সিদ্ধান্তৰ পৰা ইউ-টাৰ্ণ ট্ৰাম্পৰ

শুকুৰবাৰে আমেৰিকাৰ ৰাষ্ট্ৰপতি ড’নাল্ড ট্ৰাম্পে নিজৰ এটা সিদ্ধান্তৰ ওপৰত ইউ টাৰ্ণ লৈছে।দৈনিক ব্যৱহাৰ কৰা বহু সামগ্ৰীৰ ওপৰত শুল্ক হ্ৰাস কৰিছে ট্ৰাম্পে।

এই ইউ-টাৰ্ণ এনে সময়ত লোৱা হৈছে,যেতিয়া আমেৰিকাত দৈনন্দিন সামগ্ৰীৰ দাম আকাশলংঘী হৈছিল।অৱশ্যে এই শুল্ক হ্ৰাসে এতিয়া আমেৰিকাৰ জনসাধাৰণক যথেষ্ট সকাহ দিব।

ট্ৰাম্পে গো-মাংস, কফি, গ্রীষ্মমণ্ডলীয় ফলকে ধৰি কেইবাটাও বস্তুৰ ওপৰত শুল্ক হ্ৰাস কৰিছে।আমেৰিকাত এই মাহত অবছৰীয়া নিৰ্বাচনত অৰ্থনৈতিক উদ্বেগৰ বিষয়টো আছিল এক উত্তপ্ত বিষয়, য’ত আমেৰিকাৰ নাগৰিকে সামগ্ৰীৰ দামক লৈ ক্ষোভ প্ৰকাশ কৰিছিল।ইয়াৰ ফলত ভাৰ্জিনিয়া আৰু নিউ জাৰ্চিত ডেম’ক্ৰেটসকলে ডাঙৰ জয়লাভ কৰে।

মন কৰিবলগীয়া যে এপ্ৰিল মাহত ট্ৰাম্পে বেছিভাগ দেশৰ ওপৰত শুল্ক আৰোপ কৰিছিল।তেওঁ আৰু তেওঁৰ প্ৰশাসনে দীৰ্ঘদিন ধৰি জোৰ দি আহিছে যে শুল্কই গ্ৰাহকৰ মূল্য বৃদ্ধি নকৰে,আনহাতে অৰ্থনৈতিক প্ৰমাণ ইয়াৰ বিপৰীত আৰু গ্ৰাহক সামগ্ৰীৰ মূল্য তীব্ৰভাৱে বৃদ্ধি পাইছে।

আমেৰিকাত অভিলেখ সৃষ্টিকাৰী গো-মাংসৰ উচ্চ মূল্য বিশেষ চিন্তাৰ বিষয় হৈ পৰিছে আৰু ট্ৰাম্পে এইবোৰ হ্ৰাস কৰাৰ বাবে ব্যৱস্থা লোৱাৰ মনস্থ কৰিছে বুলি কৈছে।

আনুষ্ঠানিকভাৱে গো-মাংস, কফি আৰু ফলৰ উপৰিও এই অৰ্ডাৰত চাহ, ফলৰ ৰস, ক’ক’, মছলা, কল, কমলা, টমেটো আৰু কিছু সাৰৰ ওপৰতো শুল্ক আঁতৰোৱা হৈছে।

ইয়াৰ ভিতৰত এনে কিছুমান সামগ্ৰী আমেৰিকাত উৎপাদিত নহয়।এতিয়া এইবোৰ বস্তুৰ দাম কমি যাব পাৰে বুলি আশা কৰা হৈছে।

লগতে পঢ়ক:বটছৱানাত উপস্থিত ৰাষ্ট্ৰপতি দ্ৰৌপদী মুৰ্মু; কিয় বিশেষ এই ভ্ৰমণ ?

