ইজৰাইলৰ আক্ৰমণত ইৰাণৰ প্ৰতিৰক্ষা মন্ত্ৰী আমিৰ নাছিৰজাদেহ আৰু ৰিভল্যুচনেৰী গাৰ্ডছৰ কমাণ্ডাৰ মহম্মদ পাকপুৰৰ মৃত্যু হৈছে

মধ্যপ্ৰাচ্যত আমেৰিকা, ইজৰাইল আৰু ইৰাণৰ মাজত ক্ৰমাৎ বৃদ্ধি পোৱা সামৰিক সংঘাতে সমগ্ৰ অঞ্চলটোত উত্তেজনা বৃদ্ধি কৰিছে । কেইবাখনো দেশত আক্ৰমণ আৰু প্ৰত্যাক্ৰমণ চলি আছে, যাৰ ফলত যুদ্ধসদৃশ পৰিস্থিতিৰ সৃষ্টি হৈছে । ইফালে ৰয়টাৰে প্ৰকাশ কৰা অনুসৰি ইজৰাইলৰ আক্ৰমণত ইৰাণৰ প্ৰতিৰক্ষা মন্ত্ৰী আমিৰ নাছিৰজাদেহ আৰু ৰিভল্যুচনেৰী গাৰ্ডছৰ কমাণ্ডাৰ মহম্মদ পাকপুৰৰ মৃত্যু হৈছে ।

ৰয়টাৰৰ তথ্য অনুসৰি ইৰাণৰ প্ৰতিৰক্ষা মন্ত্ৰী আমিৰ নাছিৰজাদেহ আৰু ৰিভল্যুচনেৰী গাৰ্ডৰ কমাণ্ডাৰ মহম্মদ পাকপুৰ ইজৰাইলৰ আক্ৰমণত নিহত হৈছে । অৱশ্যে ইৰাণে এতিয়াও এই কথা আনুষ্ঠানিকভাৱে নিশ্চিত কৰা নাই ।

ইৰাণৰ কেইবাটাও গুৰুত্বপূৰ্ণ লক্ষ্যত আমেৰিকা আৰু ইজৰাইলে আক্ৰমণ কৰাৰ লগে লগে মধ্যপ্ৰাচ্যৰ পৰিস্থিতিৰ অধিক অৱনতি ঘটে । ইৰাণে এই কাৰ্যক নিজৰ সাৰ্বভৌমত্বৰ ওপৰত প্ৰত্যক্ষ আক্ৰমণ বুলি ঘোষণা কৰি প্ৰতিশোধমূলক আক্ৰমণ চলায় আৰু পৰৱৰ্তী সময়ত উপসাগৰীয় অঞ্চলত থকা আমেৰিকাৰ সামৰিক ঘাটিসমূহক লক্ষ্য কৰি লয় ।

কাটাৰ, বাহৰেইন, ইউ এ ই, চৌদি আৰৱতো বিস্ফোৰণ সংঘটিত হোৱাৰ খবৰ প্ৰকাশ পাইছে । কেইবাখনো দেশে নিজৰ বায়ু প্ৰতিৰক্ষা ব্যৱস্থা সক্ৰিয় কৰিছে । সাধাৰণ নাগৰিকক নিৰাপদ স্থানত আশ্ৰয় ল’বলৈ পৰামৰ্শ দিয়া হৈছে । সতৰ্কতামূলক ব্যৱস্থা হিচাপে অঞ্চলটোৰ বহু বিমানবন্দৰ, বিদ্যালয়, চৰকাৰী কাৰ্যালয় বন্ধ কৰি দিয়া হৈছে ।

ইফালে বৰ্ধিত এই সংঘাতে আন্তঃৰাষ্ট্ৰীয় পৰ্যায়ত তীব্ৰ প্ৰতিক্ৰিয়াৰ সৃষ্টি কৰিছে । ফ্ৰান্স, ৰাছিয়া, কাটাৰ, ইউৰোপীয় সংঘকে ধৰি কেইবাখনো দেশে ডি-এস্কেলেচন আৰু কূটনৈতিক সমাধানৰ আহ্বান জনাইছে । ৰাষ্ট্ৰসংঘতো শীঘ্ৰেই হস্তক্ষেপৰ দাবী উত্থাপন হৈছে । ইফালে ইজৰাইলৰ আক্ৰমণত ইৰাণৰ প্ৰতিৰক্ষা মন্ত্ৰী আৰু ৰিভল্যুচনেৰী গাৰ্ডৰ এজন শীৰ্ষ সেনাধ্যক্ষৰ মৃত্যু হোৱাৰ দাবীয়ে সংকট আৰু অধিক তীব্ৰতৰ কৰি তুলিছে ।

