টেষ্ট শৃংখলাত ধৰাশায়ী টীম ইণ্ডিয়া
গুৱাহাটীত অনুষ্ঠিত দ্বিতীয়খন টেষ্টত দক্ষিণ আফ্ৰিকাই টীম ইণ্ডিয়াক ৪০৮ ৰানৰ বৃহৎ ব্যৱধানত পৰাস্ত কৰে । ৫৪৯ ৰানৰ লক্ষ্য অনুসৰণ কৰি ভাৰতৰ দ্বিতীয় ইনিংছ ১৪০ ৰানত সমাপ্ত হয় । এই টেষ্টত ভাৰতৰ বেটছমেনৰ নিৰাশাজনক প্ৰদৰ্শন দেখা যায় । প্ৰথম ইনিংছত মাত্ৰ যশস্বী জয়ছোৱালে অৰ্ধশতক আৰু দ্বিতীয় ইনিংছত ৰবীন্দ্ৰ জাডেজাইহে অৰ্ধশতক অৰ্জন কৰে । প্ৰথম ইনিংছতো টিম ইণ্ডিয়াই ২০১ ৰান কৰি অল আউট হয় । টেম্বা বাভুমাই এই শৃংখলাত অধিনায়ক হিচাপে কেতিয়াও টেষ্টত পৰাস্ত নোহোৱাৰ অভিলেখ বজাই ৰাখিছে । এই জয়ৰ লগে লগে দুখন মেচৰ টেষ্ট শৃংখলা দক্ষিণ আফ্ৰিকাই ২-০ ব্যৱধানত দখল কৰে ।
যোৱা ৭খন মেচত পঞ্চমটো পৰাজয়-
গুৱাহাটী টেষ্টত পৰাস্ত হোৱাৰ লগে লগে ঘৰুৱা মাটিত খেলা যোৱা ৭খন টেষ্টৰ ভিতৰত ৫ খন টেষ্টত পৰাস্ত হৈছে টীম ইণ্ডিয়া । যোৱা বছৰ একে মাহতে টীম ইণ্ডিয়াই ঘৰুৱা ক্ষেত্ৰত নিউজীলেণ্ডৰ হাতত টেষ্ট শৃংখলাত ৩-০ ব্যৱধানত পৰাস্ত হৈছিল । গুৱাহাটীৰ পূৰ্বে কলকাতাত টীম ইণ্ডিয়াই লজ্জাজনক প্ৰদৰ্শন কৰিছিল, য’ত খেলপথাৰক দোষাৰোপ কৰা হৈছিল যদিও ইয়াত আলহী দলৰ বেটছমেনসকলে উজ্জ্বল প্ৰদৰ্শন আগবঢ়াইছিল । তথাপিও এই খেলপথাৰত কোনো ভাৰতীয় বেটছমেনে আশাপ্ৰদ প্ৰদৰ্শনত ব্যৰ্থ হয় । প্ৰথম ইনিংছত ছেনুৰন মুথুস্বামীয়ে শতক (১০৯) অৰ্জন কৰাৰ বিপৰীতে বলাৰ মাৰ্কো জেন্সেনেও ভাৰতীয় বলাৰৰ বিৰুদ্ধে ৯৩ ৰানৰ শক্তিশালী ইনিংছ খেলে ।
ইফালে দক্ষিণ আফ্ৰিকাৰ হাতত টেষ্ট শৃংখলাত ০-২ ব্যৱধানত পৰাস্ত হোৱাৰ পাছত ভাৰত বিশ্ব টেষ্ট চেম্পিয়নশ্বিপ ২০২৫-২০২৭ পইণ্ট টেবুলত পঞ্চম স্থানলৈ অৱনমিত হৈছে ।
দক্ষিণ আফ্ৰিকাৰ প্ৰথম ইনিংছত ৪৮৯ ৰান-