শুল্ক হ্ৰাস কৰাৰ ইংগিত ট্ৰাম্পৰ…

মঙলবাৰে আমেৰিকাৰ ৰাষ্ট্ৰপতি ড’নাল্ড ট্ৰাম্পে ভাৰতৰ সৈতে বাণিজ্যিক চুক্তিৰ ওচৰত থকাৰ ইংগিত দিয়ে। লগতে তেওঁ কয় যে এটা সময়ত আমেৰিকাই ভাৰতৰ ওপৰত শুল্ক হ্ৰাস কৰিব।

ভাৰতত ৰাষ্ট্ৰদূত হিচাপে চাৰ্জিঅ’ গ’ৰৰ শপত গ্ৰহণ অনুষ্ঠানত ট্ৰাম্পে এই মন্তব্য কৰে।ইয়াৰ মাজতে ৰাষ্ট্ৰপতি গৰাকীয়ে এই বাণিজ্যিক চুক্তি বিশেষ বুলি কৈছে। তেওঁ ক’লে, “তেওঁলোকে মোক এতিয়া ভাল নাপায়, কিন্তু আমাক পুনৰ পছন্দ কৰিব।”

দৰাচলতে অভাল অফিচত ৰাষ্ট্ৰপতি গৰাকীক সোধা হৈছিল যে ভাৰতৰ সৈতে বাণিজ্যিক চুক্তি কিমান ঘনিষ্ঠ আৰু  নতুন দিল্লীৰ ওপৰত শুল্ক হ্ৰাস কৰাৰ কথা চিন্তা কৰিবনে?

ইয়াৰ প্ৰতিক্ৰিয়া প্ৰকাশ কৰি তেওঁ কয়, “আমি ভাৰতৰ সৈতে চুক্তি কৰি আছো। এই চুক্তি পূৰ্বৰ তুলনাত বহুত বেলেগ।তেওঁলোকে মোক এতিয়া ভাল নাপায়, কিন্তু আমাক আকৌ ভাল পাব।আমি এটা উচিত চুক্তি পাইছো”।

“তেওঁলোক বৰ ভাল আলোচনাপন্থী, গতিকে, চাৰ্জিঅ’, আপুনি এইটো চাব লাগিব। মই ভাবো আমি সকলোৰে বাবে ভাল চুক্তিৰ বহুত ওচৰত আছো।”

তেওঁ আৰু কয় যে, “এতিয়া ৰাছিয়াৰ তেলৰ বাবে ভাৰতৰ ওপৰত শুল্ক অতি বেছি আছে, আৰু তেওঁলোকে ৰাছিয়াৰ তেলৰ ব্যৱসায় বন্ধ কৰি দিছে”।

“ইয়াৰ পৰিমাণ যথেষ্ট হ্ৰাস পাইছে।হয়, আমি শুল্ক হ্ৰাস কৰিবলৈ ওলাইছো।এটা সময়ত আমি ইয়াক হ্ৰাস কৰিম”।

লগতে পঢ়ক: ‘শুল্কৰ বিৰুদ্ধে মাত মতাসকল মূৰ্খ’; ড’নাল্ড ট্ৰাম্পৰ ডাঙৰ ঘোষণা

‘শুল্কৰ বিৰুদ্ধে মাত মতাসকল মূৰ্খ’

ড’নাল্ড ট্ৰাম্পে পুনৰবাৰ শুল্কৰ সুবিধাৰ কথা উল্লেখ কৰিছে।ছ’চিয়েল মিডিয়াত দিয়া এটা পোষ্টত তেওঁ কয় যে তেওঁৰ নেতৃত্বত আমেৰিকাই অহৰহ আগবাঢ়ি গৈছে আৰু আমেৰিকাৰ শুল্ক সমালোচনা কৰাসকলক তেওঁ ‘মূৰ্খ’ বুলি অভিহিত কৰিছে।

ইয়াৰ লগতে তেওঁ শুল্ক ৰাজহৰ পৰা প্ৰায় প্ৰতিজন আমেৰিকানক লভ্যাংশ হিচাপে ২০০০ ডলাৰ দিয়াৰ প্ৰতিশ্ৰুতিও দিছিল।

নিজৰ শুল্কৰে বিশ্বক ভয় খুৱাই থকা ট্ৰাম্পে আমেৰিকাক ইয়াৰ সুবিধাৰ কথা অহৰহ প্ৰচাৰ কৰি আছে।তেওঁ ট্ৰুথ ছ’চিয়েল প্লেটফৰ্মত এটা নতুন পোষ্টত নিজৰ ব্যৱসায়িক কৌশলৰ প্ৰচাৰ কৰে আৰু দাবী কৰিছিল যে তেওঁৰ নেতৃত্বত আমেৰিকা বিশ্বৰ আটাইতকৈ ধনী আৰু আটাইতকৈ সন্মানীয় দেশ হয়, য’ত অভিলেখ ষ্টক মূল্য, উচ্চ ৪০১(কে) বেলেন্স আৰু ফেক্টৰী সকলোতে বৃদ্ধি পাইছে।