লগতে পঢ়ক : মধ্য প্ৰাচ্যত যুদ্ধৰ বিভীষিকা, এয়াৰ ইণ্ডিয়া আৰু ইণ্ডিগোৱে ল’লে ডাঙৰ সিদ্ধান্ত

মধ্যপ্ৰাচ্যৰ ৭টা আমেৰিকাৰ সামৰিক ঘাটিত বেলিষ্টিক মিছাইলেৰে আক্ৰমণ কৰিছে বুলি আন্তঃৰাষ্ট্ৰীয় সংবাদ মাধ্যমত খবৰ প্ৰকাশ পাইছে ।

ইজৰাইলৰ পিছত আমেৰিকাৰ বিৰুদ্ধে যুদ্ধ ঘোষণা কৰিছে ইৰাণে । দেশখনে মধ্যপ্ৰাচ্যৰ ৭টা আমেৰিকাৰ সামৰিক ঘাটিত বেলিষ্টিক মিছাইলেৰে আক্ৰমণ কৰিছে বুলি আন্তঃৰাষ্ট্ৰীয় সংবাদ মাধ্যমত খবৰ প্ৰকাশ পাইছে । যদি ইজৰাইলকো ধৰা হয় তেন্তে ইৰাণে একেলগে আঠখন দেশৰ বিৰুদ্ধে প্ৰত্যাক্ৰমণ আৰম্ভ কৰিছে । শেহতীয়া তথ্য অনুসৰি ইৰাণে ছৌদি আৰব, জৰ্ডান, বাহৰেইন, কুৱেইট, কাটাৰ, ইউ এ ইত অৱস্থিত আমেৰিকাৰ নৌসেনাৰ ঘাটিসমূহত আক্ৰমণ চলাইছে । বাহৰেইনে শনিবাৰে কয় যে এই ক্ষেপণাস্ত্ৰ আক্ৰমণ আমেৰিকাৰ নৌসেনাৰ ৫ম ফ্লীট মুখ্য কাৰ্যালয়ক লক্ষ্য কৰি লোৱা হৈছে ।

বাহৰেইনে শনিবাৰে কয় যে দেশখনত থকা আমেৰিকাৰ নৌসেনাৰ ৫ম ফ্লীটৰ মুখ্য কাৰ্যালয়ক লক্ষ্য কৰি ক্ষেপণাস্ত্ৰ আক্ৰমণ চলাইছে ইৰাণে । বাহৰেইনৰ মানমা চহৰতো বিস্ফোৰণৰ শব্দ শুনা গৈছে ।

ইৰাণে মধ্যপ্ৰাচ্যত থকা আমেৰিকাৰ সামৰিক ঘাটিৰ বিৰুদ্ধে ধাৰাবাহিকভাৱে ক্ষেপণাস্ত্ৰ আক্ৰমণ চলাইছে । ইউ এ ইৰ আল ধাফ্ৰা এয়াৰ বেছ, কুৱেইটত থকা আমেৰিকাৰ সামৰিক ঘাটি, ছৌদি আৰৱত থকা আমেৰিকাৰ ঘাটি আৰু বাহৰেইনত থকা আমেৰিকাৰ ঘাটিত ইৰাণে আক্ৰমণ চলাইছে । কাটাৰৰ ৰাজধানী ডোহাতো বিস্ফোৰণৰ শব্দ শুনা গৈছে । দোহাত থকা এয়াৰবেছ ইতিমধ্যে বন্ধ কৰি দিয়া হৈছে ।

সংযুক্ত আৰব আমিৰশ্বাহীতো আক্ৰমণ সংঘটিত কৰিছে কৰিছে ইৰাণে । কুৱেইট, ইউ এ ই, বাহৰেইনৰ কেইবাটাও আমেৰিকাৰ সামৰিক ঘাটিতো আক্ৰমণ কৰা হৈছে ।

বাহৰেইনৰ একাধিক স্থানত আক্ৰমণ-

বাহৰেইনৰ সংবাদ সংস্থাই কয় যে দেশৰ বাহিৰৰ পৰা হোৱা আক্ৰমণত একাধিক স্থানত লক্ষ্য কৰি লোৱা হৈছে । বাহৰেইনে এই আক্ৰমণক দেশৰ সাৰ্বভৌমত্ব আৰু নিৰাপত্তাৰ প্ৰকাশ্য উলংঘা বুলি অভিহিত কৰি বাহৰেইন কৰ্তৃপক্ষই “জৰুৰীকালীন ব্যৱস্থা” ৰূপায়ণ কৰিছে বুলি কয় ।