টেম্বা বাভুমাই টছত জয়লাভ কৰি প্ৰথমে বেটিং কৰিবলৈ বাছি লয় । প্ৰথম উইকেটৰ বাবে ৮২ ৰানৰ অংশীদাৰিত্বৰে দলটোক সুদৃঢ় আৰম্ভণি কৰে এইডেন মাৰ্কৰাম (৩৮) আৰু ৰিয়ান ৰিকেল্টনে (৩৫) । তৃতীয় উইকেটৰ বাবে ট্ৰিষ্টান ষ্টাবছ (৪৯) আৰু টেম্বা বাভুমাই ৪১ ৰান সংগ্ৰহ কৰে । প্ৰথম ইনিংছত ভাৰতৰ বলাৰসকলৰ প্ৰদৰ্শন অতিশয় দু্ৰ্বল আছিল, যাৰ প্ৰমাণ নিম্ন ক্ৰমৰ বেটছমেন মাৰ্কো জেন্সেনৰ বিস্ফোৰক ৯৩ ৰানেৰে দক্ষিণ আফ্ৰিকাক মুঠ ৪৮৯ ৰান সংগ্ৰহ কৰাত সহায় কৰে ।
দক্ষিণ আফ্ৰিকাৰ হৈ প্ৰথম ইনিংছত ছেনুৰাণ মুথুস্বামীয়ে দুটা ছয় আৰু ১০টা চাৰিৰ সহায়ত ১০৯ ৰান সংগ্ৰহ কৰে । এয়া আছিল তেওঁৰ প্ৰথমটো টেষ্ট শতক । মাৰ্কো জেন্সেনে ৯৩ ৰানৰ বিস্ফোৰক ইনিংছত ৭টা ছয় কোবাই ইতিহাস ৰচনা কৰে । ভাৰতৰ বিৰুদ্ধে টেষ্ট ইনিংছত যৌথভাৱে সৰ্বাধিক ছয় কোবোৱা বেটছমেন হিচাপে পৰিগণিত হয় তেওঁ ।
ভাৰতৰ হৈ কুলদীপ যাদৱে প্ৰথম ইনিংছত সৰ্বাধিক চাৰিটা উইকেট দখল কৰিছিল যদিও তেওঁৰ ইকনমি ৰেট আছিল ৩.৯৪ । তেওঁ ১১৫ ৰান খৰচ কৰে । বুমৰাহ আৰু ছিৰাজে দুটাকৈ উইকেট দখল কৰে যদিও ৰান সংগ্ৰহক নিয়ন্ত্ৰণ কৰাত ব্যৰ্থ হয় ।
২০১ ৰানত সমাপ্ত টীম ইণ্ডিয়াৰ প্ৰথম ইনিংছ-
যশস্বী জয়ছোৱাল আৰু কে এল ৰাহুলে প্ৰথম উইকেটৰ বাবে ৬৫ ৰানৰ অংশীদাৰিত্ব গঢ়ি প্ৰথম ইনিংছত ভাৰতক সুদৃঢ় আৰম্ভণি প্ৰদান কৰে । অৱশ্যে ভাৰতৰ মিডল অৰ্ডাৰ সম্পূৰ্ণৰূপে ব্যৰ্থ হয় । ৰাহুল (২২)ক কেশৱ মহাৰাজে আউট কৰাৰ পাছত যশস্বী জয়ছোৱালে নিজৰ অৰ্ধশতক অৰ্জন কৰে । তেওঁৱো ৫৮ ৰানত ছাইমন হাৰমাৰৰ হাতত উইকেট বিসৰ্জন দিয়ে । এইটো ভাৰতৰ ৯৫ ৰানত দ্বিতীয়টো উইকেট আছিল । তাৰ পিছতে সপ্তমটো উইকেট আছিল ১২২ ৰানত । ইয়াৰ অৰ্থ হ’ল ভাৰতে মাত্ৰ ২৭ ৰানত ৬টা উইকেট হেৰুৱাইছিল ।
