প্ৰধানমন্ত্ৰী মোদীক প্ৰশংসাৰে ওপচালে ট্ৰাম্পে

সোমবাৰে ইজিপ্তত গাজাৰ শান্তি সন্দৰ্ভত অনুষ্ঠিত এক সন্মিলনত ভাৰত আৰু প্ৰধানমন্ত্ৰী নৰেন্দ্ৰ মোদীক প্ৰশংসাৰে ওপচালে আমেৰিকাৰ ৰাষ্ট্ৰপতি ড’নাল্ড ট্ৰাম্পে । তেওঁ কয় যে ভাৰত আৰু পাকিস্তান এতিয়া বহুত ভালকৈ একেলগে থাকিব । এই কথা কোৱাৰ লগে লগে মঞ্চৰ আঁৰত থিয় হৈ থকা পাকিস্তানৰ প্ৰধানমন্ত্ৰী শ্বেহবাজ শ্বৰীফৰ ফালে ঘূৰি ‘হয় নে নহয়’ বুলিও সোধে ট্ৰাম্পে ?

ইয়াৰ পিছতে পাকিস্তানৰ প্ৰধানমন্ত্ৰী শ্বৰীফে মূৰ জোকাৰি হ’ব বুলি উত্তৰ দিয়ে, যাৰ ফলত অনুষ্ঠানত উপস্থিত থকা নেতা আৰু সংবাদ মাধ্যমৰ মাজত লঘু হাঁহিৰ পৰিৱেশৰ সৃষ্টি হয় । ইয়াৰ ভিডিঅ’ ছ’চিয়েল মিডিয়াত ভাইৰেল হৈ পৰিছে ।

ভাষণত ট্ৰাম্পে কেমেৰাত হাঁহি হাঁহি কয়, “ভাৰত এখন মহান দেশ, যাৰ শীৰ্ষত আছে মোৰ এজন অতি ভাল বন্ধু । আৰু তেওঁ এটা ডাঙৰ কাম কৰিছে । মই ভাবো পাকিস্তান আৰু ভাৰত একেলগে বহুত ভালদৰে থাকিব ।”

ইজিপ্তৰ ৰাষ্ট্ৰপতি আব্দেল ফাত্তাহ আল চিছিৰ সৈতে গাজা শান্তি সন্মিলনৰ সহ-অধ্যক্ষতা কৰি থকা ট্ৰাম্পে পাকিস্তানৰ সামৰিক নেতৃত্বক প্ৰশংসা কৰি কয় যে আঞ্চলিক শান্তি নিৰ্ভৰ কৰে ভাল বন্ধুসকলে ভাল কাম কৰাৰ ওপৰত ।

আমেৰিকাৰ ৰাষ্ট্ৰপতিগৰাকীয়ে এই সন্মিলনত ভাষণ দিবলৈ পাকিস্তানৰ প্ৰধানমন্ত্ৰীকো আমন্ত্ৰণ জনায় । ভাষণত শ্বেহবাজ শ্বৰীফে ভাৰত আৰু পাকিস্তানৰ মাজত পাৰমাণৱিক যুদ্ধ বন্ধ কৰাৰ বাবে ট্ৰাম্পক কৃতিত্ব দিয়ে । তেওঁ কয় যে সেই চাৰিদিনত এই ভদ্ৰলোক আৰু তেওঁৰ দলটোৱে হস্তক্ষেপ নকৰা হেতেন দুয়োখন পাৰমাণৱিক ৰাষ্ট্ৰৰ মাজত যুদ্ধ ইমানেই তীব্ৰতৰ হ’ল হেঁতেন যে কি হৈছিল সেই কথা ক’বলৈ কোনো জীয়াই নাথাকিলহেঁতেন ।

ইয়াৰ পূৰ্বে ভাৰত আৰু পাকিস্তানৰ মাজত যুদ্ধবিৰতিৰ কৃতিত্ব পুনৰ ল’লে ট্ৰাম্পে । ইজৰাইলৰ সংসদ নেচেটত তেওঁ নিজৰ ভাষণৰ সামৰণিত কয় যে তেওঁ সমাধান কৰা আঠটা বিবাদৰ ভিতৰত এইটো অন্যতম বিবাদ । দৰাচলতে ১০ মে’ত ভাৰত আৰু পাকিস্তানৰ মাজত যুদ্ধবিৰতিৰ পিছৰে পৰা ট্ৰাম্পে তাৰ কৃতিত্ব লৈ আহিছে । অৱশ্যে ভাৰতে বাৰে বাৰে স্পষ্ট কৰি দিছে যে দুয়োখন দেশৰ সেনাৰ ডিজিএমঅ’ৰ মাজত আলোচনাৰ অন্তত এই চুক্তিত উপনীত হৈছে ৷ ইয়াত তৃতীয় পক্ষৰ হস্তক্ষেপ নাই ।

লগতে পঢ়ক : ট্ৰাম্পৰ প্ৰচেষ্টাৰ শলাগ ল’লে প্ৰধানমন্ত্ৰী মোদীয়ে; নেতানিয়াহুক লৈয়ো কৰিলে বিশেষ মন্তব্য

পুনৰ ভাৰত-পাক যুদ্ধ বন্ধ কৰাৰ কৃতিত্ব ল’লে ড’নাল্ড ট্ৰাম্পে

ন’বেল বঁটাৰ পৰা বঞ্চিত হৈও হতাশ হোৱা নাই আমেৰিকাৰ ৰাষ্ট্ৰপতি ড’নাল্ড ট্ৰাম্প।পৃথিৱীৰ বহু যুদ্ধৰ অন্ত পেলোৱাৰ কৃতিত্ব তেওঁ লৈছে।ট্ৰাম্পে পুনৰবাৰ ভাৰত আৰু পাকিস্তানৰ যুদ্ধ বন্ধ কৰাৰ দাবী কৰিছে।