কাটাৰত একাধিক বিস্ফোৰণ-

কাটাৰত মোবাইল ফোনত ৱাৰ্নিং এলাৰ্ট বাজিছিল, য’ত মানুহক আশ্ৰয় বিচাৰিবলৈ আহ্বান জনোৱা হয় । কাটাৰৰ আকাশমাৰ্গ বন্ধ কৰি দিয়া হৈছে আৰু সকলো বিমান সেৱা বাতিল কৰা হৈছে ।

কাটাৰ এয়াৰৱেজ গ্ৰুপে নিশ্চিত কৰিছে যে কাটাৰ এয়াৰৱেজৰ গ্ৰাউণ্ডিঙৰ বাবে ডোহালৈ অহা-যোৱা কৰা বিমান সেৱা সাময়িকভাৱে বন্ধ হৈ পৰিছে । বিমান সংস্থাটোৱে চৰকাৰী অংশীদাৰ আৰু সংশ্লিষ্ট কৰ্তৃপক্ষৰ সৈতে ক্ষতিগ্ৰস্ত যাত্ৰীসকলক সহায় কৰি আছে আৰু আকাশমাৰ্গ পুনৰ মুকলি হ’লেই বিমান সেৱা পুনৰ আৰম্ভ কৰিব বুলি কৈছে ।

কুৱেইটত চাইৰেন আৰু বিস্ফোৰণৰ খবৰ-

প্ৰত্যক্ষদৰ্শীয়ে কুৱেইটৰ আমেৰিকান সেনা কেন্দ্ৰত চাইৰেন আৰু বিস্ফোৰণৰ শব্দ শুনা বুলি জনাইছে । কাটাৰৰ আল উবাইদ এয়াৰ বেছ আক্ৰমণৰ লগতে কুৱেইটৰ আল চেলেম এয়াৰ বেছকো আক্ৰমণ কৰা হয় । ইউ এ ইৰ আল ধাফ্ৰা এয়াৰ বেছত আক্ৰমণ কৰা হৈছে বুলি জানিব পৰা গৈছে । তদুপৰি বাহৰেইনত থকা আমেৰিকাৰ সামৰিক ঘাটিত ইৰাণে ধাৰাবাহিকভাৱে আক্ৰমণ চলায় ।

আবুধাবিত এজন লোকৰ মৃত্যু-

ইৰাণৰ এই আক্ৰমণত চৌদি আৰৱৰ ৰাজধানী ৰিয়াদ আৰু ইউ এ ইৰ ডুবাই আৰু আবুধাবিক লক্ষ্য কৰি লোৱা হয় । আবুধাবিত এজন লোকৰ মৃত্যু হোৱা বুলি জানিব পৰা গৈছে । ডুবাইত এক শক্তিশালী বিস্ফোৰণৰ খবৰ পোৱা গৈছে । ইৰাণৰ আক্ৰমণৰ প্ৰত্যুত্তৰ জনোৱাৰ কথা উল্লেখ কৰিছে ইউ এ ইয়ে ।

ইৰাকত দুজন লোক নিহত-

শনিবাৰে বাগদাদৰ দক্ষিণে থকা জুৰ্ফ আল-ছাখৰত বিমান আক্ৰমণৰ পিছত কমেও চাৰিটা বিস্ফোৰণত ইৰাকৰ দুজন যোদ্ধা নিহত হোৱাৰ লগতে আন তিনিজন গুৰুতৰভাৱে আহত হয় ।

লগতে পঢ়ক : ইৰাণে ইজৰাইলক দিছে প্ৰত্যুত্তৰ; ৭০টা বেলিষ্টিক মিছাইল নিক্ষেপ,টেল আভিভত বাজিছে চাইৰেন

আমেৰিকাৰ ৰাষ্ট্ৰপতি ড’নাল্ড ট্ৰাম্পে ইৰাণৰ সৈতে চুক্তিৰ আশা প্ৰকাশ কৰিছে যদিও ধৰি আলোচনা স্থবিৰ হৈ ৰৈছে

