ভাৰত আৰু আফগানিস্তানৰ মাজৰ একমাত্ৰ টেষ্ট মেচখনত ভাৰতীয় দলে এক ঐতিহাসিক জয় সাব্যস্ত কৰিছে
মুল্লনপুৰৰ (নিউ চণ্ডীগড়) মহাৰাজ যাদৱিন্দ্ৰ সিং আন্তঃৰাষ্ট্ৰীয় ক্ৰিকেট ষ্টেডিয়ামত অনুষ্ঠিত হোৱা ভাৰত আৰু আফগানিস্তানৰ মাজৰ একমাত্ৰ টেষ্ট মেচখনত ভাৰতীয় দলে এক ঐতিহাসিক জয় সাব্যস্ত কৰিছে । আলহী দল আফগানিস্তানক এক ইনিংছ আৰু ৩০০ ৰানৰ এক বৃহৎ ব্যৱধানত ধূলিস্যাৎ কৰি ট্ৰফী আজুৰি আনিলে টিম ইণ্ডিয়াই । মেচখন অতি আকৰ্ষণীয়ভাৱে তৃতীয় দিনাৰ (৮ জুন) তৃতীয়টো সত্ৰতে সমাপ্ত হয় । উল্লেখযোগ্য যে, ৰানৰ ব্যৱধানৰ হিচাপত টেষ্ট ক্ৰিকেটৰ ইতিহাসত ভাৰতীয় দলৰ এয়া আটাইতকৈ ডাঙৰ জয় । ইয়াৰ পূৰ্বে ২০১৮ চনৰ অক্টোবৰ মাহত ৰাজকোটত ৱেষ্ট ইণ্ডিজৰ বিৰুদ্ধে ভাৰতে এক ইনিংছ আৰু ২৭২ ৰানত জয়লাভ কৰিছিল, যিটো অভিলেখ এই মেচখনত ভংগ হ’ল ।
প্ৰথম ইনিংছত ভাৰতৰ ৰানৰ পাহাৰ-
মেচৰ প্ৰথম দিনা ভাৰতৰ অধিনায়ক শুভমন গীলে টছত জিকি প্ৰথমে বেটিং কৰাৰ সিদ্ধান্ত লৈছিল । অধিনায়কৰ এই সিদ্ধান্তক যোগ্য প্ৰমাণিত কৰি ভাৰতীয় বেটাৰসকলে প্ৰথম ইনিংছত ৮ টা উইকেট হেৰুৱাই ৫৬৪ ৰানৰ এক বিশাল স্ক’ৰ থিয় কৰায় আৰু ইনিংছ ঘোষণা কৰে ।
ভাৰতৰ হৈ অধিনায়ক শুভমন গীলে সুন্দৰ ফৰ্ম অক্ষুণ্ণ ৰাখি ১৭৭ টা বলত ১২৬ ৰানৰ এক চমকপ্ৰদ ইনিংছ খেলে (১৫ টা চাৰি আৰু ১ টা ছয়)। এয়া আছিল গীলৰ টেষ্ট কেৰিয়াৰৰ ১১ সংখ্যক শতৰান । আনহাতে, তেওঁক যোগ্য সংগ দি অপেনিং বেটছমেন কে এল ৰাহুলে ১৬৫ টা বলত ১১ টা চাৰিৰ সহায়ত ১০০ ৰান সম্পূৰ্ণ কৰে । ৰাহুলৰ টেষ্ট কেৰিয়াৰৰ এয়া ১২ সংখ্যক শতৰান । ইয়াৰ উপৰিও ছাই সুদৰ্শন (৮১ ৰান), উইকেটকীপাৰ বেটাৰ ঋষভ পন্ট (৮১ ৰান) আৰু অলৰাউণ্ডাৰ ৱাশ্বিংটন সুন্দৰে (অপৰাজিত ৫২ ৰান) অৰ্ধশতৰান অৰ্জন কৰি দলৰ স্ক’ৰ ৫৫০ পাৰ কৰাত সহায় কৰে । আফগানিস্তানৰ হৈ ফাষ্ট বলাৰ মহম্মদ চেলিম চাফীয়ে সৰ্বাধিক ৬ টা উইকেট লাভ কৰিবলৈ সক্ষম হয় ।
