ৰাষ্ট্ৰপতি ভৱনত অনুষ্ঠিত হৈ যোৱা পদ্মশ্ৰী বঁটা প্ৰদান অনুষ্ঠানত ভাৰতীয় ক্ৰিকেট দলৰ প্ৰাক্তন অধিনায়ক ৰোহিত শৰ্মাৰ অনুপস্থিতিয়ে এতিয়া ক্ৰীড়াপ্ৰেমীসকলৰ মাজত তীব্ৰ চৰ্চাৰ সৃষ্টি কৰিছে
অলপতে ৰাষ্ট্ৰপতি ভৱনত অনুষ্ঠিত হৈ যোৱা পদ্মশ্ৰী বঁটা প্ৰদান অনুষ্ঠানত ভাৰতীয় ক্ৰিকেট দলৰ প্ৰাক্তন অধিনায়ক ৰোহিত শৰ্মাৰ অনুপস্থিতিয়ে এতিয়া ক্ৰীড়াপ্ৰেমীসকলৰ মাজত তীব্ৰ চৰ্চাৰ সৃষ্টি কৰিছে । বিগত ২৫ মে’ত দেশৰ চতুৰ্থ সৰ্বোচ্চ নাগৰিক সন্মান ‘পদ্মশ্ৰী’ বিতৰণৰ বাবে আয়োজন কৰা বিশেষ সমাৰোহত উপস্থিত নাথাকিল তাৰকা ক্ৰিকেটাৰগৰাকী । তেওঁৰ এই অনুপস্থিতিক লৈ বিভিন্ন মহলত নানান প্ৰশ্ন উত্থাপন হোৱাৰ পাছতে এতিয়া ইয়াৰ প্ৰকৃত কাৰণ পোহৰলৈ আহিছে ।
ব্যস্ত ক্ৰীড়াসূচী আৰু আই পি এলৰ বাবেই হ’ল এই খেলিমেলি-
জানিব পৰা মতে, বৰ্তমানৰ ব্যস্ত ক্ৰীড়াসূচী আৰু শেহতীয়াকৈ সমাপ্ত হোৱা আই পি এল ২০২৬-ৰ বাবেই ৰোহিত শৰ্মাই উক্ত অনুষ্ঠানত অংশ ল’ব নোৱাৰিলে । চলিত বৰ্ষৰ আই পি এলত মুম্বাই ইণ্ডিয়ানছৰ হৈ খেলিছিল হিটমেন-খ্যাত বেটাৰগৰাকীয়ে । উল্লেখযোগ্য যে, ভাৰতীয় মহিলা ক্ৰিকেট দলৰ অধিনায়ক হাৰমনপ্ৰীত কৌৰেও এই বৰ্ষত পদ্মশ্ৰী বঁটা লাভ কৰিবলৈ সক্ষম হৈছে ।
এতিয়া কেতিয়া সন্মানিত কৰা হ’ব ৰোহিতক ?
পদ্ম বঁটা প্ৰদানৰ এক নিয়ম অনুসৰি, মাননীয় ৰাষ্ট্ৰপতিয়ে মনোনীত সকলো ব্যক্তিকে একেদিনাই এই সৰ্বোচ্চ সন্মানেৰে বিভূষিত নকৰে । বঁটা প্ৰাপকসকলৰ সুবিধা আৰু সময়সূচী অনুসায়ী ভিন্ন তাৰিখত বিভিন্ন দল বা বেচ (batch) হিচাপে এই বঁটাসমূহ বিতৰণ কৰা হয় ।
প্ৰাথমিক সূচী অনুসৰি ৰোহিত শৰ্মাক প্ৰথমটো বেচতে অন্তৰ্ভুক্ত কৰা হৈছিল । কিন্তু আই পি এলৰ অতি ব্যস্ত সূচীৰ বাবে তেওঁৰ নাম পৰৱৰ্তী এটা বেচত অন্তৰ্ভুক্ত কৰা হয় । চলিত বৰ্ষৰে পৰৱৰ্তী বেচৰ পদ্মশ্ৰী বঁটা প্ৰাপকসকলক যেতিয়া ৰাষ্ট্ৰপতি ভৱনত সন্মানিত কৰা হ’ব, তেতিয়া ৰোহিত শৰ্মাই উপস্থিত থাকি নিজৰ পদ্মশ্ৰী মেডেল আৰু প্ৰমাণপত্ৰ গ্ৰহণ কৰিব । অৱশ্যে এই পৰৱৰ্তী অনুষ্ঠান কেতিয়া অনুষ্ঠিত হ’ব, সেই তাৰিখ এতিয়ালৈকে চৰকাৰীভাৱে ঘোষণা কৰা হোৱা নাই ।
আই পি এল ২০২৬ত কেনে আছিল ৰোহিত শৰ্মাৰ প্ৰদৰ্শন ?
আই পি এল ২০২৬ ৰ ছিজনটো ৰোহিত শৰ্মা আৰু তেওঁৰ দল মুম্বাই ইণ্ডিয়ানছৰ বাবে বিশেষ সুখকৰ নাছিল । আঘাতপ্ৰাপ্ত হোৱাৰ বাবে ৰোহিতে ছিজনৰ কেইবাখনো গুৰুত্বপূৰ্ণ মেচত খেলিবলৈ সক্ষম নহ’ল । সমগ্ৰ ছিজনটোত তেওঁ মাত্ৰ ৯ খন মেচ খেলি দুটা অৰ্ধশতকসহ ২৮৩ ৰান সংগ্ৰহ কৰে । আনহাতে, তেওঁৰ দল মুম্বাই ইণ্ডিয়ানছেও অত্যন্ত হতাশাজনক প্ৰদৰ্শন দাঙি ধৰি প্লে-অফৰ দৌৰৰ পৰা আটাইতকৈ প্ৰথমে বাহিৰ হোৱা দলসমূহৰ ভিতৰত অন্যতম হিচাপে পৰিগণিত হয় ।
লগতে পঢ়ক : আই পি এল ২০২৬: লীগ পৰ্যায়ৰ সামৰণি; অৰেঞ্জ আৰু পাৰ্পল কেপৰ দৌৰত তীব্ৰ প্ৰতিযোগিতা
