বুধবাৰে ভাৰত আৰু আফগানিস্তানৰ মাজত তিনিখনীয়া এদিনীয়া শৃংখলাৰ দ্বিতীয়খন খেল অনুষ্ঠিত হয়। খেলখনত ভাৰতে আগানিস্তানৰ বিৰুদ্ধে ১৭০ ৰানত জয়ী হয়।
ভাৰত আৰু আফগানিস্তানৰ মাজত অনুষ্ঠিত তিনিখনীয়া এদিনীয়া শৃংখলাৰ দ্বিতীয়খন খেল বুধবাৰে (১৭ জুন) লক্ষ্ণৌৰ ভাৰত ৰত্ন শ্ৰী অটল বিহাৰী বাজপেয়ী একানা ক্ৰিকেট ষ্টেডিয়ামত খেলা হয়। এই খেলখনত ভাৰতীয় দলে ১৭০ ৰানৰ ব্যৱধানত এক বৃহৎ জয় সাব্যস্ত কৰে।
খেলখনত ভাৰতীয় দলে প্ৰথমে বেটিং কৰি ৪৯.৫ অভাৰত ৪০২ ৰান সংগ্ৰহ কৰি অল-আউট হয়। প্ৰত্যুত্তৰত ৪০৩ ৰানৰ লক্ষ্য খেদিবলৈ আফগানিস্তানৰ দলটোৱে ৪৪.৩ অভাৰত মাত্ৰ ২৩২ ৰানতে থমকি ৰয়। এই বিজয়ৰ সৈতে ভাৰতীয় দলে তিনিখনীয়া এদিনীয়া শৃংখলাটোত ২-০ ব্যৱধানত অপ্ৰতিৰোধ্য অগ্ৰগতি লাভ কৰিছে। শৃংখলাৰ অন্তিমখন খেল ২০ জুনত চেন্নাইৰ এম এ চিদাম্বৰম ষ্টেডিয়ামত অনুষ্ঠিত হ’ব।
আফগান দলটোৰ আৰম্ভণি ভাল আছিল যদিও প্ৰয়োজনীয় ৰান ৰেট বেছি হোৱাৰ বাবে তেওঁলোকৰ ওপৰত চাপ বাঢ়ি গৈছিল। আফগানিস্তানৰ হৈ সৰ্বাধিক ৭৯ ৰান সংগ্ৰহ কৰে ৰহমত শ্বাহে। ৮৯ টা বলৰ ইনিংছত তেওঁ ৮ টা চাৰি কোবায়। আনহাতে, চেদিকুল্লাহ আটলে ৪২ ৰান আৰু ৰহমানুল্লাহ গুৰবাজে ৪১ ৰানৰ বৰঙণি যোগায়।
ভাৰতৰ হৈ অৰ্শদীপ সিং আৰু গুৰনুৰ ব্ৰাৰে ৩ টাকৈ উইকেট লাভ কৰে। অভিষেককাৰী প্ৰিন্স যাদৱে ২ টা সফলতা লাভ কৰাৰ বিপৰীতে ৱাশ্বিংটন সুন্দৰে ১ টা উইকেট দখল কৰে।
লক্ষ্ণৌত অনুষ্ঠিত এই খেলখনত যশস্বী জয়ছোৱাল আৰু কুলদীপ যাদৱে দললৈ প্ৰত্যাৱৰ্তন কৰে, আনহাতে প্ৰিন্স যাদৱৰো অভিষেক ঘটে। খেলখনত ভাৰতৰ আৰম্ভণি বেয়া আছিল। যশস্বী জয়ছোৱালে মহম্মদ চেলিম চাফীৰ বলত নাংগেয়ালিয়া খাৰোটিক কেচ দি মাত্ৰ ৪ ৰানতে বিদায় লয়। অৱশ্যে ইয়াৰ পিছত ৰোহিত শৰ্মা আৰু তৃতীয় স্থানত বেটিং কৰিবলৈ অহা শুভমন গিলে ধৈৰ্য্যসহকাৰে খেলিবলৈ আৰম্ভ কৰে। ৰোহিত শৰ্মা ৪৮ ৰানত ৰাছিদ খানৰ স্পিনৰ বলি হৈ ব’ল্ড হয়। ৰোহিত আউট হোৱাৰ লগে লগে ভাৰতৰ স্ক’ৰ ৯৬/২ হয়।
পিছত শুভমন গিলে ৩৮ টা বলত নিজৰ অৰ্ধশতক সম্পূৰ্ণ কৰে। আনফালে ঈশান কিষাণেও ৫২ টা বলত হাফ-চেঞ্চুৰী সম্পূৰ্ণ কৰে। ক্ৰীজত টিকি থকা শুভমন গিলে ৭৭ টা বলত শতক অৰ্জন কৰে। এদিনীয়াত গিলৰ এইটো নৱম শতক আছিল। শুভমনৰ পিছত ঈশানেও ৭১ টা বলত নিজৰ শতক সম্পূৰ্ণ কৰে। ঈশানৰ এদিনীয়া কেৰিয়াৰৰ এইটো দ্বিতীয়টো শতক আছিল। ঈশান কিষাণে ৭৯ টা বলত ১২৫ ৰানৰ এক বিস্ফোৰক ইনিংছ খেলি নাংগেয়ালিয়া খাৰোটিৰ বলত কেচ আউট হয়। তেওঁৰ ইনিংছত ১৪ টা চাৰি আৰু ৭ টা ছিক্সাৰ অন্তৰ্ভুক্ত আছিল।
আফগানিস্তানৰ স্পিনাৰ নাংগেয়ালিয়া খাৰোটিয়ে মাত্ৰ কেইটামান অভাৰতে খেলৰ গতি সলনি কৰাৰ চেষ্টা চলায়। ৪২.৩ অভাৰত তেওঁ সুন্দৰ বেটিং কৰি থকা শুভমন গিলক ১৫৪ ৰানত আউট কৰে। গিলে ৰিভাৰ্ছ চুইপ খেলিবলৈ গৈ ডিপ কভাৰত কেচ দিয়ে। ইয়াৰ পিছৰ বলতে কে এল ৰাহুলে খাতা নোখোলাকৈয়ে লং অনত কেচ আউট হয়।
লগতে পঢ়ক: ODI ত শুভমান গিলৰ বেটেৰে ধুমুহা; ১৫৪ ৰান সংগ্ৰহ কৰি ইতিহাস সৃষ্টি