প্ৰথম ইনিংছত আফগানিস্তানৰ বিপৰ্যয় : মানব সুথাৰৰ বিধ্বংসী স্পীন
৫৬৪ ৰানৰ লক্ষ্য অনুসৰণ কৰিবলৈ নামি আফগান দলটো প্ৰথম ইনিংছত তীব্ৰ বেটিং বিপৰ্যয়ৰ সন্মুখীন হয় । দ্বিতীয় দিনাৰ খেল শেষ হোৱালৈকে দলটোৱে মাত্ৰ ১১৩ ৰানতে ৫ টা গুৰুত্বপূৰ্ণ উইকেট হেৰুৱাইছিল । নিজৰ অভিষেক মেচ খেলা ভাৰতীয় যুৱ স্পীনাৰ মানব সুথাৰে আফগান বেটিং লাইন-আপক সম্পূৰ্ণৰূপে বিধ্বস্ত কৰে । তেওঁ প্ৰথম ইনিংছত মাত্ৰ ১৫২ ৰানতে আফগানিস্তানক অল-আউট কৰি এক অকলে ৬ টা উইকেট বুটলি লয় । আনহাতে বেগী বলাৰ প্ৰসিদ্ধ কৃষ্ণাই ৩ টা উইকেট লাভ কৰে । আফগানিস্তানৰ হৈ কেৱল ৰহমত শ্বাহে অলপ যুঁজ দি ৬০ ৰানৰ এক ধৈৰ্য্যশীল ইনিংছ খেলে । ইয়াৰ সৈতে তেওঁ ভাৰতৰ বিৰুদ্ধে টেষ্ট মেচত অৰ্ধশতৰান কৰা প্ৰথমগৰাকী আফগান বেটছমেন হিচাপে পৰিগণিত হয় ।
ফলো-অনৰ সন্মুখীন আফগানিস্তান: দ্বিতীয় ইনিংছত ১১২ ৰানতে মষিমূৰ
প্ৰথম ইনিংছৰ আধাৰত ভাৰতে ৪১২ ৰানৰ এক বিশাল অগ্ৰগতি লাভ কৰাৰ পাছত আফগানিস্তান ফলো-অনৰ সন্মুখীন হয় । কিন্তু দ্বিতীয় ইনিংছতো আফগান বেটাৰসকলে ভাৰতীয় বলাৰৰ আক্ৰমণ প্ৰতিহত কৰাত ব্যৰ্থ হয় । মহম্মদ চিৰাজে আৰম্ভণিতেই আব্দুল মলিকক (৮ ৰান) আউট কৰি প্ৰথম আঘাত সানে । ইয়াৰ পিছত নিয়মীয়া ব্যৱধানত উইকেট পতন ঘটি আফগানিস্তানৰ দ্বিতীয় ইনিংছটো মাত্ৰ ১১২ ৰানতে সংকুচিত হৈ পৰে ।
দ্বিতীয় ইনিংছত আফগানিস্তানৰ হৈ অপেনাৰ চেদিকুল্লাহ অতলে সৰ্বাধিক ৪২ ৰান কৰে । আনহাতে ৰহমানুল্লাহ গুৰবাজে ২৪ ৰান আৰু ৰহমত শ্বাহে ১৩ ৰান কৰে । আফগানিস্তানৰ বাকী কোনো এজন বেটছমেনে দহকৰ ঘৰ স্পৰ্শ কৰিব নোৱাৰিলে । আনকি দলটোৰ বেটাৰ শৰাফুদ্দিনে আঘাতপ্ৰাপ্ত হোৱাৰ বাবে বেটিং কৰিবলৈ খেলপথাৰলৈকে নামিব নোৱাৰিলে । দ্বিতীয় ইনিংছত ভাৰতৰ হৈ ৱাশ্বিংটন সুন্দৰে সুন্দৰ বলিং কৰি চাৰিটা উইকেট আৰু কুলদীপ যাদৱে তিনিটা উইকেট দখল কৰে ।
লগতে পঢ়ক : আফগানিস্তান শৃংখলাৰ পৰা বাহিৰ বিৰাট! ৰোহিত-হাৰ্দিকক লৈও ওলমিছে প্ৰশ্নবোধক
