ৰিমিয়াৰ লীগত ৩৪খন খেল খেলিছে । ইয়াৰে ২০খন খেলত ৰয়েল চেলেঞ্জাৰ্ছ বাংগালুৰুৱে জয়লাভ কৰাৰ বিপৰীতে দিল্লী কেপিটেলছে ১৩খন খেলত জয়লাভ কৰিছে । এখন মেচ ড্ৰ’ত সমাপ্ত হয় ।

লগতে পঢ়ক : টিম ইণ্ডিয়াত কাৰ ঠাই ল’ব বৈভৱ সূৰ্যবংশীয়ে? শীঘ্ৰেই ঘটিব আন্তঃৰাষ্ট্ৰীয় অভিষেক !

দিল্লী কেপিটেলছে মুম্বাই ইণ্ডিয়ানছক ৬ উইকেটত পৰাস্ত কৰে

আই পি এল ২০২৬ৰ শনিবাৰে অনুষ্ঠিত হোৱা এখন মেচত দিল্লী কেপিটেলছে মুম্বাই ইণ্ডিয়ানছক ৬ উইকেটত পৰাস্ত কৰে । দিল্লীৰ অৰুণ জেটলী ষ্টেডিয়ামত অনুষ্ঠিত খেলখনত প্ৰথমে বেটিং কৰি মুম্বাইয়ে ১৬২ ৰান সংগ্ৰহ কৰে । ইয়াৰ প্ৰত্যুত্তৰত সমীৰ ৰিজৱীৰ ৯০ ৰানৰ সহায়ত ১৯ অভাৰত দিল্লীয়ে লক্ষ্যত উপনীত হয় । আই পি এল ২০২৬ত দিল্লীৰ এয়া একেৰাহে দ্বিতীয়টো জয় ।

সমীৰ ৰিজৱীৰ বেটিং ধুমুহা-

১৬৩ ৰানৰ লক্ষ্য অনুসৰণ কৰি আৰম্ভণিতে দিল্লী কেপিটেলছ শলঠেকত পৰে, কিয়নো অ’পেনাৰ কে এল ৰাহুল মাত্ৰ এটা ৰানতে পেভিলিয়নমুখী হোৱাৰ বিপৰীতে নীতিশ ৰাণাই নিজৰ একাউণ্ট খুলিবলৈয়ো সক্ষম নহ’ল ।

কিন্তু সমীৰ ৰিজৱীয়ে খেলপথাৰত নামিয়েই মুম্বাইৰ বলাৰৰ বিৰুদ্ধে তাণ্ডৱ আৰম্ভ কৰে । তেওঁ বিস্ফোৰক বেটিংঙৰ সহায়ত ৩১টা বলত অৰ্ধ শতক অৰ্জন কৰে । ইয়াৰ পিছতে ৰিজৱীৰ বেটে ধুমুহাৰ সৃষ্টি কৰে । তেওঁ ৭টা চাৰি আৰু ৭টা ছয়ৰ সহায়ত ৫১টা বলত ৯০ ৰান সংগ্ৰহ কৰে । চলিত আই পি এলত ৰিজভীয়ে মাত্ৰ ২খন মেচতে ১৬০ ৰান সংগ্ৰহ কৰিছে । ইয়াৰ পূৰ্বে লক্ষ্ণৌ ছুপাৰ জায়েন্টছৰ বিৰুদ্ধেও বিস্ফোৰক অৰ্ধশতক অৰ্জন কৰিছিল তেওঁ । ৰিজভীয়ে পাথুম নিছাংকাৰ সৈতে ৬৬ ৰানৰ অংশীদাৰিত্ব আৰু ডেভিদ মিলাৰৰ সৈতে ৭৮ ৰানৰ অংশীদাৰিত্ব গঢ়ে ।

ইফালে মুম্বাই ইণ্ডিয়ানছৰ নিয়মীয়া অধিনায়ক হাৰ্দিক পাণ্ডিয়াই অসুস্থতাৰ বাবে এই মেচত খেলা নাছিল । তেওঁৰ ঠাইত অধিনায়কৰ দায়িত্ব পালন কৰিছিল সূৰ্যকুমাৰ যাদৱে । তেওঁ ৫১ ৰানৰ ইনিংছ খেলে । ৰোহিত শৰ্মাইও ৩৫ ৰানৰ বৰঙণি আগবঢ়াইছিল যদিও সমীৰ ৰিজৱীৰ স্মৰণীয় ৯০ ৰানৰ ইনিংছত সকলো অথলে যায় ।

উল্লেখ্য যে, অক্ষৰ পেটেলৰ অধিনায়কত্বত দিল্লী কেপিটেলছে আই পি এল ২০২৬ৰ অভিযানত এক দৃষ্টিনন্দন আৰম্ভণি কৰিছে । প্ৰথমখন খেলত লক্ষ্ণৌ ছুপাৰ জায়েন্টছক ৬ উইকেটত পৰাস্ত কৰে দলটোৱে । এতিয়া মুম্বাই ইণ্ডিয়ানছক ৬ উইকেটত পৰাস্ত কৰি ছিজনৰ একেৰাহে দ্বিতীয়টো জয় পঞ্জীয়ন কৰিছে দিল্লীয়ে ।

লগতে পঢ়ক : আই পি এলক লৈ বিতৰ্ক; আদালতৰ দুৱাৰত টোকৰ তাৰকা খেলুৱৈৰ