বিশ্বকাপৰ মঞ্চলৈ প্ৰথমবাৰৰ বাবে যোগ্যতা অৰ্জন কৰা কেপ ভাৰ্ডেৰ মুখামুখি হৈছিল বৰ্তমানৰ ইউৰোপীয় চেম্পিয়ন স্পেইন
চলিত ফিফা বিশ্বকাপত সৃষ্টি হৈছে এক বিৰল অভিলেখ । ক্ৰীড়া পত্ৰিকা ‘দ্য এথলেটিক’-অৰ এক প্ৰতিবেদন অনুসৰি, সুদীৰ্ঘ ৬৮ বছৰৰ পাছত বিশ্বকাপৰ ইতিহাসত একেটা দিনতে চাৰিখনকৈ মেচ ড্ৰ’ হোৱাৰ ঘটনা ঘটিছে । ইয়াৰ পূৰ্বে ১৯৫৮ চনৰ ১৫ জুনত একেটা দিনতে অনুষ্ঠিত আঠখন মেচৰ ভিতৰত চাৰিখন খেল ড্ৰ’ হৈছিল । এই ঐতিহাসিক দিনটোত বিশ্ববাসীয়ে লাভ কৰিলে কেইবাটাও ৰোমাঞ্চকৰ ফুটবল মূহূৰ্ত ।
স্পেইনক ৰোধিলে নৱাগত কেপ ভাৰ্ডেয়ে
দিনটোৰ আটাইতকৈ ডাঙৰ বিপৰ্যয় দেখিবলৈ পোৱা গ’ল প্ৰথমখন মেচত । বিশ্বকাপৰ মঞ্চলৈ প্ৰথমবাৰৰ বাবে যোগ্যতা অৰ্জন কৰা কেপ ভাৰ্ডে (Cape Verde)ৰ মুখামুখি হৈছিল বিশ্বৰ দুই নম্বৰ স্থান প্ৰাপ্ত তথা বৰ্তমানৰ ইউৰোপীয় চেম্পিয়ন স্পেইন । কিন্তু আটলাণ্টাত অনুষ্ঠিত এই খেলখনত নৱাগত দলটোৱে এক অনবদ্য ডিফেঞ্চিভ মাষ্টাৰক্লাছ প্ৰদৰ্শন কৰি তাৰকাখচিত স্পেইনক ০-০ গ’লহীন ড্ৰ’ত ৰখিবলৈ সক্ষম হয় । সোমবাৰে খেলা এই খেলখনৰ পাছত ‘গ্ৰুপ এইচ’-ৰ সমীকৰণ এতিয়া সম্পূৰ্ণ মুকলি হৈ পৰিছে ।
অন্তিম মূহূৰ্তত জয়ৰ পৰা বঞ্চিত ইজিপ্ত
দিনটোৰ দ্বিতীয়খন খেলত ছিয়াটলত মুখামুখি হৈছিল ইজিপ্ত আৰু বেলজিয়াম । খেলৰ আৰম্ভণিতে ইমান আশুৰৰ এক ক্ষিপ্ৰ গ’লৰ সহায়ত ইজিপ্তে অগ্ৰগতি লাভ কৰি ইতিহাসৰ প্ৰথমটো বিশ্বকাপ জয়ৰ দিশে আগবাঢ়িছিল । কিন্তু দ্বিতীয়াৰ্ধত বেলজিয়ামৰ তাৰকা ষ্ট্ৰাইকাৰ ৰোমেলু লুকা কুৱে খেলপথাৰত প্ৰৱেশ কৰিয়েই ১ মিনিটৰ ভিতৰত ইজিপ্তৰ ডিফেণ্ডাৰক এটা অ’ন-গ’ল কৰিবলৈ বাধ্য কৰে । ফলত মেচখন ১-১ গ’লত ড্ৰ’ হয় ।
ৰোমাঞ্চকৰ মেচৰ অন্তত পইণ্ট ভগাই ল’লে উৰুগুৱে-চৌদি আৰৱ আৰু ইৰানে
মঙলবাৰে মায়ামীত অনুষ্ঠিত অন্য এখন হাই-ভল্টেজ মেচত উৰুগুৱে আৰু চৌদি আৰৱে ১-১ গ’লত ড্ৰ’ খেলে । খেলৰ ৮০ মিনিটত মেক্সিমিলিয়ানো আৰাউজোৰ গুৰুত্বপূৰ্ণ সমতা স্থাপনকাৰী গ’লটোৰ সহায়ত উৰুগুৱে পৰাজয়ৰ পৰা ৰক্ষা পৰে । এই ড্ৰ’ৰ ফলত ‘গ্ৰুপ এইচ’ৰ আটাইকেইটা দল ক্ৰমে স্পেইন, কেপ ভাৰ্ডে, উৰুগুৱে আৰু চৌদি আৰৱ ১ পইণ্টকৈ লাভ কৰি বৰ্তমান সমস্থানত আছে ।
আনহাতে, লছ এঞ্জেলছৰ ছ’ফাই ষ্টেডিয়ামত অনুষ্ঠিত দিনটোৰ অন্তিমখন খেলত ইৰান আৰু নিউজিলেণ্ডৰ মাজত তীব্ৰ প্ৰতিদ্বন্দিতা দেখিবলৈ পোৱা যায় । এই ৰোমাঞ্চকৰ মেচখন শেষত ২-২ গ’লত ড্ৰ’ হয় । বিশ্বকাপত নিজৰ সপ্তমখন মেচ খেলাৰ পিছতো নিউজিলেণ্ডে এতিয়ালৈকে প্ৰথম জয়ৰ সোৱাদ পাবলৈ সক্ষম হোৱা নাই ।
দেওবাৰে পৰৱৰ্তী যুঁজ
‘গ্ৰুপ জি’-ৰ পৰৱৰ্তী মেচসমূহ অহা দেওবাৰে অনুষ্ঠিত হ’ব । নকআউট পৰ্যায়ত প্ৰথমবাৰৰ বাবে প্ৰৱেশ কৰিবলৈ লক্ষ্য স্থিৰ কৰা ইৰানে বেলজিয়ামৰ বিৰুদ্ধে খেলিবলৈ পুনৰ লছ এঞ্জেলছলৈ উভতি আহিব । আনহাতে, নিউজিলেণ্ডে ভেংকুভাৰত ইজিপ্তৰ প্ৰত্যাহ্বানৰ সন্মুখীন হ’ব ।
লগতে পঢ়ক : বিশ্বকাপৰ গ্ৰুপ পৰ্যায়ৰ আটাইকেইখন মেচৰ পৰাই বাহিৰ নেইমাৰ!