ট্ৰাম্পে শুল্কক আমেৰিকাৰ অৰ্থনৈতিক শক্তিৰ মূল কাৰক হিচাপে উল্লেখ কৰিছে।ইয়াৰ লগতে তেওঁ ইয়াৰ বিৰোধী লোকসকল আৰু শুল্ক সমালোচনা কৰাসকলকো লক্ষ্য কৰি লৈছিল।

তেওঁ নিজৰ পোষ্টটোত লিখিছে, ‘যি সকল লোকে শুল্কৰ বিৰোধিতা কৰি আছে, তেওঁলোক মূৰ্খ!’ আমেৰিকাৰ ৰাষ্ট্ৰপতিগৰাকীয়ে যুক্তি আগবঢ়ায় যে এই শুল্কসমূহে বিনিয়োগ আৰু কৰ্মসংস্থাপনৰ সুযোগ বৃদ্ধি কৰিছে।

শুল্ক সমালোচকক মূৰ্খ বুলি অভিহিত কৰি ৰাষ্ট্ৰপতি গৰাকীয়ে সামাজিক মাধ্যমত এটা ডাঙৰ দাবী কৰি কয় যে US Tariff Revenue ৰ পৰা প্ৰায় সকলো আমেৰিকানক শুল্ক লভ্যাংশৰ অংশ হিচাপে ২০০০ ডলাৰৰ ধন পৰিশোধ কৰা হ’ব। অৱশ্যে কেনেকৈ বা কেতিয়া সেই ধন পৰিশোধ কৰা হ’ব সেই বিষয়ে তেওঁ স্পষ্ট কৰা নাই।

লগতে পঢ়ক: অহায়ো’ৰ গৱৰ্ণৰৰ বাবে বিবেক ৰামাস্বামীক সমৰ্থন ট্ৰাম্পৰ

বিবেক ৰামাস্বামীক সমৰ্থন ট্ৰাম্পৰ

আমেৰিকাৰ ৰাষ্ট্ৰপতি ড’নাল্ড ট্ৰাম্পে ভাৰতীয় মূলৰ উদ্যোগী তথা ৰাজনীতিবিদ বিবেক ৰামাস্বামীক অহায়ো’ৰ গৱৰ্ণৰ পদৰ বাবে নিজৰ “পূৰ্ণ আৰু সম্পূৰ্ণ সমৰ্থন”দিছে।

সামাজিক মাধ্যমত এটা পোষ্টত ট্ৰাম্পে লিখিছে যে “বিবেক ৰামাস্বামী ডেকা, শক্তিশালী আৰু স্মাৰ্ট,আৰু তেওঁ সঁচাকৈয়ে আমাৰ দেশখনক ভাল পায়।”

ট্ৰাম্পে কয় যে, অহায়ো এইখন ৰাজ্য য’ত তেওঁ ২০১৬, ২০২০ আৰু ২০২৪ চনত ডাঙৰ জয়লাভ কৰিছিল,আৰু তেওঁ বিবেকক ব্যক্তিগতভাৱে বহুত ভালকৈ চিনি পায়।

তেওঁ কয় যে,”বিবেকে অৰ্থনীতি বৃদ্ধি, কৰ আৰু নিয়ম হ্ৰাস কৰাৰ ব্যৱস্থাক সমৰ্থন কৰে,’মেড ইন ইউ এছ এ’ক প্ৰচাৰ কৰিবলৈ সীমান্ত সুৰক্ষিত কৰক,আমি সামৰিক বাহিনীক শক্তিশালী কৰাৰ বাবে যুঁজি যাম আৰু আইন-শৃংখলা কঠোৰভাৱে বলবৎ কৰিম।”