দেওবাৰে নিশা তেওঁ কয় যে তেওঁ বিশ্বৰ বহু পুৰণি বিবাদৰ সমাধান বিচাৰি উলিওৱাত গুৰুত্বপূৰ্ণ ভূমিকা পালন কৰিছে।ভাৰত-পাকিস্তানৰ বিবাদকে ধৰি এতিয়ালৈকে তেওঁ ৭খন যুদ্ধ বন্ধ কৰিছে।

অৱশ্যে এই সকলোবোৰ শান্তিৰ ন’বেল বঁটা লাভৰ বাবে কৰা নাছিল বুলিও তেওঁ কয়।গাজা শান্তি আলোচনাৰ বাবে ইজিপ্তলৈ যোৱাৰ পথত এখন সংবাদমেলৰ সময়ত ট্ৰাম্পে এই মন্তব্য কৰিছে।

ড’নাল্ড ট্ৰাম্পে কয় যে মই কেৱল শুল্কৰ ভিত্তিত কিছুমান যুদ্ধ নিষ্পত্তি কৰিছো।যেনে, ভাৰত-পাকিস্তানৰ মাজত যেতিয়া সংঘাত আৰম্ভ হৈছিল, তেতিয়া মই কৈছিলো, যদি আপোনালোকে যুদ্ধ কৰিব বিচাৰে আৰু পাৰমাণৱিক অস্ত্ৰ আছে তেন্তে মই আপোনালোক দুয়োৰে ১০০ শতাংশ, ১৫০ শতাংশ আৰু ২০০ শতাংশৰ দৰে উচ্চ শুল্ক আৰোপ কৰিম।

মই শুল্ক আৰোপ কৰি আছো বুলি ক’লোঁ৷সেই গোচৰটো মই ২৪ ঘণ্টাত নিষ্পত্তি কৰিলোঁ। মোৰ যদি শুল্ক নাথাকিলহেঁতেন তেন্তে সেই যুদ্ধখন তেওঁলোকে কেতিয়াও নিষ্পত্তি নকৰিলেহেঁতেন।

লগতে পঢ়ক: পুনৰ আৰম্ভ হ’ল আমেৰিকা-চীনৰ বাণিজ্য যুদ্ধ; ড্ৰেগনৰ ওপৰত এশ শতাংশ শুল্ক আৰোপ ট্ৰাম্পৰ

ইজৰাইল-হামাছৰ চুক্তিক লৈ ট্ৰাম্পক প্ৰশংসা প্ৰধানমন্ত্ৰী মোদীৰ

ড’নাল্ড ট্ৰাম্পৰ শান্তি পৰিকল্পনা ঘোষণাৰ পিছত গাজাত শান্তিৰ প্ৰচেষ্টাত বৃহৎ অগ্ৰগতিৰ লক্ষণ দেখা গৈছে।প্ৰধানমন্ত্ৰী নৰেন্দ্ৰ মোদীয়ে ট্ৰাম্পৰ এই পদক্ষেপক প্ৰশংসা কৰি কয় যে পণবন্দীসকলক মুকলি কৰি দিয়াৰ ইংগিত দিয়াটো এটা গুৰুত্বপূৰ্ণ পদক্ষেপ।

প্ৰধানমন্ত্ৰী মোদীয়ে তেওঁৰ বাৰ্তাত লিখিছে, ‘আমি ৰাষ্ট্ৰপতি ট্ৰাম্পৰ নেতৃত্বক আদৰণি জনাইছো কাৰণ গাজাত শান্তিৰ প্ৰচেষ্টাই নিৰ্ণায়ক অগ্ৰগতি লাভ কৰিছে।’

ছ’চিয়েল মিডিয়া প্লেটফৰ্ম এক্সত শ্বেয়াৰ কৰা এটা পোষ্টত প্ৰধানমন্ত্ৰী মোদীয়ে লিখিছে, ‘পণবন্দীক মুকলি কৰি দিয়াৰ ইংগিত এক ডাঙৰ পদক্ষেপ।ভাৰতে স্থায়ী আৰু ন্যায্য শান্তিৰ বাবে সকলো প্ৰচেষ্টাক তীব্ৰ সমৰ্থন আগবঢ়াই যাব।’

বিশ্বৰ আন বহু নেতাইও ট্ৰাম্পৰ এই পদক্ষেপক প্ৰশংসা কৰিছে।অষ্ট্ৰেলিয়াৰ প্ৰধানমন্ত্ৰী এণ্টনি আলবানিছেও ট্ৰাম্পৰ এই পৰিকল্পনাক সমৰ্থন কৰিছে।তেওঁ কৈছে যে, ‘ৰাষ্ট্ৰপতি ট্ৰাম্পৰ পৰিকল্পনাৰ অগ্ৰগতিক অষ্ট্ৰেলিয়াই আদৰণি জনাইছে।’

‘হামাছে তৎক্ষণাত নিজৰ অস্ত্ৰ-শস্ত্ৰ আত্মসমৰ্পণ কৰি সকলো পণবন্দীক মুকলি কৰি দিব লাগে।অষ্ট্ৰেলিয়াই আমাৰ অংশীদাৰসকলৰ সৈতে সংঘাতৰ অন্ত পেলাই ন্যায্য আৰু স্থায়ী সমাধান বিচাৰি উলিওৱাৰ প্ৰচেষ্টাক সমৰ্থন কৰি যাব।’

লগতে পঢ়ক: ‘ভাৰত ৰাছিয়াৰ আটাইতকৈ ভাল বন্ধু’; প্ৰধানমন্ত্ৰী মোদীক ‘বুদ্ধিমান নেতা’ আখ্যা পুটিনৰ