আমেৰিকাৰ বিমানবাহী যুদ্ধ জাহাজ পশ্চিম এছিয়াৰ কাষ চাপি অহাৰ সময়তে ইৰাণে বৃহস্পতিবাৰে ৰাছিয়াৰ সৈতে বাৰ্ষিক সামৰিক অনুশীলন অনুষ্ঠিত কৰে । ইফালে আমেৰিকা আৰু ইৰাণ দুয়োখন দেশেই তেহৰাণৰ পাৰমাণৱিক কাৰ্যসূচীক লৈ আলোচনা বিফল হ’লে যুদ্ধৰ বাবে সাজু হোৱাৰ ইংগিত দিছে ।

আমেৰিকাৰ ৰাষ্ট্ৰপতি ড’নাল্ড ট্ৰাম্পে ইৰাণৰ সৈতে চুক্তিৰ আশা প্ৰকাশ কৰিছে যদিও ধৰি আলোচনা স্থবিৰ হৈ ৰৈছে । ইৰাণে আমেৰিকা আৰু ইজৰাইলৰ দাবীৰ ওপৰত আলোচনা কৰিবলৈ অস্বীকাৰ কৰিছে । ইৰাণক ক্ষেপণাস্ত্ৰ কাৰ্যসূচী বাতিল কৰাৰ লগতে সশস্ত্ৰ সংগঠনৰ সৈতে সম্পৰ্ক বিচ্ছিন্ন কৰিবলৈ আমেৰিকা আৰু ইজৰাইলে দাবী জনাইছে । যোৱা কেইটামান সপ্তাহত পৰোক্ষ আলোচনাই কোনো বিশেষ অগ্ৰগতি লাভ কৰা নাই । এই সময়খিনি দুয়োপক্ষই যুদ্ধৰ চূড়ান্ত প্ৰস্তুতিৰ বাবে ব্যৱহাৰ কৰাৰ আশংকাও দেখা গৈছে ।

যোৱা বছৰ ইজৰাইল আৰু আমেৰিকাৰ সৈতে ১২ দিনীয়া সংঘাত আৰু জানুৱাৰী মাহত গণ প্ৰতিবাদৰ হিংসাত্মক দমনৰ পিছত ইৰাণ চৰকাৰ পূৰ্বতকৈ অধিক দুৰ্বল হৈ পৰিছে । ইয়াৰ পিছতো ইৰাণে ইজৰাইল আৰু আমেৰিকাৰ ঘাটি আক্ৰমণ কৰিবলৈ সক্ষম হৈ আছে আৰু যিকোনো আক্ৰমণে আঞ্চলিক যুদ্ধৰ সূচনা কৰিব পাৰে বুলি সকীয়াই দিছে । ইৰাণে এই সপ্তাহত হৰমুজ জলদ্বীপত লাইভ ফায়াৰ অনুশীলন চলাইছিল, যাৰ মাজেৰে বিশ্বৰ ব্যৱসায়িক তেলৰ এক পঞ্চমাংশ পাৰ হৈ যায় ।

ভূমধ্য সাগৰত আমেৰিকাৰ যুদ্ধজাহাজ-

আমেৰিকাই অধিক যুদ্ধজাহাজ আৰু বিমান নিয়োগ কৰিছে আৰু ইউ এছ এছ জেৰাল্ড আৰ ফৰ্ড বিমানবাহী জাহাজ ভূমধ্য সাগৰত আছে । অৱশ্যে ইয়াৰ অৰ্থ এইটো নহয় যে আমেৰিকাই নিশ্চিতভাৱে ইৰাণক আক্ৰমণ কৰিব । কিন্তু ইমান বৃহৎ বাহিনী আৰু জাহাজৰ আগমনে ট্ৰাম্পৰ আক্ৰমণৰ ক্ষমতা অধিক শক্তিশালী কৰি তুলিছে । ইচ্ছা কৰিলে এতিয়া আমেৰিকাই ইৰাণ আক্ৰমণ কৰিব পাৰে ।

লগতে পঢ়ক : দক্ষিণ কোৰিয়াৰ প্ৰাক্তন ৰাষ্ট্ৰপতিক যাৱজ্জীৱন কাৰাদণ্ড; দেশত জাৰি কৰিছিল সামৰিক আইন

আমেৰিকাই এতিয়া নিজৰ সৰ্ববৃহৎ বিমানবাহী জাহাজ ইউ এছ এছ গেৰাল্ড আৰ ফৰ্ড ইৰাণৰ কাষৰীয়া অঞ্চললৈ প্ৰেৰণ কৰিছে বুলি বাতৰি প্ৰকাশ পাইছে ।