বিবেক ৰামাস্বামী, যি চিনচিনাটিৰ বাসিন্দা,চলিত বৰ্ষৰ আৰম্ভণিতে নিজৰ প্ৰচাৰ আৰম্ভ কৰিছিল আৰু সমগ্ৰ ৰাজ্যতে সক্ৰিয়ভাৱে প্ৰচাৰ চলাই আছে।ইয়াৰ পূৰ্বে তেওঁ ট্ৰাম্প প্ৰশাসনৰ “চৰকাৰী দক্ষতা বিভাগ” পদক্ষেপৰ সহ-অধ্যক্ষ হিচাপে কাৰ্যনিৰ্বাহ কৰিছিল।

ৰাজনৈতিক বিশ্লেষকসকলে কয় যে বিবেকৰ ৰাজনৈতিক যাত্ৰা অহায়ো’ৰ পৰা চেনেটত জয়ী হোৱা জে ডি ভেন্স আৰু মৰেনোৰ দৰে হ’ব পাৰে -ট্ৰাম্পৰ সমৰ্থনত দুয়োজনে এক বৃহৎ ৰাজনৈতিক বুষ্ট লাভ কৰিছিল।

লগতে পঢ়ক:ট্ৰাম্পক মোক্ষম আঘাত: আমেৰিকাৰ চহৰসমূহলৈ সামৰিক বাহিনী প্ৰেৰণক ন্যায়ালয়ৰ অবৈধ আখ্যা

সামৰিক বাহিনী প্ৰেৰণক ন্যায়ালয়ৰ অবৈধ আখ্যা

শুকুৰবাৰে আমেৰিকাৰ ৰাষ্ট্ৰপতি ড’নাল্ড ট্ৰাম্পে এক বৃহৎ আইনী বিপৰ্যয়ৰ সন্মুখীন হ’বলগীয়া হয়।এজন ফেডাৰেল ন্যায়াধীশে ৰায় দিয়ে যে ট্ৰাম্পে পৰ্টলেণ্ড,অৰেগনত নেচনেল গাৰ্ডক অবৈধভাৱে’ নিয়োগ কৰা হৈছিল।

এই ৰায়দানৰ ফলত ট্ৰাম্প প্ৰশাসনৰ আমেৰিকাৰ চহৰসমূহত সামৰিক শক্তি ব্যৱহাৰৰ নীতিত যথেষ্ট প্ৰভাৱ পৰিব পাৰে।

আমেৰিকাৰ জিলা ন্যায়াধীশ কেৰিন ইমাৰগুটে ট্ৰাম্পৰ এই নিৰ্দেশক অবৈধ ঘোষণা কৰি স্থায়ীভাৱে বাধা প্ৰদান কৰিছে।ইয়াৰ পূৰ্বে আদালতে পৰ্টলেণ্ডত নেশ্যনেল গাৰ্ড নিয়োগ কৰাৰ ওপৰত অন্তৱৰ্তীকালীন স্থগিতাদেশ দিছিল।

ট্ৰাম্প প্ৰশাসনে আদালতত যুক্তি দিছিল যে পৰ্টলেণ্ডৰ এটা ইমিগ্ৰেচন ডিটেনচন চেণ্টাৰৰ বাহিৰত প্ৰতিবাদকাৰীসকলে ‘বিদ্ৰোহ’ৰ দৰেই পৰিস্থিতিৰ সৃষ্টি কৰিছিল, সেয়ে সামৰিক বাহিনী প্ৰেৰণৰ কৰ্তৃত্ব ৰাষ্ট্ৰপতিৰ।

কিন্তু ন্যায়াধীশ ইমাৰগুটে এই যুক্তি নাকচ কৰিলে। মন কৰিবলগীয়া যে ইমাৰগুট নিজেই ট্ৰাম্পে নিযুক্তি দিয়া এজন ন্যায়াধীশ।

ট্ৰাম্পে ডেম’ক্ৰেটিক শাসিত লছ এঞ্জেলছ, চিকাগো, ৱাশ্বিংটন ডি চিৰ দৰে চহৰলৈও প্ৰতিবাদৰ সময়ত সামৰিক বাহিনী প্ৰেৰণ কৰাৰ চেষ্টা কৰিছে।পৰ্টলেণ্ডৰ এই সিদ্ধান্তই এই প্ৰচেষ্টাসমূহতো প্ৰভাৱ পেলাব পাৰে।

