তৃতীয়বাৰৰ বাবে চৰকাৰ গঠনৰ দিশে এনডিএ! ধূলিস্যাৎ বিৰোধীৰ দুৰ্গ
তৃতীয়টো কাৰ্যকালৰ বাবে সাজু হৈছে বিজেপি নেতৃত্বাধীন এনডিএ চৰকাৰে। অসমত ধূলিস্যাৎ হোৱাৰ দিছে বিৰোধীৰ দুৰ্গ।
অসমত বিজেপি নেতৃত্বাধীন নেচনেল ডেমক্ৰেটিক এলায়েন্স এক নিৰ্ণায়ক আৰু বৃহৎ বিজয়ৰ দিশে অগ্ৰসৰ হোৱাৰ লগে লগে ভাৰতীয় জনতা পাৰ্টীয়ে পুনৰ ক্ষমতা দখল কৰাটো নিশ্চিত হৈ পৰিছে । নিৰ্বাচন আয়োগৰ শেহতীয়া তথ্য অনুসৰি, ১২৬ জনীয়া বিধানসভাত সংখ্যাগৰিষ্ঠতাৰ সীমা অতিক্ৰম কৰি বিজেপিয়ে ৯৯খন আসনত আগবাঢ়ি থকাৰ বিপৰীতে কংগ্ৰেছ মাত্ৰ ২৫খন আসনত আগবাঢ়ি আছে । ইয়াৰ লগে লগে ভোট গণনা চলি থকাৰ মাজতে মুখ্যমন্ত্ৰী ড০ হিমন্ত বিশ্ব শৰ্মা একেৰাহে তৃতীয়টো কাৰ্যকালৰ বাবে সাজু হৈছে ।
ভাৰতীয় নিৰ্বাচন আয়োগৰ শেহতীয়া তথ্য অনুসৰি, বিজেপিয়ে ৯৯খন আসনত, ভাৰতীয় জাতীয় কংগ্ৰেছে ২৫খন আসনত আৰু ইয়াৰ পিছতে বড়োলেণ্ড পিপলছ ফ্ৰণ্ট (BPF) আৰু অসম গণ পৰিষদে ১০খনকৈ আসনত অগ্ৰগতি লাভ কৰিছে । আনহাতে, AIUDF ২খন আসনত আগবাঢ়ি থকাৰ বিপৰীতে UPPL আৰু ৰাইজৰ দল ১খনকৈ আসনত আগবাঢ়ি আছে । ইয়াৰ লগে লগে বিজেপিয়ে এক স্পষ্ট প্ৰাৰম্ভিক সংখ্যাগৰিষ্ঠতা লাভ কৰিছে ।
জালুকবাৰীৰ পৰা প্ৰতিদ্বন্দ্বিতা কৰা মুখ্যমন্ত্ৰী ড০ হিমন্ত বিশ্ব শৰ্মাই ৩৯,২১৪ টা ভোট লাভ কৰিছে । ১৮ ৰাউণ্ডৰ গণনাৰ ভিতৰত ষষ্ঠ ৰাউণ্ডলৈকে তেওঁ কংগ্ৰেছ প্ৰাৰ্থী বিদিশা নেওগৰ (১৫,২৮৩ ভোট) তুলনাত ২৩,৯৩১ টা ভোটত গ্ৰগতি লাভ কৰিছে । ইফালে দিছপুৰ বিধানসভা সমষ্টিত বিজেপি প্ৰাৰ্থী প্ৰদ্যুত বৰদলৈয়ে এক শক্তিশালী অগ্ৰগতি অক্ষুণ্ণ ৰাখিছে; তেওঁ নটা ৰউণ্ডৰ গণনাৰ অন্তত ৫৭,২৫০ টা ভোট লাভ কৰাৰ লগতে কংগ্ৰেছ প্ৰাৰ্থী মীৰা বৰঠাকুৰ গোস্বামীৰ (২১,৯৬৫ ভোট) বিৰুদ্ধে ৩৫,২৮৫ টা ভোটত অগ্ৰগতি লাভ কৰিছে ।
আনহাতে, নিৰ্বাচন আয়োগৰ দহটা ৰাউণ্ডৰ গণনাৰ ধাৰা অনুসৰি যোৰহাট বিধানসভা সমষ্টিত কংগ্ৰেছ প্ৰাৰ্থী গৌৰৱ গগৈ পিছ পৰি আছে । বিজেপি প্ৰাৰ্থী হিতেন্দ্ৰ নাথ গোস্বামীয়ে ৪৮,১৩৮ টা ভোট লাভ কৰি আগবাঢ়ি থকাৰ বিপৰীতে গৌৰৱ গগৈয়ে ৩২,২০৬ টা ভোট লাভ কৰিছে । প্ৰাৰম্ভিক ধাৰাসমূহে এই সমষ্টিটোত এক তীব্ৰ প্ৰতিদ্বন্দ্বিতাৰ ইংগিত দিছে ।
ইফালে বহু চৰ্চিত খোৱাং সমষ্টিত এক তীব্ৰ নিৰ্বাচনী যুঁজ পৰিলক্ষিত হৈছে । এই সমষ্টিটোত ১৫ ৰাউণ্ডৰ ভিতৰত ৮ টা ৰাউণ্ডৰ গণনাৰ অন্তত বিজেপি প্ৰাৰ্থী চক্ৰধৰ গগৈয়ে ৩৮,৮৪০ টা ভোট লাভ কৰাৰ বিপৰীতে তেওঁৰ নিকটতম প্ৰতিদ্বন্দ্বি অজাপৰ সভাপতি লুৰীণজ্যোতি গগৈয়ে ২৯,৫১৮ টা ভোট লাভ কৰিছে । তেওঁ বিজেপিৰ প্ৰাৰ্থীগৰাকীতকৈ ৯,৩২২ টা ভোটত পিছ পৰি আছে । ইফালে শিৱসাগৰ সমষ্টিটো তুমুল প্ৰতিদ্বন্দ্বিতা দেখা গৈছে । এই সমষ্টিটোত বিজেপি প্ৰাৰ্থী কুশল দুৱৰী তেওঁৰ নিকটতম প্ৰতিদ্বন্দ্বি ৰাইজৰ দলৰ সভাপতি অখিল গগৈতকৈ ৯৩৩ টা ভোটত পিছ পৰি আছে ।
লগতে পঢ়ক: তামিলনাডুত ইতিহাস সৃষ্টিৰ দিশে থালাপথী বিজয়ৰ TVK
