বাৰাসাতৰ সাংসদ ড° কাকলি ঘোষ দস্তিদাৰৰ পুত্ৰ ড° বৈদ্যনাথ ঘোষ দস্তিদাৰে তেওঁৰ বিৰুদ্ধে উত্থাপিত ৰাজনৈতিক বাক্যবাণক লৈ অতি শক্তিশালী স্থিতি গ্ৰহণ কৰিছে।
তৃণমূল কংগ্ৰেছত চলি থকা সংকটৰ মাজতে এক নতুন বিতৰ্ক পোহৰলৈ আহিছে। বাৰাসাতৰ টিএমচি সাংসদ ড০ কাকলি ঘোষ দস্তিদাৰৰ পুত্ৰ ড০ বৈদ্যনাথ ঘোষ দস্তিদাৰে দলৰ মুৰব্বী মমতা বেনাৰ্জী আৰু আন চাৰিগৰাকী প্ৰমুখ নেতালৈ আইনী জাননী প্ৰেৰণ কৰিছে। বৈদ্যনাথে স্পষ্ট কৰি দিছে যে তেওঁ বাৰাসাত বিধানসভা সমষ্টিৰ পৰা কেতিয়াও কোনো নিৰ্বাচনী টিকট বিচৰা নাছিল। ইয়াৰ লগতে তেওঁ টিএমচি নেতাসকলে তেওঁ আৰু তেওঁৰ পৰিয়ালৰ ওপৰত জাপি দিয়া আৰোপসমূহক সম্পূৰ্ণ কাল্পনিক আৰু ভিত্তিহীন বুলি অভিহিত কৰিছে।
আনহাতে, সোমবাৰে জাৰি হ’বলগীয়া এই জাননীত তেওঁ ১৫ দিনৰ ভিতৰত ৰাজহুৱা ক্ষমা প্ৰাৰ্থনা আৰু মন্তব্য প্ৰত্যাহাৰ কৰাৰ দাবী জনাইছে। তেনে নকৰিলে তেওঁ মানহানিৰ কঠোৰ আইনী ব্যৱস্থা গ্ৰহণ কৰিব বুলি হুংকাৰ দিছে।
আইনী জাননীখনৰ অনুসৰি, এগৰাকী প্ৰতিষ্ঠিত মনোৰোগ বিশেষজ্ঞ ড০ বৈদ্যনাথে স্পষ্ট কৰি দিছে যে তেওঁৰ কোনো ৰাজনৈতিক উচ্চাকাংক্ষা নাছিল। তেওঁ বাৰাসাত বিধানসভা সমষ্টিৰ পৰা কেতিয়াও কোনো ৰাজনৈতিক মনোনয়ন বা টিকট বিচৰা নাছিল।
তেওঁ জাননীখনত প্ৰকাশ কৰা অনুসৰি আই পেকৰ প্ৰতিনিধি আৰু বাৰাসাত জিলা টিএমচিৰ তৎকালীন সভাপতি সোহম পালে নিজেই হোৱাটছএপ আৰু ফোন কলৰ জৰিয়তে ড০ বৈদ্যনাথৰ সৈতে বহুবাৰ যোগাযোগ কৰিছিল।তেওঁলোকেহে ড০ বৈদ্যনাথক বাৰাসাতৰ পৰা নিৰ্বাচন খেলিবলৈ আৰু স্বাস্থ্য শিবিৰসমূহত অংশগ্ৰহণ কৰিবলৈ উৎসাহিত কৰিছিল।
প্ৰাক্তন বিধায়িকা সোনালী গুহৰ এটা মন্তব্যক লৈ ড০ বৈদ্যনাথ ঘোষ দস্তিদাৰে তীব্ৰ ক্ষোভ আৰু আপত্তি প্ৰকাশ কৰিছে। সোনালী গুহই দাবী কৰিছিল যে বৈদ্যনাথ, তেওঁৰ ভাতৃ আৰু মাতৃ ড০ কাকলি ঘোষ দস্তিদাৰে নিয়মিতভাৱে সুৰাপান কৰে। ড০ বৈদ্যনাথে এই মন্তব্যক সম্পূৰ্ণ মিছা বুলি আখ্যা দি ইয়াক তেওঁৰ চৰিত্ৰ হনন কৰাৰ এক ষড়যন্ত্ৰ বুলি অভিহিত কৰিছে।
অধিবক্তা পূজা শুক্লাৰ জৰিয়তে প্ৰেৰণ কৰা এই জাননীত পাঁচোগৰাকী নেতা— মমতা বেনাৰ্জী, সাংসদ কল্যাণ বেনাৰ্জী, সাংসদ সৌগত ৰায়, সাংসদ মহুৱা মৈত্ৰ আৰু সোনালী গুহক ভৱিষ্যতে বৈদ্যনাথৰ বিৰুদ্ধে এনেধৰণৰ যিকোনো মিছা মন্তব্য কৰাৰ পৰা বিৰত থাকিবলৈ কোৱা হৈছে। লগতে ভৱিষ্যতে তেওঁ বা তেওঁৰ পৰিয়ালৰ বিষয়ে কোনো প্ৰত্যক্ষ বা পৰোক্ষ মন্তব্য নকৰিবলৈও সকীয়াই দিয়া হৈছে।
জাননীখনত সতৰ্ক কৰি দিয়া হৈছে যে যদি ১৫ দিনৰ ভিতৰত ৰাজহুৱা স্পষ্টীকৰণ আৰু ক্ষমা খোজা নহয়, তেন্তে তেওঁ দেৱানী (Civil), ফৌজদাৰী (Criminal) আৰু অন্যান্য উপলব্ধ আইনী উপায়ৰ আশ্ৰয় ল’ব।
লগতে পঢ়ক: ‘সাংসদ-বিধায়কক ক্ৰয় কৰি তল পেলাব নোৱাৰে’; টিএমচিত বিভাজন সন্দৰ্ভত অভিষেক বেনাৰ্জীৰ প্ৰতিক্ৰিয়া