ট্ৰাম্পৰ এই প্ৰচেষ্টাক আমেৰিকাৰ পৰম্পৰাৰ পৰা পৃথক বুলি গণ্য কৰা হৈছে,কাৰণ আমেৰিকাৰ ৰাষ্ট্ৰপতিসকলে সাধাৰণতে দেশৰ ভিতৰত সৈন্য নিয়োগ কৰাটো এৰাই চলি থাকে।এই প্ৰথা কেৱল বৃহৎ বিদ্ৰোহ, সশস্ত্ৰ আক্ৰমণ আদি ব্যতিক্ৰমী গোচৰৰ বাবেহে ৰখা হৈছে।

লগতে পঢ়ক; “ইমেইলযোগে ভোট দিয়া বন্ধ কৰক”; ভোটদানৰ ক্ষেত্ৰত ড’নাল্ড ট্ৰাম্পৰ মন্তব্য

প্ৰধানমন্ত্ৰী মোদী মোৰ ভাল বন্ধুঃ ট্ৰাম্প

আমেৰিকাৰ ৰাষ্ট্ৰপতি ড’নাল্ড ট্ৰাম্পে দীৰ্ঘদিন ধৰি ভাৰতৰ প্ৰধানমন্ত্ৰী নৰেন্দ্ৰ মোদীক বন্ধু বুলি অভিহিত কৰি আহিছে।এতিয়া ট্ৰাম্পে পুনৰবাৰ প্ৰধানমন্ত্ৰী মোদীক বন্ধু আৰু মহান ব্যক্তি বুলি অভিহিত কৰিছে।

ইয়াৰ সমান্তৰালকৈ ট্ৰাম্পেও শীঘ্ৰে ভাৰত ভ্ৰমণলৈ অহাৰ কথা ঘোষণা কৰিছে।উল্লেখ্য যে ড’নাল্ড ট্ৰাম্পে ইয়াৰ পূৰ্বে ২০২০ চনত ৰাষ্ট্ৰপতি হিচাপে প্ৰথম কাৰ্যসূচীৰ সময়ত ভাৰত ভ্ৰমণ কৰিছিল।

ভাৰত আৰু আমেৰিকাৰ মাজত বাণিজ্যিক আলোচনা অব্যাহত আছে। আমেৰিকাই ভাৰতীয় সামগ্ৰীৰ ওপৰত ২৫ শতাংশ শুল্ক আৰু ৰাছিয়াৰ পৰা তেল ক্ৰয়ৰ ওপৰত ২৫ শতাংশ অতিৰিক্ত শুল্ক আৰোপ কৰিছে।

এতিয়া এই বিষয়ত আৰু প্ৰধানমন্ত্ৰী  মোদীৰ সৈতে বাণিজ্যিক চুক্তিৰ আলোচনাৰ প্ৰশ্নত আমেৰিকাৰ ৰাষ্ট্ৰপতি গৰাকীয়ে কয়-“তেওঁ ভাল কৰি আছে, তেওঁ ৰাছিয়াৰ পৰা তেল ক্ৰয় কৰাটো প্ৰায় বন্ধ কৰি দিছে।

ট্ৰাম্পে লগতে কয় যে,“তেওঁ মোৰ বন্ধু, আৰু আমি কথা পাতো আৰু তেওঁ বিচাৰে মই তালৈ যাওঁ।আমি হিচাপ কৰিম, মই যাম…প্ৰধানমন্ত্ৰী মোদী এজন মহান ব্যক্তি আৰু মই ভাৰতলৈ যাম।”অহা বছৰ ভাৰত ভ্ৰমণৰ পৰিকল্পনা সন্দৰ্ভত ৰাষ্ট্ৰপতি ড’নাল্ড ট্ৰাম্পে কয় – “হয়,এয়া সম্ভৱ হ’ব পাৰে।”

লগতে পঢ়ক: “ইমেইলযোগে ভোট দিয়া বন্ধ কৰক”; ভোটদানৰ ক্ষেত্ৰত ড’নাল্ড ট্ৰাম্পৰ মন্তব্য