আমেৰিকা আৰু ইৰাণৰ মাজত ক্ৰমাৎ বৃদ্ধি পাইছে উত্তেজনা । ইফালে আমেৰিকাই মধ্যপ্ৰাচ্যত সামৰিক উপস্থিতিও বৃদ্ধি কৰিছে । শেহতীয়াকৈ আমেৰিকাই এতিয়া নিজৰ সৰ্ববৃহৎ বিমানবাহী জাহাজ ইউ এছ এছ গেৰাল্ড আৰ ফৰ্ড ইৰাণৰ কাষৰীয়া অঞ্চললৈ প্ৰেৰণ কৰিছে বুলি বাতৰি প্ৰকাশ পাইছে ।

প্ৰকাশিত বাতৰি অনুসৰি এই যুদ্ধ জাহাজখন মধ্যপ্ৰাচ্যলৈ যাবলৈ এসপ্তাহ সময় লাগিব, য’ত ইতিমধ্যে আব্ৰাহাম লিংকন কেৰিয়াৰ আৰু অন্যান্য যুদ্ধ জাহাজ নিয়োজিত হৈ আছে । এই পদক্ষেপে ইৰাণৰ ওপৰত সাগৰ আৰু আকাশ উভয়ৰে পৰা সামৰিক হেঁচা বৃদ্ধি কৰাৰ সম্ভাৱনা আছে ।

বিমান পৰিবাহী এই যুদ্ধ জাহাজখন পাৰমাণৱিক শক্তিসম্পন্ন আৰু ইয়াত এফ-১৮ ছুপাৰ হৰ্নেট যুদ্ধ বিমান আৰু ই-২ হকআই আৰ্লি ৱাৰ্নিং বিমানকে ধৰি ৭৫খনতকৈও অধিক সামৰিক বিমান নিয়োগ কৰিব পৰা যায় । ইয়াৰ উপৰিও ইয়াত অত্যাধুনিক ৰাডাৰ ব্যৱস্থা আছে যিয়ে যুদ্ধ বিমান চলাচল আৰু নেভিগেচন নিয়ন্ত্ৰণ কৰাত সহায় কৰে ।

ইউ এছ এছ গেৰাল্ড আৰ ফৰ্ড প্ৰথমে ইউৰোপত নিয়োজিত হোৱাৰ কথা আছিল যদিও নৱেম্বৰ মাহত হঠাতে কেৰিবিয়ান সাগৰলৈ স্থানান্তৰ কৰা হয় । এই যুদ্ধ জাহাজে ভেনিজুৱেলাত আমেৰিকাৰ অভিযানতো অংশগ্ৰহণ কৰিছিল । ইয়াৰ উপৰিও যোৱা কেইটামান সপ্তাহত মধ্যপ্ৰাচ্যত কেইবাখনো গাইডেড মিছাইল ডেষ্ট্ৰয়াৰ, যুঁজাৰু বিমান, নিৰীক্ষণ বিমান নিয়োগ কৰা হৈছে ।

উল্লেখ্য যে, আমেৰিকান নৌসেনাৰ ১১খন বিমানবাহী জাহাজ আছে, যাৰ বাবে ইয়াক এক মূল্যৱান সম্পদ হিচাপে পৰিগণিত কৰা হয় আৰু ইয়াৰ নিয়োগৰ সময়সূচী পূৰ্বনিৰ্ধাৰিত । যোৱা জুন মাহত যেতিয়া ইৰাণ আৰু ইজৰাইলৰ মাজত যুদ্ধ আৰম্ভ হৈছিল, তেতিয়া ইৰাণৰ পাৰমাণৱিক স্থানত আক্ৰমণৰ সময়ত এই অঞ্চলত আমেৰিকাৰ দুখন বিমানবাহী যুদ্ধ জাহাজ আছিল । ৰাষ্ট্ৰপতি ড’নাল্ড ট্ৰাম্পেও কয় যে ইৰাণৰ সৈতে কোনো চুক্তি নহ’লে দ্বিতীয়খন কেৰিয়াৰ প্ৰেৰণ কৰাৰ কথা চিন্তা কৰিছে । তেওঁ কয় যে অহা এমাহৰ ভিতৰত ইৰাণৰ সৈতে চুক্তি হ’ব পাৰে, নহ’লে ইয়াৰ পৰিণতি ভয়াৱহ হ’ব ।

লগতে পঢ়ক : বাংলাদেশ নিৰ্বাচনত বিএনপিৰ আকৰ্ষণীয় প্ৰদৰ্শন, প্ৰধানমন্ত্ৰী হ’বলৈ সাজু তাৰিক ৰহমান