আফগানিস্তানৰ বিৰুদ্ধে দ্বিতীয়খন এদিনীয়া খেলত দুৰ্দান্ত শতকেৰে ক্ৰিকেট জগতখনক স্তম্ভিত কৰি তুলিছিল শুভমান গিলে। গিলে এদিনীয়াত নিজৰ নৱমটো শতক অৰ্জন কৰে।
আফগানিস্তানৰ বিৰুদ্ধে দ্বিতীয়খন এদিনীয়া (ODI) মেচত শুভমান গিলে তেওঁৰ নৱমটো এদিনীয়া শতক অৰ্জন কৰে। এই শতকীয় ইনিংছৰ জৰিয়তে গিলে অধিনায়ক হিচাপে ৰাহুল দ্ৰাবিড়ৰ এক ডাঙৰ অভিলেখ ভংগ কৰে। ভাৰতৰ হৈ অধিনায়ক হিচাপে আটাইতকৈ বেছি শতক অৰ্জন কৰাৰ ক্ষেত্ৰত শুভমান গিল এতিয়া দ্ৰাবিড়তকৈ আগবাঢ়ি গৈছে। দ্ৰাবিড়ে অধিনায়ক হিচাপে ৬ টা শতক অৰ্জন কৰিছিল।
ইয়াৰ লগতে, আন্তঃৰাষ্ট্ৰীয় ক্ৰিকেটত আটাইতকৈ বেছি শতক অৰ্জন কৰা ভাৰতীয় বেটছমেনৰ তালিকাত শুভমান গিলে গৌতম গম্ভীৰকো পিছ পেলাইছে। গম্ভীৰে আন্তঃৰাষ্ট্ৰীয় ক্ৰিকেটত মুঠ ২০ টা শতক অৰ্জন কৰিছিল, আনহাতে শুভমান গিলৰ নামত এতিয়া আন্তঃৰাষ্ট্ৰীয় ক্ৰিকেটত ২১ টা শতক পঞ্জীয়ন হ’ল।
ক্ৰিকেটাৰ গৰাকীয়ে ভাৰতৰ মাটিত খেলি এদিনীয়াত ১,০০০ ৰান সম্পূৰ্ণ কৰিছে। ভাৰতত আটাইতকৈ কম ইনিংছত ১,০০০ এদিনীয়া ৰান সংগ্ৰহ কৰা বেটছমেনৰ তালিকাত শুভমান গিল এতিয়া শীৰ্ষস্থানত উপনীত হৈছে। তেওঁ মাত্ৰ ১৯ টা ইনিংছত ভাৰতৰ মাটিত এই কীৰ্তিচিহ্ন স্পৰ্শ কৰে। এই ক্ষেত্ৰত খেলুৱৈ গৰৈাকীয়ে বিৰাট কোহলীক পিছ পেলাইছে। কোহলীয়ে ভাৰতত ১,০০০ এদিনীয়া ৰান সম্পূৰ্ণ কৰিবলৈ ২৪ টা ইনিংছ লৈছিল। আনহাতে, শিখৰ ধৱনেও ২৪ টা ইনিংছতে ভাৰতৰ মাটিত ১,০০০ এদিনীয়া ৰান সম্পূৰ্ণ কৰাত সফল হৈছিল।
ইয়াৰ উপৰিও, শুভমান গিল ভাৰতৰ হৈ এদিনীয়াত আটাইতকৈ দ্ৰুতগতিত ৩,০০০ ৰান সম্পূৰ্ণ কৰা বেটছমেন হৈ পৰিছে। তেওঁ এদিনীয়াত মাত্ৰ ৬২ টা ইনিংছত ৩,০০০ ৰানৰ গণ্ডী পাৰ কৰে। উল্লেখ্য যে বিৰাট কোহলীয়ে ৭৫ টা ইনিংছত ৩,০০০ এদিনীয়া ৰান সম্পূৰ্ণ কৰিছিল।
সামগ্ৰিকভাৱে বিশ্ব ক্ৰিকেটত আটাইতকৈ দ্ৰুতগতিত ৩,০০০ এদিনীয়া ৰান সংগ্ৰহ কৰা দ্বিতীয়গৰাকী বেটছমেন হৈ পৰিছে শুভমান গিল। এদিনীয়া ক্ৰিকেটত আটাইতকৈ দ্ৰুতগতিত ৩,০০০ ৰান সম্পূৰ্ণ কৰাৰ বিশ্ব অভিলেখ হাশ্বিম আমলাৰ নামত আছে। আমলে ৫৭ টা ইনিংছত ৩,০০০ এদিনীয়া ৰান সম্পূৰ্ণ কৰিছিল।
কেৱল এয়াই নহয়, ভাৰতীয় অধিনায়কসকলৰ ভিতৰত আটাইতকৈ দ্ৰুত এদিনীয়া শতক অৰ্জন কৰা চতুৰ্থগৰাকী ভাৰতীয় বেটছমেন হিচাপে পৰিগণিত হৈছে শুভমান গিল। গিলে মাত্ৰ ৭৭ টা বলত নিজৰ শতক সম্পূৰ্ণ কৰে। উল্লেখ্য যে, ভাৰতৰ হৈ অধিনায়ক হিচাপে এদিনীয়াত আটাইতকৈ দ্ৰুত শতক অৰ্জন কৰাৰ অভিলেখ ৰোহিত শৰ্মাৰ নামত আছে। ৰোহিতে ২০২৩ চনত আফগানিস্তানৰ বিৰুদ্ধে মাত্ৰ ৬৩ টা বলত শতক কোবাইছিল।
লগতে পঢ়ক: ফিফা বিশ্বকাপ ২০২৬: সুদীৰ্ঘ ৬৮ বছৰৰ পাছত ঘটিল এই অঘটন!