চাই সুদৰ্শন (১৫), ধ্ৰুৱ জুৰেল (০), ঋষভ পন্ট (৭), ৰবীন্দ্ৰ জাডেজা (৬) আৰু নীতিশ কুমাৰ ৰেড্ডী (১০) কম সময়তে আউট হয় । মাৰ্কো জেন্সেনে এই ইনিংছত ৬টা উইকেট দখল কৰে । কেৱল ৱাশ্বিংটন সুন্দৰ আৰু কুলদীপ যাদৱৰ অংশীদাৰিত্বই ভাৰতক ২০০ ৰান অতিক্ৰম কৰাত সহায় কৰে । সুন্দৰে ৪৮ ৰান সংগ্ৰহ কৰাৰ বিপৰীতে কুলদীপে ১৩৪ বলৰ সন্মুখীন হোৱাৰ পিছতো মাত্ৰ ১৯ ৰান সংগ্ৰহ কৰে ।
১৪০ ৰানত সীমাবদ্ধ টীম ইণ্ডিয়াৰ দ্বিতীয় ইনিংছ-
প্ৰথম ইনিংছত দক্ষিণ আফ্ৰিকাই ২৮৮ ৰানত অগ্ৰগতি লাভ কৰিছিল । আলহী দলটোৱে ২৬০/৫ ৰানত দ্বিতীয় ইনিংছ ঘোষণা কৰি ভাৰতক ৫৪৯ ৰানৰ লক্ষ্য নিৰ্ধাৰণ কৰে । দ্বিতীয় ইনিংছত ট্ৰিষ্টান ষ্টাবছে ৯৩ ৰান সংগ্ৰহ কৰে । ইয়াৰ পিছতে বাভুমাই ইনিংছ ঘোষণা কৰে ।
দ্বিতীয় ইনিংছতো টীম ইণ্ডিয়াৰ বেটিং ব্যৰ্থতা অব্যাহত থাকে । যশস্বী জয়ছোৱাল (১৩) আৰু কে এল ৰাহুলে (৬) ভাল আৰম্ভণিত ব্যৰ্থ হয় । জয়ছোৱালক জেন্সেনে আউট কৰাৰ বিপৰীতে কে এল ৰাহুল হাৰ্মাৰৰ বলত পেভিলিয়নমুখী হয় ।
আজি টেষ্টৰ অন্তিম দিনটোত ভাৰতৰ তৃতীয় উইকেট কুলদীপ যাদৱৰ ৰূপত পতন ঘটে । ইয়াৰ পিছতে ধ্ৰুৱ জুৰেল (২) আৰু ঋষভ পন্ট (১৩) কম সময়তে পেভিলিয়নমুখী হয় । সুদৰ্শনেও ১৪ ৰানত নিজৰ উইকেট বিসৰ্জন দিয়ে । ৰবীন্দ্ৰ জাডেজাই কিছু চেষ্টা কৰিছিল যদিও সেয়া যথেষ্ট নহ’ল । দুটা ছয় আৰু চাৰিটা চাৰিসহ ৫৪ ৰান সংগ্ৰহ কৰে তেওঁ । ভাৰতৰ দ্বিতীয় ইনিংছ ১৪০ ৰানত সমাপ্ত হয় । লগে লগে দক্ষিণ আফ্ৰিকাই ৪০৮ ৰানত বৃহৎ জয় সাব্যস্ত কৰে ।
এই ইনিংছত ছাইমন হাৰ্মাৰে সৰ্বাধিক ৬টা উইকেট দখল কৰে । তেওঁ এই মেচতে টেষ্ট কেৰিয়াৰৰ দ্বিতীয়টো ৫ উইকেট দখল কৰে । কেশৱ মহাৰাজে দুটা উইকেট দখল কৰে । মাৰ্কো জেন্সেন আৰু ছেনুৰণ মুথুস্বামীয়ে এটাকৈ উইকেট দখল কৰে ।
লগতে পঢ়ক : ঘোষণা হ’ল আই চি চি টি ২০ বিশ্বকাপৰ দিন; ১৫ ফেব্ৰুৱাৰীত ভাৰত-পাকিস্তানৰ যুঁজ
